Ԝәйе ча щаба хԝә бьда һәрге ԝә пьрскьрана: «Һун дьхԝазьн һʹәта-һʹәтайе бьжин?» Һьлбәт гәләк мәрьв ԝе бежьн әре, ле йәкә дьфькьрьн кӧ әԝ йәк ԝе наԛәԝьмә. Чьмки әԝана дьбежьн кӧ мьрьн әԝ тьштәки нормал ә дь әʹмьре мәрьвада.

Ле һәрге әве пьрсе бь ԝи щурʹәйи бьдьнә ԝә: «Һун һазьр ьн әʹмьре хԝә ӧнда кьн?» Тʹӧ кәс жь мәрьва нахԝазә бьмьрә. Гәло чьрʹа? Мәрьв чьԛас жи рʹасти чәтьнайа бен, йәкә дьхԝазьн бьжин. Жь Кʹьтеба Пироз әм педьһʹәсьн кӧ Хԝәде мәрьв ӧса әʹфьрандийә кӧ дьхԝазьн бьжин. Хәбәра ԝида ӧса те готьне кӧ «ԝи һәр тьшти . . . абадини хьст дьлед ԝан» (Ԝаиз 3:11).

Рʹожа иройин мәрьв һʹәта-һʹәтайе нажин. Ле чьрʹа? Гәло Хԝәде тьштәк кьр сәва кӧ әԝе дәрәще бьдә гӧһастьне? Щабед ԝан пьрса дь Кʹьтеба Пирозда һәнә, у әԝ мә дьлгәрм дькьн. Кʹьтеба Пироз ӧса жи әʹйан дькә сәва чь Иса чәрчьри у мьр.

Се сәред пешьн жь кʹьтеба Дәстпебунеда те готьне кӧ Хԝәде Адәм у Һеԝа әʹфьранд, сәва кӧ әԝана һʹәта-һʹәтайе бьжин. Әԝи готә ԝан кӧ әԝана чь гәрәке бькьн бона ԝе жийине. Жь ԝан сәрийа әм ӧса жи педьһʹәсьн кӧ ԝана гӧрʹа Хԝәде нәкьр, у ләма әʹмьре хԝәйи һʹәта-һʹәтайе ӧнда кьрьн. Дәрһәԛа ԝе йәке ӧса һеса һатийә гьликьрьне, ԝәки гәләк һʹәсаб дькьн кӧ әԝ йәк чʹирʹок ә. Ле кʹьтеба Дәстпебун, ӧса жи Пәймана Ну, избат дькә кӧ әԝ йәк рʹасти ԛәԝьми.

Әԝ йәк кӧ Адәм гӧрʹа Хԝәде нәкьр чь ахьри ани инсанәтерʹа? Кʹьтеба Пироз щаба ԝе пьрсе ӧса дьдә: «Аԝа чаԝа бь мәрьвәки гӧнә кʹәтә дьне у жь гӧнә жи мьрьн һат, ӧса жи мьрьн сәр һʹәму мәрьва бәла бу, чьмки һʹәмуйа жи гӧнә кьр» (Рʹомайи 5:12). Адәм гӧнәки мәзьн кьр, чьмки әԝи гӧрʹа Хԝәде нәкьр у ләма жи әʹмьре һʹәта-һʹәтайе ӧнда кьр у мьр. Әм зӧрʹәте ԝи нә, ләма гӧнә дәрбази сәр мә жи бу. Ләма жи мәрьв нәхԝәш дькʹәвьн, кал-пир дьбьн у дьмьрьн. Шьровәкьрьна ԝе йәке кӧ әм чьрʹа дьмьрьн, ләv те тʹәви шьровәкьрьна зандара дәрһәԛа ԝе йәке, кӧ ча нәхԝәшийа де-бава бь генетик дәрбази сәр зарʹе ԝан дьбә. Ле пьрс пешда те, гәло Хԝәде чь кьр ԝәки гӧнә у мьрьн бьдә һьлдане?

Хԝәде пешда хәм кьр, ԝәки ԝәгәрʹинә мәрийарʹа әԝ әʹмьре һʹәта-һʹәтайе, кʹижан кӧ Адәм ӧнда кьр. Ле Хԝәде ԝе ча әԝе йәке бинә сери?

Кʹьтеба Рʹомайида 6:23 те готьне кӧ «маше гӧнә мьрьн ә». Әԝ те һʹәсабе кӧ ахьрийа гӧнә мьрьн ә. Адәм гӧнә кьр ләма жи мьр. Бь ԝи щурʹәйи әм жи чаԝа зӧрʹәте Адәм, жь бо гӧнә дьмьрьн. Чьмки әм бь гӧнә һатьнә буйине. Ләма жи Хԝәде бь һʹьзкьрьне кӧрʹе хԝә Иса Мәсиһ шандә сәр әʹрде ԝәки «маше гӧнә» һьлдә сәр хԝә. Ле чь щурʹәйи?

Чьмки бь мәрьвәки беԛьсур, демәк бь Адәм, гӧнә у мьрьн дәрбази мә бун, ләма жи сәва кӧ гӧне һәр кәси бенә һьлдане, лазьм бу мәрьвәки мина ԝи беԛьсур, кʹижан кӧ гәрәке һʹәта мьрьна хԝә жи амьн бьма. Кʹьтеба Пироз ӧса дьбежә: «Бь нәгӧһдарийа йәки гәләк бунә гӧнәкʹар, ӧса жи бь гӧһдарийа йәки гәләк ԝе рʹаст бенә һʹәсабе» (Рʹомайи 5:19). Әԝ мәрьве беԛьсур Иса бу. * Әԝи әʹзман һишт, бу мәрьве беԛьсур, у сәва мә әʹмьре хԝә да. Мьрьна Иса мәщале да мә ԝәки һәләԛәтийа хԝә тʹәви Хԝәде незик кьн у әʹмьре һʹәта-һʹәтайе бьстиньн.

Чьрʹа мьрьна Иса лазьм бу? Гәло Хԝәдайе һьмзор нькарьбу ӧса бькьра кӧ зӧрʹәтед Адәм һʹәта-һʹәтайе бьжитана? Әԝ йәк ԝирʹа ԛә чәтьн нибу. Ле һәрге Хԝәде әԝ йәк бькьра, ԝе мьԛабьли ԛануна хԝә бьчуйа, кӧ маше гӧнә мьрьн ә. Әԝ ԛанун нә кӧ тьштәкә нәфәрз ә йа кӧ дькарә бе гӧһастьне йан жи нәйе сери. Ле бь рʹастийе әԝ һʹиме һәԛийа у рʹастийа Хԝәде йә (Зәбур 37:28).

Һәрге Хԝәде ԝе дәрәщеда һәрге хԝә нәда кʹьфше, мәрьв дькарьбун дӧдьли буна кӧ дь дәрәщед дьнда жи Хԝәде ԝе һәԛийа хԝә бьда алики. Мәсәлә, гәло Хԝәде ԝе бь һәԛийе бьжберә кʹе жь зӧрʹәта Адәм һежайи әʹмьре һʹәта-һʹәтайе йә? Йан жи гәло әм дькарьн амьнийа хԝә Хԝәде биньн кӧ әԝ ԝе созед хԝә бинә сери? Әԝ йәк кӧ Хԝәде рʹастийа хԝә да кʹьфше,  һе зедә баԝәрийа мә ԛәԝи дькә, кӧ әԝ ԝе тʹьме бь һәԛийе һәр тьшти бькә.

Хԝәде бь сайа ԛӧрбана Иса мәщал да мә, кӧ ль сәр әʹрде, Щьнәтеда һʹәта-һʹәтайе бьжин. Дина хԝә бьдьнә гьлийед Иса жь Йуһʹәнна 3:16 «Хԝәде ӧса дьнйа һʹьз кьр, кӧ Кӧрʹе хԝәйи тайе тʹәне бәрва да, ԝәки һәр кәсе кӧ ԝи баԝәр бькә ӧнда нәбә, ле жийина ԝийә һʹәта-һʹәтайе һәбә». Бь ԝи щурʹәйи мьрьна Иса әԝ нә кӧ тʹәне һәԛийа Хԝәде дьдә кʹьфше, ле һе зедә дьдә кʹьфше һʹьзкьрьна ԝи һьндава мәрьва.

Ле чьрʹа Иса гәрәке бьчәрчьрийа у ӧса бьмьрийа? Иса хԝә кьрә ԛӧрбан у амьн ма, бь ԝе йәке әԝи избат кьр ԝәки Шәйтʹан дәрәԝ кьр чахе бӧхдан авит кӧ мәрьв һʹәта хьлазийе Хԝәдерʹа амьн наминьн гава рʹасти чәтьнайа тен (Ибо 2:4, 5). Әԝ бӧхдана Шәйтʹан дькарьбу рʹаст бьһата һʹәсабе, чьмки Адәме беԛьсур рʹасти чәтьнайада амьн нәма у гӧнә кьр. Ле чьмки Иса кӧ мина Адәм беԛьсур бу, ԝәʹде чәтьнайед гьран жи амьн ма, әԝи бь ԝе йәке избат кьр кӧ Шәйтʹан дәрәԝин ә (1 Корьнтʹи 15:45). Иса ӧса жи избат кьр кӧ Адәм жи дькарьбу Хԝәдерʹа амьн бьма, һәрге әԝи сафикьрьна рʹаст бькьра. Бь ԝе йәке кӧ Иса щәфа кʹьшанд у амьн ма әԝи нәхшәк у мәсәлә бона мә һишт (1 Пәтрус 2:21). Ләма жи Хԝәде Иса кʹәрәм кьр сәва амьнийа ԝи, бь ԝе йәке кӧ әʹмьре һʹәта-һʹәтайе ль сәр әʹзмана да ԝи.

Иса бь рʹастийе мьр. У мьрьна ԝи рʹийа бона жийина һʹәта-һʹәтайе мәрʹа вәкьр. Һун дьхԝазьн жийина һʹәта-һʹәтайе бьстиньн? Иса гот кӧ чь әм гәрәке бькьн сәва кӧ әве жийине бьстиньн: «Әв ә жийина һʹәта-һʹәтайе, ԝәки әԝ тә нас кьн, чаԝа Хԝәдейе рʹасти бешьрики-беһәвал у ӧса жи Иса Мәсиһе кӧ тә шандийә» (Йуһʹәнна 17:3).

Әм ԝә тʹәглиф дькьн кӧ һун һе зедә пебьһʹәсьн дәрһәԛа Йаһоԝа, Хԝәдайе рʹастийе у Кӧрʹе ԝи Иса Мәсиһ. Шәʹдед Йаһоԝа йе кӧ дь мьһала ԝәда дьжин ԝе бь шабуне аликʹарийе бьдьн ԝә дь ԝе йәкеда. Һун ӧса жи дькарьн аликʹарийе бьстиньн жь малпәра мә, www.pr418.com.