“Abo ke biba pa semper?” Kiko lo bo kontestá si un hende hasi bo e pregunta ei? Probablemente, mayoria di hende lo bisa ku nan ke biba pa semper pero ku ta irealístiko pa pensa ku esei ta posibel. Pa nan, morto ta parti di bida, e último parti di nos bida.

Pero suponé si nan kambia e pregunta i puntra bo: “Bo ta kla pa muri?” Bou di sirkunstansianan normal, mayoria di hende lo kontestá nò. Kiko esaki ta mustra? Ku apesar di e prueba- i difikultatnan ku nos ta enfrentá, nos deseo natural ta pa biba. Beibel ta mustra ku Dios a krea hende ku e deseo di biba. Sí, Dios ‘a pone eternidat den nos kurason.’—Eklesiástes 3:11.

Pero realidat ta ku hende no ta biba pa semper. P’esei, nos por puntra: Ta kiko a bai robes anto? Dios a hasi algu pa drecha e situashon? Beibel su kontestanan ta alentador i nan tin hopi di haber ku e motibu pakiko Hesus tabatin ku sufri i muri.

E promé tres kapítulonan di e buki Génesis ta bisa nos ku Dios a duna e promé pareha humano, Adam ku Eva, e oportunidat di biba pa semper i a bisa nan kiko nan mester a hasi pa logra esei. Despues e relato ta mustra kon nan a desobedesé Dios i asina a pèrdè e oportunidat ei. Komo ku e relato akí ta asina simpel, algun hende ta pensa ku e ta djis un kuenta. Pero meskos ku e Evangelionan, tin tur indikashon ku Génesis ta un registro di historia konfiabel basá riba echo. *

Kiko tabata e resultado di Adam su desobedensia? Beibel ta bisa: “Pa medio di ún hende [Adam] piká a drenta mundu, i morto pa medio di piká, i asina morto a pasa pa tur hende pasobra nan tur a peka.” (Romanonan 5:12) Sí, Adam a peka ora el a desobedesé Dios. Asina Adam a pèrdè e oportunidat di biba pa semper, i ku tempu el a muri. Komo ku nos ta desendiente di Adam, nos a heredá piká for di dje. P’esei, nos ta bira malu, bieu i ta muri. E splikashon akí ta kuadra ku loke sientífikonan a deskubrí tokante e manera ku yunan ta heredá sierto karakterístikanan for di nan mayornan. Pero Dios a hasi algu pa drecha nos situashon?

Sí, Dios a tuma medida pa redimí, òf kumpra bèk, loke Adam a pèrdè i duna esaki na su desendientenan, esta, e speransa di biba pa semper. Kon Dios a logra esei?

Na Romanonan 6:23, Beibel ta bisa: “E salario ku piká ta paga ta morto.” Esaki ta nifiká ku morto ta konsekuensia di piká. P’esei, komo ku Adam a peka, el a muri. Di mes manera, komo ku nos ta kometé piká, nos tambe ta muri. Pero no ta nos falta ku nos a nase ku piká. P’esei, demostrando su amor pa nos, Dios a manda su Yu, Hesus, pa den un sentido e paga pa nos debe òf piká. Kon asina?

Ta debí na e desobedensia di Adam, ún hòmber perfekto, nos a heredá piká i morto. P’esei, mester tabatin ún hòmber perfekto ku a keda obediente te na morto pa libra nos di e debe ei. Beibel ta splik’é asin’akí: “Meskos ku mediante desobedensia di esun hende ei hopi a bira pekadó, asina tambe mediante obedensia di esun persona akí hopi lo bira hustu.” (Romanonan 5:19) Hesus tabata “esun persona akí.” El a bandoná shelu, bira un hòmber perfekto, * i muri pa nos. Debí na esei, nos por tin un posishon hustu den bista di Yehova i haña e speransa di biba pa semper.

Pero dikon Hesus mester a muri pa logra tur esaki? Dios Todopoderoso no por a djis saka un dekreto ku lo a permití Adam su desendientenan biba pa semper? Dios siguramente tabatin e outoridat pa hasi algu asina. Pero esei lo a bai kontra e lei ku el a stipulá, esta ku e salario ku piká ta paga ta morto. E lei ei no tabata un regla insignifikante ku por a ser poné un banda òf kambiá ora ta kumbiní. E ta esensial pa logra berdadero hustisia.—Salmo 37:28.

Si Dios lo a ignorá su lei di hustisia na e okashon ei, hende lo por a puntra nan mes si lo e hasi esei den otro asuntunan tambe. Por ehèmpel, lo e aktua ku hustisia ora di determiná kua desendientenan  di Adam ta kualifiká pa haña bida eterno? Hende lo por konfia ku lo e kumpli ku su promesanan? Sí, e echo ku Dios a aktua ku hustisia ora di perkurá salbashon pa humanidat ta duna nos e garantia ku semper lo e hasi loke ta korekto.

Pa medio di Hesus su morto komo sakrifisio, Dios a habri kaminda pa bida eterno den Paradeis riba tera. Wak kiko Hesus a bisa na Huan 3:16: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” Pues, Hesus su morto no solamente ta un ekspreshon di Dios su hustisia; e ta spesialmente un ekspreshon di Dios su gran amor pa hende.

Sinembargo, dikon Hesus mester a sufri i muri un morto asina doloroso manera e Evangelionan ta deskribí? Wèl, e echo ku Hesus a someté su mes na un prueba severo asina i a keda fiel, a demostrá un bes pa semper ku loke Diabel a insinuá, esta ku hende lo no keda leal na Dios bou di prueba, no ta bèrdat. (Yòb 2:4, 5) E akusashon ei lo por a parse bèrdat despues ku Satanas a logra ku e hòmber perfekto Adam a peka. Pero Hesus—kende tabata un ekivalente perfekto di Adam—a keda obediente apesar di hopi sufrimentu. (1 Korintionan 15:45) Asina Hesus a proba ku Adam tambe por a obedesé Dios si e tabata ke. Perseverando, bou di prueba, Hesus a laga un ehèmpel pa nos sigui. (1 Pedro 2:21) I Dios a rekompensá su Yu pa su obedensia perfekto; Hesus a haña bida inmortal den shelu.

Hesus a muri di bèrdat. Pues, e kaminda pa bida eterno ta habrí. Abo ke biba pa semper? Hesus a mustra kiko nos tin ku hasi pa logra esei. El a bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.

E editornan di e revista akí ta animá bo pa siña mas tokante Yehova, e Dios berdadero, i tokante su Yu, Hesukristu. Testigunan di Yehova den bo área lo ta kontentu pa yuda bo. Ademas, bo por bishitá nos website, www.pr418.com/pap, pa haña mas informashon balioso.