We kwakula naminyi su bakwipusha’shi: “Okumiina kwikala na muwa wa ikalaika?” Bantu bebungi mbalombeene kwakula’shi abakumina kwikala nao, anka tabamono bu mwanda wa binyibinyi nya. Abamba’shi lufu alukwataa muntu ooso, takwi mushindo wa kwilusuka nya.

Tubande kupwandjikisha su bashintuula lwalwa lunkonko bakwipusha’shi: “Okumiina kufwa su?” Pa kushii mwanda, bantu bebungi tabakumiinaa kufwa nya. Bwakinyi? Mwanda lukalo lwetu ndwa kwikala na muwa sunga twekala na nkalakashi. Bible aleesha’shi Efile Mukulu bapangile bantu na lukalo lwa kwikala na muwa. Nyi bwakinyi Bible akula’shi: ‘Mmupe eshimba dyetu kyuukilo kya bya ikalaika.’—Mulungudi 3:11.

Anka bantu ta be na muwa wa ikalaika nya. Myanda ibaadi ilwile naminyi? Efile Mukulu bakitshiine kintu kampanda bwa kulumbuula myanda su? Lwaluulo alutusha Bible alukumu kwishimba, mwanda alwituleesha bwakinyi Yesu bakyengyele na kufwa.

Shapitre isatu ya kumpala ya mukanda wa Kibangilo ayitulungula’shi Efile Mukulu bapangile Adame na Eeva na muwa ushi na nfudiilo, aye nkwibalungula kibaabadi na kya kukita bwabadya kwiulama. Akupu, ayileesha bibabaadi bakutwe kukookyela Efile Mukulu na kushimisha wawa muwa. Uno mwisambo wi mu ngakwilo mupelepele—bilombeene na bangi kupwandjikisha wanka bu mwele kushi bu mwanda wa binyibinyi. Anka, mu mukanda wa Kibangilo na mu ma Evanjile mwi bishinkamisho byoso abileesha’shi ino myanda ibaadi ikitshikye. *

Mbipeta kinyi bifwishe kukutwa kukookyela kwa Adame? Bible aluula’shi: “Milwisho ibatwelele pa nsenga pa mwanda wa muntu umune, Adame, yaya milwisho yafwisha lufu. Byabya, lufu alukwata bantu boso mwanda boso mbalwishe.” (Beena-Looma 5:12, EEM) P’aye kukutwa kukookyela Efile Mukulu, Adame bakitshine mulwisho. Baadi mushimishe mpàngo ya kwikala na muwa wa ikalaika aye nkufwa. Bu byatudi beekulu baaye, twi bapyane mulwisho. Pa mwanda wa byabya, tukwete kukumba maladi, tukwete kununupa na kufwa. Bino mbipushene na abileesha beena siyanse pabitale mushindo aupyanaa bana ingi myanda kwi bebatande. Anka, Efile Mukulu  bakitshiine kintu kampanda bwa kulumbuula myanda su?

Efile Mukulu baatshile mpàngo bwa kukuula sunga kufuta kyakya kibaadi Adame mushimishe bwa bana baaye kyabetamina bu muwa wa ikalaika. Efile Mukulu baadi mwibikite naminyi?

Mukanda wa Beena-Looma 6:23 awamba’shi: ‘Efuto dya mulwisho ndufu.’ Bino abileesha’shi masaku atuushe mulwisho nyi ndufu. Adame bakitshine mulwisho, nyi bwakinyi baafwile. Mu mushindo umune, tukwete kulwisha na kupeta efuto aditukila ku mulwisho diikale lufu. Twi batandjikwe mu mulwisho kushii mu kukumiina kwetu. Nyi bwakinyi, na kifulo kyoso, Efile Mukulu batumine Mwan’aye Yesu bwadya kutwala ‘efuto dya milwisho yetu.’ Bino bibaadi bikitshikye naminyi?

Bu bibaadi muntu umune mupwidikye Adame mukutwe kukookyela ako kwitufwishile mulwisho na lufu, bibaadi abitungu muntu mupwidikye akookyela mpa na ku lufu bwa kwitukatusha bwabwa bushito. Bible apatuula bino p’aye kwakula’shi: “Mwanda bu bibaadi kukutwa kukookyela kwa muntu umune nkufishe kibumbu kya bantu ku milwisho, byabya dimo, ku kukukookyela kwa muntu umune kibumbu kya bantu akitambula bululame.” (Beena-Looma 5:19) Yesu nyi yawa “muntu umune.” Bakatukile mwiyilu, afika muntu mupwedikye * bwadya kwitufwila. Pa mwanda wa byabya, twi na mushindo watudya kwikala balulame ku meeso kw’Efile Mukulu na kwikala na lukulupilo lwa muwa wa ikalaika.

Bwakinyi bibaadi na muulo bwa’shi Yesu afwe bwa kulombasha uno mwanda? Efile Mukulu sha bukome booso tabaadya penda kutadiila bana ba Adame bwabadya kwikala na muwa wa ikalaika? Baadi na matalwa a kwibikita. Anka, bino bibadya kukutwa kulombasha mwiya waye ubambile’shi efuto dya milwisho ndufu. Wawa mwiya ta wi bu mwanda wa bisumanga wa kushintuula nya. Ngwikale kitako kya kululama kwa binyibinyi.—Misambo 37:28.

Su Efile Mukulu badya kutuula ku lupese kululama kwaye, bantu babadya kwiyipusha bibadya kwikala mululame mu myanda yooso. Bu kileshesho,  badya kuleesha kululama mu kusangula kwa bantu ba mu lutandwa lwa Adame balombane bwa kupeta muwa wa ikalaika? Tubadya kwikala atumukulupila bwa kulombasha milayilo yaaye su? Bu byaadi mushale mulamate ku kululama kwaye bwa kukimba kipandjilo kyetu, abitushinkamisha’shi Efile Mukulu ekala akitshi nka myanda ibuwa.

Ku bukwashi bwa mulambu wa lufu lwa Yesu, Efile Mukulu mmufungule eshinda aditwala ku muwa wa ikalaika mu Mpaladiiso pa nsenga. Mayi a Yesu e mu mukanda wa Yowano 3:16 aamba’shi: “Mwanda Efile Mukulu mmufule ba pano bikile, mu kipaso kyadi mupaane Mwan’aye eeleka, bwa’shi muntu ooso amukumiina taashiminanga, anka aikale na muwa wa ikalaika.” Lufu lwa Yesu talwi penda bwa kuleesha kululama kw’Efile Mukulu nya, anka aluleesha kifulo kyaye kikata bwa bantu.

Byabya, bwakinyi Yesu bakyengyele na kufwa lufu lwa makyenga lwabadi baleeshe mu ma Evanjile? P’aye kukookyela na kushala na lulamato, Yesu baadi muleeshe patooka madimi a Satana a kwamba’shi bantu ta mbalombeene kushala na lulamato kwi Efile Mukulu pabadi mu makyenga. (Yoobo 2:4, 5) Aa madimi abaadi amwenekye bu a binyibinyi kunyima kwa Satana kutwesha Adame mu mulwisho. Anka, Yesu baadi mupwidikye bu bibaadi Adame—baadi mukookyele Efile Mukulu sunga mu makyenga. (1 Beena-Kodinda 15:45) Baadi mushinkamishe’shi Adame namu baadi na kya kukookyela Efile Mukulu su baadya kusangula bwa kwibikita. P’aye kunyingiila mu mpombo, Yesu mmulekye kileshesho kya kulonda. (1 Mpyeele 2:21) Efile Mukulu baadi mufute Mwan’aye bwa kukookyela kwaye pa kumupa muwa ushii bya kufwa mwiyilu.

Yesu baadi mufwe binyibinyi. Eshinda dya muwa ushi na mpwilo ndishitukye. Okumiina kwikala na muwa wa ikalaika su? Yesu balesheshe kyatudi balombeene kukita p’aye kwakula’shi: “Muwa wa looso namu ngi’shi bantu bakuukye, obe bupenka Efile a binyibinyi na yawa obotumine, Yesu Kidishitu.”—Yowano 17:3.

Bafundji ba uno jurnale abakutekye bwa kulonga ingi myanda pabitale Yehowa, Efile Mukulu a binyibinyi na pabitale Mwan’aye Yesu Kidishitu. Batemwe ba Yehowa be mbalo yodi mushale abekala na muloo wa nkukwasha. We mulombeene kuuka ingi myanda ibungi p’obe kutwela mu site eetu a Iternet a www.pr418.com.