Kumbi mungamuka wuli asani munthu wangakufumbani kuti, “Kumbi mukhumba kuja ndi umoyu wamuyaya?” Ŵanthu anandi angamuka kuti akhumba kuja ndi umoyu wamuyaya, kweni awona kuti vingachitika cha. Yiwu awona so kuti ndimu vijaliya pa umoyu wa munthu. Akamba kuti munthu wawaku, pakumaliya paki watufwa.

Kweni mungamuka wuli asani munthu munyaki wangakufumbani kuti, “Kumbi mwe akunozeka kufwa?” Viwoneke limu kuti ŵanthu anandi angamuka kuti “awa.” Ntchifukwa wuli angamuka viyo? Chifukwa chakuti weyosi wakhumba kuja ndi umoyu chinanga kuti wakumana ndi masuzu. Bayibolu lilongo kuti Chiuta wakutipanga ndi mtima wakhumba kuja ndi umoyu utali. Ilu likamba kuti, “wakupasa ŵanthu mtima wakukhumba kuja ndi umoyu wamuyaya.”​—Wakutaula 3:11.

Unenesa ngwakuti, sonu ŵanthu aja ndi umoyu wamuyaya cha. Nanga ntchinthu wuli cho chikunangika? Kumbi ndi vinthu wuli vo Chiuta wachita kuti wanozi vo vikunangika? Bayibolu le ndi fundu zakuchiska ukongwa pa nkhani iyi ndipuso lilongo chifukwa cho Yesu wangusuzikiya ndipuso kufwa.

Machaputala ngatatu ngakwamba nga buku la Chiyambo ngakamba kuti pakwamba Chiuta wangulenga Adamu ndi Eva, ndipu wakhumbanga kuti aje ndi umoyu wamuyaya. Kweniso, wanguŵakambiya vo akhumbikanga kuchita kuti alutirizi kuja ndi umoyu weniwo. Bayibolu likonkhosa so mo angutondeke kuvwiya Chiuta ndipu venivi vinguchitisa kuti atondeki kuja ndi umoyu wamuyaya. Bayibolo likonkhosa nkhani iyi mwakudumuwa ukongwa mwakuti ŵanthu anyaki awona nge kuti ndi nthanu waka. Buku la Chiyambo nalu likonkhosa nkhani iyi mwaunenesa nge mo mabuku nga Uthenga Wamampha ngakonkhose nkhani zaunenesa. *

Kumbi ntchinthu wuli cho chinguchitika Adamu wati watondeka kuvwiya? Bayibolu likamba kuti: “Ubudi ukusere mucharu chifukwa cha munthu yumoza [Adamu] ndipu nyifwa yikuza chifukwa cha ubudi, mwaviyo nyifwa yikukwasa ŵanthu wosi chifukwa wosi akubuda.” (Ŵaroma 5:12) Adamu wangubuda chifukwa chakuti wangumuvwiya cha Chiuta. Mwaviyo, iyu wangutaya mwaŵi wakuja ndi umoyu wamuyaya ndipu pavuli paki wangufwa. Nasi tikutoliyaku ubudi chifukwa tosi tikutuliya kwaku iyu. Ndichu chifukwa chaki titama, tikota ndipuso kufwa. Fundu iyi yikoliyana ukongwa ndi vo  asayansi akusaniya kuti mwana wangatoliyaku tinthu tinyaki kwa apapi ŵaki. Kumbi ndi vinthu wuli vo Chiuta wakuchita kuti wanozi vo vikunangika?

Chiuta wakuchitapu kanthu kuti wanozi vo Adamu wangunanga vo vinguchitisa kuti ŵana ŵaki wosi afwengi. Kumbi Chiuta wakuchitapunji?

Lemba la Ŵaroma 6:23 likamba kuti: “Mphotu ya ubudi ndi nyifwa.” Ivi ving’anamuwa kuti ŵanthu atufwa chifukwa cha ubudi. Adamu wakufwa chifukwa cha ubudi. Nasi titufwa chifukwa cha ubudi. Kweni tingukhumba tija cha kuti tibalikengi akubuda. Ndichu chifukwa chaki Chiuta wangutuma Mwana waki, Yesu kuti wazitiwombo ku ‘mphotu ya ubudi.’ Kumbi tiwomboleka wuli?

Munthu yumoza, Adamu yo wenga murunji, wati wananga wanguchitisa kuti tosi tije akunanga ndipuso kuti tifwengi. Mwaviyo, pakhumbikanga munthu munyaki wakuvwiya kuti watifwiyi ndi kutiwombo. Bayibolu likamba kuti: “Chifukwa cha kuleka kuvwiya kwa munthu yumoza, ŵanthu anandi mbakubuda, mwaviyo chifukwa cha kuvwiya kwa munthu yumoza ŵanthu anandi azamuja arunji.” (Ŵaroma 5:19) Yesu ndiyu wenga munthu murunji yo wakambika pa lemba ili. Iyu wangutuwa kuchanya ndi kuzija munthu murunji *, ndipu wangufwa chifukwa chaku isi. Nyifwa yaku Yesu yitovya kuti ŵanthu aje arunji pamasu paku Chiuta ndipuso kuti azisaniyi umoyu wamuyaya.

Nanga ntchifukwa wuli Yesu wakhumbikanga kufwa? Kumbi Chiuta Wanthazizosi watingi watondekengi kulamula waka kuti ŵana aku Adamu aje ndi umoyu wamuyaya? Iyu wenga nazu nadi nthazi zakuchitiya viyo. Kweni asani wanguchita viyo, ndikuti watingi waswengi dangu laki lakuti mphotu ya ubudi ndi nyifwa. Dangu ili ndakukhumbika ukongwa ndipu wangaliswa cha chifukwa chakukhumba waka kukondwesa ŵanthu. Dangu ili lilongo kuti Chiuta wayeruzga mwaurunji.​—Sumu 37:28.

Asani Chiuta wanguleka kulondo urunji pa nkhani iyi, ŵanthu atingi awonengi kuti wangachita so viyo pa nkhani zinyaki. Mwakuyeruziyapu, kumbi vatingi viŵengi  umampha asani wangusankha waka ŵana amanavi aku Adamu kuti ndiwu azije ndi umoyu wamuyaya? Kumbi ŵanthu atingi amugomezengi kuti wafiska nadi vo wakamba? Chiuta walondo fundu zaki zaurunji kuti watiwombo. Venivi vititichitisa kuti timugomezengi kuti nyengu zosi wachita cho ntchamampha.

Chiuta wakutikambiya kuti tazamuja ndi umoyu wamuyaya mu Paradayisu pacharu chapasi. Ivi vazamuchitika chifukwa cha nyifwa yaku Yesu. Wonani vo Yesu wangukamba pa Yohane 3:16. Lemba ili likamba kuti: “Pakuti Chiuta wanguchiyanja ukongwa charu mwakuti wangupereka Mwana waki wapade, kuti weyosi yo wavwana mwaku iyu wangafwanga cha kweni waje ndi umoyu wamuyaya.” Nyifwa yaku Yesu yilongo kuti Chiuta ndi murunji ndipuso watanja ŵanthu ŵaki.

Kweni, ntchifukwa wuli Yesu wanguzomela kufwa ndipuso kusuzika nge mo mabuku nga Uthenga Wamampha ngakambiya? Yesu wangulutiriza kuja wakugomezeka chinanga kuti wangukumana ndi chiyesu chikulu. Ivi vinguwovya kuti wamuki boza laku Dyaboli lakuti, ŵanthu angagomezeka cha kwaku Chiuta asani ayeseka. (Jobu 2:4, 5) Fundu iyi yatingi yiwonekengi kuti njaunenesa asani Yesu nayu wangunyengeka nge po wangunyengeke Adamu, yo wenga munthu murunji. Adamu wenga murunji nge po wenge Yesu. Kweni Yesu wangugomezeka chinanga kuti wangukumana ndi masuzu ngakulu. (1 Ŵakorinte 15:45) Vo Yesu wanguchita vilongo kuti Adamu nayu watingi wagomezekengi kwaku Chiuta. Nasi tikhumbika kukunthiyapu masuzu nge mo Yesu wanguchitiya. (1 Petro 2:21) Chiuta wangumutumbika ukongwa Mwana waki chifukwa chakuti wanguvwiya. Iyu wakumupasa umoyu wambula kufwa kuchanya.

Yesu wangufwa nadi. Mwaŵi ulipu wakuti weyosi wangaja ndi umoyu wamuyaya. Kumbi mukhumba kuzija ndi umoyu wamuyaya? Yesu wangukamba vo titenele kuchita. Iyu wanguti: “Azamusaniya umoyu wamuyaya asani aziŵa imwi Chiuta yija waunenesa, ndi Yesu Khristu yo mungumutuma.”​—Yohane 17:3.

Wo alemba magazini iyi atikupemphani kuti musambiri vakukwasana ndi Yehova, Chiuta waunenesa ndipuso Mwana waki, Yesu Khristu. Akaboni aku Yehova a muchigaŵa cho muja mbakunozeka kukuwovyani. Mungasaniya so fundu zinyaki pa webusayiti yidu ya www.pr418.com./tog