Techeʼ ¿a kʼáat wa kuxtal mantatsʼ? Yaʼab máakoʼob aʼalikeʼ u kʼáatoʼob, pero u yojloʼob maʼ tu páajtal. Ku tuklikoʼobeʼ natural u kíimil máak, maʼ tu páajtal bin u kʼexpajal.

Kux túun wa ka kʼáataʼaktech: «¿Listoech wa utiaʼal a kíimil?». Wa natural u kíimil máakeʼ, ¿baʼaxten túun óoliʼ tuláakal máak jeʼel u yaʼalik maʼ listo utiaʼal u kíimileʼ? Lelaʼ ku yeʼesikeʼ maʼ natural ka kíimkoʼoniʼ. Kex táan k-aktáantik yaʼab problemaʼobeʼ maʼ k-kʼáat kíimiliʼ. Dioseʼ tu tsʼáaj tiʼ wíinik u tsʼíibolal u kuxtal minaʼan u xuul. Le Bibliaoʼ ku yaʼalikeʼ «tu tsʼáaj xan tiʼ wíinik u tuukulil minaʼan xuʼulul» (Eclesiastés 3:11).

¿Baʼaxten túun wíinikeʼ maʼ tu páajtal u kuxtal minaʼan u xuul? ¿Yaan wa baʼax tsʼoʼok u beetik Dios utiaʼal u kuxtal máak mantatsʼ? Le baʼax ku yaʼalik le Bibliaoʼ jeʼel u líiʼsik a wóoleʼ yéetel jeʼel u yeʼesiktech baʼaxten muʼyajnaj yéetel kíim Jesuseʼ.

Le capítulo 1 tak 3 tiʼ Génesis, u yáax libroil le Bibliaoʼ, ku yaʼalikeʼ Dioseʼ tu tsʼáaj u páajtalil u kuxtal minaʼan u xuul Adán yéetel Eva, le yáax wíinikoʼoboʼ. Ku yaʼalik xaneʼ tu peʼertoʼob le kuxtaloʼ tumen maʼ tu yuʼuboʼob u tʼaan Diosiʼ. Yoʼolal bix u tsikbaltaʼal le baʼax úuchaʼ yaʼab máax tuklikeʼ chéen cuento. Pero u libroil Génesis, bey xan le Evangelioʼoboʼ, juntaatsʼ u yaʼalikoʼob le baʼax úuchoʼ. *

Tumen maʼ tu yuʼubaj tʼaan Adaneʼ, ¿baʼax úuchi? Le Bibliaoʼ ku yaʼalik: «Le oʼolaleʼ, jeʼel bix tu yoʼolal chéen juntúul máak [Adán] ook le kʼeban way yóokʼol kaab, yéetel tu yoʼolal le kʼeban ook le kíimiloʼ, bey xan úuchik u máan le kíimil tiʼ tuláakal máakoʼ tumen tuláakloʼob kaʼach tsʼoʼok u kʼebantaloʼob» (Romailoʼob 5:12). Úuchik maʼ u yuʼubik tʼaan Adaneʼ kʼebanchaji. Bey úuchik u peʼertik u páajtalil u kuxtal minaʼan u xuuloʼ, yéetel ka máan kʼiineʼ chʼíijeʼ ka kíimi. Como u paalaloʼon Adaneʼ tuláakloʼon t-heredartaj le kʼebanoʼ, le oʼolal k-kʼojaʼantal, k-chʼíijil yéetel k-kíimil. Baʼaleʼ ¿yaan wa baʼax tsʼoʼok u beetik Dios utiaʼal u yutskíintik le kuxtaloʼ?

Jéeoba Dioseʼ yaan baʼax tu beetaj utiaʼal u yantaltoʼon le kuxtal minaʼan u xuul tu peʼertaj Adanoʼ. ¿Baʼax túun tu beetaj?

Le Bibliaoʼ ku yaʼalik: «Tumen le boʼol ku tsʼáaik le kʼebanoʼ letiʼe kíimiloʼ» (Romailoʼob 6:23). Lelaʼ u kʼáat u yaʼaleʼ le kíimiloʼ tiʼ le kʼeban u taaloʼ. Adaneʼ kíimi tumen kʼebanchaji. Toʼon xaneʼ k-kʼebantal le oʼolal k-kíimil. Minaʼantoʼon u culpail le baʼax úuch tu jardinil Edenoʼ, le oʼolal Dioseʼ tu chʼaʼajtoʼon óotsilil, ka tu túuxtaj Jesucristo u luʼs le kʼeban t-heredartoʼ. ¿Bix úuchik u beetik?

Adán, le máax beet u yantal le kʼebanoʼ perfecto kaʼachi, le oʼolal utiaʼal u luʼsaʼal le kʼebanoʼ kʼaʼabéet xan juntúul máak perfecto. Le Bibliaoʼ bey u yaʼalikaʼ: «Jeʼex yaʼab máakoʼob aʼalaʼab yaan u kʼebanoʼob tu yoʼolal u x-maʼ uʼuyajtʼaanil le juntúul máakeʼ, yaʼab máakoʼob xan kun aʼalbil toj u kuxtaloʼob úuchik u yuʼubik tʼaan le juntúuliliʼ máakoʼ» (Romailoʼob 5:19). Le «juntúuliliʼ máak» ku yaʼalik le Bibliaoʼ Jesús. Letiʼeʼ anchaj u pʼatik le kaʼan utiaʼal ka taalak way Luʼum bey juntúul máak perfectoeʼ, * ka tsʼoʼokeʼ kíim t-oʼolal. Lelaʼ tu tsʼáaj tuʼux k-kʼaʼamal tumen Dios yéetel u tsʼaʼabaltoʼon u páajtalil k-kuxtal minaʼan u xuul.

¿Baʼaxten túun anchaj u kíimil Jesús utiaʼal ka yanaktoʼon le kuxtal minaʼan u xuuloʼ? ¿Maʼ wa túun tu béeytal kaʼach u yaʼalik Dios junpuliʼ ka kuxlak minaʼan u xuul u paalal Adán? Jeʼeleʼ, tumen Dioseʼ yaan tuláakal páajtalil tiʼ. Baʼaleʼ wa ka u beet kaʼacheʼ jeʼel u bin tu contra le ley u tsʼaamaʼ: u boʼolil le kʼebanoʼ kíimil. Le leyaʼ maʼ chéen báaxaliʼ; maʼ tu páajtal u kʼeʼekʼexaʼal. Tsʼoʼoleʼ jach kʼaʼanaʼan utiaʼal ka yanak justicia (Salmo 37:28).

Wa ka u pʼat kaʼach Dios juntséelil le leyaʼ jeʼel u tuklaʼal yaan u seguer u tsʼáaik juntséelil u justicia ken u beet uláakʼ baʼaloʼobeʼ. Koʼox aʼalikeʼ, ¿jeʼel wa u yéeyik yéetel justicia máaxoʼob ichil u paalaloʼob Adán kun kuxtaloʼob minaʼan u xuuleʼ? ¿Jeʼel wa  k-confiar de ke mantatsʼ yaan u beetik baʼax ku yaʼalikeʼ? Wa maʼ tu tsʼáaj juntséelil u justicia le ka tu salvartoʼonoʼ, lelaʼ ku yeʼesikeʼ mantatsʼ ken u beet baʼax toj.

Úuchik u túuxtik u Hijo kíimil t-oʼolaleʼ, Dioseʼ tu tsʼáaj u páajtalil k-kuxtal minaʼan u xuul tiʼ junpʼéel Paraíso. Tak Jesuseʼ tu yaʼalaj: «Dioseʼ tumen jach u yaabiltmaj yóokʼol kaabeʼ tu tsʼáaj u juntúuliliʼ Paal, utiaʼal beyoʼ maʼ u xuʼulsaʼal tiʼ le máaxoʼob ken u tsʼáa u fejoʼob tiʼ letiʼoʼ, baʼaxeʼ ka yanaktiʼob kuxtal minaʼan u xuul» (Juan 3:16). Úuchik u kíimil Jesuseʼ, Dioseʼ maʼ chéen tu yeʼesajtoʼon u justiciaiʼ, baʼaxeʼ tu yeʼesaj bukaʼaj u yaabiltmiloʼon.

Baʼaleʼ yaan uláakʼ kʼáatchiʼ: ¿baʼaxten jach kʼaas úuchik u muʼyaj yéetel u kíimil Jesús? Úuchik u chúukpajal u yóol u aguantart tuláakal baʼax beetaʼabtiʼeʼ, tu yeʼesaj chéen táan u tuus Satanás le ka tu yaʼalaj mix juntúul wíinik kun chúukpajal u yóol wa ka túuntaʼak u yóol (Job 2:4, 5). Úuchik u kʼebantal Adaneʼ, jeʼel u tuklaʼal jaaj le baʼax tu yaʼalaj Satanasoʼ. Baʼaleʼ Jesús, juntúul máak perfecto jeʼex Adaneʼ, tu yuʼubaj u tʼaan Dios tak le ka beetaʼab u sen muʼyajoʼ (1 Corintoiloʼob 15:45). Beyoʼ tu yeʼeseʼ wa u kʼáat Adaneʼ jeʼel kaʼach u páajtal u chʼaʼtuklik u yuʼubik u tʼaan Dioseʼ. Le úuchik u chúukpajal u yóol Jesusoʼ tu pʼatajtoʼon junpʼéel maʼalob ejemplo (1 Pedro 2:21). Úuchik u yuʼubik tʼaan u Hijoeʼ, Dioseʼ tu tsʼáaj u páajtalil tiʼ utiaʼal maʼ u kíimil mix bikʼin.

Jesuseʼ jach tu jaajil kíimi, le oʼolal jeʼel u páajtal k-kuxtal minaʼan u xuuleʼ. ¿A kʼáat wa kuxtal minaʼan u xuul? Jesuseʼ tu yaʼalaj baʼax unaj k-beetik: «Lelaʼ letiʼe baʼax ku tsʼáaik kuxtal minaʼan u xuuloʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ» (Juan 17:3).

Le máaxoʼob beetik le revistaaʼ ku invitartikechoʼob maas kaanbal tiʼ Jéeoba, le jaajil Diosoʼ, yéetel tiʼ Jesucristo, u Hijo. U j-jaajkunajoʼob Jéeobaeʼ yéetel kiʼimak óolal jeʼel u yáantkechoʼobeʼ. Jeʼel xan u páajtal a wojéeltik u maasil ich Internet teʼ www.pr418.com/yua.