Ne a au pati ka fai māfai ko fesili atu, “E fia ola koe ki te se-gata-mai?” Kāti ka fai mai te tokoukega o tino me e ma‵nako latou ki ei kae mafau‵fau me ailoga loa e mafai o tupu te mea tenā. E fai mai latou me i te mate se vaega masani o te olaga, ko te ikuga masani o ‵tou olaga.

Mafaufau la me ko ‵fuli te fesili kae ‵sili atu, “E a, ko toka koe ke mate?” Mai lalo i fakanofonofoga masani, ka fai mai a te tokoukega o tino ikai. Se a te manatu tāua? Faitalia a tofotofoga mo tulaga faiga‵ta e fe‵paki mo tatou, a te manakoga masani o tatou ko te fia ola. E fakaasi mai i te Tusi Tapu me ne faite a tino ne te Atua mo te manakoga mo te loto fia ola. E fai mai i ei me “ne tuku atu ne ia te se-gata-mai ki olotou loto.”—Failauga 3:11, NW.

Kae ko te ‵tonuga loa, e se ola a tino ki te se-gata-mai. Se a te mea ne tupu? E se gata i ei, e mata, ko oti ne fai ne te Atua se mea ke faka‵lei aka te tulaga tenei? E fakamalosi loto eiloa a te tali i te Tusi Tapu, kae e isi eiloa sena sokoga ki te pogai ne logo‵mae kae mate ei a Iesu.

E fai mai i mataupu muamua e tolu o te tusi o Kenese me ne tuku atu ne te Atua ki mua o Atamu mo Eva, a te fakamoemoega ko te ola se-gata-mai kae fai atu ne ia a mea e ‵tau o fai ko te mea ke maua ne lāua. Kae ne fakamatala mai i te tala a te auala ne fakata‵mala lāua o faka‵logo ki te Atua kae ne galo atu ei te fakamoemoega tenā. Ne fakamatala fakatoetoe mai fua te tala—kae ona ko te mea tenā e fakaiku fakavave aka ne nisi tino me se tala ‵kai fua. Kae ko te Kenese, e pelā mo tusi Evagelia, e tuku mai a fakamaoniga katoa me se tala tonu i aso mua. *

Se a te ikuga o te sē fakalogo o Atamu? E tali mai penei te Tusi Tapu: “Ne oko mai te agasala ki te lalolagi e auala i te tagata e tokotasi [Atamu], a ko te mate e auala i te agasala, kae ne faka‵solo atu a te mate ki tino katoa me ko agasala a latou katoa.” (Loma 5:12) Mai te sē faka‵logo ki te Atua, ne agasala a Atamu. Ne galo atu ei tena fakamoemoega ke ola ki te se-gata-mai kae fakamuli ifo ne mate a ia. Ona ko tatou ne ‵tupu mai i a ia, ne maua foki ne tatou te tulaga agasala. Ne iku atu ei ki te mauaga ne tatou o masaki, te olaga matua, mo te mate. E fetaui eiloa te fakamatalaga tenei o te pogai e ‵mate ei tatou mo mea ko iloa ne saienitisi ki te mauaga ne tama‵liki  a nisi uiga mo faifaiga a olotou mātua. Kae e mata, ko oti ne fai ne te Atua se mea ke faka‵lei aka ei te tulaga tenei?

Ao, ko oti ne fai ne te Atua a fakatokaga ke fakasaoloto io me toe ‵togi mai a te mea ne galo i a Atamu mō ana fanau, te fakamoemoega ki te ola se-gata-mai. Ne fai pefea ne te Atua te mea tenā?

“Me i te ‵togi o te agasala ko te mate,” ko muna i te Tusi Tapu i te Loma 6:23. E fakauiga loa a te mea tenei me i te mate ko te ikuga o te agasala. Ne agasala a Atamu, tela la, ne mate a ia. E penā foki loa, e agasala tatou kae e ‵tau o maua ne tatou a te ikuga o te agasala, ko te mate. Kae e seai se ‵se o tatou, i te fa‵nau mai ki te tulaga agasala tenei. Tela la, ne uga mai eiloa mo te alofa ne te Atua tena tama, ko Iesu ke talia ne ia te “‵togi o te agasala” mō tatou. E pefea la?

Ona ko te mea ne aumai ne te tagata e tokotasi, te tagata ‵lei katoatoa ko Atamu, a te agasala mo te mate ki a tatou e auala i te sē fakalogo, e ‵tau o fakasaoloto ne se tagata ‵lei katoatoa ke oko ki te mate a tatou mai te amoga ‵mafa tenā. E fakamatala mai penei te Tusi Tapu: “Me e pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi, e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi.” (Loma 5:19) A Iesu ko te “tino e tokotasi” tenā. Ne tiaki ne ia te lagi kae ne fai mo fai se tagata ‵lei katoatoa  *, kae mate mō tatou. Ne iku atu i ei ki te mafai o maua ne tatou se tulaga amiotonu i mua o te Atua kae maua te fakamoemoega ki te ola se-gata-mai.

Kaia la ne manakogina ei ke mate a Iesu ko te mea ke fakataunu a te mea tenei? E mata, ne seki mafai fua ne te Atua Malosi Katoatoa o fai atu se fakatonuga ke talia a tamaliki a Atamu ke ola ki te se-gata-mai? E mautinoa eiloa me ne maua ne ia a te pulega ke fai penā. Kae ne mafai o fakaseaoga ei tena tulafono ne fai atu me i te ‵togi o te agasala ko te mate. A te tulafono tenā e sē se tulafono fua telā e mafai o fakaseaoga io me e ‵fuli ki te mea e ‵lei ei a te tino. Se fakavae mō te fakamasinoga tonu.—Salamo 37:28.

Moi ne fakaseaoga ne te Atua a te fakamasinoga tonu i te taimi tenei, ne mafai o mafau‵fau a tino me ka fai foki ne ia penā i nisi mea. E mata, ka ‵lei a te fakaikuga  me ko oi i tamaliki a Atamu e ‵tau o maua ne latou a te ola se-gata-mai? E mata, ka fakatalitonugina a ia e pelā me se tino e tausi ki ana folafolaga? A te taofi ‵mau o te Atua ki te fakamasinoga tonu i te taumafai ke toe maua te ‵tou fakaolataga se fakatalitonuga ki a tatou me ka fai faeloa ne ia a te mea tonu.

E auala i te mate o Iesu e pelā me se taulaga, ne ‵tala mai ei ne te Atua a te auala ki te ola se-gata-mai i te lalolagi Palataiso. Masaua la a pati a Iesu i te Ioane 3:16: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” Tela la, a te mate o Iesu se fakaasiga o te fakamaoni o te Atua ki te faiga o fakamasinoga ‵tonu, kae maise eiloa tena alofa lasi mō tino.

Kaia ne ‵tau ei o logo‵mae kae mate a Iesu i te auala telā e fakamatala mai i te Tusi Tapu? Mai te fakafesagai atu ki te ‵toe tofotofoga faigata kae tumau i te fakamaoni, ne ‵teke atu ei a Iesu ki pati katoa a te Tiapolo me ka se tumau a tino i te a‵lofa fakamaoni ki te Atua mai lalo i tofotofoga. (Iopu 2:4, 5) E mafai o foliga mai me ne ‵tonu a pati konā i te taimi ne fakaosooso ei ne Satani a Atamu ke agasala. Kae ko Iesu—telā ne ‵lei katoatoa e pelā mo Atamu—ne tumau eiloa i te fakalogo faitalia te ‵mafa o logo‵maega. (1 Kolinito 15:45) Ne fakamaoni atu ei ne ia me ne mafai foki o fakalogo a Atamu ki te Atua moi ne manako a ia ki ei. Mai te kufaki i lalo i tofotofoga, ne tuku mai ei ne Iesu se fakaakoakoga ‵lei ke tau‵tali atu ki ei. (1 Petelu 2:21) Ne taui eiloa ne te Atua a te fakalogo ‵lei katoatoa o Iesu, mai te tukuatuga ki a Iesu a te ola telā e se mafai o toe tamate i te lagi.

Ne tupu tonu eiloa a te mate o Iesu. Ko ‵tala mai nei te auala ki te ola se-gata-mai. E fia ola koe ki te se-gata-mai? Ne fakaasi mai ne Iesu a mea e ‵tau o fai ne tatou i ana pati konei: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.”—Ioane 17:3.

E ‵kami atu eiloa ne tino ‵lomi o te mekesini tenei a koe ke tauloto ki mea e uke atu e uiga ki a Ieova, te Atua tonu, mo tena Tama, ko Iesu Keliso. Ka fia‵fia eiloa a Molimau a Ieova i tou fa‵kai ke fesoasoani atu ki a koe. E mafai foki o maua ne koe a fakamatalaga aoga māfai e fanatu koe ki te motou fakatuatusi i te itanei ko te www.pr418.com.