Mwaarowa waakhula sai mwaakohiwe so: “Munniphavela okhala mahiku otheene?” Anamunceene yaarowa waakhula wira ‘aayo’ anniphavela, masi yaamuhimya-tho wira khivaniweryaneya okhala mahiku otheene. Maana okhwa oniirela mpantta okumi ahu, niire so, ti emalelo ahu.

Sai vaakhanle wira mukohiwe so: “Nyuwo munniphavela okhwa?” Okhala wene anamunceene yaarowa waakhula wira nnaari. Mwaha wa xeeni? Mwaha woowi nnaamwi sinikhumelelaka itthu sooxankiha, hiyo nimphavela okhala akumi. Tthiri Muluku aapattunxe apinaatamu ni yootthuna ya okhala voohimala. Biibiliya onihimya wira Muluku “òhela tho mmurimani mwa atthu warya wohimala”.​—Musuweli 3:11, Biblya Exirima.

Mooriipiha murima, okumi wa apinaatamu khonipisa. Exeeni ekhumelenle? Nto niireke Muluku oopaka etthu wira ophuke muxankiho owo? Biibiliya onnaakhula nikoho nlo mwa enamuna yoohakalaliha maana ti yeeyo yaamwiirinhe Yesu ohaawa ni okhwa.

Ikapiitulu 3 soopacerya sa eliivuru ya Biibiliya ya Maphattuwelo, sinninleela wira Muluku aahaavaha eparakha anamathelana oopacerya, Adamu ni Eva, ya okhala mahiku otheene; nave-tho aahaaleela ele yaakhanle aya oopaka wira eyo eweryaneye. Ikapiitulu iyo sinnooniherya ele yaawiirinhe Adamu ni Eva opweteiwa yoolipelela eyo. Yowiiraneya eyo ennilavuliwa ni masu vakhaani paahi ni ookhweya; nto eyo enniwiiriha akina woonaka wira eyo ehantisi paahi. Masi moolikana ni Ivangelyo, eliivuru ya Maphattuwelo enninleela saana itthu saakhumelenle. *

Ohiiwelela wa Adamu exeeni okumihenrye aya? Biibiliya onaakhula so: “Mutthu mmosá pahi t’oruhale etampi mulaponi: etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”. (aRoma 5:12) Mwaha wa ohimwiiwelela Muluku, Adamu aattheka. Awo aayeleela eparakha ya okhalana okumi woohimala ni ahookhwa. Ntoko osuulu aya, hiyo noorava etampi aya. Ti maana aya ninwereiwa ahu, wuuluvala ni okhwa. Eyo ennivarihana ni ele masientista aphwannye aya voohimya sa moota mikhalelo sa mwaana sinilikana aya ni sa anamuyari awe. Nto niireke Muluku oopaka etthu wira omalihe muxankiho owo?

Tthiri Muluku oopaka mareheryo wira onoopole, aahiiso oliva ele Adamu yaakomphe aya, eyo piiyo, yoolipelela ya okhalana okumi ohinimala. Nto Muluku opanke sai eyo?

ARoma 6:23 oni: “Ale anvarela muteko etampi anniliviwa n’ukhwa”. Eyo enitaphulela wira okhwa okhumenle mwaha wa etampi. Adamu aattheka, nto ti maana aya akhwiiye aya. Moolikanasa, hiyo-tho noottheka nave ninnookhwa. Nnaamwi hiyo nihirina mulattu, niyariwe ni mukhalelo owo woottheka. Muluku yoowo ori oophenta, oomuruma Mwanawe, Yesu, wira oniliverye etampi eyo. Moota xeeni?

Okhala wira etampi ni okhwa ekhumelenle mwaha wa ohiiwelela wa mutthu mmosa oomalela, eyo piiyo, Adamu, nto aanitthuneya-tho okhwa mutthu mukina oomalela wira onoopole mwaha wa etampi eyo. Biibiliya onitthokiherya so: “Ntoko ohìwelela wa mutthu mmosá wakhalihalyaya anatampi atthu othene, siso-tho wiwelela wa mutthu mmosá onnakhaliha anaxariya atthu yawo othene”. (aRoma 5:19) Mutthu owo mmosa oonihenrye “wiwelela” ti Yesu. Owo aahikhuma wiirimu khurwa valaponi ntoko mutthu oomalela *, ni khukhwa wira onoopole. Eyo ehiiriha wira vaweryaneyeke hiyo okhala anaxariya vamaithoni va Muluku ni ophwanya-tho eparakha ya okumi ohinimala.

Nto xeeni Yesu aatthuneya awe okhwa wira eyo eweryaneye? Niireke Muluku yoowo ori Oowerya Sotheene khaawerya ohiya osuulu wa Adamu okhalaka mahiku otheene? Tthiri owo aahikhalana owerya woopaka eyo. Masi eyo yaarowa wooniherya ohiiwelela nlamulo nawe noowi ‘ohiiwelela onnikumiherya okhwa’. Yooruma eyo yaari etthu yuulupale maana khiyaatthuneya oturukiwa. Tthiri eyo yaari etthu ya xariya.​—Esalimo 37:28.

Muluku aahirumeela exariya okathi ole, masi atthu akina waaniheryasa pooti okohaka akhala wira owo anwerya opaka itthu mwa enamuna ekina yoolokexa. Mwa ntakiheryo, niireke vaarowa okhala vaxariya Muluku omuthanlaka ole aarowa  ophwanelela okumi ohinimala eriyari ya osuulu wa Adamu? Niireke Muluku anvarexexa yooleiherya awe? Ovarexexa exariya awe ni wiimananiha vanceene wira noopowe onooniiriha okupali wira Muluku okathi wotheene onipaka itthu sooloka.

Orweela wa mukuttho wa Yesu, Muluku oopaka mareheryo wira apinaatamu eweryeke ophwanya okumi ohinimala, mParayiisu valaponi. Mwa yoolepa ya Yohani 3:16, Yesu aalavunle so: “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. Tthiri okhwa wa Yesu khahiyo paahi woonihenrye wira Muluku khonihiya weettela exariya awe, masi-tho onooniherya waaphenta wawe apinaatamu.

Xeeni Yesu aivaherenrye awe wira ohaawe ni okhwa mmakhalelo ale ootakhala ntoko sinitthokiherya aya Ivangelyo? Mwaha wa ovilela weehereriwa wuulupale ni ovikaniha okhala oororomeleya, Yesu aahikhootta soweeha sotheene sa Diabo yoowo aakupali wira apinaatamu otheene khiyaarowa ovikaniha ororomeleya wa Muluku akhala wira yaamweehereriwa vanceene. (Yobi 2:4, 5) Muupuwelo wa Satana waakhala ntoko wekeekhai nuumala owerya onwoka Adamu. Masi Yesu yoowo aari oomalela ntoko Adamu, aahivikaniha wiiwelela nnaamwi aahaaxiwe. (1 aKorinto 15:45) Nave-tho aahooniherya wira Adamu yanwerya omwiiwelela Muluku vaakhanle wira yaaniphavela. Mwaha woovilela weehereriwa wuulupale, Yesu oonivaha ntakiheryo wira nitthareke. (1 Pedru 2:21) Muluku oomutthuvela Mwanawe mwaha wa wiiwelela wawe woomalela, ni onvaha okumi ohinikhwa wiirimu.

Tthiri, okhwa wa Yesu ohiiraneya. Vano yoohuliwa ephiro ya ekumi ehinimala. Niireke nyuwo munniphavela ophwanya ekumi eyo? Yesu aahihimya ele nintthuneya ahu opaka, vaavo aalavunle awe so: “Ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”.​—Yohani 17:3.

Ale alempe erevista ela annoolattulani wiixutta itthu sikina voohimya sa Yehova yoowo ori Muluku eekeekhai, ni voohimya sa Mwanawe, Yesu Kristu. Anamoona a Yehova a muttetthe anyu anoohakalala wookhaliheryani opaka eyo. Wira mphwanye soohimmwa sikina, xontte mukele esaite ahu www.pr418.com.