Te waŋndo nyuna num pɛ aa, “A yeema ma wa achal lefafɛɛŋ,” vɛɛ ŋ cho yɛ muli? Kɛlɛŋgaa mi wanaa bɔɔbɔɔ dimi maa a yeema, kɛ ma yiyaŋ maa o cho suɛi cho yɔŋnɔŋ te i cho le. Ma dimi maa nyɛ cho naa kuee wo piɔmndo cho ni. Maa mɛɛ mɛɛ naŋ viou achal ŋ cho piɔmndo sɔla.

Kɛ te o wa yɛ ma siŋga nyuna koŋ o baa pilɔɔ choo nduyɛ ma nyuna num aa, “A yeema ma vi?” O kpeekpei niŋ, mi wanaa bɔɔbɔɔ muli maa sako bɛɛ. Yɛɛ hei chɔm yɛ? Mi che bɛɛ nyɛpalaa cho naa choo, kɛ ŋ nɔ yeemɛi le waa achal. Baabuiyo dimi maa Mɛlɛka toosiaa waŋchieeya a yeemɛi le waa achal. Baabuiyo dimi pɛŋ maa Mɛlɛka dɔu waŋchieeya ‘yeemɛi keŋ niŋ le ma landuŋ kɔl le siɔdii lachioo.’​—Ikilisiaatii 3:11.

I cho tonya maa, waŋchieeya lo achal lefafɛɛŋ te. Yɛɛ hiŋ yɛ a keŋ? Le handɔɔ lechoo, baa Mɛlɛka ndoo tosa pa nyɛ le bahawɛiyo hoo solioo? Mɛɛ Baabuiyo muli nyunalaŋ ndaŋ yɛ ke naa kɔl dɛɛniaa. Nduyɛ mulila laŋ la chɔm kpendekele le sabu Chiisu sɔla saŋgaa nduyɛ mbo wu wo.

Bolii Baabui yaa tasei o yau Chɛnɛsioo o Baabuiyo niŋ dimul naa maa mi Mɛlɛka ke waŋchieeyaa tasiaa Adama nda Ifi tiindaŋndo le waa achal lefafɛɛŋ. Nduyɛ mbo dimul nda nyɛ ndaa nɔ ma tosa le yoomu waa lende sɔlaa wo. Kɛ mi Baabuiyo tɛɛsiaa mɛɛ nda kɛɛ Mɛlɛka diikɔŋndo, nduyɛ mi yoomu fafɛɛŋ koŋ hialuŋ nda yɛ. Le mɛɛ bundɛi cho o yau Chɛnɛsioo bolle taseleŋ tei bolii yaa ve cho tɛtɛlɛ yɛ, lelaŋ waŋnda apum dimi chɔ chɔ ni maa bundɛi lachoowɛi i cho ni. Kɛ tonya cho o yau Maatiu, Maki, Luku, a Chɔŋ ndo niŋndo ko cho o yau Chɛnɛsioo niŋ ni. *

Yɛɛ wa yɛ fulamakɔɔlioo mɛɛ Adama kɛɛ le Mɛlɛka diikɔŋndo? Baabuiyo muli aa, “Wana pilɛ kpe [Adama] tosa ni mi yɔŋ wɔɔŋndo huŋ o chieeŋndo niŋ, nduyɛ mi yɔŋ wɔɔŋndo huŋ a piɔmndo. O koŋ, mi piɔmndo huŋ le ŋwaŋnda chiee kpou, kani fuule, ŋwaŋnda chiee kpou a tosa yɔŋ wɔɔŋndo.” (Luomaŋnda 5:​12) Mɛɛ Adama kɛɛ Mɛlɛka diikɔŋndo, mbo luɛi o hakioo niŋ. Okoŋ, mi yoomu fafɛɛŋndo hialuŋ ndu nduyɛ mbo wu. Le mɛɛ naŋ cho chuauwaa nduaa yɛ naŋ sɔla haki ndɔɔ ni. Le saboo hoo naŋ naa ni, miŋ yuuwa, nduyɛ miŋ vi. Tɛɛsiaa hoo cho o chɛlaŋ a nyɛ wanaa pɛɛku a nyɔɔŋ okɔɔ wa saaluŋ mɛɛ chuaambuaa chua  kaala wanaa velu nda wa latiŋ yɛ. Kɛ baa Mɛlɛka ndoo tosa pa nyɛ le bahawɛiyo hoo solioo?

Tonya i cho ni maa mi Mɛlɛka ndoo tosa kɛɛsiaa le waŋchieeya baŋaa, ɔɔ mbo miŋgi nda ke nyɛ hɛluŋ Adama finya nda wo. Ndu cho yɛ yoomu fafɛɛŋndo ni. Vɛɛ Mɛlɛka ndoo tosa yɛ keŋ?

Baabuiyo dimi o Luomaŋnda 6:​23 aa, “Paawa wana sɔla le yɔŋ wɔɔŋndo wo ndu cho piɔmndo ni.” Hei sim ni maa, fulamakɔɔli hakioo cho piɔmndo ni. Mi Adama tosa hakioo, nduyɛ lelaŋ o sɔla piɔmndo ni. Nduyɛ le mɛɛ naŋ cho o hakioo niŋ yɛ, lelaŋ naŋ sɔla paawa ndɔɔ ni. Paawa koŋ cho yɛ piɔmndo ni. Kɛ o cho naapila le tosa hakioo le, leniŋ naŋ veluŋ ni. Lelaŋ a kaalaa, mi Mɛlɛka yɔŋ Po ndɔɔ, Chiisu, le mbo huŋ wu le hakila naalaŋ. Vɛɛ hei yɔŋnuŋ yɛ?

Adama waŋnuŋ walaŋ nduyɛ ndoo nɔ haki le. Kɛ mɛɛ o kɛɛ Mɛlɛka diikɔŋndo, mbo luei naa o hakioo niŋ a piɔmndo. Nduyɛ le mi naŋ fula o haki koŋ niŋ, mɛɛ mi wana cho walaŋ o nɔ haki le wo ndoo diikuŋ Mɛlɛka tei mbo vi le naa baŋaa. Baabuiyo tɛɛsiaa ndi aa, “Nduyɛ, mɛɛ wana pilɛ soli Mɛlɛka diom mi hei tosa, mi wanaa faŋga a simnuŋ wanaa yɔŋ wɔɔŋ yɛ, lende koni le mɛɛ wana pilɛ tuei Mɛlɛka diom yɛ, mi hei tosa mi wanaa faŋga a wa simnɔŋ wanaa sakpo Mɛlɛka o hɔl.” (Luomaŋnda 5:​19) Chiisu wa yɛ “wana pilɛ” tuei koŋ Mɛlɛka diomndo ni. Mbo chaŋ o choo choo niŋ, mbo huŋ simnuŋ wana walaŋndo *, nduyɛ mbo wu le naa. Hei tosa miŋ simnuŋ wanaa sakpuaa Mɛlɛka o hɔl nduyɛ miŋ sɔla tiindaŋndo le yoomu nɔ la mɛɛlu le wo sɔlaa.

Kɛ le yɛɛ Chiisu ndoo nɔ yɛ mi ndoo vi le sabu koŋ peeloo? Baa Mɛlɛka Kpaaya Kpou Kpou Wo ndoo nɔla mbo dimi le mi chuauwaa Adamaa wa achal lefafɛɛŋ te? A tonya, ndoo nɔ kpaayaa le keŋ tosaa. Kɛ i wa simnɔŋ maa o kɛɛ sawa o dɔu maa wana tosa hakioo pɛ, piɔmndo ŋ sɔla ni wo peeloo. O ve sawa taaniŋ te sawa koŋ wa le ndu siŋgaa le hɛnaŋ waŋchieeya tosaa le. Ŋgemelaa sawa koŋ cho le sakpoyɛi kpeekpeiye ni.​—Sam 37:28.

Te Mɛlɛka ndoo kɛsi sakpoyɛi nduɛi ikɛi pɛ o suɛi hei niŋ, kaamaa wa waŋnda biyɔɔ te o ve tosa lende o sɔɔŋ cheleŋ niŋ te. Le tamaseliiyo, ŋ wa pa  tonyaa saalɔŋ o wanaa suiliŋ o chuauwaa Adamaa tɛɛŋ le yoomu fafɛɛŋndo sɔlaa wa? Baa waŋnda wa pa tiindaŋndo dɔuwɔɔ o ndu niŋ maa wana lo o lediom ndo o cho ni? Mɛlɛka loo o sakpoyɛi nduɛi choo o wali ndɔɔ tosaa niŋ le naa piŋioo ke naa tiindaŋndo maa le lɔɔlɔɔ o cho tosa nyɛ bɛnda wo.

Mi Mɛlɛka soliŋ piɔm sala baŋaa Chiisoo kpeku le waŋchieeya kioo tiindaŋ yoomu fafɛɛŋndo o Kpele Hɛnɛkiɔɔ niŋ o chieeŋndo choo. Tofawɔ diomnda Chiisulaŋ o Chɔŋ 3:​16 niŋ. La dimi aa, “Mɛlɛka kaala waŋnda chieeya. O koŋ, mbo yɔŋgu Po ndɔ pilɔɔ kpe le nda, maa wana o wana dɔu tiindaŋ ndɔɔ o Po ndɔ pilɔɔ niŋ pɛ, wana koŋ o vi lɛ le. Yoomu kpeekpeiyo o nɔ lamɛɛlu le wo, ndu o sɔla ni.” Lelaŋ, o cho ko sakpoyɛi Mɛlɛkɛi nɔ lamɛɛlu le wo le piɔm Chiisoo chɔm te. Kɛ i hiou kpou ve cho ni, piɔm ndɔɔ chɔm kaala bɛndu Mɛlɛka nɔ le waŋchieeya wo.

Kɛ le yɛɛ Chiisu saŋga yɛ nduyɛ mbo sɔla piɔm imɔnɔɔ a mɛɛ yau Maatiu, Maki, Luku, a Chɔŋ ndo tɛɛsiaa yɛ? Mi Chiisu chɛl le saŋgaa sɔlaa nduyɛ mbo lo o laalaŋ ndɔɔ choo. Nduyɛ mbo chɔm maa choolaŋ Setana dimi ni maa waŋchieeya chɔm lolechoo wo o Mɛlɛka lo le te a wa pɛ o nyɛkindilaa bɛŋgu. (Choobu 2:​4, 5) Mi nyɛ Setana ndoo dimi koŋndo simnuŋ tonya mɛɛ o luei Adama wa walaŋndo balaŋ o hakioo niŋ. Kɛ mi Chiisu wa walaŋ maa Adama wo diikuŋ Mɛlɛka a saŋga wɔɔŋ wɔɔŋ o sɔla wo fau. (Kɔliŋtiaŋ Tasoo 15:​45) Mi Chiisu chɔm maa Adama bɛɛ ndoo nɔla mbo diikuŋ Mɛlɛka te ndoo yeema pɛ le tosaa lende. Mi Chiisu kɛsul naa tamaseliiyo le ndu tolɔɔ kɔɔli a mɛɛ o biunuŋ mɔnɛi biyɔɔ yɛ. (Pitɛ Tasoo 2:​21) Mi Mɛlɛka fanda Chiisu Po ndɔ le diikɔŋ ndɔɔ a yoomu nɔ lamɛɛlu le wo o choo choo niŋ.

Mi Chiisu sɔla piɔmndo kɛsɛ kɛsɛ. Nɛiyo cho o kumbiaŋ le yoomu nɔ lamɛɛlu le wo sɔlaa. A yeema ma wa achal lefafɛɛŋ? Mi Chiisu chɔm nyɛ naŋ nɔ le tosaa wo. Mbo dimi aa, “Yoomu kpeekpeiyo hoo ndu cho yɛ ni, waŋndo sinaa maa num pilɛ kpe cho Mɛlɛka ni, nduyɛ, mbo sina vɛlɛ Chiisu Kiliti, wana ŋ vem ndo.”—Chɔŋ 17:​3.

Wanaa poonyiaa yauwo hoo wa cho num dɛɛniaa le ma chɔɔlu pɛɛku a Chɛhowa okɔɔ, Mɛlɛka tonyaa, vɛlɛ a Po ndɔɔ, Chiisu Kiliti. Seiyaa Chɛhowaa o tanda numndo niŋ cho wa a kɔl kɛndɛ le num malaa. A nɔla vɛlɛ ma sɔla yooŋgula mala numndaŋ te a tofa pɛ o tɛɛŋgii nɛi hei, www.pr418.com/kss.