Ano an imo ibabaton kon pakianhan ka, “Karuyag mo ba mabuhi ha waray kataposan?” Kadam-an an bangin bumaton hin “oo,” pero para ha ira baga hin imposible ito. Nasiring hira, an kamatayon bahin han kinabuhi, an natural nga dadangatan han aton pag-eksister.

Kondi paonan-o man kon baliktaron an pakiana, ngan pakianhan ka, “Andam ka na ba mamatay?” Kasagaran, kadam-an an mabaton hin diri. Ano an iginpapakita hini? Bisan pa han problema ngan kakurian, an aton natural nga hingyap amo an mabuhi. Iginpapakita han Biblia nga ginlarang han Dios an tawo nga may hingyap nga mabuhi. Ngani, nagsiring ito nga “iya man iginpahamutang an kadayonan ha ira kasingkasing.”—Eklesiastes 3:11.

Kondi ha reyalidad, an tawo diri nabubuhi ha waray kataposan. Ano an nahitabo? Ngan may ginhimo ba an Dios basi masolusyonan an problema? Nakakaliaw an baton han Biblia, ngan may kalabotan ito ha kon kay ano nga nag-antos ngan namatay hi Jesus.

An siyahan nga tulo nga kapitulo han libro han Biblia nga Genesis nagsusumat nga gintagan han Dios an siyahan nga mag-asawa, hira Adan ngan Eva, hin paglaom nga mabuhi hin dayon, ngan ginsumatan hira kon ano an ira sadang buhaton basi magkaada hito. Katapos iginhuhulagway han asoy an ira pagtalapas ha Dios nga nagresulta ha kawad-i nira hito nga paglaom. Simple la an istorya—sobra kasimple salit gintagad ito han iba nga susmatanon la. Pero an Genesis, pariho ha Ebanghelyo, nagpapakita nga tinuod ito ngan uyon ha kasaysayan. *

Ano an resulta han pagtalapas ni Adan? An Biblia nabaton: “Pinaagi han usa nga tawo [hi Adan] an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.” (Roma 5:12) Pinaagi ha pagtalapas ha Dios, nakasala hi Adan. Salit nawad-an hiya han paglaom nga mabuhi hin dayon, ngan ha urhi namatay. Tungod kay tulin kita niya, napanunod naton an iya pagin makasasala. Sugad nga resulta, nagkakasakit kita, nalalagas, ngan namamatay. Ini nga pagsaysay uyon ha nadiskobrehan han syensya mahitungod ha kon paonan-o napapanunod han anak an pipira nga kalidad han ira kag-anak. Pero may ginhimo ba an Dios basi solusyonan an problema?

Oo, naghimo an Dios hin paagi basi lukaton, o paliton utro, an nawara ni Adan—an paglaom nga mabuhi ha kadayonan. Paonan-o ito ginhimo han Dios?

An Roma 6:23 nasiring: “An bayad han sala amo an kamatayon.” Karuyag sidngon, an kamatayon amo an resulta han sala. Nakasala hi Adan salit namatay hiya. Nakakasala liwat kita, salit namamatay kita. Kondi diri naton sala nga igin-anak kita nga makasasala. Tungod hito, mahigugmaon nga iginpadara han Dios an iya Anak—hi Jesus—basi karawaton an “bayad han sala” para ha aton. Paonan-o?

Tungod kay perpekto nga tawo hi Adan nga amo an hinungdan han sala ngan kamatayon pinaagi ha pagin diri masinugtanon, perpekto liwat nga tawo nga masinugtanon tubtob ha kamatayon an kinahanglan basi matalwas kita tikang hito nga kahimtang. An Biblia nasiring: “Sugad la nga pinaagi han pagkadiri-masinugtanon han usa nga tawo, damu an nagin makasasala, sugad man pinaagi han pagkamasinugtanon han usa nga tawo, damu an magigin matadong.” (Roma 5:19) Hi Jesus iton ‘masinugtanon nga usa nga tawo.’ Bumaya hiya ha langit, nagin perpekto nga tawo *, ngan namatay para ha aton. Sugad nga resulta, posible na nga magin matadong kita ha atubangan han Dios ngan magkaada paglaom nga mabuhi ha waray kataposan.

Kondi, kay ano nga kinahanglan pa mamatay hi Jesus basi matuman ini? Diri ba puydi maghimo na la an Dios nga Makagarahum ha ngatanan hin sugo nga magtutugot ha katulinan ni Adan nga mabuhi ha waray kataposan? Sigurado nga may awtoridad hiya nga himoon ito. Pero kon ito an iya hihimoon, mababalewaray an iya balaud nga an bayad han sala amo an kamatayon. Diri ito simple nga balaud nga puydi la balewarayon o bag-uhon kon karuyag niya. Basihan ito han tinuod nga hustisya.—Salmo 37:28.

Kon ginbalewaray han Dios an hustisya hini nga higayon, bangin maghunahuna an mga tawo nga hihimoon liwat niya ito ha iba nga kahimtang. Pananglitan,  magigin patas ba hiya ha pagpili kon hin-o ha tulin ni Adan an angay tagan hin kinabuhi nga dayon? Masasarigan ba hiya ha pagtuman han iya mga saad? Han ginhihimo ni Jehova an mga paagi basi matalwas kita, gintipigan niya an iya suruklan han hustisya; nagpapasarig ini ha aton nga iya pirme hihimoon an husto.

Pinaagi han halad nga kamatayon ni Jesus, gin-abrihan han Dios an dalan tipakadto ha kinabuhi nga dayon ha Paraiso. Tagda an ginsiring ni Jesus ha Juan 3:16: “Hinigugma gud han Dios an kalibotan salit iginhatag niya an iya bugtong nga Anak basi an tagsa nga nagpapakita hin pagtoo ha iya diri mamatay kondi magkaada kinabuhi nga waray kataposan.” Salit an iya kamatayon kapahayagan diri la han marig-on nga hustisya han Dios, kondi labi na han Iya daku nga gugma ha mga tawo.

Pero kay ano nga kinahanglan pa mag-antos ngan mamatay hi Jesus ha masakit nga paagi sugad han iginhulagway ha mga Ebanghelyo? Pinaagi ha pagpabilin nga matinumanon bisan pa han duro nga pagsari, napamatud-an ni Jesus nga sayop an akusasyon han Yawa nga waray magpapabilin nga maunungon ha Dios durante han pagsari. (Job 2:4, 5) Baga hin tinuod ito han nasulay ni Satanas an perpekto nga hi Adan. Pero hi Jesus—an perpekto nga katugbang ni Adan—nagpabilin nga masinugtanon bisan pa han duro nga pag-antos. (1 Corinto 15:45) Hito nga paagi, napamatud-an niya nga mahimo unta sumugot hi Adan ha Dios kon karuyag ni Adan. Pinaagi ha pagpabilin nga matinumanon bisan pa han pagsari, nagbilin hi Jesus hin susbaranan nga angay naton sundon. (1 Pedro 2:21) Ginbalosan han Dios an iya Anak pinaagi ha paghatag hin diri mamaratyon nga kinabuhi ha langit.

Nahitabo gud an kamatayon ni Jesus. Posible na kita mabuhi hin dayon. Karuyag mo ba mabuhi ha kadayonan? Iginpakita ni Jesus an sadang naton himoon: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.”—Juan 17:3.

Gin-aaghat ka han mga nagpupublikar hini nga magasin nga mahibaro hin dugang mahitungod kan Jehova, an tinuod nga Dios, ngan ha iya Anak, hi Jesu-Kristo. An mga Saksi ni Jehova malilipay ha pagbulig ha imo. Makakakuha ka liwat hin mapulsanon nga impormasyon ha amon website, www.pr418.com/war.