Tuku xkgalhtinanti komo xkgalhskinka: «¿Latamaputuna putum kilhtamaku?». Atsinu ni putum max xkgalhtinankgolh pi chuna, pero ni kanajlakgo pi tlan chuna nala. Wankgo akxni niyaw anta sputa latamat.

Pero uku kalakpuwanti pi xtlawanika atanu takgalhskinin: «¿Lakpuwana pi tlantiya naniya?». Atsinu ni putum xkgalhtinankgolh pi ni. ¿Tuku limasiya uma? Maski tuwa tuku titaxtuyaw, ni niputunaw. Biblia limasiya pi Dios kamalakatsukilh latamanin xlakata xlatamaputunkgolh putum kilhtamaku. Chuna, wan pi «kxnakujkan kawilininit pi nalatamaputunkgo putum kilhtamaku» (Eclesiastés 3:11).

Maski chuna, latamanin ni latamakgo putum kilhtamaku. ¿Tuku xlakata chuna lalh? ¿Wi tuku tlawanit Dios xlakata nalakkaxtlawa uma? Biblia masta takgalhtin nema tlan mamakgkatsininan chu liwana lichuwinan tuku xlakata Jesús patinalh chu nilh.

Xapulana akgtutu capítulos xla Génesis, maktum libro xalak Biblia, kinkawaniyan pi Dios katlawalh xapulana tamakgaxtokgat, Adán chu Eva, xlakata tlan xlatamakgolh putum kilhtamaku chu kawanilh tuku xlitlawatkan xwanit xlakata chuna xwa. Alistalh wan la makgatsankgananikgolh Dios chu makgatsankgakgolh uma latamat. Liwana taʼakgatekgsa chuna la lichuwinankan uma, wa xlakata makgapitsi lakpuwankgo pi kaj cuento. Pero libro xla Génesis, la Evangelios, liwana limasiya pi xlikana chuna lanit tuku lichuwinankgo. *

¿Tuku kitaxtunit xlakata Adán ni kgalhakgaxmatli Dios? Biblia wan: «Xpalakata kaj chatum chixku [Adán] analh talakgalhin kkakilhtamaku, chu linin xpalakata talakgalhin chu chuna linin kgalhikgolh putum latamanin xlakata putum lakgalhinankgonit» (Romanos 5:12, TNM). Adán lakgalhinalh xlakata ni kgalhakgaxmatnalh, kgololh chu alistalh nilh. Xlakata akinin xkamanan, kinkamatitaxtinin talakgalhin. Wa xlakata tatatlayaw, kgolonaw, chu niyaw. Uma tuku lichuwinaw xtalakxtum tuku la uku katsiyaw nema kinkamatitaxtinikgoyan kinatlatnikan. Pero ¿tuku tlawalh Dios xlakata nalakkaxtlawa?

Jehová Dios wi tuku tlawalh xlakata xkgalhiparaw tuku Adán nialhla kamatitaxtinilh xkamanan, pi tlan nalatamayaw putum kilhtamaku. ¿La tlawalh Dios?

Biblia wan: «Xtaxokgo ntalakgalhin, wa linin» (Romanos 6:23). Uma wamputun pi talakgalhin wa tuku tlawa pi kaʼanalh linin. Adán lakgalhinalh, wa xlakata nilh. Akinin na lakgalhinanaw chu makglhtinanaw xtaxokgo talakgalhin, linin. Xlakata ni linaw kuenta xlakata ktalakgalhin lakachiw, Dios kinkalakgalhaman chu malakgachalh xKgawasa, Jesús, xlakata xmastalh «xtaxokgo ntalakgalhin» kimpalakatakan. ¿La xokgolh?

Xlakata kaj chatum chixku, Adán, ni kgalhakgaxmatnalh, kinkatamaknun ktalakgalhin chu klinin, xtalakaskin chatum chixku tiku ni xkgalhilh talakgalhin chu xkgalhakgaxmatli Dios maski xmakgnika, xlakata xkinkalakgmaxtun. Biblia wan: «Xpalakata xtalakgachixkuwimakgan nchatum nchixku, wa lakgalhinanin liwankgolh lhuwa amakgapitsin, na chuna xpalakata xtalakgachixkuwin nchatum nchixku, chuna xatamalulokgni liwankgolh lhuwa amakgapitsin» (Romanos 5:19). Jesús wa «nchatum nchixku». Xla makgxtakgli akgapun, litaxtulh chixku tiku ni kgalhi talakgalhin * chu nilh kimpalakatakan. Uma tlawalh pi Dios xaʼakgstitum xkinkaʼakxilhni chu tlan xlatamaw putum kilhtamaku.

Pero ¿tuku xlakata xtalakaskin pi Jesús xnilh xlakata xmakgantaxtilh uma? ¿Nila kajwatiya xlakkaxwililh Dios tiku kgalhi putum litliwakga pi xkamanan Adán xlatamakgolh putum kilhtamaku? Xlikana pi xkgalhi limapakgsin xlakata chuna xtlawalh. Pero ni xkgantaxtulh limapakgsin nema xwanit, pi xtaxokgo talakgalhin wa linin. Uma limapakgsin xlakaskinka xlitaxtu chu nila xlakatsalakan o xlakgpalikan kaj xlakata wi tiku tlan xkitaxtunilh. Uma xlakaskinka xlakata natawila tuku xaʼakgstitum (Salmo 37:28).

Komo Dios ni xtimakgantaxtilh tuku xaʼakgstitum, max xlakpuwanka pi amakgtum chuna xtlawapa.  Akgtum liʼakxilhtit, ¿xʼama tlawa tuku xaʼakgstitum akxni xlaksakli tiku putum kilhtamaku xlatamalh? ¿Tlan nalipawankan pi namakgantaxti tuku malaknunit? Xlakata tlawanit tuku xaʼakgstitum nakinkalakgmaxtuyan, uma kinkamakanajliyan pi Dios putum kilhtamaku natlawa tuku xaʼakgstitum.

Xlakata Jesús makamastalh xlatamat, Dios tlawalh pi tlan xlatamaw putum kilhtamaku kParaíso unu kkatiyatni. Jesucristo wa: «Dios lu paxkilh kakilhtamaku, wa xlakata mastalh kaj xachastum xKgawasa, xlakata putum tiku nakanajlani ni namalakgsputukan wata nakgalhi latamat nema nikxni sputa» (Juan 3:16, TNM). Xlakata Jesús nilh, Jehová ni kaj limasiyalh pi putum kilhtamaku tlawa tuku xaʼakgstitum, wata na limasiyalh pi lu kinkapaxkiyan.

Pero ¿tuku xlakata xtalakaskin pi Jesús lu xpatinalh akxni xmakgnika, chuna la lichuwinankgo Evangelios? Xlakata ni makgatsankgananilh Dios maski lu nitlan tuku titaxtulh, Jesús limasiyalh pi ni xlikana tuku Akgskgawini wa xpalakata latamanin, pi namakgxtakgkgo Dios akxni natitaxtukgo tuku nitlan (Job 2:4, 5). Akxni Akgskgawini xtlawanita pi Adán xlakgalhinalh, max xtasiya pi xlikana tuku xwanit. Pero Jesús tiku na ni xkgalhi talakgalhin la Adán, ni makgxtakgli Dios maski lu mapatinika (1 Corintios 15:45). Na limasiyalh pi Adán tlan xtikgalhakgaxmatli Dios komo chuna xtilaksakli natlawa. Jesús na kinkamakgxtakgnin liʼakxilhtit nema nastalaniyaw (1 Pedro 2:21). Dios maxkilh xKgawasa latamat nema ni kgalhi xlisputni kʼakgapun xlakata kgalhakgaxmatnilh.

Jesús xlikana nilh. Uma tlawa pi tlan nalatamayaw putum kilhtamaku. Nakkakgalhskimparayan: ¿Latamaputuna putum kilhtamaku? Jesús wa tuku kilitlawatkan: «Uma wamputun latamat nema ni kgalhi xlisputni, pi nalakgapaskgoyan wix, xachastum Dios xaxlikana chu wantiku malakgacha, Jesucristo» (Juan 17:3, TNM).

Tiku tlawakgo uma revista xatapaxuwan wanikgoyan pi tlakg kalakgapasti Jehová, xaxlikana Dios, chu xlakata xKgawasa, Jesucristo. Xtatayananin Jehová xalak minkachikin xatapaxuwan namakgtayakgoyan. Na tlakg nakatsiniya komo natanuya kkisitiojkan xla Internet, www.pr418.com/top.