Ana mpaka ajanje wuli mundu ali ŵawusisye kuti, “Ana akusaka aŵe ni umi kwangamala?” Ŵandu ŵajinji mpaka ajanje kuti akusaka nambo akusaganisya kuti yeleyi ngaŵa mkomboleka. Akusaganisya kuti Mlungu ŵatupanganyisye kuti tupagwe kaneko tuwe.

Nambi mpaka ajanje wuli mundu ali ŵawusisye kuti, “Ana akusaka kuwa?” Mundu jwambonembonepe mpaka ajanje kuti ngakusaka. Yeleyi yikutukamucisya kumanyilila kuti ŵanduwe tukusasacilila kuŵa ni umi mwangasamala kandu yakusawusya yatukusasimana nayo. Baibulo jikusalosya kuti Mlungu ŵatupanganyisye ni mtima wakusaka kuŵa ni umi. Mwambone jikusasala kuti, “Mlungu ŵapele ŵandu mtima wakusaka kuŵa ni umi mpaka kalakala.”—Mlaliki 3:11.

Nambo yisyene yakwe yili yakuti ŵandu ŵangatama ni umi mpaka kalakala. Ana calemwecekwe cici? Ana pana cilicose catesile Mlungu pakusaka kutukulupusya? Yajikusajanga Baibulo pa nganiji yili yakutamika mtima pasi, soni yikusakamulana ni magongo gakwe Yesu ŵalasile soni kuwa.

Macaputala gatatu gandanda m’buku ja Genesis gakusatusalila kuti Mlungu ŵamsalile Adamu ni Hawa kuti catame ni umi kwangamala. Nambosoni ŵasalile yakusosekwa kutenda kuti ajendelecele ni umiwu. Nganiji jikusatusalilasoni yayatendekwe kuti Adamu ni Hawa alepele kupikanila Mlungu ni kulepela kutama ni umiwu kwangamala. Ngani ja Adamu ni Hawa akusajisala mwangasawusya mwati ŵandu ŵane akusagamba ganisya kuti jili mpela adisi. Nambo mwakulandana ni mabuku ga Ngani Syambone, nombe najo buku ja Genesis jikwete maumboni gakulosya kuti yinduyi yatendekwe. *

Ana pana yakuyicisya yatuli ligongo lya ungapikanila wa Adamu? Baibulo jikusajanga kuti: “Ulemwa wayice pacilambo capasi ligongo lya mundu jumo [Adamu], nipo ulemwawo wayice naco ciwa. M’yoyo ciwa cijendelecele kwa ŵandu wosope ligongo jwalijose ŵalemwisye.” (Aloma 5:12) Adamu ŵalemwisye ligongo lyakuti nganampikanila Mlungu. Yakuyicisya yakwe ŵajasile upile wakuŵa ni umi wangamala nipo kaneko ŵawile. Wosopewe twajigalile ulemwa wa Adamu ligongo lyakuti twapagwile kutyocela kwa jwalakwe. Ligongo lya yeleyi, wosopewe tukusalwala, kalambala soni kuwa. Yeleyi yili yakamulana ni yakusasala ŵasayansi pakwamba yakuti mwanace pakupagwa akusajigalila yineyakwe kutyocela kwa acinangologwe. Nambo ana pana yiliyose yatesile Mlungu pakusaka kutukulupusya?

Mlungu ŵalinganyisye yakuti atukulupusye, kapena kuti kuwucisya cindu ciŵajasile Adamu kwa ŵanace ŵakwe. Cindu celeci cili kutama ni umi wangamala. Ana Mlungu ŵatesile catuli yeleyi?

Lilemba lya Aloma 6:23 likusasala kuti, “Malipilo ga ulemwa cili ciwa.” Yeleyi yigopolela kuti ciwa cikusayika ligongo lya ulemwa. Adamu ŵawile ligongo lyakuti ŵalemwisye. M’yoyosoni, m’weji tukusawa ligongo lya ulemwa. Tukusaŵa mpela tukulipila ulemwa waŵatupelele Adamu, pakuŵa jwalakwe ni juŵalemwisye. Nambo Mlungu pakusaka kutukulupusya ŵatumisye Yesu, jwali Mwanagwe, kuti atuwombole ku ulemwa. Ana ŵatuwombwele mwatuli?

Mundu jumo, Adamu jwaŵaliji jwamlama ŵayikasisye ulemwa ni ciwa ligongo lya ungapikanila wakwe. M’yoyosoni pasosekwagwa mundu jumo jwamlama jwakapikanile mpaka ciwa cakwe kuti atukulupusye ku ciwa. Baibulo jikusasala kuti, “Mpela muyaŵelele kuti ŵandu ŵaliji ŵakulemwa, ligongo lya ungapikanila wa mundu jumo jula, m’yoyosoni ŵandu akusasimanikwa kuti ali ŵakulungama ligongo lya kupikanila kwa mundu jwinesoni jumpepe.” (Aloma 5:19) “Mundu jwinesoni jumpepe” jwakumkolanga pa lilembali ali Yesu. Jwalakwe ŵatyosile kwinani, nikuŵa mundu jwamlama *, kaneko ŵawile pakusaka kutukulupusya. Yeleyi yitendekasisye kuti tuŵe paunasi wambone ni Mlungu soni kola cembeceyo ca umi wangamala.

Nambo ligongo cici yaliji yakuŵajilwa kuti Yesu awe kuti yeleyi yitendekwe? Ana ngamkaniyikomboleka kuti Mlungu Jwamaciligose agambe kulamula kuti ŵanace ŵa Adamu atameje ni umi kwangamala? Yikakombolece ligongo jwalakwe ŵakwete ukumu wakutenda yeleyo. Nambo kutenda yeleyo kukaliji kusisyana ni lilamusi lyaŵasasile kala lyakuti malipilo ga ulemwa cili ciwa. Pangali cilicose campaka cityosye lilamusi lyakusosekwali kapena kulicenga. Ligongo likusalosya kuti Yehofa ali jwacilungamo.—Salimo 37:28.

Mlungu akakase lilamusi liŵasasile jikali, ŵandu akatandite kayicila naga jwalakwe cacitenda yacilungamo pa yindu yine. Mwambone, ŵandu akatandite kayicila naga Mlungu cacisagula ŵakwinjila m’cilambo  casambano mwangalola ngope. Akakayicilesoni naga yosope yaŵaŵecete yicikwanilicikwa. Nambo ligongo lyakuti ŵatesile yacilungamo pakulinganya yakuti citukole umi wangamala, tukusakulupilila kuti cacikwanilisya yiliyose yaŵecete.

Mlungu ŵatumisye Yesu kuti catuwile mpela mbopesi pakusaka kuwugula litala lyakuti citupate umi wangamala m’cilambo capasi ca Paladaiso. Alole yaŵaŵecete Yesu pa Yohane 3:16: “Mlungu ŵacinonyele cilambo capasi mnope mwakuti jwalakwe ŵampelece Mwanace jwakwe jumopejo ni kuti jwalijose jwakukulupilila mwa jwalakwe akawa nambo akole umi wangamala.” M’yoyo, ciwa ca Yesu cikusalosya kuti Mlungu akusiŵanonyela mnope ŵandu nambosoni kuti akusatenda yacilungamo ndaŵi syosope.

Ligongo cici Yesu ŵasosekwaga kulagasika soni kuwa ciwa cakupweteka mnope mpela mwasalile m’mabuku ga Ngani Syambone? Atamose kuti Yesu ŵasimene ni yipwetesi, jwalakwe ŵajendelecele kuŵa jwakulupicika. Yeleyi yatendekasisye kuti asisye unami wa Satana wakuti mundu ngaŵa mkuŵa jwakulupicika pakusimana ni yakulingwa. (Yobu 2:4, 5) Unamiwu wawonecele panyuma pakuti Satana atendekasisye Adamu jwaŵaliji jwamlama kuti alemwe. Nambo Yesu jwaŵaliji jwakulandana umlama ni Adamu ŵajendelecele kupikanila atamose paŵasimanaga ni yipwetesi. (1 Akolinto 15:45) Yesu ŵalosisye kuti Adamu akasace akakombwele kumpikanila Mlungu. Ligongo lyakuti Yesu ŵapilile paŵasimanaga ni yakulingwa, jwalakwe ŵatulecele cisyasyo. (1 Petulo 2:21) Mlungu ŵampele Mwanagwe umi wangawa ligongo lya kupikanila kwakwe.

Tukakayicilaga kuti Yesu ŵawile. Jwalakwe ŵawugwile litala lyakuti citupate umi wangamala. Ana akusaka kutama ni umi kwangamala? Yesu ŵatusalile yatukusosekwa kutenda kuti citupate umi wangamala. Ŵaŵecete kuti: “Umi wangamala ugopolela kuti ŵandu ŵamanyilile ŵalakwe ŵali Mlungu jikape ŵakuwona, soni ammanyilile Yesu Klistu juŵamtumile wawojo.”—Yohane 17:3.

Ŵakuwandisya magasiniji akwaŵenda kuti alijiganye yejinji ya Yehofa, jwali Mlungu jwakuwona soni ya Yesu Klistu, jwali Mwanagwe. Ŵamboni sya Yehofa ŵa mumkuli wawo ali ŵakusangalala kwakamucisya. Webusayiti jetu ja www.pr418.com/yao mpaka jakamucisyesoni kulijiganya yejinji.