¿Mjukyˈatäämp winë xëëw winë tiempë? Mayë jäˈäy yˈatsowdët ko jukyˈatandëp, per wyinmaytyë ko kyaj mbäät duˈun jyukyˈattë. Jyënäˈändë ko jabäät jyëjpkëxy ko nˈoˈkëm.

Ko pën myajtëwëdët: “¿Mˈijtp listë parë tyamyë mˈoogët?”. Ko pën oy mëk yajpääty, jënäˈänäämp ko kyaj. Ets oy nuˈunë amay jotmay njamëdäjtëm, niˈamukë njukyˈatäˈänëm. Biiblyë jyënaˈany ko Dios ojts dyajkojˈyë naxwinyëdë jäˈäy parë xëmë jyukyˈatäˈänët, pes “të tpëjtaˈaky mä jäˈäyë kyorasoon ja tiempë diˈib kyaj jyëjpkëxy” (Eclesiastés 3:11).

Per tyam kyaj njukyˈäjtëm winë xëëw. ¿Tiko ojts myaˈaty ja jukyˈäjtën? ¿Tidaa Dios të ttuny parë yˈoyëdë tyäˈädë jotmay? Xyjotkujkmoˈoyëm extëmë Biiblyë tˈatsoowëmbity ets nyimaytyakypy ko nan päätyë Jesus yˈayooy ets yˈoˈky.

Mä Génesis kapitulo 1 axtë 3 tmaytyaˈaky ko Dios ojts tˈanëëmë Adán mëdë Eva ko mbäät jyukyˈattë winë xëëw ets ti mbäät ttundë. Nan nyigajpxypy ko yajtëgooytyë tyäˈädë jukyˈäjtën mët ko kyaj tmëmëdoowdë Dios. Ets kom kyaj tsyipëty extëm yajnimaytyaˈaky, pääty näägë jäˈäy wyinmaytyë ko yëˈë tuˈugë jekymyaytyaˈaky. Génesis duˈun yajjääy extëmë Evangelios, kaˈpxy yajkujäˈäyëtyaay ets tijaty myaytyakypy jantsy tuun jantsy jäjtë. *

¿Wiˈix të wyimbëtsëmy ko Adán kyamëdooy? Biiblyë tˈatsoowëmbity: “Dëˈën extëm tuˈuk jeˈeyë ja jäˈäy [Adán] kyaj tmëmëdooy ja Dios es mëdë tyäˈädë pojpëkyëjxm tsyondaky ja oˈkën, pääty nidëgekyë ja jäˈäyëty yˈooktë, mët ko nidëgekyë pyojpëtuundë” (Romanʉs 5:12). Adán pyokytyuuny mët ko kyamëdooy. Pääty dyajtëgooy ja jukyˈäjtënë winë xëëbë, ets ok, ta ojts myëjjäˈäyënë ets yˈoˈknë. Kom jam të ntsoˈonëm mä Adán mëdë Eva, ta të xytyukninäjxëmë poky, pääty nbäˈämbajtëm, nmëjjäˈäyëm ets nˈoˈkëm. Tyäˈädë tëyˈäjtëndëjkëp, pes të yaˈëxpëjkpëtsëmy ko tääk teety mbäät tijatyë yˈuˈunk yˈënäˈk ttukninaxtë. Minë net nˈokˈijxëm ti Dios tyuun parë yˈoyëdë tyäˈädë jotmay.

Jyobaa Dios tyuknibëjtakë parë jatëgok tmoˈoyaˈanyë jukyˈäjtënë winë xëëbë ja Adángë tyëëm yˈääts. ¿Wiˈix ttuuny?

Biiblyë jyënaˈany ko ja poky “yajkypy ja mëjuˈuny, esë tadë mëjuˈuny yëˈë dëˈën ja oˈkën” (Romanʉs 6:23). O ja tuk pëky njënäˈänëm, nˈoˈkëm mët ko pokyjyaˈay nyajpatëm. Päätyë Adán yˈoˈky mët ko pyokytyuuny ets ëtsäjtëm nan pääty nˈoˈkëm. Per kom yëˈë Adángë poky ko nmaxuˈunkˈäjtëm pokyjyaˈay, ta Dios ojts xypyaˈˈayoˈowëm ets tkejxyë yˈUˈunk Jesukristë parë ojts xynyikëbajtutëm. ¿Wiˈix të xynyikëbajtutëm?

Ko Adán pyokytyuuny, diˈibë nety wäˈätsjäˈäy, ta ttukninäjxyë naxwinyëdë jäˈäy ja poky ets ja oˈkën. Pääty, tsojkëbë nety xynyikëbajtutëm jatuˈugë wäˈätsjäˈäy diˈib myëmëdowëbë Dios axtë nyaˈook nyatëgoyët. Biiblyë tnimaytyaˈaky: “Mët ko extëmë mayjyaˈay pyekytyundë jaˈagyëjxm ko tuˈugë jäˈäy ja Dios tkakajxykyupejky, nandëˈënë mayjyaˈay wyëˈëmdë oy mët ja Dios jaˈagyëjxm ko jatuˈugë yetyëjk ja Dios tkajxykyupejky” (Romanʉs 5:19). Tyäˈädë “yetyëjk”, yëˈë Jesus diˈib tsoˈon tsäjpotm ets kyëdaky wäˈätsjäˈäy parë ojts xykyuˈoˈkëm. * Duˈuntsoo mbäädë Dios xyajnäjxëm wäˈäts ets mbäät jatëgok xymyoˈoyëm ja jukyˈäjtënë winë xëëbë.

¿Tiko nety jyëjpˈamëty etsë Jesus yˈoogët parë jatëgok nˈaxäjëm diˈib tëgooy? ¿Ti kyajxyëbë nety mbäädë Dios dyajnaxkëdaˈaky tuˈugë anaˈamën diˈib nyasˈixëp parë ja Adángë tyëëm yˈääts jyukyˈatët winë xëëw? Jyobaa myëdäjtypyë nety ja madakën parë duˈun ttunët, per kyajxyëp tkuytyuuny ja yˈanaˈamën mä jyënaˈany ko ja poky yajkëbety mët ja oˈkën. Pesë tyäˈädë anaˈamën jëjpˈam, kyaj mbäät pën dyajtëgatsy näˈä ttimtseky. Jëjpˈamë nety ets yajtunët ja tëyˈäjtën (Salmo 37:28).

Koxyëbë Dios tkatuunyë tëyˈäjtën mä tadë tiempë, kyajxyëp nˈijtëm seguurë pën tyunëp näˈä  ja tëyˈäjtën. Extëm nˈokpëjtakëm, ¿tyuumpyxyëbë tëyˈäjtën koxyëp jeˈeyë tnigajpxy pënaty jukyˈatëp winë xëëw mä ja Adángë tyëëm yˈääts? ¿Kyuytyuumpyxyëp tukëˈëyë tijaty të twandaˈaky? Komë Dios kyuytyuun ja yˈanaˈamën parë mbäät nnitsokëm, pääty tyam nˈijtëm seguurë ko xëmë ttunäˈänyë tëyˈäjtën.

Ko Jesus tkëyajkyë jyukyˈäjtën, ta mbäädë Dios xymyoˈoyëm ja jukyˈäjtënë winë xëëbë mä ja it lugäärë tsujpë. Jesukristë jyënany: “Dios nëgoo oj tˈoktsojknë ja naxwinyëdë jäˈäyëty, pääty ttuknigejxy ja tyuˈukˈUˈunk, es pënaty myëbëjktëp jikyˈattëp winë xëë winë tiempë es kyaj kyutëgoytyët” (Fwank 3:16). Ko Jesus yˈoˈky, ta nyigëxëˈky ko Dios tyuumbyë tëyˈäjtën, per diˈib niˈigyë nigëxëˈk, yëˈë ko mëk xytsyojkëm.

Per ¿tiko Jesus yˈayooy ets yˈoˈky mëdë jäj jëmuˈumën? Parë ojts dyaˈˈanëgugäˈäjë Satanás ko jyënaˈany ko naxwinyëdë jäˈäy kyaj mbäät tmëmëdoyë Dios ko tpäädëdë amay jotmay (Job 2:4, 5). Ko Satanás dyajtëgooy ja Adán diˈibë nety wäˈäts jäˈäy, duˈun kyëxëˈëgany ko tëyˈäjtën jyënany. Perë Jesus diˈib nanduˈun ijt wäˈäts jäˈäy, myëmëdoowë Dios axtë ko axëëk jyajty kyëbejty (1 Korintʉ 15:45). Duˈun dyajnigëxëˈky ko Adán mbäätxyëp tmëmëdooyë Dios koxyëp yëˈë ttsejky. Jesus nan ojts xymyoˈoyëmë ijxpajn parë nbanëjkxëm (1 Peedrʉ 2:21). Dios kyumääy ja yˈUˈunk ko tmooyë jukyˈäjtënë winë xëëbë jam tsäjpotm mët ko myëmëdoowë.

Jesus jantsy oˈk ets yaˈˈawats ja tuˈu parë nbatëm ja jukyˈäjtënë winë xëëbë. ¿Mjukyˈatäämp winë xëëw? Jesus nyigäjpx ti mbäät nduˈunëm: “Tyäˈädë jikyˈäjtën winë xëë winë tiempë, jaˈa yëˈë ko [...] mij, tiˈigyë Dios, mˈixyˈatëdë es xyˈaxäjëdëts ëj extëm ja Kristë es tmëbëktët ko mij xykyajxëts yä naxwiiny” (Fwank 17:3).

Pënaty yajpëtsëëmdëbë tyäˈädë rebistë mˈanmääyëdëp parë xyˈixyˈatëdë Jyobaa, yëˈë Diosë tëyˈäjtënbë, ets ja yˈUˈunk, Jesukristë. Jyobaa tyestiigëty diˈib mä mnax mgäjpn mbudëkëyanëdëp. Nan mbäät xyˈaknijawë mä Internet jw.org.