¿Imëyaqpis kawakïta munankimantsuraq? nir tapushqaqa, mëtsikaqmi niyanman kawëta munëkarpis llapantsik wanunqantsikta. Porqui llapantsikpis wanoqllam kantsik.

Peru ¿kanan wanukïkïta munankimantsuraq? nir tapushqaqa. Manam pipis alli juiciunchö këkarqa awmi nimashwantsu. Imëka tukï sasa problëmakunapa pasarpis, llapantsikmi imëkanöpapis kawëtaqa munantsik. Nunakunataqa imëyaqpis kawakï munëyoqtam Diosqa kamashqa. Tsëmi Bibliaqa kënö nin: “Mana wanushpa kawakï munëtam shonqunkunaman churashqa” (Eclesiastes 3:11).

Rasumpa kaqchöqa manam imëyaqpis kawëta puëdintsiktsu. Peru, ¿imataq pasakurqan wanïman chänapaq? ¿Imallatapis Dios rurashqaku tsë llapanta altsamunampaq? Biblia willamanqantsikqa alläpam kushiratsimantsik y rikätsimantsikmi imanir Jesus sufrinqanta y wanunqanta.

Bibliapa Genesis librumpa qallanan kima kaq capïtulunkunam willamantsik, punta nunakuna Adan y Ëvata imëyaqpis kawakuyänampaq Dios ninqanta y imata rurarlla tsëta lograyänampaq kaqta. Y ninmi, mana cäsukuyanqanrëkur imëyaqpis kawakïta oqrayanqanta. Fäcil-llam tsë llapanta entienditsimantsik, y tsëmi wakinqa cuentulla kanqanta pensayan. Peru Mateu, Marcus, Lücas y Juan librukuna willakuyanqan markäkïpaq kayanqannöllam Genesis librupis rasun kaqllata y markäkïpaq kaqllata willakun. *

Adan mana wiyakunqanqa, ¿imakunamantaq chätsikushqa? Bibliam nin: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Romänus 5:12). Diosta mana wiyakurmi Adanqa jutsata rurarirqan. Tsënöpam imëyaqpis kawakïta oqrarirqan y tiempuwanqa awkinyarmi wanurirqan. Pëkunapa tsurinkuna karmi jutsasapa kantsik y tsërëkurmi qeshyantsik, awkinyantsik y wanuntsik. Biblia tsënö yachatsimanqantsikqa kanan witsan doctorkuna kawëpaq niyanqanwampis igualanmi. Kananna rikärishun tsëta altsamunanrëkur Dios imata ruranqanta.

Adan oqranqanta altsananrëkur y tsënöpa mirëninkuna yapë imëyaqpis kawakuyänanrëkurmi Diosnintsikqa jukta rurashqa. ¿Imatataq rurashqa?

Bibliam kënö nin: “Porqui jutsa rurëpa pägunqa wanïmi” (Romänus 6:23, NM). Awmi, jutsa ruranqantsikrëkurmi wanuntsik. Tsëmi Adanqa jutsata rurashqa karnin wanurqan. Tsëmi noqantsikpis jutsa ruraq karnin wanuntsik. Peru, Eden huertachö Adan jutsata ruranqampitaqa manam culpayoqtsu kantsik, tsëmi Diosqa llakipämarnintsik Tsurin Jesucristuta kachamurqan jutsantsikpita ‘pagakunampaq’.

Jutsannaq nuna këkar Adan mana wiyakunqanrëkurmi, llapan nunakuna jutsasapa këta y wanïta chaskirquntsik; tsëmi precisarqan jutsannaq juk nunaraq y Diosta llapanchö wiyakoqraq tsë jutsapita salvamänantsikrëkur wanunan. Bibliam tsëta kënö entienditsimantsik: “Dios mandashqanta Adan mana cäsuconqanrecurmi atscaq nunacuna jutsasapa ticrayashqa. Y Diosta Jesucristu cäsuconqanrecurmi atscaq nunacuna alli ruraqna ticrashqa cayan” (Romänus 5:19). Jesusqa Diosta llapanchö wiyakurninmi, ciëluchö këkanqanta jaqirïkur, jutsannaq këkar * noqantsikrëkur wanurqan. Tsërëkurmi Diosnintsikqa alli ruraqtanö chaskimantsik y imëyaqpis kawakïtam yapë chaskishun.

Peru ¿imanirtaq Jesusqa wanunanraq karqan imëyaqpis kawakïta chaskinantsikpaq? ¿Manatsuraq mas alli kanman karqan Adanpa tsurinkunata imëyaqpis kawakuyänampaq nirinqanlla? Awmi, Diosqa tsëta ninampaq autoridäyoqmi karqan, peru tsëta rurarqa, jutsapa pägun wanï kanqanta ninqantam mana kaqpaq churarinman karqan. Porqui tsë ninqantaqa, manam llutalla ushakätsir o cambiar rurananllatsu. Tsë ninqanqa alläpam precisarqan alli kaq rurë cumplikänampaq (Salmu 37:28).

Tsë kutichö ninqanta Dios mana cumplirqa, yapëchö ninqanta mana cumplinampaq kaqtachi rikätsikunman karqan. Tantiyarinapaq, ¿allitsuraq kanman karqan Adanpa tsurinkunapita mëqanlla imëyaqpis  kawakuyänampaq kaqta ninqanqa? ¿Llapan änikunqankunatsuraq cumplinman karqan? Salvamänantsikrëkurmi Diosqa ninqanta cumplitsirqan, tsëwanmi cläru rikätsimarqantsik Pëqa imëpis alli kaqta cumplitsinampaq kaqta.

Noqantsikrëkur Diospa Tsurin wanunqanmi, yapë shumaq Patsachö kawakuyänampaq permitishqa. Kikin Jesusmi kënö nirqan: “Porqui que patsacho nunacunata allapa cuyarninmi, Dios[qa] jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Jesus wanunqanqa manam Diospa alli rurëninllatatsu rikätsimantsik, sinöqa alläpa kuyamanqantsiktawanmi.

Peru tapukuntsikran: ¿imanirtaq Jesusqa alläpa sufrirninraq wanurqan? Porqui wanunqanyaq Diosta cäsukunqanwanmi rikätsikurqan, Satanas ulikoq kanqanta. Porqui pëqa nishqa karqan, nunakuna imëka problëmakunapa pasarqa llapan shonqunkunawan Diosta mana sirwiyänampaq kaqtam (Job 2:4, 5). Jutsannaq punta nunata Satanas ishkiratsiptinmi, ninqanqa imëka rasumpanö rikakärirqan. Jesuspis jutsannaqmi karqan, peru alläpa mana allikunapa pasëkarpis Diosta wiyakoqmi karqan (1 Corintius 15:45). Tsëwanmi rikätsikurqan Adanpis rasumpa munarninqa Diosta wiyakïta puëdinampaq kaqta. Jina tsëwanmi Jesusqa yachatsimarquntsik pënölla ruranantsikpaq (1 Pëdru 2:21). Diosqa, wamran shonqupita patsë wiyakoq kaptinmi, ciëluchö mana wanushpa kawakïta qorqan.

Jesus wanunqanqa rasumpam karqan, y imëyaqpis kawakunapaqmi yanapamantsik. Tsëmi yapë tapuriyaq: ¿Imëyaqpis kawakïta munankimantsuraq? Jesusqa tsëta logranapaq imata ruranapaq kaqtam nimarqantsik: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).

Kë revistata qellqamoqkunam animariyaq rasumpa kaq Dios Jehoväta y Tsurin Jesucristuta reqinëkipaq. Tsëpaqqa markëkichö Jehoväpa testïgunkunam kushishqa yanapariyäshunki. Jina masta musyëta munarqa Internetchö jw.org päginäkunachömi mas yachatsikïta taririnki.