Faanra fithem be’ ni gaar, “Ga baadag ni ngam par ndariy n’umngin nap’an?” Ma mang e ga ra yog ngak? Yooren e girdi’ e sana yad ra yog ni yad baadag, machane yad ra lemnag ma gowa dabiyog ni nge buch e re n’ey. Yad ma yog ni yam’ e ban’en ni ke mang bang ko yafos rodad, ma aram e n’en nra buch rodad ni gad gubin.

Machane, uw rogon ni faanra fithem be’ ni gaar, “Ga baadag ni nga mum’?” Yooren e girdi’ e yad ra yog ndubrad. Ere, mang e be dag e re n’ey? Yugu aram rogon ni boor e magawon ni gad be mada’nag, machane gad gubin ni dubdad ni ngad m’ad. Bin riyul’ riy e, sunmiy Got e girdi’ ni yad baadag ni ngar pared ndab ra m’ad.

Machane, ka be yim’ e girdi’. Ere, mang e ke buch ma be yim’ e girdi’? Ma gur, bay ban’en ni ke rin’ Got ko re magawon ney, fa? Gad ra felfelan’ ko fulweg riy ni be pi’ e Bible, maku be ayuwegdad ni ngad nanged fan ni gafgow Jesus me yim’.

Dalip ni m’on e guruy u lan fare babyor ko Bible ni Genesis e be yog nnap’an ni sunmiy Got e gal nsom’on e girdi’ ni aram Adam nge Efa, me pi’ e athap ko yafos ndariy n’umngin nap’an ngorow, me yog ngorow e n’en nib t’uf ni ngar rin’ed ya nge yag e re tow’ath nem ngorow. Machane, ku be yog e Bible rogon ndar folgow rok Got nge rogon ni mul e re athap nem u pa’row. Rib tamilang e re chep ney ni be weliy e Bible murung’agen. Machane, bay boch e girdi’ ni yad ma lemnag nre n’em ni be weliy e Bible murung’agen e kemus nib yat. Machane, riyul’ e thin ni bay u lan fare babyor ni Genesis ni bod rogon fapi Gospel.

Ere, mang wenegan ni ke yib ngodad ni bochan e de fol Adam? Baaray e fulweg riy ni be pi’ e Bible. Be gaar: “Denen e yib nga fayleng u daken taabe’ [ni aram Adam], ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Ere, bochan nde fol Adam rok Got ma aram e ke yan i aw ni ke denen. Ma bochan e denen ni rin’, ma aram me mul e athap ko yafos ndariy n’umngin nap’an u pa’, me munmun me yim’. Maku arrogodad pi fak ni kki af e denen rok ngodad. Ma bochan e re denen nem ni ke af ngodad, ma aram fan ni gad ma m’ar, ma gad ma pilibthir, ma gad ma yim’. Ma re machib ney u murung’agen fan ni ma yim’ e girdi’ e ba puluw nga rogon ni ke pirieg e piin llowan’ rogon ni ma af boch ban’en u rarogon reb e gallabthir ngak e bitir rok. Machane gur, bay ban’en ni ke rin’ Got ko re magawon ney, fa?

Arrogon, bay ban’en ni ke rin’ Got ya nge yag ni ngki sulweg bayay fare yafos ndariy n’umngin nap’an ni ke mul u pa’ Adam. Uw rogon ni ke rin’ Got e re n’ey?

Be gaar e Roma 6:23: “Denen e ma pi’ puluwoy ni yam’.” Re n’ey e be yip’ fan ni wenegan e denen e aram e yam’. Ke yim’ Adam ni bochan e ke denen. Maku arrogodad ni gad ma denen, ere aram fan ni gad ma pi’ puluwon e denen ni gad ma tay ni aram e yam’. Bin riyul’ riy e, kan gargelegdad nga fithik’ e denen. Machane, bochan ni gad ba t’uf rok Got, ma aram me pi’ Jesus ni Fak ni nge thang “puluwon” e denen rodad. Uw rogon e re n’ey?

Adam ni ir be’ nib flont e fek e denen nge yam’ i yib nga fayleng ni bochan e de fol. Ere, ba t’uf be’ nib flont ni nge par nib yul’yul’ nge mada’ ko yam’ ya nge yag ni chuwegdad u tan gelngin e denen ni ke af ngodad. Be tamilangnag e Bible ni gaar: “Rogon ni boor e girdi’ ni yan i par ni yad e tadenen ni bochan e taareb e girdi’ nde fol, e ku aram rogon ni boor e girdi’ ni bayi mat’awnagrad Got ngak ni bochan taabe’ ni ke fol.” (Roma 5:19) Kemus ni “taabe’” e yag rok ni nge rin’ e re n’ey ni aram Jesus. I pag tafen u tharmiy nge yib nga fayleng ni ir be’ * nib flont, me yim’ ni fan ngodad. Angin ni ke yib riy e ke mab e kanawo’ ngodad nrayog ni ngad mat’awgad u p’eowchen Got me yag e athap ko yafos ndariy n’umngin nap’an ngodad bayay.

Ere, mang fan nib t’uf ni nge yim’ Jesus ni nge biyuliy e denen rodad? Faanra Got e Gubin Ma Rayog Rok, me ere gathi rayog rok ni nge pi’ e thin ni be yog ni ke pi’ mat’awun pi fak Adam ni nge yag e yafos ni manemus ngorad? Gad manang ni bay mat’awun ni nge rin’ e re n’ey. Machane, faanra rin’ ni aray rogon ma aram e ke darifannag fare motochiyel rok ni be yog ni puluwon e denen e aram e yam’. Rib ga’ fan e re motochiyel ney, ere dabiyog ni nga yugu ni pag ndab ni fol riy ara ni thilyeg. Ya ba puluw nga rogon ni ma rin’ Got boch ban’en nib mat’aw.​—Psalm 37:28.

Faan gomanga de ngongol Got u rogon nib mat’aw ni nge rin’, ma rayog ni nge maruwar boch ban’en ni ma rin’ u wan’ boch e girdi’. Bod ni, faanra yigi mel’eg boch u fithik’ pi fak Adam ni nge yag e yafos ndariy n’umngin nap’an ngorad, ma gur, ra yan i aw nib mat’aw e n’en ni  ke rin’? Rayog ni nge pagan’dad ko pi n’en ni ke micheg ni faanra rin’ ban’en ni aram rogon, fa? Rogon ni ke maruwel Got u reb e kanawo’ nib mat’aw ni ir e ra yognag bayay e yafos ngodad e aram e n’en ni be micheg ngodad ni gubin ngiyal’ nra i rin’ Got e tin nib mat’aw ban’en.

Bochan e yam’ ni tay Jesus, ma aram e ke bing Got e kanawo’ ni ngki yag bayay e yafos ndariy n’umngin nap’an ngodad u Paradis u fayleng. Mu tay fanam i yan ko n’en ni yog Jesus ko John 3:16 ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” Ere, yam’ ni tay Jesus e be m’ug riy rarogon Got ni gubin ban’en ni ma rin’ mab mat’aw, ma rib t’uf e girdi’ rok.

Machane, mang fan nthingari gafgow Jesus me yim’ ni bod rogon ni kan weliy u lan e pi Gospel? Bochan ni par Jesus nib yul’yul’ u fithik’ e tin th’abi mo’maw’ e skeng, ma aram me yag ni ngari micheg nde riyul’ e n’en ni ke yog Moonyan’ ni aram e dabiyog ni nge par e girdi’ nib yul’yul’ ngak Got u nap’an ni yad ra mada’nag boch e skeng nib mo’maw’. (Job 2:4, 5) Tomuren ni yag rok Satan ni nge k’aring Adam ni nge denen, me m’ug ni gowa ba riyul’ e re thin ney. Jesus e taareb rogon ngak Adam nib flont, machane ke yag rok ni nge par nib yul’yul’ u fithik’ e gafgow nrib gel nni tay ngak. (1 Korinth 15:45) I dag ni faanra baadag Adam maku rayog rok ni nge fol rok Got ndabi denen. Bochan e yul’yul’ ni tay Jesus u fithik’ e skeng nib mo’maw’, ma aram me dag e kanawo’ ngodad ni ngad folwokgad riy. (1 Peter 2:21) I tow’athnag Got Fak ko yul’yul’ ni tay me pi’ reb e yafos ngak u tharmiy ni aram e dab ki yim’ biid.

Riyul’ ni yim’ Jesus. Ere, ke mab e kanawo’ nrayog ni ngki yag bayay e yafos ndariy n’umngin nap’an ngodad. Ere uw rogon, ga baadag ni ngam par ndariy n’umngin nap’an, fa? Ke yog Jesus e n’en nib t’uf ni ngad rin’ed u nap’an ni gaar: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”​—John 17:3.

Piin ni kar ngongliyed e re ke babyor ney e yad be pi’ e athamgil nga lanin’um ni ngkum fil boch ban’en u murung’agen Jehovah ni ir e bin riyul’ e Got, nge Fak ni aram Jesus Kristus. Ba felfelan’ e Pi Mich Rok Jehovah ko binaw rom ni ngar ayuweged gur. Ku bay boch ban’en nrayog ni nge ayuwegem ko fare website romad ni www.pr418.com.