Mbamudatawira tani khala munthu akubvundzani kuti, “Musafuna kukhala maso kwenda na kwenda?” Anthu azinji mbadatawira kuti asafuna, mbwenye asaona kuti kucedza pya nkhani ineyi nkhabe maphindu. Iwo asalonga kuti kufa kusacita khundu ya umaso kutomera padacitwa ife.

Cincino nyerezerani kuti munthu akucitani mbvundzo, “Muli dzololo toera kufa?” Azinji mbadatawira nkhabe. Pyenepi pisapangizanji? Cifuno cathu ndi kukhala maso, mwakukhonda tsalakana pinentso pinatamba ife. Bhibhlya isapangiza kuti Mulungu acita anthu na cifuno cakukhala maso. Iyo isalonga kuti ‘iye aikha ndzidzi wakukhonda mala m’mitima yawo.’—Koelete 3:11, Tradução do Novo Mundo.

Mbwenye undimomwene ndi wakuti anthu nkhabe khala kwenda na kwenda. Natenepa, ninji cidadodomeka? Kodi Mulungu acita cinthu toera kusasanyira nkhani ineyi? Matawiro a Bhibhlya ndi akutsandzayisa, pontho asaphataniza thangwi idacitisa Yezu kuthabuswa na kuphiwa.

Makapitulu matatu akutoma a bukhu yakutoma ya Bhibhlya ya Genesi asatipanga kuti Mulungu acita banja yakutoma ya anthu, Adhamu na Eva, toera kukhala maso kwenda na kwenda mbaapanga kuti anacitanji toera akhale na umaso unoyu. Buluka penepo mbiri isalonga kuti iwo nee abvera Mulungu na aluza cidikhiro ceneci. Mbiri isalonga kuti anthu anango, basi ene asaona pyenepi ninga undimomwene. Mbwenye Genesi na Maevanjelyu asalonga undimomwene onsene. *

Kodi kukhonda bvera kwa Adhamu kwabweresanji? Bhibhlya isatawira mbvundzo unoyu: ‘Ninga mudapita madawo pantsi pano, thangwi ya munthu m’bodzi basi [Adhamu], mbakupitambo kufa thangwi ya madawo, tenepa kufa kwapita mwa anthu onsene thangwi anthu onsene acitambo madawo.’ (Aroma 5:12) Adhamu adawa thangwi yakukhonda bvera Mulungu. Iye aluza kukhala maso kwenda na kwenda na pakumalisira afa. Nakuti tabulukira kwa iye, atisira madawo ace. Na thangwi ineyi ife tisabva kupha, tisakalamba na kufa. Kufokotozwa kweneku kwa mathangwi anaticitisa kufa kusabverana na pinadziwa ife lero thangwi yakulandana kwa mwana na anyakubalace.  Mphapo, piripo pidacita Mulungu toera kusasanyira nkhani ineyi?

Inde, Mulungu acita masasanyiro toera kuombola, peno kulipa umaso wakukhonda mala udaluza Adhamu, wakuti ukhafunika paswa anace. Mulungu akwanirisa tani pyenepi?

Pa Aroma 6:23 Bhibhlya isalonga: ‘Kulipwa kwa madawo ndi kufa.’ Pyenepi pisabveka kuti kufa kusabwereswa na madawo. Adhamu afa thangwi yakudawa. Munjira ibodzi ene, thangwi yakudawa kwathu tisalipwa na kufa. Mbwenye si thangwi yakudawa kwathu basi tayu, ndi thangwi tabalwa akudawa. Mwaufuni, Mulungu atuma Mwanace, Yezu, toera ‘kulipa madawo’ athu. Pyenepi pisakwanisika tani?

Nakuti kukhonda bvera kwa munthu m’bodzi waungwiro, Adhamu, kwatibweresera madawo na kufa, kubvera kwa mamuna m’bodzi mpaka kufa kukhafunika toera kutiombola ku madawo. Bhibhlya isafokotoza pyenepi munjira iyi: ‘Thangwi ya munthu m’bodzi, adakhonda kubvera, anthu onsene mbanyakudawa, thangwi ya munthumbo m’bodzi adabvera anthu onsene analungamiswa.’ (Aroma 5:19) ‘Munthu m’bodzi’ adabvera ndi Yezu. Iye abuluka kudzulu, mbakhala munthu waungwiro *, mbatifera. Pyenepi pyacitisa kuti tikhale akutawirika kuna Yahova na kukhala na cidikhiro ca umaso wakukhonda mala.

Thangwi yanji Yezu akhafunika kufa toera kukwanirisa pyenepi? Kodi Mulungu Wamphambvu Zonsene nee mbadakhazikisa ntemo toera ana a Adhamu akhale na umaso wa kwenda na kwenda? Iye akhali na mphambvu yakucita pyenepi. Mbwenye pyenepi mbapidasiyana na mwambo wakutoma wakuti kulipwa kwa madawo ndi kufa. Mwambo unoyu nee ndi wakusowa basa wakuti unacinjwa mwakusowa mathangwi. Iwo uli na phata mu ulungami wandimomwene.​—Masalmo 37:28.

Mulungu mbadakhonda phatisira ulungami pa nkhani ineyi, anthu mbadanyerezera kuti Mulungu anacita pibodzi pyene mu nkhani zinango. Mwacitsandzo, kodi iye mbadakhala wakulungama pakusankhula  mwa dzindza ya Adhamu ale anathema kukhala na umaso wakukhonda mala? Kodi mapikiro ace mbadakhala akunyindirika? Thangwi yakuphatisira kwace cilungamo toera kutipulumusa, pisatipasa cinyindiro cakuti ndzidzi onsene Mulungu anacita pinthu munjira yadidi.

Kubulukira mu ntsembe ya kufa kwa Yezu, Mulungu afungula njira toera kukhala na umaso wakukhonda mala mu Paradhizu pa dziko yapantsi. Onani mafala a Yezu pa Jwau 3:16: ‘Mulungu afuna anthu a pantsi pano pikulu pyene, mbapereka Mwana wace m’bodzi ekha toera munthu anankhulupira, aleke kufudzwa, mbwenye awine umaso wakukhaliratu.’ Kufa kwa Yezu kusapangiza kuti ulungami wa Mulungu nee ndi wandimomwene basi, mbwenye kusapangiza kuti ufuni wace kuna anthu ndi ukulu kakamwe.

Mphapo, thangwi yanji Yezu akhafunika kuthabuswa na kuphiwa munjira yakutsukwalisa ninga pinalongwa m’Maevanjelyu? Mukutawira kuthabuswa na kupitiriza kukhala wakukhulupirika, Yezu apereka ntawiro kupokanya kwa Dyabo kuti anthu nee mbadapitiriza kukhala akukhulupirika kuna Mulungu pa mayesero. (Yobe 2:4, 5) Kupokanya kweneku kukhapitiriza padamala nyengezwa Adhamu na Eva toera kudawa. Mbwenye Yezu, wakuti akhali sawasawa na Adhamu waungwiro, apitiriza kukhala wakubvera maseze pakuthabuswa. (1 Akorinto 15:45) Iye apangizambo kuti Adhamu mbadakwanisa kubvera Mulungu mbadasankhula kucita pyenepi. Thangwi yakupirira pa mayesero, Yezu atisira citsandzo toera kutowezera. (1 Pedro 2:21) Mulungu apasa nkhombo kubvera kwa Mwanace mukumpasa umaso wakukhonda kufa kudzulu.

Kufa kwa Yezu kwacitikadi. Pyenepi pyafungula njira ya umaso wakukhonda mala. Musafuna khala maso kwenda na kwenda? Yezu apangiza pinafunika ife kucita mudalonga iye: ‘Umaso wakukhaliratu ndi uyu: anthu akudziweni kuti ndimwe mwekha Mulungu wandimomwene, adziwembo Yezu Kristu adatuma imwe.’​—Jwau 17:3.

Anyakucita revista ino asakucemerani toera kupfundza pizinji thangwi ya Yahova, Mulungu wandimomwene, na Mwanace, Yezu Kristu. Mboni za Yahova za mu cisa canu zinadzatsandzaya toera kukuphedzani. Munakwanisambo gumana mphangwa zakuthimizirika mu website yathu, www.pr418.com.