DICIEMBRE 26 urunak saraqatarojja, oraq khatatiw Simeulue islan 2004 maran sartäna. Ukajj Sumatra, Indonesia markan jikjjatasi. Uka cheqankirinakajj jankʼaki lamar qotat uma saraqer uñjasajja, jankʼakiw qollunakar “¡Smong! ¡Smong!” arnaqasis jaltjjapjjäna, uka arojj tsunami, jan ukajj lamar qotat umaw wali chʼamampi mistunini sañwa arupan muni. 30 minutonakatjja, lamar qotat umajj wali chʼamampiw mistunïna, ukat qʼalwa utanaksa, jiskʼa markanaksa tʼunjarakïna.

Lamar qotat umajj mistunisin walja markanak tʼunjkäna ukanakat Simeulue islajj maynïriwa. Ukanjja, 78.000 jaqenakaw jakasipjjäna, ukampis paqallqonikiw jiwapjjäna. * Jupanakajj aka arunakaruw istʼapjjäna: ‘Oraqetï khatatini ukat qotat umajj jankʼak saraqani ukhajja, jankʼakiw qollunakar jaltjjañasa, kunattejj lamar qotat umajj chʼamampiw mistunini’ sasa. Ukan jakasirinakajj uka arunakar sum istʼapjjäna, kunapachatï oraqejj khatatkäna ukat qotat umajj jankʼak saraqkäna ukhajj lamar qotat umaw mistunini sasaw amuyapjjäna. Ukanakar istʼasaw jaqenakajj qhespiyasipjjäna.

Bibliajj tʼaqhesiñ uruw utjani “ukham tʼaqhesiñsti janiw jichhürkamajj khitis uñjkiti aka oraqe luraski ukürutpacha, ni uka pasatats utjkarakiniti” sasaw qhanañchistu (Mateo 24:21). Ukampis uka arunakajja, janiw aka Oraqejj jaqenakan tʼunjatäniwa sañ munkiti ni mä oraq khatatiw aka Oraq tʼunjani sañsa munkarakiti. Bibliajj siwa: “Oraqejj janipuniw mayjtʼkiti” sasa (Eclesiastés 1:4). Jan ukasti Diosajj uka jachʼa tʼaqhesïwinwa ‘aka Oraqe tʼunjirinakar tʼunjani’. Ukhaw Diosajj tʼaqhesiñanaksa, jan walinaksa chhaqtayjjani (Apocalipsis 11:18; Proverbios 2:22). Ukajj wali ¡sumapunïniwa!

Jachʼa tʼaqhesïwi urunjja, janiw lamar qotat umajj mistunisin mä thiyat jaqenakar jiwarayki ukham jaqenakar jiwaraykaniti. Diosan sutipajj Jehová satawa ukat “Diosajj munasiñawa” sasaw Bibliajj qhanañchistu. Jupasti “aski jaqenakajj oraq katoqapjjani, wiñayatakiw ukan jakapjjarakini” sasaw sistu (1 Juan 4:8; Salmo 37:29). Ukhamajj ¿kunjamsa uka jachʼa tʼaqhesiña urut qhespiyassna? Ukatakejj Bibliar istʼañaw wakisi.

Kunapachas tʼaqhesiñanakasa, jan walinakas chhaqtani uk janiw yatksnati. Jesusajj akham sänwa: “Kuna horasäkanitejj jan ukajj kuna urükanitejj ukjja janiw khitis yatkiti, ni alajjpachankir angelanakasa ni Diosan Yoqapasa, jan ukasti Dios Awki sapakiw yati” sasa. Ukampis “suyapjjapunim  [jan ukajj amuyasipjjapunim]” sasaw ewjjtʼäna (Mateo 24:36; 25:13). ¿Kunatsa? Bibliajj kunanakas janïr akapachajj tukuskipan pasañapäna ukanak sum qhanañcharaki. Kunjamtï Simeulue islankirinakajj oraq khatati ukat qotat umajj jankʼak saraqer uñjapki ukhajj lamar qotat umaw mistunini sasin amuyapkejja, ukhamarakiw akapachan kuna jan walinakatï pasaski ukanak uñjasajj jachʼa tʼaqhesiña urojj wali jakʼankjjatap amuyañasaraki. Uka toqet aka janankir recuadrow mä qawqhanak qhanañchi.

Recuadron qhanañchaski ukanakat yaqhepanakajj uñjasiwayjjewa. Ukampis Jesusajj taqe “ukanak uñjasajj” yatipjjätawa akapachan tukusiñapajj jakʼankatapa sasaw säna (Mateo 24:33). Akham jisktʼasiñäni: “¿Kunapachas taqe ukanakajj 1) oraqpachan pasäna, 2) pachpa tiempon pasäna, 3) jukʼamp jiljjattawayi?” sasa. Cheqas uka tiemponwa jaktanjja.

Estados Unidos marka apnaqer mä chachajja, akham siwa: “Jan walinakat jarkʼaqasiñatak yatiyäwinak istʼañajj [...] jakäwis qhespiyistaspa” sasa. 2004 maran lamar qotat umajj mistunisin jaqenak jiwaraykäna ukhamar mayampi jan purtʼasiñatakejja, uksa toqenjja sistema de alarma satäkis ukanakaw uskusiwayi. Diosajj ukhamarakiw janïr akapach tukuskipan jaqenakar yatiyaski. Bibliajj akham siwa: “Aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasa (Mateo 24:14).

Aka qhepa maranakanjja, Jehová Diosan Testigonakapajj 1.900 millones jila horanakwa 700 arunakata ukat 240 markanakan suma yatiyäwinak yatiyawayapjje. Ukaw akapachan tukusiñapajj wali jakʼankatap uñachtʼayistu. Jupanakajj jaqe  masinakapar wal munasipjje, ukatwa jan qarjtas Diosan juicio urupat yatiyasipki (Mateo 22:39). Aka qellqata katoqatamajj qawqsa Jehová Diosajj munastam ukwa uñachtʼayi, Diosajj “janiw munkiti khitin chhaqañapsa, jan ukasti muniwa taqeninsa [Jupar] kutkatañapa” (2 Pedro 3:9). Ukhamajj wali munasiri Jehová Diosarojj ¿istʼätati?

Simeulue islankirinakajj qotat uma saraqer uñjasajj jankʼakiw qollunakar jaltjjapjjäna, janiw ukharuk qheparapkänti, ukhamatwa qhespiyasipjjäna. Jachʼa tʼaqhesïwi urut qhespiyasiñatakejja, ukhamarakiw mä cheqar jaltjjañasa. ¿Kunjamatsa qhespiyassna? Isaías profetajj ‘qhepa urunakat’ parlkasajj akham sasaw qellqäna: “Jutapjjam, Tatitun qollupar makhatapjjañäni, [...] jupajj jiwasar sarnaqäwinakap yatichañapataki, ukat uka thakipanjam sarañasataki” sasa (Isaías 2:2, 3).

Mä qollu patat taqe kunaw uñjasi, jarkʼaqasiñatakis wali askirakiwa. Niya ukhamarakiw Diosan thakipa uñtʼañampejj pasi, Diosan Arupat yatjjatañajj waljaniruw nayra jakäwinakap jaytañataki yanaptʼaski (2 Timoteo 3:16, 17). Ukham lurasajja, Diosan ‘thakipan sarapjje’, Jupampis sumarak apasipjje ukat suma jarkʼaqataw uñjasipjjaraki.

Ukhamajj janit jumajj ¿Diosan suma uñjatäñsa ukat aka jan wali urunakan jarkʼaqatäñsa munkasma? Bibliajj kunsa ‘qhepa urunakat’ yatichi uk sum yatjjatañamatakiw chʼamañchtʼapjjsma, ukatakejj wali amuyumpi aka yatichäwin utjki uka recuadro yatjjatam. Jehová Diosan Testigonakapajj taqe chuymaw Biblian profecianakap yatjjatañamataki ukat kunjamsa ukarjam sarnaqasma uk yatichañatakejj visittʼapjjerisma. Jan ukajj uka toqet jukʼamp yatjjatañatakejj Internetan jw.org cheqaruw mantasma. ENSEÑANZAS BÍBLICAS > PREGUNTAS SOBRE LA BIBLIA siski ukaru.