Ta eo kwõnaaj kar ba el̦aññe kar kajjitõk ippam̦ kajjitõk in, “Kokõn̦aan ke mour ñan indeeo?” Enañin aolep armej renaaj bõlen uwaak im ba bwe rekõn̦aan mour ñan indeeo bõtab rejjab kõn̦aan l̦õmn̦ak kake kõnke rej ba bwe men in eban wal̦o̦k. Remaroñ ba bwe kar kõm̦anm̦an kõj bwe jen mour im tokãlik mej.

Ak ta el̦aññe kar kajjitõk ippam̦ kajjitõk in, “Kwõpojak ke in mej?” Ealikkar bwe enañin aolep armej renaaj uwaak im ba jaab. Men in ej kaalikkar bwe ewõr ippãd kõn̦aan eo ñan mour meñe jej iioon apañ ko im wãween ko reppen. Baibõl̦ ej kwal̦o̦k bwe Anij ear kõm̦anm̦an armej ro bwe en wõr ippãer kõn̦aan eo ñan mour. Ilo m̦ool, Baibõl̦ ej ba bwe Anij ear “likũt iien indeeo ilo bũrueer.”​—Ekklisiastis 3:11.

Bõtab, jejel̦ã bwe kõj armej jejjab mour ñan indeeo. Innem, ta eo ear wal̦o̦k bwe jen ãindein? Im ewõr ke jabdewõt men en̦ Anij ear kõm̦m̦ane ñan kõm̦adm̦õde apañ in? Uwaak ko jãn Baibõl̦ el̦ap aer naaj kaenõm̦m̦an kõj, im rej kaalikkar etke Jijej ear eñtaan im mej.

Jebta ko jilu jinointata ilo bokin Jenesis rej kwal̦o̦k kõn an Anij kar kõn̦aan bwe em̦m̦aan im kõrã eo m̦oktata, Adam im Iv ren mour ñan indeeo, im ear jiroñ erro ta eo rar aikuj kõm̦m̦ane bwe ren maroñ mour wõt ñan indeeo. Tokãlik, bwebwenato in ej kwal̦o̦k kõn aerro kar jab pokake Anij im jujen luuji jeraam̦m̦an eo ñan mour indeeo. Bwebwenato in elukkuun kadu im ejjab lõñ kõmel̦el̦e ko ie. Joñan, jet rej m̦õkaj im l̦õmn̦ak bwe bwebwenato in ej juon ino̦ñ bajjek. Bõtab, bokin Jenesis ej ãinwõt bokin Gospel ko. Mel̦el̦e ko ie rej kaalikkar bwe bok in elukkuun jim̦we im m̦ool.

Ta eo ear wal̦o̦k jãn an kar Adam jab pokake? Baibõl̦ ej ba: “Ãinwõt kõn juon armej [Adam], jerawiwi ear del̦o̦ñ ilo lal̦, im mej kõn jerawiwi; im ãindein mej ear itok ioon armej otemjej, bwe er otemjej rar jerawiwi.” (Rom 5:12) Ilo an kar Adam jab pokake Anij, ear jerawiwi. Kõn men in, ear luuji jeraam̦m̦an eo ñan mour indeeo im tokãlik ear mej. Innem, kõnke jej ro nejin Adam im jej bõdañe, kõj bareinwõt jej rijjerawiwi. Eñin unin jej nañinmej, rũttol̦o̦k, im mej. Mel̦el̦e in kõn unin ad mej ej juon wõt ippãn mel̦el̦e eo an jaintiij ro kõn wãween an ajri ro bõdañe jemãer im jineer. Ak ewõr ke jabdewõt men en̦ Anij ear kõm̦m̦ane ñan kõm̦adm̦õde apañ in ewal̦o̦k ñan kõj?

Anij ear kõm̦m̦an karõk bwe en maroñ kõjepl̦aaktok men eo Adam ear luuji me ebar jelõt ro nejin. Ta kar men in? Jeraam̦m̦an eo ñan mour indeeo. Innem, ewi wãween an kar Anij maroñ kõjepl̦aaktok men in?

Baibõl̦ ej ba ilo bokin Rom 6:23 bwe “on̦ãn jerawiwi, mej.” Mel̦el̦ein bwe jej mej kõnke jej jerawiwi. Kõn an kar Adam jerawiwi, ear mej. Ãindeinl̦o̦k wõt, kõnke kõj rijjerawiwi, jej mej ñan kõl̦l̦ãik on̦ãn jerawiwi ko ad. Kõj aolep jej l̦otaktok im jerawiwi meñe ejjel̦o̦k men en̦ ebõd jaar kõm̦m̦ane. Bõtab, kõn an Anij yokwe kõj, ear jilkintok Nejin, Jijej, bwe en kõl̦l̦ãik “on̦ãn jerawiwi” ko ad. Ewi wãween an kar maroñ kõm̦m̦ane men in?

Adam ear juon armej eweeppãn ak ke ear jab pokake Anij, ear bõktok jerawiwi im mej ñan kõj. Kõnke ear juon armej eweeppãn, jej aikuji bar juon armej eweeppãn me enaaj pokake Anij ñan mej bwe en maroñ kanemkwõj kõj jãn jerawiwi im mej. Eñin men eo Baibõl̦ ej ba: “Kõn an juon armej kar jab pokake ear kõm̦m̦an bwe armej otemjej ren rijjerawiwi ilo ejja wãween in wõt, kõn an armej eo juon pokake, Anij enaaj kowãnõk elõñ armej.” (Rom 5:19, UBS) “Armej eo juon” ej Jijej. Ear wanlal̦tak jãn lañ, erom juon armej eweeppãn, im ear mej kõn kõj. * (Lale kõmel̦el̦e eo itulal̦.) Kõn men in, jemaroñ epaake Anij im bõk jeraam̦m̦an eo ñan mour indeeo.

Etke ear menin aikuj bwe Jijej en mej kõn kõj? Anij eo Ekajoor Bõtata emaroñ ke kar kajju kõm̦m̦an bwe ro nejin Adam ren mour ñan indeeo? Em̦ool bwe ewõr an maroñ ñan kõm̦m̦ane men in. Bõtab, men in enaaj kar kwal̦o̦k an kõjekdo̦o̦n kien eo an me ej ba bwe on̦ãn jerawiwi ej mej. Kien in ejjab juon kien bajjek me emaroñ ukote ak jab l̦oore ilo jabdewõt iien ekõn̦aan. Kien in elukkuun aorõk kõnke ej kõm̦m̦an bwe en wõr ekajet jim̦we.​—Sam 37:28.

Ñe Anij ear kõjekdo̦o̦n kien in an, bõlen tokãlik armej remaroñ naaj kar jino l̦õmn̦ak bwe Anij emaroñ bar ãindein ñan pepe ko jet ej kõm̦m̦ani ak men ko ej ba. Ñan waanjoñak, enaaj ke jim̦we wãween an pepe kõn wõn iaan ro nejin Adam remaroñ mour ñan indeeo? Jenaaj ke maroñ lõke bwe enaaj kajejjet kallim̦ur  ko an? Kõnke Anij ear kwal̦o̦k wõt ekajet jim̦we ke ear kõm̦m̦ane juon ial̦ ñan ad bõk lo̦mo̦o̦r, men in ej kam̦ool ñan kõj bwe aolep iien enaaj kõm̦m̦ane men eo ejim̦we.

Ikijjeen katok in mour eo an Jijej, Anij ear kõpel̦l̦o̦k juon ial̦ bwe jen maroñ bõk jeraam̦m̦an eo ñan mour indeeo ilo naaj Pedetaij eo ijin ioon lal̦. L̦õmn̦ak m̦õk kõn naan kein an Jijej ilo Jon 3:16 (UBS) me rej ba: “Bwe joñan an Anij yokwe lal̦, ear letok Nejin eo ej make wõt, bwe jabdewõt eo ej tõmak ilo e en jab jako, ak en mour indeeo.” Mej eo an Jijej ej kwal̦o̦k bwe Anij enaaj kõm̦m̦ani men ko rejim̦we aolep iien, im el̦aptata ej kwal̦o̦k bwe elukkuun l̦ap an Anij yokwe armej.

Bõtab, etke Jijej ear aikuj eñtaan im mej ilo juon wãween ekaeñtaanan ãinwõt an bokin Gospel ko kwal̦o̦k? Ilo an kar Jijej tiljek wõt meñe ear iioon juon mãlejjoñ el̦aptata an pen, ear kam̦ool ñan aolep bwe eriab an kar Tepil̦ eo ba bwe armej ro reban tiljek ñan Anij ñe rej iioon mãlejjoñ ko. (Job 2:4, 5) Bõlen ewõr remaroñ l̦õmn̦ak bwe em̦ool naan kein an Setan ãlikin an kar kapoiki Adam bwe en jerawiwi. Bõtab, Jijej ear weeppãn ãinwõt kar Adam, im ear dãpij wõt an tiljek meñe ear lukkuun eñtaan. (1 Korint 15:45) Men in Jijej ear kõm̦m̦ane ear kam̦ool bwe Adam bareinwõt emaroñ kar pokake wõt Anij el̦aññe ear kããlõt ñan kõm̦m̦ane men in. Ilo an Jijej kijenmej ium̦win mãlejjoñ ko, ear likũt juon joñak em̦m̦an ñan kõj bwe jen l̦oore. (1 Piter 2:21) Anij ear kajeraam̦m̦an Nejin kõn an kar pokake ilo an kõm̦m̦an bwe en mour ñan indeeo ilañ.

Mej eo an Jijej ear lukkuun wal̦o̦k. Kõn men in, epel̦l̦o̦k juon ial̦ ñan ad bõk mour indeeo. Kokõn̦aan ke bwe kwõn mour ñan indeeo? Jijej ear kaalikkar ta eo jej aikuj kõm̦m̦ane ke ear ba: “Eñin mour indeeo: bwe armej ren jel̦ã kwe, juon wõt Anij em̦ool, im bwe ren jel̦ã Jijej Kũraij, eo kwaar jilkintok.”​—Jon 17:3, UBS.

Ro rar kõm̦m̦ane bok in rej karwaineneik eok ñan kal̦apl̦o̦k am̦ katak kõn Jeova, Anij eo em̦ool, im eo Nejin, Jijej Kũraij. Ri Kõnnaan ro an Jeova ilo bukwõn eo am̦ renaaj m̦õn̦õn̦õ in jipañ eok. Ewõr bar mel̦el̦e ko jet remaroñ jipañ eok ñe kwõnaaj lale weep jait in am etan www.pr418.com/mh.