YƐ December 26, 2004 lɛ, shikpɔŋhosomɔ ko ni naa wa ba Simeulue, ni ji ŋshɔkpɔ ko ni yɔɔ Sumatra, yɛ Indonesia kooyi-anaigbɛ lɛ. Mɛi fɛɛ ni yɔɔ ŋshɔ lɛ naa lɛ miikwɛ bɔ ni ŋshɔ lɛ feɔ lɛ. Ŋshɔ lɛ fã kɛtee sɛɛ shɔŋŋ fe nine. Nɔŋŋ kɛkɛ ni mɔ fɛɛ mɔ wo foi kɛyi gɔji lɛ anɔ gbɛ kɛ bolɔmɔ akɛ, “Smong! Smong!” ejaakɛ nakai ji bɔ ni amɛtsɛɔ tsunami. Yɛ minitii 30 mli lɛ, ŋshɔ lɛ ku waa, ni eke kɛba maŋ lɛ mli, ni efite akrowai kɛ shĩai babaoo.

Simeulue ŋshɔkpɔ lɛ ji he klɛŋklɛŋ ni tsunami ni fite nii waa lɛ je shishi kɛjɛ. Eyɛ mli akɛ mɛi 78,000 yɔɔ maŋ lɛ mli moŋ, shi mɛi 7 pɛ ni gboi. Mɛni hewɔ ni mɛi fioo ko pɛ gboi lɛ? * Nɔ ko ni mɛi ni yɔɔ ŋshɔkpɔ lɛ nɔ lɛ fɔɔ wiemɔ ji: ‘Kɛ́ shikpɔŋ hoso waa ni ŋshɔ lɛ tee sɛɛ lɛ, esa akɛ mɔ fɛɛ mɔ ajo foi kɛya gɔji lɛ anɔ, ejaakɛ etsɛŋ, ŋshɔ lɛ baaké kɛba maŋ lɛ mli.’ Yɛ niiashikpamɔ ni Simeuluebii lɛ ená lɛ hewɔ lɛ, amɛnyɛɔ amɛkwɛɔ bɔ ni ŋshɔ lɛ efee lɛ, ni amɛleɔ kɛji tsunami ko miiba. Kɔkɔ ni atsɔ hiɛ abɔ amɛ lɛ toi ni amɛbo lɛ ji nɔ ni here amɛ yiwala lɛ.

Biblia lɛ wieɔ jaramɔ shihilɛ ko ni miiba lɛ he akɛ, “amanehulu kpeteŋkpele ni anako enɔ dã kɛjɛ je lɛ shishijee aahu kɛbashi amrɔ nɛɛ, dabi, ni asaŋ eko baŋ dɔŋŋ lɛ baaba.” (Mateo 24:21) Shi enɛ efeŋ Shikpɔŋ ni wɔyɔɔ nɔ nɛɛ naagbee​—ní nibii gbohii ni adesai feɔ loo adebɔɔ naa oshara ko ni naa wa kɛbaaba​—ejaakɛ eji Nyɔŋmɔ yiŋtoo akɛ shikpɔŋ lɛ ahi shi kɛya naanɔ. (Jajelɔ 1:4) Moŋ lɛ, Nyɔŋmɔ baatsɔ amanehulu ni baa lɛ nɔ ‘efite mɛi ni fiteɔ shikpɔŋ lɛ.’ No baajie efɔŋfeemɔ kɛ amanehulu fɛɛ kɛya. (Kpojiemɔ 11:18; Abɛi 2:22) Kwɛ bɔ ni enɛ baafee jɔɔmɔ kple kɛhã wɔ!

Agbɛnɛ hu lɛ, kɛ́ tsunami, shikpɔŋhosomɔi loo lasu gɔji afɛlɛmɔ ko ba lɛ, ekpãtãa mɛi kpakpai kɛ mɛi fɔji fɛɛ ahiɛ, shi hiɛkpatamɔ ni baa lɛ kpãtãŋ mɛi ni efeko nɔ ko lɛ ahiɛ. Biblia lɛ kɛɔ akɛ, “Nyɔŋmɔ lɛ, suɔmɔ ji lɛ,” ni Nyɔŋmɔ, ni gbɛ́i ji Yehowa lɛ ewo shi akɛ, “jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” (1 Yohane 4:8; Lala 37:29) Belɛ, te oofee tɛŋŋ oje amanehulu kpeteŋkpele lɛ mli shweshweeshwe, ni onine ashɛ jɔɔmɔi ni awo he shi lɛ nɔ? Nɔ ni esa akɛ ofee ji: Bó kɔkɔbɔɔ ni atsɔ hiɛ akɛhã lɛ toi!

Wɔnyɛŋ wɔtsɔɔ gbi tuuntu ni efɔŋfeemɔ kɛ piŋmɔ fɛɛ sɛɛ baafo, ejaakɛ Yesu wie akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ tete loo Bi lɛ tete leee, ja Tsɛ lɛ kɛkɛ.” Fɛɛ sɛɛ lɛ, Yesu wo wɔ hewalɛ koni ‘wɔya nɔ wɔbu.’ (Mateo 24:36; 25:13) Mɛni hewɔ? Biblia lɛ etsɔɔ wɔ bɔ ni je lɛŋ shihilɛ baaji dani Nyɔŋmɔ kɛ je lɛ baaba naagbee. Taakɛ bɔ ni nibii ni tsake trukaa lɛ hã mɛi ni yɔɔ Simeulue lɛ yoo akɛ tsunami ko miiba lɛ, nakai nɔŋŋ tsakemɔi ni yaa nɔ yɛ je lɛŋ lɛ hãa wɔnaa akɛ etsɛŋ ni naagbee lɛ baaba. Akrabatsa ni fata he lɛ tsɔɔ tsakemɔi komɛi ni sa kadimɔ ni Biblia lɛ ewie he.

 Eji anɔkwale akɛ, nibii ni awie he yɛ akrabatsa lɛ mli lɛ ekomɛi eba mli kɛyashi he ko yɛ bei ni eho lɛ amli. Shi Yesu wie akɛ, kɛ́ wɔna “nibii nɛɛ fɛɛ” lɛ, wɔná wɔle akɛ naagbee lɛ eshɛ etã. (Mateo 24:33) Bi ohe akɛ, ‘Kɛjɛ blema tɔ̃ɔ lɛ, mɛɛ be nibii ni awie he nɛɛ fɛɛ (1) eba yɛ je lɛŋ he fɛɛ he, (2) eba yɛ be kome too mli, ni (3) etee nɔ emli ewo wu waa?’ Eyɛ faŋŋ akɛ naagbee gbii lɛ amli wɔyɔɔ lɛ.

Tsutsu U.S. maŋ hiɛnyiɛlɔ ko wie akɛ: “Kɛ́ atsɔ hiɛ abɔ kɔkɔ lɛ . . . ehereɔ mɛi ayiwala.” Be ni tsunami lɛ ba yɛ afi 2004 lɛ sɛɛ lɛ, afee tsɔji awo maji ni tsunami lɛ fite nii yɛ mli lɛ amli, bɔ ni afee ni kɛ́ oshara ko ni tamɔ nakai miiba lɛ, ebɔ mɛi lɛ kɔkɔ koni mɛi ahiɛ akakpãtã nakai dɔŋŋ. Nakai nɔŋŋ Nyɔŋmɔ eto gbɛjianɔ koni atsɔ hiɛ abɔ mɛi kɔkɔ dani naagbee lɛ aba. Biblia lɛ egba efɔ̃ shi akɛ: “Abaashiɛ Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”​—Mateo 24:14.

Yɛ nyɛsɛɛ afi lɛ pɛ mli lɛ, Yehowa Odasefoi kɛ ŋmɛlɛtswai ni fa fe akpekpe toi akpe kome kɛ akpekpei ohai nɛɛhu shiɛ sane kpakpa lɛ yɛ shikpɔji 240 nɔ, yɛ wiemɔi ni fa fe 700 mli. Enɛ ji odaseyeli kpele ni tsɔɔ akɛ naagbee lɛ ebɛŋkɛ. Akɛni Yehowa Odasefoi sumɔɔ amɛnaanyo gbɔmɔ hewɔ lɛ, amɛkɛ amɛdekã fɛɛ tsuɔ nii kɛbɔɔ mɛi kɔkɔ yɛ Nyɔŋmɔ kojomɔ gbi ni etsɛŋ ni ebaaba lɛ he. (Mateo 22:39) Kɔkɔbɔɔ nɛɛ ni akɛhãa lɛ ji odaseyeli ni tsɔɔ akɛ Yehowa sumɔɔ bo, ejaakɛ kɛ́ obo toi lɛ, obaaná he sɛɛ. Kaimɔ akɛ, “[Nyɔŋmɔ] sumɔɔɔ akɛ akpãtã mɔ ko mɔ ko hiɛ, shi moŋ eesumɔ ni mɛi fɛɛ atsake amɛtsui.” (2 Petro 3:9) Ani obaabo kɔkɔbɔɔ ni Nyɔŋmɔ kɛhãa lɛ toi kɛtsɔɔ akɛ ohiɛ sɔɔ suɔmɔ ni eyɔɔ kɛhã bo lɛ?

Kaimɔ akɛ, be ni mɛi ni yɔɔ akrowai ni yɔɔ Simeulue ŋshɔ lɛ naa lɛ na akɛ ŋshɔ lɛ etee sɛɛ waa lɛ, amrɔ nɔŋŋ kɛkɛ ni amɛwo foi kɛtee gɔji lɛ anɔ hei ni yɔɔ lɛ; amɛmɛɛɛ ni ŋshɔ lɛ aku esɛɛ dã. Oyaiyeli ni amɛkɛtsu shihilɛ lɛ he nii lɛ ji nɔ ni here amɛ lɛ. Bɔ ni afee ni oje amanehulu lɛ ni baa lɛ mli shweshweeshwe lɛ, amrɔ nɛɛ ji be ni esa akɛ ofee nibii ni baahã ahere oyiwala, dani efee nɔ ni ekpe sɛɛ tsɔ̃. Te ooofee tɛŋŋ ofee nakai? Nyɔŋmɔ kɛ emumɔ lɛ tsirɛ gbalɔ Yesaia ni etsɔɔ ninefɔɔ ko ni akɛbaahã yɛ “naagbee gbii lɛ amli,” ni nakai be lɛ mli wɔyɔɔ amrɔ nɛɛ. Eŋma akɛ: ‘Nyɛbaa ni wɔyakwɔa Yehowa gɔŋ lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ!’​—Yesaia 2:2, 3.

Kɛ́ odamɔ gɔŋ ko yiteŋ lɛ, onyɛɔ onaa nɔ ko ni yɔɔ shɔŋŋ, ni ofeɔ shweshweeshwe. Nakai nɔŋŋ ŋmɛnɛ lɛ, mɛi akpekpei abɔ ni yɔɔ jeŋ fɛɛ lɛ ebale Nyɔŋmɔ kɛtsɔ Biblia lɛ ni amɛkaseɔ lɛ nɔ, ni enɛ ehã amɛfee tsakemɔi ni sa yɛ amɛ shihilɛ mli. (2 Timoteo 3:16, 17) Enɛ hãa ‘amɛnyiɛɔ Nyɔŋmɔ tempɔŋi lɛ anɔ,’ ni amɛnáa ehiɛ duromɔ ni ebuɔ amɛhe.

Ani obaakpɛlɛ ninefɔɔ nɛɛ nɔ koni ohã Nyɔŋmɔ ni yɔɔ suɔmɔ lɛ abu ohe yɛ bei krɛdɛɛ nɛɛ mli? Wɔmiiwo bo hewalɛ ni opɛi Ŋmalɛ naa odaseyelii ni tsɔɔ faŋŋ akɛ wɔyɛ “naagbee gbii lɛ” amli, ni yɔɔ akrabatsa ni fata he lɛ mli lɛ mli jogbaŋŋ. Kɛ́ ootao onu Ŋmalɛi ni atsɛ yisɛɛ lɛ ashishi jogbaŋŋ, kɛ bɔ ni obaafee okɛtsu nii lɛ, Yehowa Odasefoi ni yɔɔ he ni oyɔɔ lɛ yɛ he miishɛɛ akɛ amɛbaaye amɛbua bo. Aloo obaanyɛ oya wɔ wɛbsaiti ni ji www.pr418.com/gaa lɛ, koni oyatao hetoi kɛhã osanebimɔi lɛ yɛ jɛmɛ. Kwɛmɔ fã ni ji BIBLIA TSƆƆMƆI > SANEBIMƆI NI BIBLIA LƐ EHÃ HETOO.