TANGGAL 26 Desember 2004, masa ma lalo na gogona 9,1 skala Richter di Pulo Simeulue, di Barat Laut ni Sumatra, Indonesia. Sude halak disi mangida na masa di laut. Tompu ma surut aek sian na somal. Pintor marlojong ma nasida tu dolok huhut mandok, ”Smong! Smong!”, na lapatanna tsunami. Dungkon 30 minut, ro ma galumbang na mansai balga. Dibaor ma jabu dohot huta na jonok tu laut i.

Pulo Simeulue ma inganan na parjolo sahali hona tsunami di tingki i. Sian 78.000 halak, holan 7 do na mate. Boasa songon i? * Angka na tading di pulo i mandok, ’Molo ro lalo jala ndang songon na somal be laut, pintor marlojong do hami tu dolok, ala na laho ro ma galumbang na umbalga.’ Sian najolo, angka halak di Simeulue nunga marsiajar mangadopi tsunami marhite mangida na masa di laut. Mangihuthon sipasingot mambahen nasida malua.

Di Bibel, dipatorang do taringot bencana na laho masa. Didok disi, ”Mansai balga do haporsuhon i; sian mula ni hasiangan on rasirasa nuaeng ndang adong dope masa na songon i, tu jolo on pe ndang masa be.” (Mateus 24:21) Alai na didok di ayat i, ndang na laho salpu tano on alani jolma manang alani mara (bencana alam). Alana, marsangkap do Debata na laho tongtong adong tano on. (Parjamita 1:4) Alai, di haporsuhon godang, Debata laho ”mangago angka na mangago tano i”. On ma ujung ni sitaonon dohot angka parjahat. (Pangungkapon 11:18; Poda 2:22) Pasupasu na palashon rohanta!

Ndang songon tsunami, lalo, manang dolok na mapultak, di haporsuhon godang na laho ro ndang mate halak na so marsala. Bibel paboahon, ”Haholongon do Debata.” Jala marjanji do Debata, na margoar Jahowa, ”Teanon ni angka partigor i do sogot tano i, jala tongtong do nasida maringanan disi.” (1 Johannes 4:8; Psalmen 37:29) Songon dia do asa malua hamu sian haporsuhon godang jala mandapot pasupasu? Ingkon diihuthon hamu do sipasingot!

Ndang taboto andigan ujung ni sitaonon dohot hajahaton. Alana, Jesus mandok, ”Anggo arina dohot sadiharina, ndang adong na umbotosa, nang surusuruan na di banua ginjang, nang Anak i; nda holan Ama i!” Alani i, dipasingot Jesus do hita asa sai ”jaga”. (Mateus 24:36; 25:13) Boasa? Dipaboa do di Bibel taringot angka na masa di portibi on andorang so ro ari i. Hamubaon ni laut di Simeulue pasingothon angka halak na laho ro ma tsunami. Songon i ma, angka na masa di portibi on pasingothon hita nunga jonok ajal ni portibi  on. Ida ma kotak taringot angka na masa na disurat di Bibel na pasingothon hita.

Pigapiga na masa na disurat di kotak i, nunga hea masa najolo. Alai, Jesus mandok molo nunga taida ”masa angka tandatanda i”, taboto ma nunga jonok ajal ni portibi on. (Mateus 24:33, Bibel siganup ari) Sungkun ma dirimu, ’Mangihuthon sejarah, andigan do masa angka tanda on (1) di liat portibi on, (2) di tingki na sarupa, jala (3) lam tu segana?’ Tangkas ma, di parngoluonta saonari do i masa.

Sahalak presiden ni Amerika Serikat mandok, ”Sipasingot andorang so masa mara . . . boi paluahon hita.” Dung masa tsunami taon 2004, dibahen ma sistem peringatan di inganan na hona tsunami. Sistem peringatan i mangorui na mate haduan molo masa sisongon i. Suang songon i, dilehon Debata do sipasingot tu hita andorang so ro ariNa. Dipaboa do di Bibel, ”Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso; dung pe i, asa ro ujungna.”—Mateus 24:14.

Di taon na salpu, dilehon Sitindangi Ni Jahowa do lobi sian 1,9 miliar jom laho marbarita na uli di 240 negeri di lobi sian 700 bahasa. Sudena on patuduhon nunga jonok ari ni Debata. Holong ni Sitindangi Ni Jahowa mangonjar roha ni nasida paboahon barita panguhuman ni Debata. (Mateus 22:39) Hatorangan on pe patuduhon holong ni Jahowa tu hamu. Ingot ma, ”Dipangido [Debata], naeng unang ma nian mago agia ise, naeng ma tahe saluhutna sahat tu hamubaon ni roha.” (2 Petrus 3:9) Dijangkon hamu do holong  ni Debata marhite mangihuthon sipasingot naung dilehon?

Taingot ma muse na masa di Simeulue. Ala diida nasida hamubaon di laut, pintor marlojong ma nasida tu dolok; ndang dipaima nasida jolo ro tsunami. Molo diihuthon nasida sipasingot, malua ma nasida. Songon i ma, asa boi malua sian haporsuhon godang haduan, ingkon taihuthon do sipasingot na dilehon tarsongon na marlojong tu dolok. Songon dia do hita mangulahon i? Ditogutogu Debata do panurirang Jesaya manurathon gokkon sian Debata ”di ujung ni angka ari”, i ma di tingkinta saonari. Disi didok, ”Beta hita tanangkohi ma dolok ni Jahowa, . . . asa diajarhon tu hita angka dalanna, jala mardalani hita di angka lapangna.”—Jesaya 2:2, 3.

Marlojong tu dolok mambahen hita mandapot parlinggoman. Suang songon i, mamparsiajari taringot Debata marhite Bibel mangurupi marjuta halak di liat portibi on marhamubaon. (2 Timoteus 3:16, 17) Molo diulahon nasida i, boi ma nasida ’mardalan di dalan ni [Debata]’ jala mangkilala parlinggomanNa.

Dijangkon hamu do gokkon ni Debata jala marlinggom tu Ibana saleleng ari hasusaan on? Las rohanami manogihon hamu manulingkiti taringot parngoluonta saonari di ”tingki parpudi”, marhite hatorangan sian Bibel na adong di kotak na di ginjang. Las do roha ni Sitindangi Ni Jahowa di luatmu mangurupi hamu mandapot pangantusion sian Bibel jala songon dia mangulahon i. Manang, ida ma alus ni sungkunsungkunmu di situs Webnami, www.pr418.com/id. Ida ma di AJARAN ALKITAB > PERTANYAAN ALKITAB DIJAWAB.