LO EN zil dan norwas Sumatra, Lendonezi, le 26 Desanm 2004, en tranblemandter ki mezir 9.1 magnitid ti tap en zil ki apel Simeulue. Tou dimoun ki ti ater zot lizye ti’n fikse lo lanmer. Lanmer ti sek en sel kou. Deswit tou dimoun ti konmans tay dan montanny e kriye, “Smong! Smong!” ki vedir tsunami dan zot langaz. Bann gro laroul ti kraz lo lakot e detri laplipar lakaz ek vilaz dan lespas 30 minit.

Zil Simuelue ti sa premye landrwa ki ti ganny tape par sa tsounami ki ti fer bokou dega. Me parmi sa 78,000 dimoun lo sa zil, selman 7 ki ti mor. Akoz zis sa ptigin dimoun konpare avek lezot landrwa? * I annan en proverb dan sa zil ki dir: ‘Si i annan en gro sekous tay dan montanny akoz lanmer pa pou tarde monte pour balye lakot.’ Leksperyans dan lepase in montre ki bann dimoun Simeulue in aprann pour rekonnet ler en tsounami pe vini akoz lanmer i sanz en sel kou e vin sek. Par obei lavertisman ki ti ganny donnen davans zot ti kapab sov zot lavi.

Labib i koz lo en dezas ki pe vini, en gran ladetres “pli terib ki tou sa ki’n deza annan avan, depi konmansman lemonn ziska konmela, e pa pou zanmen ariv ankor.” (Matye 24:21) Me sa pa vedir ki planet Later pou ganny detri akoz sa ki bann imen pe fer oubyen akoz serten katastrof natirel, parski i plan Bondye ki later i reste pour touzour. (Eklezyast 1:4) Sa gran ladetres ki pe vini i plito en dezas kot Bondye pou “detri bann ki detri later” e met en lafen avek mesanste ek soufrans. (Revelasyon 11:18; Proverb 2:22) Pa i pou vreman en benediksyon!

An plis, konpare avek bann tsounami, tranblemandter ek volkan, sa destriksyon ki pe vini pa pou detri bann dimoun inosan. Labib i dir: “Bondye i lanmour” e Bondye ki son non i Zeova in promet ki “bann dimoun drwat pou ganny later e zot pou reste lo la pour touzour.” (1 Zan 4:8; Psonm 37:29) Alor ki mannyer ou kapab sirviv sa gran ladetres e ganny bann benediksyon ki Bondye in promet? Sa pli bon keksoz pou fer i: Obei lavertisman ki ganny donnen davans!

Nou pa konn egzakteman kan mesanste ek soufrans pou fini, akoz Zezi ti dir: “Me konsernan sa zour e sa ler personn pa konnen kan i pou arive, pa menm bann lanz dan lesyel, ni menm Garson Bondye, me Papa tousel ki konnen.” Kantmenm sa, Zezi ti ankouraz nou pour kontinyen “veye.” (Matye 24:36; 25:13) Vey Kwa? Labib i donn nou detay lo ki mannyer sa lemonn pou ete avan ki Bondye i anmenn lafen. Zis parey lanmer ti sek en sel kou e sa sanzman ti averti bann dimoun Simeulue ki en tsounami ti pe vini, bann sanzman ki pou arive dan lemonn pou montre ki lafen i pros. Ki serten  sa bann sanzman ki Labib i koz lo la? Sa bwat ki koz lo serten levennman sokan ki ganny endike dan Labib.

I vre ki serten parmi sa bann levennman oubyen kondisyon ki’n ganny mansyonnen dan sa bwat in deza arive en serten degre dan lepase. Me Zezi ti dir ki ler nou vwar “tou sa bann keksoz arive,” nou pou konnen ki lafen i pros. (Matye 24:33) Demann ou lekor, ‘Ki moman dan listwar tou sa bann keksoz ki’n ganny mansyonnen (1) in arive dan lemonn antye, (2) in ariv an menm tan e (3) lo en pli o nivo ki zanmen oparavan?’ I kler alor ki nou pe viv dan sa letan.

En ansyen prezidan Leta-z-ini ti dir: “Ler en sistenm pour averti bann dimoun i ganny met an plas boner . . . sa i sov lavi.” Apre sa tsounami an 2004, en sistenm lavertisman ti ganny met an plas dan bann landrwa ki ti ganny afekte pour evite ki dimoun i perdi lavi si zanmen sa i ariv ankor. Pareyman, Bondye in met an plas en sistenm lavertisman ki pou ganny donnen avan lafen i arive. Labib in predir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.”​—Matye 24:14.

Zis lannen pase, Temwen Zeova in pas plis ki 1.9 bilyon erdtan pour pres sa bon nouvel dan 240 pei e dan plis ki 700 langaz. Sa devlopman ki pe arive dan nou letan, i en gran laprev ki lafen i pros. Parski bann Temwen Zeova i kontan zot prosen, zot fer tou zefor posib pour averti lezot konsernan zour zizman Bondye ki pe vin vitman. (Matye 22:39) Lefet ki ou kapab benefisye avek sa lenformasyon i montre ki Zeova i kontan ou. Mazinen ki, “[Bondye] pa oule ki personn i ganny detri[r], me ki tou dimoun i arive repanti[r].” (2 Pyer  3:9) Eski an retour ou pou montre ki ou kontan Bondye par obeir lavertisman ki i donnen davans?

Rapel ki sa bann dimoun ki ti reste dan bann vilaz lo lakot Simeulue ti sov dan montanny lemoman ki zot ti vwar lanmer pe sek, zot pa ti espere ziska ki gro laroul ti vini. Zot desizyon pour azir deswit ti vedir zot delivrans. Pour sirviv sa gran ladetres, dan en sans senbolik ou bezwen sov dan montanny avan i tro tar. Ki mannyer pour fer sa? Profet Izai ti ganny enspire pour ekri konsernan en lenvitasyon eksitan ki ti pou ganny donnen ziska “dan bann dernyen zour,” sa letan ki nou pe viv. Sa verse i dir: “Vini, annou mont lo montanny Zeova . . . I pou enstri nou konsernan son semen e nou pou mars dan son santye.”​—Izai 2:2, 3.

Ler ou anler lo en montanny, sa i permet ou vwar tou keksoz pli byen e ou santi ou an sekirite. Pareyman, aprann konn fason fer Bondye atraver Labib pe ed plizyer milyon dimoun dan lemonn antye pour fer bann sanzman dan zot lavi ki pe deza benefisye zot. (2 Timote 3:16, 17) Par fer sa, zot konmans “mars dan . . . santye” Bondye e ganny son laprouvasyon ek proteksyon.

Eski ou pou aksepte sa lenvitasyon e profit sa proteksyon ranpli avek lanmour ki Bondye i ofer ou dan sa bann letan difisil? Nou ankouraz ou pour egzamin byen bann levidans konsernan bann “dernyen zour” dan Labib, ki ganny trouve dan sa bwat, ki dan sa lartik. Temwen Zeova dan ou rezyon ti pou kontan ed ou pour pli byen konpran Labib e osi konman pour aplik sa ki i dir dan ou lavi. Ou osi kapab rod larepons ou bann kestyon si ou al lo nou sit, www.pr418.com. Get anba BIBLE TEACHINGS > BIBLE QUESTIONS ANSWERED.