Tonusisena Avase Sọgan Whlẹn Ogbẹ̀ Towe!
TO 26 DÉCEMBRE 2004, aigba sisọsisọ daho de wá aimẹ to Simeulue, yèdọ lopo de to agewaji-whèyihọ huto Sumatra tọn to Indonésie. Mẹhe to agé lẹpo wẹ to ohù lọ pọnhlan. Ohù lọ to agọjoyigodo zẹ̀ lehe e nọ nọ̀ go. To afọdopolọji, mẹlẹpo jẹ hinhọ̀n yì okọ́ta lẹ ji bo to awhádo dọ, “Smong! Smong!,” yèdọ hogbe he yé nọ yizan na tsunami to lẹdo lọ mẹ. To nukunwhiwhe 30 gblamẹ, agbówhẹn sinsinyẹn lẹ gbaṣinyọ́n lẹdo ohù lọ tọn bo jẹ suhugan owhé lẹ po gbétatò lẹ po tọn gbakija ji.
Lopo Simeulue tọn wẹ yin ofi tintan he tsunami sinsinyẹn enẹ hẹnnugble te. Ṣogan, omẹ 7 poun wẹ kú to omẹ 78 000 he nọ nọ̀ finẹ lẹ mẹ. Naegbọn omẹ vude poun wẹ kú? * Mẹhe to lopo lọ ji lẹ ko nọ saba zan hogbe ehelẹ dọmọ: ‘Eyin agbówhẹn sinsinyẹn de to awuwle bọ ohù lọ jẹ agọjoyigodo ji, mì họnyi okọ́ta lẹ ji, na ohù lọ na jẹ núgbà ji to madẹnmẹ.’ Sọn numimọ he wayi lẹ mẹ, mẹhe nọ nọ̀ Simeulue lẹ ko plọn nado nọ doayi e go dọ tsunami jlo na gbànú gbọn diọdo he nọ wá aimẹ to ohù ji lẹ dali. Tonusisena avase whlẹn ogbẹ̀ yetọn.
Biblu dọho gando nugbajẹmẹji he to sisẹpọ de go, enẹ wẹ “nukunbibia daho de . . . ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din, lala, e ma nasọ jọ gbede ba.” (Matiu 24:21) Ṣigba, ehe ma yin vasudo planẹti lọ he yin Aigba tọn gbọn nuwiwa gbẹtọvi he ma nọ kiyananu lẹ tọn kavi nugbajẹmẹji jọwamọ tọn de dali gba—na lẹndai Jiwheyẹwhe tọn wẹ yindọ aigba ni nọte kakadoi. (Yẹwhehodọtọ 1:4) Kakatimọ, nukunbibia he ja lọ yin nuyiwa Jiwheyẹwhe tọn nado “husudo mẹhe to aigba husudo lẹ.” E na doalọtena kanyinylan po yajiji lẹpo po. (Osọhia 11:18; Howhinwhẹn lẹ 2:22) Dona nankọ die ehe na yin!
Humọ, to vogbingbọn mẹ na tsunami, aigba sisọsisọ kavi wuwujẹgbonu osó lẹ tọn, vasudo he ja lọ ma na hù homẹvọnọ lẹ gba. Biblu dọ dọ “Jiwheyẹwhe wẹ owanyi,” podọ Jiwheyẹwhe mẹhe yinkọ etọn nọ yin Jehovah dopagbe dọ “dodonọ wẹ na dugu aigba tọn, bo nasọ nọ nọ̀ e mẹ kakadoi.” (1 Johanu 4:8; Psalm 37:29) Ṣigba, nawẹ a sọgan lùn nukunbibia daho lọ tọ́n bo duvivi dona lọ lẹ tọn gbọn? Aṣli lọ die: Nọ setonuna avase!
NỌ NỌ̀ AṢEJI GANDO AGBÓWHẸN HE TO AWUWLE LỌ GO
Mí ma sọgan yọ́n ojlẹ he mẹ kanyinylan po yajiji lẹpo po na wá opodo te taun, na Jesu dọmọ: “Na nuhe dù azán enẹ po gànmẹ lọ po, mẹdepope ma yọnẹn, etlẹ yin angẹli olọn tọn lẹ kavi Visunnu lọ lọsu, adavo Otọ́ lọ kẹdẹ.” Etomọṣo, Jesu na tuli mí nado ‘nọ họ́ míde.’ (Matiu 24:36; 25:13) Na etẹ? Biblu basi zẹẹmẹ lehe ninọmẹ aihọn tọn na te do whẹpo Jiwheyẹwhe na hẹn opodo wá tọn na mí. Kẹdẹdile agbówhẹn he to awuwle lọ yin avase de na mẹhe nọ nọ̀ Simeulue lẹ gando tsunami de go do, mọ wẹ ninọmẹ aihọn tọn lẹ he to yinylan deji na yin ohia de na mílọsu do dọ opodo lọ ko sẹpọ. Apotin he zọnpọ hẹ hosọ ehe dọhodo delẹ to ninọmẹ ylankan he go Biblu donù lẹ mẹ ji.
Nugbo wẹ dọ delẹ to nujijọ he yin sislẹ do apotin lọ mẹ lẹ ko jọ wayi jẹ obá de mẹ. Ṣigba, Jesu dọ dọ eyin mí mọ “onú ehe lẹpo,” mí ni yọnẹn dọ opodo lọ ko sẹpọ pete. (Matiu 24:33) Kanse dewe dọ, ‘Whetẹnu to whenuho mẹ wẹ nuhe yin zẹẹmẹ-basina ehelẹ (1) ko jọ lẹdo aihọn pé, (2) ko jọ to ojlẹ dopolọ mẹ, podọ (3) ko ylan deji vudevude?’ E họnwun dọ ojlẹ mọnkọtọn mẹ wẹ mí to gbẹnọ te.
DOHIA OWANYI JIWHEYẸWHE TỌN
Togán États-Unis tọn de dọ dọ “avase he yè yawu na de . . . nọ whlẹn mẹsusu.” To tsunami 2004 tọn lọ godo, nuyizan avase nina tọn de yin zizedo lẹdo he mẹ nulọ jọ te nado na avase gbẹtọ lẹ gando nujijọ mọnkọtọn devo he sọgan wá jọ go. Mọdopolọ, Jiwheyẹwhe ko basi tito na avase nido yin ninamẹ whẹpo opodo lọ nido wá. Biblu dọ dọdai dọ: “Yẹwheho wẹndagbe ahọluduta lọ tọn ehe na yin didọ to aigba fininọ lẹpo ji taidi okunnu de na akọta lẹpo; podọ whenẹnu wẹ opodo lọ na wá.”—Matiu 24:14.
To owhe he wayi kẹdẹ mẹ, Kunnudetọ Jehovah tọn lẹ yí gànhiho liva 1,9 linlán do lá wẹndagbe lọ gbọn aigba 240 ji to ogbè hugan 700 mẹ. Enẹ yin kunnudenu dolido de dọ opodo lọ ko sẹpọ. Na owanyi he Kunnudetọ Jehovah tọn lẹ tindo na kọmẹnu yetọn lẹ nọ whàn yé wutu, yé nọ yí yede zan to gigọ́ mẹ nado na avase gbẹtọ lẹ dọ whẹdazan Jiwheyẹwhe tọn to sisẹpọ po awuyiya po. (Matiu 22:39) Nugbo lọ dọ a sọgan mọaleyi sọn nudọnamẹ ehe mẹ yin kunnudenu lọ dọ Jehovah yiwanna we. Flindọ, “[Jiwheyẹwhe] ma jlo dọ mẹdepope ni yin vivasudo ṣigba jlo dọ mẹlẹpo ni wá lẹnvọjọ kọ̀n.” (2 Pita 3:9) Be a na kẹalọyi owanyi Jiwheyẹwhe tọn bo setonuna avase lọ ya?
HỌ̀N NADO MỌ HIHỌ́!
Flindọ mẹhe nọ nọ̀ gbétatò he to huto Simeulue tọn lẹ họnyi ofi yiaga lẹ nado mọ hihọ́ whenue yé mọ bọ ohù lọ jẹ agọjoyigodo ji; yé ma nọte kakajẹ whenue e lẹkọ whẹ́. Nuyiwa yetọn to afọdopolọji wẹ whlẹn yé. To linlẹn de mẹ, nado lùn nukunbibia he ja lọ tọ́n, hiẹ lọsu dona họnyi ofi yiaga lẹ whẹpo whenu nido fẹ́. Gbọnna? Yẹwhegán Isaia basi kandai de to gbọdo glọ gando oylọ-basinamẹ zohunhunnọ he to yinyin bibasi to “azán opodo gbè” go, yèdọ ojlẹ he mẹ mí to gbẹnọ te todin. E wlan dọmọ: “Mì wá na mí ni yì osó OKLUNỌ tọn ji . . . Ewọ nasọ plọn ali etọn mí, mí nasọ zinzọnlin to omọ́ etọn mẹ.”—Isaia 2:2, 3.
Eyin a yì osó de ji to aga, a na penugo nado mọ nulẹ lẹdo pé bo nasọ yin hihọ́-basina. Mọdopolọ, aliho Jiwheyẹwhe tọn lẹ yinyọnẹn gbọn Biblu pinplọn dali to alọgọna gbẹtọ livi susu lẹ to egbehe lẹdo aihọn pé nado basi diọdo he jẹ lẹ to gbẹzan yetọn mẹ. (2 Timoti 3:16, 17) Gbọnmọ dali, yé nọ jẹ ‘zọnlinzin ji to omọ́ Jiwheyẹwhe tọn mẹ’ bo nọ duvivi nukundagbe po hihọ́ etọn po tọn.
Be a na kẹalọyi oylọ-basinamẹ enẹ bo mọaleyi sọn hihọ́ owanyinọ Jiwheyẹwhe tọn mẹ to ojlẹ awusinyẹn tọn ehelẹ mẹ ya? Mí to tulina we nado yí sọwhiwhe do gbadopọnna kunnudenu Owe-wiwe tọn he gando “azán godo tọn lẹ” go, ehe yin hodọdeji to apotin he zọnpọ hẹ hosọ ehe mẹ. Homẹ Kunnudetọ Jehovah tọn he to lẹdo towe mẹ lẹ tọn na hùn nado gọalọna we nado mọnukunnujẹ owe-wiwe lẹ mẹ podọ nado yí yé do yizan mẹ. Kavi a sọgan mọ gblọndo na kanbiọ towe lẹ to nọtẹn Intẹnẹt tọn mítọn www.pr418.com ji. Pọ́n NUHE BIBLU PLỌN MÍ mẹ. GBLỌNDO NA KANBIỌ SINAI DO BIBLU JI LẸ, glọ
^ huk. 3 Gbẹtọ hugan 220 000 wẹ kú to tsunami he wá aimẹ to 2004 ehe whenu—yèdọ dopo to tsunami he hẹnnugble hugan lẹ mẹ to whenuho mẹ.
