Kiringo tënë ti mo ayeke duti ande tongana nyen, tongana a hunda mo a tene: “Eskê mo ye ti ngbâ na fini lakue lakue?” Peut-être, mingi ti azo ayeke tënë ande ‘En’, me ala pensé a yeke ngangu ti tene ye tongaso asi. Ala tene so, a ye lawa lawa, e kue e yeke kui.

Ka tongana fadeso a hunda mo a tene: “Mo ye ti kui?” Mingi ni, azo ayeke tene “Ên-ën.” Ngbanga ti nyen? E kue e ye ti ngbâ na fini, atâa angangu kpale wa la e yeke na yâ ni. Bible afa so Nzapa aleke e na ziango na yâ ti bê ti e nzara ti ngbango na fini. Na ndo ni, Bible atene so Nzapa azia ‘même tënë ti fini ti lakue lakue na yâ ti bê ti azo.’​—Zo-ti-fa-tene 3:11.

Me mawa ni ayeke so, e lingbi ti ngbâ na fini lakue lakue ape. Nyen la apassé? Eskê Nzapa asara mbeni ye awe ti leke na kpale ni? Bible amû akiringo tënë so adë bê, nga kamba ayeke na popo ti akiringo tënë ni na tënë ti pasi ti Jésus nga na ti kuâ ti lo.

Tongana e diko Genèse chapitre oko ti si na ota, e yeke bâ so Nzapa azia lani na gbele Adam na Ève beku ti fini ti lakue lakue, na lo fa na ala ye so ala lingbi ti sara ti wara ni. Na pekoni, mbaï ni afa tongana nyen la ala ke yanga ti Nzapa na ala wara fini ni so ape. Teti so a fa ambeni nzene nzene tënë na ndo ni ape, ambeni zo atene so mbaï ni so ayeke gi tënë ti tere. Me, legeoko tongana ti aÉvangile, mbeti ti Genèse afa ambeni tënë so afa so mbaï ni ayeke tâ tënë. *

Nyen la apassé na peko ti kengo yanga ti Adam ni lani? Bible atene: “Na lege ti zo oko [Adam] siokpari alï na yâ ti dunia so, na lege ti siokpari kuâ aga, tongaso kuâ amû azo kue ngbanga ti so ala kue asara fade siokpari.” (aRomain 5:12). Adam asara siokpari tongana lo ke yanga ti Nzapa. Ye so asara si lo girisa beku ti fini ti lakue lakue so lo yeke na ni, na lo kui. Teti so e yeke amolenge ti lo, e kue e wara na tere ti e siokpari ti lo ni. A yeke ni la asara si e yeke tï kobela, e ga mbakoro nga e kui. Ye so ague oko na ye so awandara awara na ndo ti lege so amolenge ayeke mû na ambeni sarango ye ti tere ti ababâ na amama ti ala. Me, eskê Nzapa asara mbeni ye awe ti leke na kpale ni?

Nzapa asara mbeni ye awe, wala lo futa mbeni ye awe, ti vo ye so Adam abata pëpe ndali ti ahale ti lo, so ti tene beku ti fini ti lakue lakue. Nzapa asara ni tongana nyen?

Mbeti ti aRomain 6:23 atene: “Futa ti peko ti siokpari ayeke kuâ.” Ye so aye ti fa so siokpari ayeke ga na kuâ. Adam asara lani siokpari, ni la lo kui so. Legeoko nga, e yeke kui ngbanga ti so e sara siokpari. Me, a yeke faute ti e ape, a dü e dungo na siokpari ni na tere ti e. Tongaso, na ndoye, Nzapa atokua molenge ti lo Jésus ti yô “futa ti peko ti siokpari” na place ti e. Lo oko lo peut ti yô ni tongana nyen?

Lani, zo oko, so ti tene Adam so ayeke lani na siokpari na tere ti lo ape, la asara si siokpari na kuâ asi na azo kue. Ni la, ti zi e na yâ ti aye ni so, a yeke gi na bezoin ti mbeni zo oko so ayeke na siokpari na tere ti lo ape nga so alingbi ti mä yanga ti Nzapa même juska na kuâ. Bible afa ndani na lege ti tënë so: “Gi tongana ti so ndali ti kengo yanga so zo oko ake, azo mingi aga awasiokpari, legeoko nga ndali ti mango yanga so zo oko amä, a yeke diko ande azo mingi tongana azo ti mbilimbili.” (aRomain 5:19). Jésus la ayeke “zo oko” ni so. Lo londo na yayu, lo ga na sese tongana zo so siokpari ayeke na tere ti lo ape, * na lo kui ndali ti nzoni ti e. Ye ti pekoni ayeke so, e lingbi ti duti na nzoni songo na Nzapa nga ti wara fini ti lakue lakue.

Me ngbanga ti nyen la a lingbi Jésus akui lani si ye ni so asi? Ngbanga ti nyen la Nzapa, so ngangu ti lo ahon angangu kue, afa gi mbeni mbela so alingbi ti mû lege na ahale ti Adam kue ti wara fini ti lakue lakue awe ape? A yeke tâ tënë so lo yeke na droit ti sara ni. Me ye so ayeke gue fade nde na ndia ti lo so afa atene futa ti peko ti siokpari ayeke kuâ. A yeke pëpe mbeni ndia so zo alingbi ti ba yâ ni wala ti ke ni. A yeke kota ye ndali ti fango ngbanga so ayeke na lege ni.​—Psaume 37:28.

Tongana, na yâ ti ye so asi so, Nzapa azia fade fango ngbanga ti mbilimbili yamba, azo ayeke hunda tere ti ala wala Nzapa ayeke sara nga tongaso na  ndo ti ambeni tënë nde. Na tapande, eskê lo yeke hinga ande tâ mbilimbili zo so na popo ti ahale ti Adam alingbi ti wara fini ti lakue lakue? Eskê e lingbi ti zia bê ti e na Nzapa na ndo ti azendo ti lo? So Nzapa asö e sân ti gue nde na mbilimbili ti lo afa na e so lo yeke sara ande gi ye lakue lakue na lege ni.

Na lege ti kuâ ti Jésus, Nzapa azi lege na azo ti wara fini ti lakue lakue na yâ ti Paradis na ndo ti sese. Bâ tënë ti Jésus so e wara na Jean 3:16: “Nzapa andoye tâ azo ti dunia so mingi si lo mû gi oko Molenge ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.” Kuâ ti Jésus afa so Nzapa ayeke sara ye lakue na lege ni, nga a fa biani so Nzapa andoye azo.

Ka ngbanga ti nyen la a lingbi Jésus akui lani na yâ ti pasi tongana ti so aÉvangile afa ni? Na yengo dä ti bâ pasi nga ti ngbâ be-ta-zo na Nzapa, Jésus afa biaku biaku so tënë ti Zabolo, so a tene azo alingbi ti ngbâ be-ta-zo na Nzapa pëpe tongana mbeni ngangu tara asi na ala, ayeke tënë ti mvene (Job 2:4, 5). A kpa mo bâ mo tene Satan awara lani raison na ngoi so Adam asara siokpari. Me Jésus, so ayeke na siokpari na tere ti lo ape tongana ti Adam lani, angbâ ti lo be-ta-zo na Nzapa atâa angangu pasi so lo bâ (1 aCorinthien 15:45). Lo fa so Adam kue alingbi lani ti mä yanga ti Nzapa tongana lo ye. So lo gbu ngangu na yâ ti tara, Jésus azia na e mbeni nzoni tapande ti tene e mû peko ni. (1 Pierre 2:21). Nzapa afuta mango yanga ti Molenge ti lo, lo mû na lo na yayu kâ fini so alingbi ti hinga kuâ ape.

Biani, Jésus akui lani. Lege azi na e awe ti wara fini ti lakue lakue. Mo ye ti ngbâ na fini lakue lakue? Jésus afa na e ye so a lingbi e sara ti wara ni, lo tene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.”​—Jean 17:3.

Azo so asigigi na mbeti so na maboko ti mo so awa mo ti gi ti hinga ye mingi na ndo ti Jéhovah, so ayeke tâ Nzapa, nga na molenge ti lo, Jésus Christ. A-Témoin ti Jéhovah ti ndo so mo yeke dä alingbi ti mû maboko na mo. Mo lingbi nga ti wara mungo maboko tongana mo gue na ndo ti site Internet ti e, www.pr418.com.