Mukuhosha nenudi neyi ayihula nawu, “Komana munakukeña kushakama haya nyaka?” Antu amavulu hadaha anateli kwiteja ilaña ajinookaña haniyi nsañu. Ahoshaña nawu muntu neyi navwaliki chalondelañahu hikufwa.

Indi neyi lwihu aluhimpa, ayihula nawu, “Komana munadiloñeshi kufwa?” Kwesekeja nachichekala, antu amavulu anateli kukaana. Chikumanyi chitunakuhoshahu? Hichidi namuloña namakabi nikweseka kutunakumonaku, twakeñaña kushakama haya nyaka. Bayibolu yashimunaña nawu Nzambi waleñeli antu nampwila yakushakama haya nyaka. Yahoshaña cheñi nawu ‘washa dehi mpinji yahaya nyaka munyichima yawantu.’—Mukwakutaŋisha 3:11.

Walala wudi wakwila nawu antu hiyashakamaña haya nyakaku. Yumanyi yaluwankeni? Kubombelahu, kudihu yuma yelayi Nzambi hakwila yamanishi iku kukala? Ñakwilu yamuBayibolu yatuzañaleshaña chikupu nawa yatuleñelaña kwiluka muloña waweni waleñeleli Yesu yakabakani nikufwa.

Tupetulu tusatu twamuBayibolu mumukanda waKutachika twatulejaña nawu Nzambi waleñeli antu adisumbula atachi, Adama naEva, wayilejeli nindi akashakamaña haya nyaka nawa wayilejeli chuma chateleleli kwilawu kulonda akatwalekuhu kwikala nawumi. Nsañu yamuBayibolu yashimunaña chiyakañenyiwu kumwovwahila Nzambi nichiyajimbesheliwu wumi wahaya nyaka. Iyi nsañu ayishimuna munjila yapela, chakwila antu amakwawu anyakalaña kuyikaana nawu hikaanu. Ilaña mukanda waKutachika watulejaña wunsahu walala wansañu yamwekeni kunyima neyi chashimuna Nyikanda Yansañu Yayiwahi. *

Chumanyi chafuminumu chelili Adama yakañanyi kwovwahila nshimbi? Bayibolu yaakula ilu lwihu nawu: “Kudi iyala wumu [Adama] nshidi yeñilili mumpata yamunu mwishina, ninshidi yaleteli kufwa; chochenochu nawa nikufwa kwashikeneni antu ejima, muloña wejima wawu avulumwini.” (Aroma 5:12) Adama chadikañiliyi naNzambi, wavulumwini.  Wajimbesheli wumi wahaya nyaka nawa wafwili. Chineli twekala anyanindi, twaswana nshidi yavulumwiniyi. Nawa twakataña, kushinakaja nikufwa. Iyi nsañu yinalumbululiwu kutalisha hachitwafwilaña yinesekani nayuma yawanawu asayantisiti nawu anyana aswanaña yuma yimu yafumaña kudi anvwali jawu. Hanu dinu, kudihu yuma yelayi Nzambi hakwila yamanishi iku kukala?

Eñañi, Nzambi waloñesheli njila yakukuulilamu hela kufuntisha chuma chajimbesheleliyi Adama anyanindi, kuchiñeja kwakushakama haya nyaka. Indi Nzambi welili ñahi?

Bayibolu yahosha haAroma 6:23 nawu, “Wufwetu wanshidi hikufwa.” Dikwila nawu kufwa diwu wufwetu wanshidi. Adama wavulumwini, wafwili. Ninetu nawa, twavulumunaña nawa chafumañamu twafwaña. Ilaña twasemukilaña munshidi hela chakwila kwosi chuma chitwavulumwini. Dichi, hamuloña wakukeña kwaNzambi, watemesheli Mwanindi Yesu kulonda yatukuuli ‘kuwufwetu wanshidi.’ Indi chumichi chazatikili ñahi?

Chineli muntu wumu, muntu wawanina Adama, wavulumwini nakutuletela kufwa muloña wadikañili, muntu mukwawu wawanina wovwahilili ndo-o nikukufwa wakeñekeleña kulonda yatukuuli kuniwu muloña. Bayibolu yalumbululaña nawu: ‘Chelili amavulu hiyakwikala akwanshidi nakujikwa kwamuntu wumu, dichi nawa antu amavulu akayibalumuna kwikala aloña nakwovwahila kwamuntu wumu.’ (Aroma 5:19) Yesu diyi wadiña ‘yeniwu muntu.’ Washili mawulu, wekalili muntu wawanina nawa watufwilili. Chumichi chatuleñela kwikala nañimenu yayiwahi naNzambi nikwikala nakuchiñeja kwakwikala nawumi wahaya nyaka.

Muloñadi Yesu chafwililiyi kulonda yafweti iwu muloña? Komana Nzambi Watwesha Yejima wadi kuhana hohu lushimbi nindi anyana kaAdama ashakameña haya nyaka? Wadiña nawuswa wakwila mwenimu. Neyi welili mwenimu wadi kudiwula  nshimbi yindi yakwila nawu wufwetu wanshidi hikufwa. Ilu lushimbi lwadiña lwalema chakwila kwosi kuludiwula hela kuluhimpa neyi kunamwekani chuma. Hilushimbi lwalema hashindamena wuñanji walala.—Masamu 37:28.

Neyi Nzambi waheñesheli wuñanji haniyi mpinji, antu adi kutachika kujinooka nawu dichakelayi nimunsañu yikwawu. Chakutalilahu, wadi kwila mwawuñanji hakutonda hakachi kawanyana kaAdama atela kutambwila wumi wahaya nyaka amakwawu nehi? Komana adi kumukuhwelela nawu wakela mwahosheliyi? Hamuloña wakwila Nzambi welaña mwawuñanji kulonda tukapuluki, chatukwashaña kukuhwelela netu Nzambi welaña yuma yaloña mpinji yejima.

Kuhitila mumulambu wakufwa kwaYesu, Nzambi wenzununa njila yakwikala nawumi wahaya nyaka muParadisa hamaseki. Shinshikenu mazu aYesu ekala haYowanu 3:16 akwili nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” Kufwa kwaYesu bayi neyi kwamwekesheli hohu wuñanji waNzambi wabulaña kukañanyaku, ilaña kwamwekeshaña nawu wasweja kukeña antu.

Hanu dinu, muloñadi Yesu chakabakeniyi nikufwa munjila yatama chikupu yashimunawu muNyikanda yaNsañu Yayiwahi? Hamuloña wakwiteja nindi amuyandishi chikupu nikutwalekahu kwikala washinshika, Yesu wakaanini chikupu yuma yejima yatwambiliyi Diyabolu nindi antu hiyanateli kutwalekahu kwikala ashinshika kudi Nzambi neyi adi mukwesekaku. (Yoba 2:4, 5) Nsañu yatwambiliyi Satana yamwekeni neyi yalala chelili Adama muntu wawanina yavulumuni. Ilaña Yesu wadiña wawanina neyi Adama, watwalekeluhu kwikala washinshika hela chakwila wamweni makabi. (1 Akorinda 15:45) Wamwekesheli chikupu nindi Adama niyena wadi kumwovwahila Nzambi neyi watondeluhu kwila mwenimu. Chomikiliyi kweseka kwejima, Yesu watushilili chakutalilahu chitwatela kulondela. (1 Petulu 2:21) Nzambi wamwinkeli wuloku Mwanindi Yesu wovwahilili chikupu, nakumwinka wumi wabulaña kufwa mwiwulu.

Mwamweni Yesu wafwili. Njila yaya kuwumi wahaya nyaka yenzunuka. Munakukeña kushakama haya nyaka? Yesu washimwini chuma chitwatela kwila nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.”—Yowanu 17:3.

Ansoneki ayinu magazini anayikoleshi kudiza nsañu yayivulu hadi Yehova, Nzambi walala niMwanindi, Yesu Kristu. A Yinsahu jaYehova amwiluña denu akutiya kuwaha kuyikwasha. Munateli cheñi kuwana nsañu yikuyikwasha hawebu sayiti yetu ya, www.pr418.com/lun.