E tôñe melep, a ne nyii wo!
MBU 2004 ya ngon awôm a baa é to melu 26, beta mfô’ôsane si a nga wôé abui bôt, ékôte si ya Simeulue. Simeulue a tele abôñe mañ, akôé ya ékôte si ba loone na, Sumatra e si ya Indonésie. Mise me bôte bese me mbe me beme mañ. Mañ me nga bo ndôn a lôté avale me wô’ô zu ma bo. Été été, môt ase a nga taté na, a tube mbil, a kele nkôle yôp a jô’ô na, “Smong! Smong!” Nde ba loone tsunami nalé wôé. Ngule mintyôa é nga zu laban abôñe mañ, a tyam abui menda a minlam.
Ékôte si ya Simeulue, nje ñhe tsunami a nga taté nambe. E bôte 78 000 be mbe be nyiñi wôé, fo’o ve bôte 7 mbe be nga wu. Amu jé fo’o ve bôte 7? * Bôte ya Simeulue ba yeme na: ‘Nge ô yene si é fô’ôsan, ô yene ke mañ me nto ndôn abui, tube minkôle yôp, amu ana’ana mintyôa ya mañ mi mbeme zu laban abôñe mañ.’ Ôsusua na jame te da boban, bôte ya Simeulue be nga yé’é yemelan avale mañ me wô’ô bo éyoñe tsunami a zu. Ntôñane be nga tôñe melebe be nga ve be, ô nga nyii be.
Kalate Zambe a kobô ajô ya beta ébubua. A jô na: “Beta njuk a ye boban aval e ngenan te tame boban ataté ane émo e nga téban a zu kui éyoñe ji, a teke selane na da ye fe bo teke beta boban.” (Matthieu 24:21, Mfefé Nkôñelan) Ve mam bôte ba bo, nge ke beta ébubua éziñ, bia vo’o bo na si é man. Nsôñane Zambe ô ne na, si é tabe nnôm éto. (Ecclésiaste 1:4) Ve beta njuk a zu, a ne jame Zambe a vañe na a bo asu na, a “jiane ba be ajiane si.” Beta njuk ate aye mane mbia be bôte bese a minjuk. (Nlitan 11:18; Minkana 2:22) Ngo’é aval abeñ, jame te da ye bo!
Beta njuk a zu, aye ke funane tsunami, mimfô’ôsane mi si, nge ke minkôle mia yô nduan. Beta njuk ate aye ke wôé bôte bese. Kalate Zambe a jô na, “Zambe a ne nye’an.” Nde fe, Zambe a ne éyôlé na, Yéhôva a ka’a na, “bôt be ne zôsô b’aye nyoñe si, a tabe été nnôm éto.” (1 Jean 4:8; Besam 37:29) Aval avé ô ne kui na ô dañe beta njuk a zu, a bi bibotane Zambe a ka’a bia? Fo’o ve nge wo bo jôme jia: E tôñe melebe ba ve wo.
YEME MAM MA LITI NA, ASU’ULAN É NTO BEBÉ
Bi se ngule ya yeme môs, nge ke éyoñe mbia be bôt, a minjuk mia ye man. Amu Yésus a nga jô na: “Ve alu te a awolo te, te ke môt a yem, ja’ane beange ya yôp, nge Mon, ve Ésa.” Nde fe, Yésus a nga tindi bia na bi ‘mombô.’ (Matthieu 24:36; 25:13) Amu jé? Kalate Zambe a liti bia mam ma ye boban ôsusua na asu’ulan da so. Fo’o ve avale ndône mendim é nga bo na bôte ya Simeulue be yeme na tsunami a zu, mam ma boban émo éyoñe ji, ma liti bia na, asu’ulan é nto bebé. Encadré a ne nlô ajô na: “Mbia be mam ba boban émo, ba liti na asu’ulan é nto bebé,” a ye tu’a liti wo de.
Bi ne jô na, jam ése ya mam me ne encadré ate, me mbe me kui abim éziñ melu mvus. Ve Yésus a nga jô na, éyoñe bia ye yene “mam ma mese,” bia ye yeme na, asu’ulan é nto bebé. (Matthieu 24:33) Sili’i womiene na, ‘Éyoñ évé mam mese bia te yene ma (1) me nga bobane si se, (2) me nga boban éyoñe jia, a (3) me ne ve lumbu abé?’ É ne fo’o été na, bi nga nyiñe melu ya asu’ulan.
AVALE YÉHÔVA A LITI NA, A NYE’E WO
Bill Clinton, njôô bôte wua ya États-Unis a nga jô na: “Éyoñe ba bemene bôt ayap éyoñ ôsusua na, mbia jam a kui . . . bôte ba nyiñ.” Éyoñe tsunami ya mbu 2004 a lôteya, be nga mane ta’a mam asu na, abui bôt é bo teke wu, nge aval ébubua te da beta kui melu ma zu. Avale te fe, Zambe a nga mane ta’a mam, aval a ye lebe bôt ôsusua na asu’ulan da so. Kalate Zambe a jô na: “Mbamba foé ya ayoñe Zambe nyô a ye katebane si se, a ye bo meyoñe mese ndem; wôna asu’ulan de aye bo.”—Matthieu 24:14.
Fo’o ve mbu ya mvus, Bengaa be Yéhôva be nga bo mewolo 1,9 milliard na, ba kañete mbamba foé e mesi 240 a minkobô 700. Ésaé nkañetane mbamba foé ja bobane si se, ja ve bia beta ndeme na, asu’ulan é nto bebé. Bengaa be Yéhôva ba nye’e bôte ba bômane be. Jôme te nje ba ve mengule mese na, be bemene bôt bevok na, môse ya ntyi’ane mejô ô nto bebé. (Matthieu 22:39) Bibotan ô ne bi amu na, wo bo mam wo wôk, bi ne ndem ja liti na, Yéhôva a nye’e wo. Yeme na, ‘[Zambe] a ne te kômbô na, môt éziñ a jañ, ve na, bese be zu kôñelane minlem.’ (2 Pierre 3:9) Ye wo ye fo’o liti Zambe na wo nye’e nye, a tôñe melep a ve wo?
KELE SOBÔ NKÔLE YÔP!
Simesa’an avale bôte ya Simeulue be nga ke sobô minkôle yôp éyoñe be nga yen ane mañ ma bo ndôn; be nga ji’a tup. Ntyi’ane be nga nyoñ ô nga nyii be. Asu na bi nyiñe beta njuk a zu, bia fe bia yiane ke sobô beta nkôl, nge na, bia yiane bo jôm éziñ nté éyoñ é ngenan. Jé bia yiane bo? Zambe a nga jô nkulu mejô Ésaïe na, a tili mbañete wo miasebane “melu ya asu’ulan” ma. Mbañete te wo jô na: “Za’a bi keane beta nkôle ya Yéhôva . . . nnye ate a ye ye’ele bia mezene mé, a bi aye wulu mezene mé été.”—Ésaïe 2:2, 3.
E ke abôbône nkôle yôp a volô wo na, ô kôme yene mam mese ma bobane si. A volô fe wo na, ô bi vôme ya sobô. Avale da fe, e yeme mezene me Zambe e Kalate Zambe été, a volô bemillion be bôte ya si nyô na, be tyendé binyiñe biap. (2 Timothée 3:16, 17) Éyoñe ba bo de, ba taté na, ba “wulu mezene [me Zambe] été.” Zambe a nye’e be, a ba’ale fe be.
Ye wo ye fo’o kañese mbañete ôte, a nyoñe mfi ya mba’alane Zambe a ba’ale wo mbia biyoñe bi? Bia ye’elane wo na, ô kôme fombô encadré a ne nlô ajô na: “Mbia be mam ba boban émo, ba liti na asu’ulan é nto bebé,” asu na ô yeme na, bi nga nyiñe fo’o “melu ya asu’ulan.” Bengaa be Yéhôva ya vôm ô to, ba ye bi meva’a ya volô wo na, ô kôme wô’ô mejô me Zambe, a bo mam wo yé’é ényiñe jôé. Nge ke na, ô ne koone biyalane ya minsili miôé anjeñe mefoé dangan e www.pr418.com. Kele vôm ba loone nkobô fulasi na, LA BIBLE ET VOUS > QUESTIONS BIBLIQUES.
^ É.N. 3 Tsunami ya mbu 2004, a nga wôé bôt a lôté 220 000. A mbe tsunami a nga dañe wôé bôt.
