IHILO 26 hi sôñ Libuy li nyéé i ñwii 2004, nyeñg isi i i bééna ngui ngandak i bi tihba ôn i Simulu, bebee ni Sumatra, i loñ i Indônésia. Bôt bobasôna i ngwañ tuye ba bé nunuk mangudga ma tuye. Tuye a bi sa iloo héga. Nlélém ngéda, hiki mut a bôdôl ke ngwéé ngii dikôa, a londok le “Tsunami! Tsunami!” Tsunami i yé ngéda mangudga ma tuye ma mbet ngandak, ma loo yak bie ntel, ma kôpna ngii nkoñ. Hala a bi nom bé môm maa ma manut, mangudga makeñi ma kôpna ngii ngandak mandap, ma tjé ki mambai ni minkoñ.

Ôn i Simulu i bé homa nu bisu le i nya Tsunami i tjé. Ikété 78 000 bôt, ndigi bôt basaambok bon ba bi wo. Inyuki ndék bôt yon i bi wo ndigi? * Ngén yada nyoo loñ i, i nkal le: ‘Ibale u nok nyeñg ikeñi, u tehe ki tuye a nsa, ôt ngwéé ngii dikôa inyule ndék ngéda tuye a nkôpna ngii nkoñ.’ I mam ma bi bôk kwél bo, ma bi niiga bôt ba Simulu i tehe biyimbne bi malo ma Tsunami munu mahéñha ma tuye. I emble mabéhna li bi boñ le ba pei nyemb.

Bibel yak yo i mpôdôl jam libe li nlo mu njel, “njiiha keñi, [ntén u] maa ba bé ilo yaga bibéé bi nkoñ ’isi letee ni hanano, y’a ba bé ki to kekikel.” (Matéô 24:21) I njiiha i, i ta bé lisuk li nkoñ isi ni njel bikuu kiki bo nyeñg disi tole ni njel béba ligwéélak bôt ba binam ba ngwélél hisi​—inyule bitééne bi Djob bi yé le hisi hi nom mba ni mba. (Ñañal 1:4) Ndi, i njiiha keñi i yé njel, i jam Djob nyemede a nlona inyu “ôbôs ba ba ñôbôs ’isi,” i ga mélés béba ni mandutu momasôna (Masoola 11:18; Bingéngén 2:22) Kinje bisai di ga kôhna!

Jam lipe li yé le, maselna ni tsunami, nyeñg disi, tole ngéda dikôa di ntjo hié, i njiiha keñi i, i ga nol bé biloñge bi bôt. Bibel i nkal le “Nyambe a yé gwéha.” Nyambe, nu jôl jé le Yéhôva, a mbôn le “bôt ba téé sép b’a kôdôl hisi, ba yén ki mu mba ni mba.” (1 Yôhanes 4:8; Tjémbi 37:29) Lelaa ni u nla boñ inyu pei i njiiha keñi ni inyu kôhna bisai Djob a mbôn? Jam di nlama boñ li yé le: Di emble mabéhna!

Di nla bé yi kel to ngeñ i lisuk li béba ni li mandutu, inyule Yésu a kal le: “Mut nye ki nye a nyi bé kel i to ngeñ i, to añgel ngii, to Man, ndik lsañ nyetama.” Ndi to hala, Yésu a bi béhe bés le: “Yéna péé.” (Matéô 24:36; 25:13) Inyuki di nlama yén péé? Bibel i ntoñle bés lelaa mam ma ga ba i nkoñ isi ilole Djob a nlona tjiba. Nlélém kiki bôt ba Simulu ba bi yi le tsunami i yé njel, ngéda ba bi tehe tuye a nsa kunda yada, yak bés di nyi le lisuk li yé bebee, ngéda di ntehe lelaa  mam ma yé héñha ikété nkoñ isi. Nkéñég matila i yigye ngim mahéñha ma hélha Bibel i mpôdôl.

I yé maliga le, ibale u nyoñ i mam di nsima i nkéñég matila, jada mbus jada, u ga tehe le ma bi bôña kôba i nkoñ isi i ngim likala. Ndi Yésu a bi kal le ngéda di ntehe “mam ma momasôna,” di nlama yi le lisuk li téé yaga i manwemel. (Matéô 24:33) Badba le: ‘Baa imbee ngéda ikété ñañ u bôt ba binam mam mana ma bi bôña (1) ni nkoñ isi wonsôna, (2) i nlélém ngéda, ni (3) ma bedek ndik ngui bet ni bet?’ Ibabé nkaa, di niñil mu ngéda i.

Nkena loñ i Amérika wada a kal le: “I pala béhe bôt, li nla boñ le ba pei nyemb.” Mbus tsunami i Tuye India, ba bi bañ kei, ba bii yo nyoo i homa tsunami i bi bôña inyu boñ le nya jam i, i tiimba ha bañ nol bôt. Nlélém jam won Djob a mboñ, a bi yoñ bitelbene i bisu bi ngéda inyu boñ le bôt ba kôhna mabéhna ilole lisuk li nlo. Bibel i gwé ini mbañ le: “Miñañ minlam mi Ane mini nw’a añlana nkoñ isi wonsôna i ba biloñ gwobisôna mbôgi, ndi to le lisuk li nlo.”​—Matéô 24:14

Ndik inyu ñwii u ntagbe, Mbôgi Yéhôva i bi tégbaha bebee le dikôô di didun diba di ngeñ i likalô, ikété 240 biloñ ni ikété iloo 700 dilémb. Bôlô yés likalô munu dilo di nsôk, i yé toi yimbne ikeñi le lisuk li yé bebee. Mu kiki gwéha inyu mut wap libôk i ntinde bo, Mbôgi Yéhôva i mboñ biliya gwap gwobisôna inyu béhe bôt bape le ngwa mbagi u Djob u nkôôge bihôô bihôô. (Matéô 22:39) Biniigana bini u yé añ hanano, bi ñunda le Yéhôva a ngwés we. Hôya bañ le “[Djob] a ngwés bé le to mut wada a nimil, ndi  ngôñ yé i yé le bobasôna ba pam i nhiel miñem.” (2 Pétrô 3:9, MN) Baa u ga neebe gwéha Djob, u leege ki mabéhna mé ilole lisuk li nlo?

Hoñol le bôt ba Simulu ba bi ôt ngwéé ngii dikôa inyu pei, ngéda ba bi tehe le malép ma tuye ma nsa. Ba bi bem bé le ma témb ma loo. I jam ba bi boñ, li bi boñ le ba pei nyemb. Inyu pei nyemb mu njiiha i yé njel, yak we u nlama ôt ngwéé ngii hikôa ilole ngéda i ntagbe. Hala a nkobla le u boñ mam ma mbéda inyu pei nyemb. Mambe mam? Mpôdôl Yésaya a bi leñ nsébla u u nke letee ni “dilo di nsôk,” hala wee ngéda di niñil i len ini. Nsébla u, u nkal le: “Bôga bés di bedek hikôa hi Yéhôva . . . A’ niiga bés kingéda maéba mé, bés ki d’a hiumul manjel mé.”​—Yésaya 2:2, 3.

I bet ngii hikôa li nhôla we le u tehe haa, a nla ki ba we homa lisolbene. Nlélém jam, i yi manjel ma Djob ni njel yigil i Bibel, hala a nhôla didun di bôt ni nkoñ isi wonsôna i len ini le ba lona mahéñha ikété biniñ gwap. (2 Timôtéô 3:16, 17) Ibale ba mboñ hala, ba mbôdôl “hiumul manjel” ma Djob, ba kôs konangoo yé, ba jôp ki ikété lisolbene jé.

Baa u ga yoñ makidik i neebe nsébla u, u jôp ki ikété lisolbene li Djob munu nledek ngéda unu? Di nti we makénd i tibil wan nkéñég matila u yé i lisuk li nkwel unu, u u ñéba manjom ma ñunda le di niñil i “dilo di nsôk.” Mbôgi Yéhôva i libôga joñ i ga kon maséé i hôla we i tibil nok Bitilna, ni i gwélél gwo i niñ yoñ. U nla ki léba mandimbhe inyu mambadga moñ ibale u nyuuga site yés internet le www.pr418.com. Béñge i hôma le LA BIBLE ET VOUS > QUESTIONS BIBLIQUES.