DECEMBER  26, 2004 ai, Indonesia ai, Sumatra ena notwest motumotu ta ladana Simeulue ai tano mareremarere ena bada 9.1 ia vara. Kone ai idia gini taudia be davara idia itaia. Davara be ia giroa lou bona kone amo ia daudau. Bena karaharaga taunimanima ibounai be ororo dekenai idia heau lao bona idia boiboi, “Smong! Smong!” anina be sunami. Miniti 30 lalonai, hurehure goadadia ese hanua bona ruma momo ia hadikaia.

Sunami ese ia hadikaia motumotu ginigunana be Simeulue. To, taunimanima 78,000 amo 7 sibona idia mase. Dahaka dainai momo idia mase lasi? * Unai motumotu taudia ese idia gwauraia momo herevana ta be inai: ‘Bema tano mareremarere ia vara bona davara be ia giroa lou, ororo dekenai umui heau, badina davara be karaharaga kone do ia koua.’ Simeulue taudia be guna idia vara sunami idia diba dainai, davara ena toana amo idia diba sunami do ia vara eiava lasi. Unai gaudia ese idia ia durua idia roho mauri totona.

Baibel be kahirakahira do ia vara disasta ta ia herevalaia, ia gwau, “hisihisi badana do ia vara, tanobada ena matamaia negana amo ema bona hari, unai bamona hisihisi ta ia vara lasi, bona gabeai danu do ia vara lasi.” (Mataio 24:21) To unai be taunimanima edia kara dika o idia vara kava dika badadia ese tanobada do ia hadikaia ia herevalaia lasi​—Dirava ena ura be tanobada do ia noho hanaihanai. (Hadibaia Tauna 1:4) To, unai hisihisi badana be Dirava ese “tanobada idia hadikaia taudia do [ia] hadikaia ore” ia herevalaia. Unai nega ai, kara dika bona hisihisi do idia ore. (Apokalupo 11:18; Aonega Herevadia 2:22) Unai be hahenamo namona!

Sunami, tano mareremarere, o volkeino idia vara neganai momo idia mase, kerere lasi taudia danu, to hisihisi badana be unai bamona lasi. Baibel ia gwau “Dirava be lalokau,” bona Dirava, ena ladana be Iehova, ia gwauhamata “kara maoromaoro taudia ese, Dirava ia henidia tano dekenai do idia noho ela bona hanaihanai.” (1 Ioane 4:8; Salamo 37:29) To, edena dala ai hisihisi badana amo oi roho mauri bona gwauhamata namodia oi moalelaia? Gau badana be: Hadibaia herevadia oi badinaia!

Ita diba lasi edena negai kara dika bona hisihisi do idia ore, Iesu ia gwau: “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona.” Momokani, Iesu be ita ia hagoadaia “do [ita] gima noho” totona. (Mataio 24:36; 25:13) Dahaka dainai? Baibel ia gwau tanobada ai dika idauidau do idia vara guna, unai murinai Dirava ese dokona do ia mailaia. Simeulue taudia be davara ena toana idia itaia amo idia diba sunami do ia vara, unai  hegeregerena, tanobada ai idia vara gaudia ese ita ia hadibaia dokona be kahirakahira. Inai atikol ena maua ai Baibel ese ia herevalaia toa haida ia hahedinaraia.

Maua ese ia hahedinaraia gaudia haida be guna idia vara. To Iesu ia gwau “inai gau ibounai idia vara” ita itaia neganai, do ita diba dokona be kahirakahira. (Mataio 24:33) Sibona oi nanadaia, ‘unai gaudia be, (1) tanobada hegegemadai dekenai idia vara, (2) nega tamona idia vara, bona (3) dika badana ai ia lao, a?’ Momokani, ita be unai bamona negadia ai ita noho.

U.S presiden gunana ta, ia gwau, “disasta idia do vara lasi neganai taunimanima idia hadibaia haraga gaudia. . .ese momo idia hamauria.” Lagani 2004 ai ia vara sunami murinai, provinsi momo dekenai unai bamona gaudia idia atoa, unai amo momo do idia mase lasi. Unai hegeregerena, dokona negana ia do ginidae lasi lalonai, Dirava be ita dekenai hadibaia herevadia ia henia noho. Baibel ia gwau: “Basileia ena sivarai namona be tanobada ibounai dekenai do idia harorolaia, unai amo bese ibounai ese idia kamonaia diba, unai murinai dokona be do ia ginidae.”​—Mataio 24:14.

Vanegai lagani ai, Iehova ena Witnes taudia be hora 1.9 bilioni idia gaukaralaia tano 240 bona gado 700 ai sivarai namona idia harorolaia totona. Hari, idia vara gaudia ese idia hamomokania dokona be ia kahirakahira. Iehova ena Witnes taudia be edia dekena taudia idia lalokau henia dainai, nega bada idia gaukaralaia taunimanima idia hadibaia Dirava ena kota badana dinana be ia kahirakahira noho. (Mataio 22:39) Unai ese oi ia durua diba, bona ia hahedinaraia Iehova ese ita ia lalokau henia. Laloatao,  “[Dirava] ia ura lasi tau ta ia mase, to ia ura taunimanima ibounai idia helalo-kerehai.” (2 Petero 3:9) Oi be Dirava ena lalokau karana do oi abia dae bona ena hadibaia herevadia do oi badinaia, a?

Simeulue hanua taudia be idia itaia davara ia giroa lou neganai, idia naria lasi to ororo dekenai idia heau lao. Unai bamona idia karaia dainai idia roho mauri. Unai hegeregerena, hisihisi badana amo oi roho mauri totona, namona be ororo dekenai oi heau lao. Edena dala ai? Dirava ena lauma ese peroveta tauna Isaia ia hasiahua bona inai nega dokona ai boiboi herevana ta ia torea. Ia gwau: “Umui mai, Lohiabada ena ororo dekenai do ita daekau, . . . Ia ese iena kara ita dekenai do ia hadibaia, bona ita ese unai Dirava ena dala dekenai do ita raka.”​—⁠Isaia 2:2, 3.

Ororo ena atai momokani oi daekau neganai gabu ibounai do oi itaia bona dika ta do oi davaria lasi. Unai hegeregerena, Baibel amo Dirava ena dala dibaia karana ese hari tanobada hegegemadai taunimanima milioni momo ia durua edia mauri idia haidaua totona. (2 Timoteo 3:16, 17) Unai amo ‘Dirava ena dala dekenai idia raka’ matamaia bona ia ese ia lalonamo henidia bona do ia gimaia.

Oi ese Dirava ena boiboi herevana bona nega aukadia ai ena gimaia karana do oi abia dae, a? Namona be inai atikol ena maua oi itaia, ia be Baibel ese “dina gabedia” ai do idia vara gaudia ia hahedinaraia. (2 Timoteo 3:1) Emu gabu ai idia noho Iehova ena Witnes taudia be mai moale ida oi do idia durua Baibel ena hereva oi lalopararalaia bona emu mauri ai oi badinaia totona. Eiava emu henanadai edia haere oi diba totona emai Web sait, www.pr418.com oi lao diba.