Tlaj ta mitstlajtlaniskiaj “¿Mitspaktiskia nochipa tiitstos?”, ¿tlake tikijtoskia? Miakej maseualmej kiijtoskiaj maske kinekij itstosej nochipa, nopa amo kema panos. Kiijtouaj se tonali nochi mikisej.

Uan tlaj mitstlajtlaniskiaj: “¿Tijnekiskia namantsi timikis?”. Amo aka kiijtoskia kena kineki mikis. Maske tijpiaj miak kuesoli, amo kema tijnekij timikisej. Kema toTeotsij kinchijchijki maseualmej, kichijki ma kinekikaj nochipa itstosej. Yeka Biblia kiijtoua: “Kitlalijtok ipan iyolo sejse [maseuali] para ma kimati tlen nelia ya axkema mikis” (Ecl. 3:11).

Maske nochi maseualmej kinekij itstosej, nochipa miktiauij. ¿Kenke mikij? ¿Tlake kichijtok toTeotsij uan kiampa techmakixtis? Tlen Biblia tlamachtia tlauel techyolchikaua. Yeka, moneki tijkuamachilisej kenke Jesús tlauel tlaijiyouik uan mijki.

Nopa achtoui eyi capítulos tlen pilamochtsi Génesis kiijtoua toTeotsij kinekiyaya Adán uan Eva nochipa ma itstokaj, uan kiniljuik tlake monekiyaya kichiuasej uan kiampa amo kema mikiskiaj. Nojkia kiijtoua inijuantij amo kineltokakej toTeotsij uan yeka mijkej. Tlen kiijtoua tlauel amo ouij se kikuamachilia uan amo kiijtoua miak tlamantli, yeka miakej moiljuiaj eli san se tlapoualistli. Sanse kej nopa achtoui naui pilamochtsitsij tlen Nopa Yankuik Tlajtoli, pilamochtsi Génesis kipia se keski tlamantli tlen kinextia temachtli tlen kiijtoua. *

¿Tlake panok pampa Adán tlajtlakolchijki? Biblia kiijtoua: “Tlajtlakoli pejki ipan Tlaltipaktli pampa san se tlakatl [Adán] tlajtlakolchijki. Uan pampa pejki tlajtlakoli, nojkia pejki mikistli. Uajka ama mikistli techasi nochi titlakamej, pampa nochi titlajtlakolchijtokej” (Rom. 5:12). Adán tlajtlakolchijki kema amo kineltokak toTeotsij, yeka ueuejtixki uan teipa mijki. Tojuantij nojkia titlajtlakolchiuaj pampa tiikoneuaj Adán, yeka timokokouaj, tiueuejtiaj uan timikij. Tijmatij nelia techpanoltilijtokej tlajtlakoli pampa ipan ni tonali katli tlauel ixtlamatij kiitstokej tetajmej kinpanoltiliaj ininkoneuaj se keski tlamantli tlen inijuantij kipiaj. Yeka, ma tikitakaj tlake kichijki toTeotsij pampa amo kineki ma timikikaj.

ToTeotsij Jehová nimantsi kiitak tlake ueliskia kichiuas uan kiampa sampa kinmakaskia maseualmej tlen Adán kipolok. Yeka, ¿tlake kichijki?

Romanos 6:23 kiijtoua tlaj “se tlakatl tlajtlakolchiua, kipantia mikistli keja itlaxtlauil”. Uajka se akajya miki pampa tlajtlakolchiua, kej Adán kipanok. Uan tojuantij nojkia timikij pampa titlajtlakolchiuaj. ToTeotsij kimati tojuantij amo titlaixpanokej ipan Xochimili Edén, yeka techtlasojtlak uan kititlanki iKone Jesucristo ma ‘tlaxtlauaki’ o ma techmakixtiki tlen totlajtlakoljuaj. ¿Kenke Jesús ueliskia techmakixtis?

Pampa Adán, katli amo eliyaya tlajtlakole, amo tlaneltokak, techpanoltilik tlajtlakoli uan mikilistli, yeka seyok tlakatl, katli nojkia amo tlajtlakole, monekiyaya tlaneltokas uan kiampa ueliskia ‘kiixtlauas’ totlajtlakoljuaj. Biblia kuali techixtomilia nopa tlamantli kema kiijtoua: “Pampa Adán axkichijki tlen toTeko Dios kiiljuik, nochi tlakamej mokuepkej tlajtlakolchiuanij, pero Jesucristo kena, kitlamichijki nochi tlen kiiljuik toTeko Dios, uan yeka ama miak titlakamej uelis timochiuasej tixitlauakej iixpa” (Rom. 5:19). Jesús kikajki iluikak, uan pampa amo eliyaya tlajtlakole *, uelki techmakixtik ika imikilis. Kiampa “uelis timochiuasej tixitlauakej iixpa” toTeotsij uan timotemachisej teipa nochipa tiitstosej ipan Xochimili.

¿Kenke Jesús monekiyaya mikis? ¿Kenke toTeotsij amo kiijtok se tlanauatili kampa kiijtoskia nochi Adán ikoneuaj ueliskiaj itstosej nochipa? Maske ueltoskia kichiuas nopa, ya amo kichijki pampa amo kinejki kiixpanos se tlanauatili tlen ya temakatoya: katli tlajtlakolchiuaskiaj mikiskiaj. Nopa tlanauatili tlauel ipati, uan amo uelis mopatlas, pampa ika nopa tlanauatili toTeotsij ueli tetlajtolsenkaua ika xitlaualistli (Sal. 37:28).

Tlaj toTeotsij amo kitlepanitstoskia nopa tlanauatili uan kipatlatoskia, uajka amo timotemachiskiaj kichiua tlen xitlauak. Ximoiljui ipan ni tlamantli: ¿Kinextiskia kichiua tlen xitlauak tlaj kintlapejpenijtoskia ajkia uelis itstosej nochipa  uan ajkia amo? ¿Timotemachiskiaj nelia kichiuas nochi tlen kitenkajtok? ToTeotsij kitlepanitak nopa tlanauatili tlen temakak pampa kinejki ma timomakixtikaj, yeka nama ueli timotemachiaj nochipa kichiua tlen xitlauak.

Pampa Jesús motemaktilik, nama nochi uelis timotemachisej tiitstosej ipan se xochimili. Xikita tlen Jesús kiijtok ipan Juan 3:16: “ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa”. Jesús imikilis kinextia toTeotsij nochipa kichiua tlen xitlauak, uan nojkia kinextia nelia tlauel techiknelia.

Uan, ¿kenke Jesús tlauel tlaijiyouik kema kimiktijkej? Jesús amo kema kiixpanok toTeotsij maske tlauel tlaijiyouik, kiampa kinextik Diablo san istlakatki kema kiijtok nochi maseualmej kitlauelkauaskiaj toTeotsij kema kipiaskiaj tlaouijkayotl (Job 2:4, 5). Nesiyaya nelia tlen Diablo kiijtok pampa kichijtoya Adán ma tlajtlakolchiua, maske amo eliyaya tlajtlakole. Uan Jesús, katli nojkia amo eliyaya tlajtlakole, nochipa kineltokak toTeotsij maske tlauel tlaijiyouik (1 Cor. 15:45). Kiampa kinextik tlaj Adán kinektoskia, ueltoskia kineltokas toTeotsij, uan technextili nojkia uelis tijchiuasej kej ya (1 Ped. 2:21). ToTeotsij tlauel kiteochijki iKone pampa kineltokak, nama Jesús itstok ne iluikak uan amo kema mikis.

Jesús nelnelia mijki, yeka nama uelis timotemachisej tiitstosej nochipa. Yeka sampa timitstlajtlaniaj: “¿Mitspaktiskia nochipa tiitstos?”. Jesús kiijtok tlake moneki tijchiuasej kema kiijtok: “Inijuantij kipia[sej] yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3).

Katli tijchijkej ni pilamochtsi timitstlaneuij xikixmati Jehová, toTeotsij katli melauak, uan nojkia iKone Jesucristo. Jehová itlajtoltemakauaj katli itstokej nechka mochaj tlauel kinpaktiskia mitspaleuisej. Nojkia uelis tijpantis sekinok tlamachtili kampa titlamachtiaj ipan Internet, ipan www.pr418.com/nch.