Ko e heigoa haau ka talahau ka hūhū ki a koe, “Manako nakai a koe ke moui tukulagi?” Laulahi he tau tagata to pehē kua manako a lautolu, ka e logona hifo kua nakai aoga ke manamanatu ki ai. Pehē a lautolu ko e mate ko e taha vala he moui a ia, ko e fakaotiaga pauaki ni ha tautolu.

Ka e kua ka hiki e hūhū ki a koe, “Manako nakai a koe ke mate?” He tau tutuaga fa mahani, laulahi he tau tagata ka tali, nakai. Ko e kakano? Pete e tau kamatamata mo e tau mena uka ka fehagai mo tautolu, ko e tuaga pauaki ha tautolu ke manako ke momoui. Fakakite mai he Tohi Tapu na tufugatia he Atua e tau tagata mo e manako ke momoui tukulagi. Pehē mai ai, “kua tuku foki e ia e manatu ke he tukulagi ke he tau loto ha lautolu.”​—Fakamatalaaga 3:11.

Ka ko e tuaga mooli, kua nakai moui tukulagi e tau tagata. Ti ko e heigoa e lekua? Lafi ki ai, kua fai mena nakai e Atua ne taute ke fakahako aki e tuaga nei? Kua mafanatia e tau tali he Tohi Tapu, ti lauia tonu ke he kakano ne matematekelea mo e mate a Iesu.

Ko e tau veveheaga tolu fakamua he tohi a Kenese i loto he Tohi Tapu, kua tala mai na tuku he Atua ke he hoa fakamua, ko Atamu mo Eva, e amanakiaga to nakai fai fakaotiaga e moui ti tala age e gahua ha laua kua lata ke taute ke moua ai. Ti fakamaama foki he tala ia e puhala ne kaumahala a laua ke omaoma ke he Atua mo e galo e amaamanakiaga ia. Ne talahau fakamukamuka e tala ia ti mafiti falu ke pehē ko e tala tuai nakai mooli. Ka e tuga ni he tau Evagelia, ne fakakite mai he Kenese kua mooli ai mo e ko e vala he fakamauaga tuai. *

Ko e heigoa e fua he kaumahala a Atamu ke omaoma? Pehē e tali he Tohi Tapu: “Tuga ni he hoko mai ai e hala ke he lalolagi ke he tagata tokotaha [Atamu], ko e mate foki ha ko e hala, ti kua hoko mai ai e mate ke he tau tagata oti kana, ha kua hala e tau tagata oti kana.” (Roma 5:12) He nakai omaoma ke he Atua, ne agahala a Atamu. Ne galo e amanakiaga haana ke moui nakai fai fakaotiaga, ti fakahiku ni ke mate. Ha ko tautolu ko e tau hologa ha Atamu, ne moua foki e tautolu e tuaga agahala haana.  Ko e fua, kua lauia a tautolu he gagao, fuakau, mo e mate. Ko e fakamaamaaga nei ke he mate kua tatai mo e iloaaga ha tautolu he vahā nei hagaao ke he tufaaga fakamagafaoa. Ka ko e heigoa ne taute he Atua ke fakahako e tuaga nei?

Ē, ne fakatoka he Atua ke liu moua mai po ke fakatau mai e mena ne fakagalo e Atamu ma e tau hologa haana, ko e amanakiaga ke he moui nakai fai fakaotiaga. Taute fēfē he Atua e mena ia?

“Ko e mate ko e palepale ia he hala,” he talahau he Tohi Tapu ia Roma 6:23. Kakano he mena nei, ko e fua he hala ko e mate. Ne hala a Atamu, ti mate a ia. Pihia foki, ha kua hala a tautolu kua moua e tautolu e fua he hala, ko e mate. Ka e fanau mai a tautolu ke he tuaga hala nei, nakai ko e hepe ha tautolu. Ne fakaalofa hofihofi e Atua ti fakafano mai e Tama haana ko Iesu, ke talia e ‘palepale he hala’ ma tautolu. Taute fēfē e mena nei?

Ha ko e tagata tokotaha, ko Atamu ko e tagata mitaki katoatoa ne tamai e hala mo e mate ki a tautolu he liuliu, ti lata he tagata mitaki katoatoa ne omaoma ke hoko ke he mate, ke fakatoka mai a tautolu he kavega ia. Fakamaama pehē he Tohi Tapu: “Ko e mena, tuga he uta mo tau tagata hala e tokologa ha ko e liuliu he tokotaha, to uta pihia foki mo tau tagata tututonu e tokologa ha ko e omaoma he tokotaha.” (Roma 5:19) Ko Iesu e tagata “tokotaha” ia. Toka e ia e lagi, ko e tagata mitaki katoatoa *, ti mate ke lata mo tautolu. Ati kua maeke ia tautolu ke moua e tuaga tututonu mo e Atua ti amanaki foki ke he moui nakai fai fakaotiaga.

Ka ko e ha kua lata a Iesu ke mate ke fakahoko e mena nei? Ai kia maeke e Atua Mua Ue Atu ke fakatoka e poakiaga ke fakaatā e tau hologa ha Atamu ke momoui tukulagi? Ha ha he Atua e pule ke taute pihia. Ka ko e fakaheu anei he fakatufono haana, ko e palepale he hala ko e mate. Nakai ko e fakatufono fakateaga anei ne maeke ke fakaheu po ke hiki ke moua e hagahaga mitaki. Ko e matapatu he fakafili tonu mooli anei.​—Salamo 37:28.

Ane mai nakai fakafili tonu e Atua he tuaga nei, liga kua manamanatu e tau tagata to liu nakai e Atua ke taute pihia foki he falu tuaga. Ma e fakatai,  to fakafili tonu nakai a ia he fifili ko hai he tau hologa ha Atamu kua lata ke moui tukulagi? To maeke nakai ke falanaki ki a ia ke fakamooli e tau maveheaga haana? Ko e pipiki mau he Atua ke he fakafili tonu ma e fakamouiaga ha tautolu, ne fakamooli ki a tautolu to taute tumau e ia e mena tonu.

Ha ko e mate ha Iesu, ne hafagi he Atua e puhala ke he moui nakai fai fakaotiaga he Parataiso he lalolagi. Mailoga e tau kupu ha Iesu ne fakamau he Ioane 3:16: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ko e mate ha Iesu ko e fakakiteaga he fakafili tonu katoatoa he Atua, ka e mua atu e fakaalofa hofihofi haana ma e tau tagata.

Ka ko e ha ne matematekelea ti mate a Iesu ke he puhala mamahi lahi ne fakamaama he tau Evagelia? He talia ke foaki a ia ni ke he kamatamata lahi mo e fakatumau ke tua fakamooli, ne totoko katoatoa e Iesu e talahauaga he Tiapolo to nakai mahani fakamooli e tau tagata ke he Atua ka kamatamata. (Iopu 2:4, 5) Liga felauaki e talahauaga ia he mole e fakaohooho e Satani e tagata mitaki katoatoa ko Atamu ke agahala. Ka ko Iesu​—ne mitaki katoatoa tuga a Atamu​—ne fakatumau ke omaoma pete he matematekelea lahi mahaki. (1 Korinito 15:45) Ne fakakite e ia na maeke foki a Atamu ke omaoma ke he Atua ane mai kua fifili a ia ke taute pihia. He fakauka ke he kamatamata, ne fakatoka e Iesu e fakafifitakiaga ma tautolu ke mumui ki ai. (1 Peteru 2:21) Ko e palepale he Atua ma e Tama haana, ha ko e omaoma katoa ki a ia, ti foaki e ia ki a Iesu e moui nakai mate he lagi.

Na mate mooli a Iesu. Ti hafagi ai e puhala ke he moui nakai fai fakaotiaga. Manako nakai a koe ke moui tukulagi? Fakakite mai e Iesu e mena kua lata ia tautolu ke taute he pehē a ia: “Ko e moui tukulagi foki hanai, kia iloa e lautolu a koe, ko e Atua moli tokotaha ni, katoa mo ia ne fakafano mai e koe, ko Iesu Keriso haia.”​—Ioane 17:3.

Ko e tau taute fakailoa he mekasini nei kua uiina a koe ke fakaako atu foki hagaao ki a Iehova, ko e Atua mooli, mo e haana Tama ko Iesu Keriso. Kua fiafia e Tau Fakamoli a Iehova he matakavi haau ke lagomatai a koe. Maeke foki a koe ke moua e tau vala tala aoga he kikite ke he ha mautolu a faahi kupega hila, www.pr418.com.