Yisinke no uyunga nsene gumwe a ku pura asi: “Ono hara kuparuka narunye ndi?” Vantu wovanzi nava limburura asi vana hara kuparuka. Nye tava lizuvhu asi kapi tayi vhuru kuhoroka, morwa va yika kumona vantu kuna kufa.

Nye ngapi nsene va ku pura asi: “Ono hara kufa ndi?” Sinzi sovantu nava uyunga asi hawe. Yisinke yina kulikida oyo? Nampili ngomu atu ligwanekere nomaudigu ose kwa hara kuparuka. Karunga kwa sitire vantu neharo lyokuparuka narunye.

Nye vantu kapi vana kuparuka narunye. Yisinke ya horoka? Ntani yisinke ga rugana ko Karunga mokukohonona po udigu owo? Bibeli kwa gava malimbururo gokuhengagwida ntani kwa likida eyi Jesus ga heperere nokufa.

Buke zaGenesis kututantera asi Karunga kwa pere Adamu naEva meho zokuparuka narunye ntani kwa va tanterere eyi va hepere kurugana mokugwana eparu olyo. Azo za faturura hena omu va tezere po veta zaKarunga nokuzumbanesa eparu olyo. Vantu wovanzi kugazara asi olyo kuna kara esimwititi tupu. Nye buke zaGenesis noMavangeli kwa gava umbangi asi ya horokere. *

Yisinke ya horoka morwa Adamu kapi ga limburukwire? Bibeli kulimburura asi: “Nzo, muntu gumwe tupu ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.” (Varoma 5:12) Apa Adamu ga dilire kulimburukwa Karunga, age kwa zonene. Age kwa zumbanesere meho zokuparuka narunye ntani ga ya fire. Morwa ose kwa tunda mwendi, twa pinga nzo. Yiyo atu verere nokukurupa nokufa. Efatururo eli kwa liza nekonakono lyovadiviusintwe kuhamena omu vanona ava pingi yikara yovakurona vawo.  Nye Karunga ga rugana ko yuma mokukohonona po udigu owo ndi?

Karunga kwa tulire po mawapaiko mokutengwidira po eparu lyanarunye eli ga zumbanesere Adamu. Ngapi ga yi rugene Karunga oyo?

Varoma 6:23 kwa uyunga asi: “Mfeto zononzo nomfa.” Eyi kutanta asi nomfa kuna kara yitundwamo yonzo. Adamu kwa fire morwa nzo. Mokulifana nose kufa morwa nzo. Kapisi epuko lyetu, nye morwa kwa tu reta mononzo. Morwa eharo, Karunga kwa tumine Munwendi, Jesus, a ya ‘fute nonzo’ detu. Ngapi omu ya vhulikire oyo?

Moomu Adamu gokusikilira mo ga tu retera nzo nonomfa morwa kudira kulimburukwa, pwa hepere hena muntu gokusikilira mo gokulimburukwa dogoro konomfa mokutuzowora mo monzo. Bibeli kwa faturura asi: “Moomu va karera navenye vananzo morwakudira kulimburukwa komuntu gumwe, nemelimburuko lyomuntu gumwe namo ngamu tunda vahungami wovanzi.” (Varoma 5:19) Gwina ‘muntu gumwe’ gomulimburukwi kuna kara Jesus. Age kwa tundire meguru ta ya kara muntu gokusikilira mo * nokuyafira nonzo detu. Morwa oyo, ose kuvhura kutura po elikwatakano naKarunga nokukara nomeho zokukaparuka narunye.

Morwasinke ya karerere hepero asi Jesus a fe? Morwasinke Karunga Munankondo nadinye ga dilire kupulisira ruvharo rwaAdamu ru paruke narunye? Age ga kara nononkondo dokuyirugana nye ngano ya lilimbire noveta zendi asi mfeto zononzo nomfa. Azo kwa kere veta zomulyo ezi va dilire kuvhura kurundurura morwa kwa kwatesere ko uhungami waJehova.—Episarome 37:28.

Ngano Karunga kapi ga hungikire, vantu ngano kapi tava mu huguvara hena momaukaro gapeke. Pasihonena, povana vaAdamu, wolye ngano ga vhulire kuhorowora mokuparuka narunye? Vantu ngano va mu huguvarere asi age kusikisa  mo matumbwidiro gendi ndi? Morwa Karunga kurugana eyi ya hungama yipo a tu zowore, eyi kutupa ehuguvaro asi age nkenye apa nga rugana eyi ya hungama.

Kupitira monzambo zaJesus, Karunga ga tu pa mpito zokukaparuka narunye pevhu moParadisa. Tara nonkango daJesus mwaJohanesa 3:16 asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” Nomfa daJesus kapi tupu da likida sikara saKarunga sokurugana eyi ya hungama nye hena eharo lyendi lyenene kovantu.

Morwasinke Jesus ga heperere nokufa monkedi zokukora ngwendi moomu va yi faturura moMavangeli? Pokupita momaheteko gomanene noulimburukwi, Jesus kwa likidire asi yimpempa eyi ga uyungire Satana asi vantu nokuvhura si kulimburukwa Karunga momaheteko. (Joba 2:4, 5) Erundiro olyo kwa monekere ngwendi usili apa Satana ga pukisire Adamu gokusikilira mo a zone. Nye Jesus, ogu ga sikilire mo ngwendi Adamu, ga kere noulimburukwi nampili momaheteko gomanene. (1 Vakolinte 15:45) Age kwa likidire asi Adamu ngano ga here nage ngano ga limburukwire Karunga. Pokulididimikira maheteko, Jesus kwa tu sigira sihonena tu kwame. (1 Peturusa 2:21) Karunga kwa pere Munwendi, Jesus eparu lyemeguru lyokudira kufa morwa ulimburukwi wendi.

Jesus sili ga fire mokutupa mpito zokukaparuka narunye. Ono hara kukaparuka narunye ndi? Jesus ga likidire eyi twa hepa kurugana apa ga tente asi: “Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.”—Johanesa 17:3.

Ava va tjanga sifo esi vana hara o dive ko yoyinzi kuhamena Jehova, Karunga gosili, ntani naMunwendi, Jesus Kristusa. Nombangi daJehova momukunda gweni ngadi ku vatera. Kuvhura o gwane mauzera gamwe koIntaneta zetu www.pr418.com/kwn.