Hadia wanemau li na so zanofu khöu, ”Hadia omasi ndra’ugö auri sagötö fa’ara?” Ato zanguma’ö wa omasi ira, hiza’i lamane tödöra lö tola alua da’ö. Molo’ö ya’ira fa’amate andrö no si to’ölö alua ba wa’auri niha.

Hewisa na labali’ö wanofunia khöu, ”Hadia omasi ndra’ugö mate?” Si to’ölönia, lö omasi niha mate. Tobali, omasi ita auri hewa’ae göna khöda gabula dödö. Ifatunö khöda Sura Ni’amoni’ö me iwöwöi niha Lowalangi, no ibe’e ba dödö niha ena’ö omasi ira auri sagötö fa’ara. Imane wa ”he si lö aetu andrö, ba noa göi ibe’e ba dödöra”.​—Zangombakha 3:11.

Satulönia, tebai auri niha gulidanö sagötö fa’ara. Hana wa tola simanö? Hadia so zi no ifalua Lowalangi ba wanga’azökhi si no alua ba ginötö andre? So wanema li moroi ba Zura Ni’amoni’ö si tola mame’e khöda fa’ahono dödö. Fanema linia mo’amakhaita ia hadia mbörö wa tefakao ba mate Yesu.

Tölu faza moroi ba I Moze itutunö khöda huku nibe’e Lowalangi ba niha si föföna sotöi Adama ba Khawa. Ibe’e khöra wa’auri si lö aetu hegöi fanuturu lala hadia zinangea lafalua ena’ö tola la’okhögö wa’auri. Hiza’i ba gafuriatania lö la’o’ö huku Lowalangi irege taya khöra wa’auri si lö aetu. Börö me adogo-dogo waö-waö wa’aurira, andrö wa lawa’ö niha ha manö-manö ia. Hiza’i sindruhu-ndruhu no alua waö-waö ba mbuku I Moze andrö, simane ba mbuku Injil. *

Hadia lua-lua me lö folo’ö khö Gadamo? Ibe’e wanema li Sura Ni’amoni’ö, ”Simane böröta horö andrö ba gulidanö, wa no ha samösa niha [Adamo] zamobörö, awö lua-lua horö andrö, fa’amate, awö wa no ikhamö niha fefu fa’amate andrö, börö wa no dozi samazökhi horö ira.” (Roma 5:12) Aekhu ba horö Gadamo börö me lö i’o’ö li Lowalangi. Taya khönia wa’auri si lö aetu, lua-luania fa’amate. Tatema göi horö ondröita me no nga’ötönia ita. Lua-luania mofökhö ita, atua, ba mate. Fanema li andre tefaudu molo’ö nisöndra niha sagatua-tua sanandrösa ba genetika. Hiza’i, hadia so zi no  ifalua Lowalangi ba wanga’azökhi si no alua ba ginötö andre?

I’alui lala Lowalangi ba wosanu mazui ba wogati si no itayaigö Adamo ba nga’ötönia, ya’ia da’ö fa’auri si lö aetu. Hewisa wamalua Lowalangi da’a?

Imane Sura Ni’amoni’ö ba Roma 6:23, ”Luo horö sa, ba fa’amate.” Eluahania, fa’amate andrö luo horö. No ifalua horö Adamo, andrö wa mate ia. Simanö göi, no si so horö ita ba tatörö wa’amate. No ta’okhögö horö i’otarai me tumbu ita. Börö wa’omasi Lowalangi, ifatenge Nononia Yesu ba wanaögö ”luo horö” andrö khöda. Hewisa wamalua ya’ia?

Te’asogö horö ba fa’amate börö me lö folo’ö moroi ba zi samösa niha so’ahonoa sotöi Adamo. Börö da’ö moguna so samösa niha so’ahonoa göi si tola mangefa’ö ya’ita moroi ba wa’amate. Itutunö khöda Sura Ni’amoni’ö, ”Hulö simane ba wa lö molo’ö niha andrö, si ha samösa sa, me no möi börö, wa no a’oi sokhö horö zato, simanö göi ba wolo’ö zi ha samösa andrö, noa göi möi börö wanga’atulö’ö ba zato.” (Roma 5:19) ”Niha andrö si ha samösa”, ya’ia da’ö Yesu. Iröi zorugo, tobali ia niha so’ahonoa *, ba mate börö horöda. Mbuania, tola atulö ita föna Lowalangi ba tasöndra wa’auri si lö aetu.

Hana wa moguna mate Yesu? Hadia tebai itehegö Lowalangi Fondrege Zabölö ba wame’e fa’auri si lö aetu ba nga’ötö Gadamo? Tatu manö so khönia kuaso wamalua da’ö. Hiza’i, na ifalua da’ö tola manö faya goroisa niwa’önia wa luo horö andrö fa’amate. Oroisa andrö tebai mubulö’ö molo’ö somasi dödöda. Da’a no dane-dane wa’atulönia.​—Zinunö 37:28.

Na lö ifalua Lowalangi wa’atulö andrö, tola manö manofu-nofu dödö niha hadia so wa’atulö khönia ba nifaluania tanö bö’ö. Duma-dumania, hadia atulö ia ba wotatugöi haniha manö  moroi ba nga’ötö Gadamo sanöndra fa’auri si lö aetu? Hadia faduhu dödöda wa ifalua zi no ifabu’u? Börö me no ifalua zi no ifabu’u, tola faduhu dödöda wa hasambalö ifalua zatulö.

Börö me no mate Yesu, itehegö khöda Lowalangi ena’ö tasöndra wa’auri si lö aetu ba gulidanö Faradaiso. Faigi wehede Yesu ba Yohane 3:16, ”Simanö sa wa’omasi Lowalangi nösi gulidanö, no ibe’e Nononia andrö, si ha sambua, ena’ö lö tekiko dozi samati khönia, ena’ö so khöra wa’auri si lö aetu.” Sindruhunia, fa’amate Yesu tenga ha tandra wa’atulö Lowalangi, tobali tandra wa’omasinia ba niha gulidanö.

Na simanö, hana wa si lö tola lö’ö tefakao Yesu ba mate, simane si no tesura ba Injil? Börö me no itörö wamakao irege lö faröi ia, iforoma’ö Yesu wa sala niwa’ö Gafökha me imane wa hasambalö faröi niha gulidanö khö Lowalangi na itörö ira famakao. (Yobi 2:4, 5) Tola manö atulö niwa’ö Zatana börö me no aekhu ba horö niha so’ahonoa sotöi Gadamo. Hiza’i, Yesu—fagölö wamo’ahonoara Gadamo—lö faröi ia hewa’ae tefakao. (I Korindro 15:45) Iforoma’ö wa sindruhunia göi tola lö faröi Gadamo khö Lowalangi. Börö me lö faröi Yesu, ibe’e khöda zi tobali duma-duma. (I Fetero 2:21) Ibe’e Lowalangi luo khö Nononia so’ahonoa ba wanöndra fa’auri ba zorugo börö me so khönia wolo’ö.

Sindruhu-ndruhu wa no mate Yesu, ba tebe’e ginötö ba niha ba wanöndra fa’auri si lö aetu. Hadia omasi ndra’ugö auri sagötö fa’ara? Ifatunö khöda Yesu hadia zinangea tafalua, ”Da’ö wa’auri si lö aetu, ena’ö aboto ba dödöra ndra’ugö, Lowalangi sindruhu andrö, si ha sambua, ba ena’ö, aboto ba dödöra zinengeu andrö, Yesu Keriso.”​—Yohane 17:3.

Omasi ndra Samaduhu’ö Yehowa ba wamaha’ö ya’ugö sanandrösa khö Yehowa, Lowalangi sindruhu, hegöi sanandrösa khö Nononia Yesu Keriso. Ira Samaduhu’ö Yehowa si so ba mbanuamö, omasi ira ba wanolo ya’ugö. Tola göi ö’alui danö bö’ö nasa na öbokai situs Web, www.pr418.com/nia.