Wetin yu go se if dɛn aks yu se, “Yu go want fɔ de sote go?” Bɔku pipul dɛn go se dɛn want fɔ de sote go bɔt dɛn fil se i nɔ mek sɛns fɔ tink bɔt dat bikɔs i nɔ go ɛva bi. Dɛn kin se na kɔmɔn tin fɔ lɛ pɔsin day, ɛn na nɔmal tin we kin apin to ɛnibɔdi.

Bɔt if dɛn tɔn di kwɛstyɔn ɛn aks yu se, “Yu rɛdi fɔ day?” Bɔku pipul dɛn go se nɔ if ɔltin fayn fɔ dɛn na layf. Dis de sho se i nɔmal fɔ lɛ wi want fɔ liv, pan ɔl we prɔblɛm dɛn de mit wi na layf. Di Baybul sho se Gɔd mek mɔtalman fɔ lɛ wi want fɔ liv. Infakt, i tɔk se Gɔd “dɔn put am na mɔtalman at fɔ mek dɛn want fɔ liv sote go.”—Ɛkliziastis 3:​11, NW.

Bɔt mɔtalman nɔ de liv sote go. Wetin mek? Gɔd dɔn du ɛnitin fɔ sɔlv dis prɔblɛm? Di ansa dɛn we de na di Baybul go mek wi gladi, ɛn dɛn de sho wetin mek Jizɔs sɔfa ɛn day.

Di fɔs tri chapta dɛn na di Baybul buk we nem Jɛnɛsis tɛl wi se we Gɔd bin mek di fɔs man ɛn uman, Adam ɛn Iv, i gi dɛn di chans fɔ lɛ dɛn de sote go, ɛn i bin tɛl dɛn wetin dɛn fɔ du fɔ gɛt da layf de. Di Baybul tɛl wi aw dɛn nɔ bin du wetin Gɔd want ɛn dis bin mek dɛn lɔs di chans fɔ de sote go. Di Baybul pul dis stori simpul wan, i so simpul dat bɔku pipul dɛn kin se na lay lay stori. Jɔs lɛk di 4 buk dɛn we na Matyu, Mak, Lyuk, ɛn Jɔn, na so di Baybul buk we nem Jɛnɛsis tan lɛk, i gɛt ɔltin we de sho se wetin dɛn rayt de na tru ɛn dɛn bin rili apin. *

Wetin dɔn apin we Adam nɔ bin du wetin Gɔd want? Di Baybul ansa wi se: “Na wan man [Adam] mek sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.” (Lɛta Fɔ Rom 5:​12) Adam bin sin we i nɔ yɛri Gɔd in wɔd. So i bin lɔs di chans fɔ gɛt layf we go de sote go ɛn leta i day. Bikɔs na frɔm am wi kɔmɔt, wi ɔl dɔn kam fɔ gɛt sin. Dis dɔn mek wi ɔl de sik, ol, ɛn day. Di we aw di Baybul ɛksplen wetin mek wi de day gri wit wetin wi no  tide bɔt aw pɔsin kin gɛt sɔntin frɔm in pipul dɛn, lɛk siks so. Bɔt Gɔd dɔn du ɛnitin fɔ sɔlv dis prɔblɛm?

Wɛl, Gɔd bin dɔn mek we fɔ gi wi bak wetin Adam bin dɔn mek wi lɔs, we na di chans fɔ lɛ wi gɛt layf we go de sote go. Aw Gɔd bin du dis?

Insay di Baybul, Lɛta Fɔ Rom 6:​23 se: “Day na sin in pe.” Dis min se we pɔsin sin, di pe na day. Adam bin sin, so na dat mek i day. Semweso, wi ɔl de sin, so wi de day fɔ pe fɔ wi sin. Pan ɔl we wi nɔ du natin, dɛn bɔn wi wit sin. Bikɔs Gɔd lɛk wi, na dat mek i sɛn in Pikin, Jizɔs, fɔ kam “pe” fɔ wi sin dɛn. Aw dis pɔsibul?

Na wan pafɛkt man, we na Adam, bin briŋ sin ɛn day pan wi bikɔs i nɔ bin obe Gɔd, so wi nid wan ɔda pafɛkt man we go obe Gɔd te i day, fɔ lɛ i pe fɔ wi sin ɛn pul wi pan day. Di Baybul ɛksplen se: “Lɛkɛ aw wɛn wan man nɔ du wetin Gɔd tɛl am fɔ du, dat mek ɔlman sin; semwe so Gɔd go mek ɔltin rayt bitwin in ɛn plɛnti pipul we biliv pan am, bikɔs Jizɔs Krays du wetin i tɛl am fɔ du.” (Lɛta Fɔ Rom 5:​19) Jizɔs bin kɔmɔt na ɛvin, kam dɔŋ na dis wɔl as pafɛkt mɔtalman *, ɛn day fɔ wi. Dis dɔn mek am pɔsibul fɔ lɛ wi bi Gɔd in padi ɛn gɛt di chans fɔ gɛt layf we go de sote go.

Wetin mek Jizɔs bin nid fɔ day fɔ lɛ i du dis? Wetin mek Gɔd nɔ fɔ jɔs dɔn pas lɔ se i go alaw Adam in pikin dɛn fɔ gɛt layf we go de sote go? I bin gɛt di pawa fɔ du dat. Bɔt dat fɔ dɔn pwɛl in lɔ we se sin in pe na day. Dis lɔ nɔto smɔl lɔ we Gɔd go jɔs pul ɔ chenj jɔs fɔ mek tin izi. Bɔt na wan men tin we de sho se Gɔd rili de du wetin rayt.—Sam 37:​28.

If Gɔd nɔ bin fɔ dɔn du wetin rayt, pipul dɛn fɔ dɔn de wɔnda if na so i go de du pan ɔda tin dɛn bak. Fɔ ɛgzampul, yu tink se Gɔd fɔ bin dɔn du  tin fia wan if i bin de pik udat pan Adam in pikin dɛn fit fɔ gɛt layf we go de sote go? Yu tink se pipul dɛn bin fɔ biliv se i go du di tin dɛn we i dɔn prɔmis? We Gɔd du wetin rayt we i bin de mek we fɔ lɛ wi sev, dat dɔn mek wi biliv se i go du wetin rayt ɔltɛm.

We Jizɔs day fɔ wi, dat bin mek Gɔd gi wi di chans fɔ gɛt layf we go de sote go na dis wɔl insay Paradays. Jizɔs bin tɔk insay Jɔn 3:​16 se: “Gɔd so lɛk mɔtalman dat i gi in wangren Pikin we i lɛk; so dat ɛnibɔdi we biliv pan am nɔ go day, bɔt i go gɛt layf we go de sote go.” Jizɔs in day nɔ jɔs sho wi se Gɔd de du wetin rayt ɔltɛm, bɔt i de sho wi bak se Gɔd rili lɛk mɔtalman.

Bɔt wetin mek Jizɔs bin gɛt fɔ sɔfa ɛn fil siriɔs pen bifo i day, jɔs lɛk aw dɛn tɔk am insay Matyu, Mak, Lyuk, ɛn Jɔn? We Jizɔs bin sɔfa ɛn fetful te i day, i sho klia wan se na lay Setan bin lay we i tɔk se mɔtalman go kɔmɔt biɛn Gɔd we i de sɔfa. (Job 2:​4, 5) I go dɔn tan lɛk se dis tin we Setan tɔk na tru we i mek Adam we bin pafɛkt, sin. Bɔt Jizɔs we bin pafɛkt lɛk Adam bin obe Gɔd, pan ɔl we i bin sɔfa bad bad wan. (Fɔs Lɛta Fɔ Kɔrint 15:​45) So Jizɔs bin sho se Adam insɛf fɔ bin dɔn obe Gɔd if i bin want fɔ du dat. We Jizɔs bia we i bin de sɔfa, i bin lɛf ɛgzampul we wi fɔ fala. (Pita In Fɔs Lɛta 2:​21) Bikɔs Jizɔs bin du wetin Gɔd want, Gɔd bin mek i gɛt layf we nɔ go ɛva ɛva dɔn na ɛvin.

Jizɔs bin rili day. I opin di we fɔ lɛ wi gɛt layf we go de sote go. Yu go want fɔ de sote go? Jizɔs bin sho wi wetin wi nid fɔ du, we i tɔk se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.”—Jɔn 17:​3.

Di wan dɛn we mek dis magazin want mek yu lan mɔ bɔt Jiova, we na di tru Gɔd, ɛn in Pikin, we na Jizɔs Krays. Jiova Witnɛs dɛn we de na yu eria go gladi fɔ ɛp yu. Yu kin lan mɔ tin dɛn bak we go ɛp yu we yu go na wi Wɛbsayt we na www.pr418.com.