KE December 26, 2004, ata akamba unyekisọn̄ ama etịbe ke Isuo Simeulue emi odude ke Indonesia. Kpukpru owo ke esụk ẹma ẹkụt nte inyan̄ ọtọn̄ọde ndikebe ata usọp usọp. Mme owo ẹma ẹfehe ẹdọk obot ẹnyụn̄ ẹfiori “Smong! Smong!” emi ọwọrọde akwa mbufụt inyan̄ibom. N̄kpọ nte minit 30 ke oro ebede, mmọn̄ ama ọtọ ofụk obio onyụn̄ owụri ata ediwak ufọk.

Isuo Simeulue ekedi akpa obio emi akwa mbufụt inyan̄ibom oro ekesịmde. Edi ke otu owo 78,000 emi ẹkedụn̄de do, owo 7 kpọt ẹkekpa. Ntak emi owo itiaba kpọt ẹkekpade? * Sia mmọ ẹma ẹnam se mme ete-ete mmọ ẹkedọhọde ẹte: ‘Edieke isọn̄ ọtọn̄ọde ndinyek ndien inyan̄ ọtọn̄ọ ndikebe usọp usọp, ẹfehe ẹka obot, koro mmọn̄ ọyọsọp ọtọ emen obio.’ Se iketịbede inọ mbon Simeulue ke eset ama anam mmọ ẹdiọn̄ọ nte inyan̄ esitiede ke ini akwa mbufụt inyan̄ibom oyomde ndiwọrọ. Mmọ ndikanam item mme ete-ete mmọ akanyan̄a mmọ.

Bible ọdọhọ ke “akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Edi emi iwọrọke ke Abasi ayayak se mme owo ẹnamde m̀mê oto-obot afanikọn̄ osobo isọn̄, sia Abasi oyom isọn̄ emi odu ke nsinsi. (Ecclesiastes 1:4) Utu ke oro, akwa ukụt emi ke Abasi edida ‘isobo mbon oro ẹbiatde isọn̄.’ Ini oro ke idiọkido ye ufen ẹditre. (Ediyarade 11:18; Mme N̄ke 2:22) Idụhe se idinemde ntem!

N̄ko, akwa ukụt iditiehe nte unyekisọn̄ ye oyobio emi ẹsiwotde nti owo ye ndiọi owo. Bible ọdọhọ ke Abasi emi ekerede Jehovah “edi ima,” ndien enye ọn̄wọn̄ọ ke “ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (1 John 4:8; Psalm 37:29) Edi nso ke akpanam man ọbọhọ akwa ukụt oro edide onyụn̄ etiene odu ke ini emi nti n̄kpọ oro Abasi ọn̄wọn̄ọde ẹdisude? Ana anam item oro ẹnọde idahaemi.

Nnyịn ifiọkke ata akpan usen emi kpukpru idiọkido ye ufen ẹditrede, sia Jesus ọkọdọhọ ete: “Baba owo kiet ifiọkke usen ye hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” Edi Jesus ama ọdọhọ n̄ko ete ‘idu ke ukpeme.’ (Matthew 24:36; 25:13) Ntak-a? Bible etịn̄ mme n̄kpọ oro ẹditịbede mbemiso Abasi osobode idiọk ererimbot emi efep. Kpa nte inyan̄ ndikekebe usọp usọp akanamde mbon Simeulue ẹfiọk ke akwa mbufụt inyan̄ibom ọmọn̄ ọwọrọ, kpasụk ntre mme n̄kpọ oro ẹtịbede mfịn ke ererimbot ẹwụt ke utịt ekpere. Ekebe oro odude ke ibuotikọ emi owụt  ndusụk n̄kpọ oro ẹtịbede mfịn, emi Bible ọkọdọhọde ke ẹyetịbe.

Edi akpanikọ ke ndusụk n̄kpọ emi ẹtịn̄de ke ekebe oro ẹsitetịbe. Edi Jesus ọkọdọhọ ke ini ikụtde “kpukpru n̄kpọ emi” ẹtịbede, yak nnyịn ifiọk ke utịt enen̄ede ekpere. (Matthew 24:33) Bụp idemfo ete, ‘Ini ewe ke kpukpru n̄kpọ oro ẹtịn̄de mi ẹtịbe (1) ke ofụri ererimbot, (2) ke ukem ini, onyụn̄ (3) aka iso ọdiọk akan nte ekedide?’ Nte n̄kpọ etiede mfịn owụt ke ini oro Jesus eketịn̄de aban̄a ke idu emi.

Akani adaibuot ukara kiet ke United States ọkọdọhọ ke ndibak nnam mme owo ẹdiọn̄ọ se iditịbede esinyan̄a owo. Ke akwa mbufụt oro ọkọwọrọde ke inyan̄ibom ke 2004 ama eketre, ukara ẹma ẹsịn n̄kpọ emi edisinamde mme owo ẹdiọn̄ọ ke akwa mbufụt ọmọn̄ ọwọrọ, man mmọ ẹkpefehe ẹbọhọ. Kpasụk ntre, Abasi anam mme owo ẹdiọn̄ọ se iditịbede mbemiso utịt edide. Bible ọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.”—Matthew 24:14.

Isua oko ikpọn̄, Mme Ntiense Jehovah ẹma ẹkwọrọ ikọ ẹkpere ndisịm biliọn hour iba ke idụt 240 ye ke se ibede usem 700. Emi enen̄ede owụt ke utịt ekpere. Sia Mme Ntiense Jehovah ẹmade mbọhọidụn̄ mmọ, mmọ ẹsịn ofụri ukeme mmọ ndinam mme owo ẹdiọn̄ọ ke ini emi Abasi edibierede ikpe inọ mme owo ke ererimbot emi enen̄ede ekpere. (Matthew 22:39) Afo emekeme ndibọ ufọn nto se mmọ ẹkwọrọde emi, ndien emi owụt ke Abasi ama fi. Ti ke Abasi iyomke “baba owo kiet atak edi oyom kpukpru owo ẹkabade esịt.”  (2 Peter 3:9) Ndi ayanam n̄kpọ aban̄a item oro Abasi ọnọde nnyịn mi?

N̄kọ emeti ke mbon Simeulue ẹkefehe ẹdọk obot ke ini mmọ ẹkekụtde nte inyan̄ ọtọn̄ọde ndikebe usọp usọp; mmọ ikebetke mmọn̄ ọtọn̄ọ nditọ. Se ikanyan̄ade mmọ edi oro. Edieke oyomde ndibọhọ akwa ukụt oro edide, enyene obot emi anade efehe aka. Ewe obot edi oro? Prọfet Isaiah ama ewet se Abasi ọdọhọde mme owo ẹnam ke “mme akpatre usen” emi ete: “Mbufo ẹdi, ẹyak nnyịn idọk ke obot Jehovah . . . ndien enye eyekpep nnyịn mme usụn̄ esie, nnyịn iyonyụn̄ isan̄a ke mme afan̄usụn̄ esie.”—Isaiah 2:2, 3.

Edieke owo odude ke enyọn̄ obot, enye ekeme ndida n̄kụt ediwak n̄kpọ onyụn̄ ọbọhọ ndusụk afanikọn̄. Kpasụk ntre, ndikpep n̄kpọ mban̄a Abasi ke Bible an̄wam ediwak owo ke ofụri ererimbot ẹkpụhọde nte mmọ ẹdude uwem. (2 Timothy 3:16, 17) Emi anam mmọ ẹtọn̄ọ ndisan̄a ke usụn̄ Abasi ẹnyụn̄ ẹbọ edidiọn̄ esie.

Ndi afo ayanam se Abasi ọdọhọde man etiene ọbọ ufọn oto se Abasi anamde man ekpeme ikọt esie ke ndiọkeyo emi? Mbọk tịn̄ enyịn kot ekebe oro odude ke ibuotikọ emi man ọfiọk se N̄wed Abasi etịn̄de aban̄a mme n̄kpọ oro ẹwụtde ke nnyịn idu uwem ke “mme akpatre usen.” Mme Ntiense Jehovah ke edem mbufo ẹyema ndinam mme itie N̄wed Abasi oro ẹdude mi an̄wan̄a fi, ẹnyụn̄ ẹtịn̄ nte mme itien̄wed emi ẹkemede ndin̄wam fi. Edieke onyụn̄ enyenede mbụme, mbọk ka ikpehe Intanet nnyịn www.pr418.com/efi man okokụt nte ẹbọrọde mme mbụme fo. Se ebiet emi okụtde: SE BIBLE EKPEPDE > MME MBỤME BIBLE ORO ẸBỌRỌDE.