MATUKŨ 26, Mwei wa 12, 2004, kĩthingitho kyaĩ na vinya mwingĩ mũno nĩkyathingithisye kĩthama kya Simeulue, kĩla kĩ ngalĩko ya ĩũlũ ya Sumatra, nthĩ ya Indonesia. Andũ onthe ala matwĩe vakuvĩ na ũkanga nĩmasyaisye ũkanganĩ nĩ kana mone kĩla kĩkwĩkĩka. Nĩmoonie kĩw’ũ kyambĩĩa kũoleka ũkanganĩ na mĩtũkĩ mũno kwĩ ũndũ kĩkaa. Ĩla moonie ũu nĩmambĩĩe kũsemba iĩmanĩ mauĩte mbu maĩtye “Smong! Smong!” ũu nĩw’o ekali ma kũu metaa tsunami. Ĩtina wa ndatĩka 30, itulumo nene syĩ na kĩseve kingĩ nĩsyakimie ũtee wa ũkanga na syaananga nyũmba mbingĩ kĩsionĩ kĩu.

Kĩthama kya Simeulue nĩkyo kyaĩ kya mbee kũkimwa nĩ tsunami kana kĩuutani kyaĩ na vinya mwingĩ na kyakuĩte kĩw’ũ kingĩ. Katĩ wa andũ 78,000 ala mekalaa kĩthamanĩ kĩu, no 7 makwie. Nĩkĩ no andũ anini makwie? * Ve ndeto imwe ekali ma ithamanĩ maasya: ‘Ĩla kweethĩwa na kĩthingitho kĩnene na kĩw’ũ kya ũkanga kĩyĩoleka na mĩtũkĩ, semba iĩmanĩ nũndũ ĩtina wa ĩvinda ĩnini kĩw’ũ kingĩ kya ũkanga nĩkĩũkĩla kĩlike nthĩ nyũmũ.’ Kumana na maũndũ ala moonete, ekali ma Simeulue maĩ matonya kũmanya tsunami yĩ vakuvĩ masisya ũndũ kũilyĩ ũkanganĩ. Kwĩthukĩĩsya ũkany’o nĩkwoovoisye mathayũ moo.

Mbivilia nĩeleetye ĩũlũ wa mũisyo wĩ vakuvĩ mũno, naw’o nĩ “thĩna mũnene, ũndũ ũtaaĩthĩwa kuma mwambĩlĩlyo wa nthĩ kũvika yu, o na kũikethĩwa ũngĩ nongi.” (Mathayo 24:21) Thĩna ũsu mũnene ndũkaetwe nĩ andũ kwananga nthĩ, o na ndũkethĩwa wĩ mũisyo ta ũla wakwatie kĩthama kya Simeulue, nũndũ Ngai oombie nthĩ yĩkale tene na tene. (Mũtavan’ya 1:4) Vandũ va ũu, Ngai nĩwe ũkaete thĩna ũsu mũnene nĩ kana anange “ala manangaa nthĩ.” Ũkeethĩwa wĩ mũthya wa mathĩna na mothũku onthe. (Ũvuan’yo 11:18; Nthimo 2:22) Vate nzika, ũsu nĩ ũathimo mũnene mũno!

Wanangĩko ũla wũkĩte ndũkananga andũ ala aseo tondũ mĩisyo ta tsunami, ithingitho sya nthĩ, na kũlivũka kwa iĩma, syũaa andũ onthe aseo na athũku. Mbivilia yaĩtye kana “Ngai nĩ wendo.” Ngai ũsu, ũla syĩtwa yake nĩ Yeova, athanĩte kana “ala alũngalu makatiĩwa nthĩ, na makatũa vo kũvika tene na tene.” (1 Yoana 4:8; Savuli 37:29) Ũtonya ata kũtangĩĩwa kuma thĩnanĩ ũsu mũnene na ndũtanĩa moathimo ala Ngai ũtwathĩte? Ũndũ ũla ũtonya kwĩka nĩ: Kwĩthukĩĩsya ũkany’o!

Tũitonya kũmanya ĩla mũminũkĩlyo wĩũka nũndũ Yesũ aisye atĩĩ: “Mũthenya ũsu na saa ũsu vai ũmwe wĩsĩ, o na alaĩka ma ĩtunĩ, o na Mwana, ĩndĩ no Asa weka.” Ĩndĩ o na ũu wĩ o vo, Yesũ atwĩkĩie vinya ‘tũsyaĩĩsye.’ (Mathayo 24:36; 25:13) Nĩkĩ watwĩie tũsyaĩĩsye? Mbivilia nĩeleetye maũndũ ala maĩ mekĩke ĩũlũ wa nthĩ Ngai atanamba kũete  mũminũkĩlyo. O tondũ ekali ma kĩthama kya Simeulue moonie kĩw’ũ kyaoleka ũkanganĩ na mĩtũkĩ na mamanya kana kĩseve kingĩ kĩkuĩte kĩw’ũ nĩkyũkĩte, now’o moalyũku ala tũkwona ũmũnthĩ mekwonany’a kana mũminũkĩlyo wĩ vakuvĩ. Ĩsandũkũ yĩu yĩ vaa ĩũlũ yonanĩtye moalyũku amwe ala Mbivilia ĩwetete.

Amwe ma moalyũku asu mawetetwe ĩsandũkũnĩ yĩu nĩmekĩkĩte kwa kĩasi kĩana ũndũ mũna ĩvindanĩ ĩvĩtu. Ĩndĩ Yesũ aisye kana ĩla twĩona ‘maũndũ asu onthe,’ twĩmanya kana mũminũkĩlyo wĩ vakuvĩ mũno. (Mathayo 24:33) Ĩkũlye-ĩ, ‘Nĩ ĩndĩĩ maũndũ asu mawetwa (1) meekĩkie ĩũlũ wa nthĩ yonthe, (2) meekĩkie ĩvindanĩ yĩmwe, na (3) maendeeie kũthũkĩĩa?’ Kwa w’o ki, maũndũ asu maendeee kwĩkĩka ĩvindanĩ yĩĩ.

Mũsumbĩ ũmwe wa Amelika aisye atĩĩ: ‘Andũ aingĩ no matangĩĩwe kũkethĩwa na syĩndũ sya kũmatetheesya kũmanya ĩla mũisyo wũkĩte.’ Ĩtina wa nthĩ mbingĩ kũkimwa nĩ tsunami mwaka wa 2004, nĩkweekĩiwe syĩndũ sya kũtetheesya andũ kũmanya ĩla mũisyo ta ũsu wũkĩte nĩ kana maikethĩwe nĩ mũisyo ũsu matataĩĩe na mayasya mathayũ moo. O ta ũu, ũmũnthĩ Ngai nĩwĩkĩte mũvango andũ makanw’e mũminũkĩlyo ũtanamba kũka. Mbivilia yathanie atĩĩ: ‘Na ũvoo ũũ mũseo wa Ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe; na ĩndĩ mũminũkĩlyo ũkyũka.’—Mathayo 24:14.

Mwaka mũvĩtu, Ngũsĩ sya Yeova nĩmatũmĩie masaa mbee wa mbilioni 1.9 maitavany’a ũvoo mũseo nthĩnĩ wa nthĩ 240 na kwa ithyomo mbee wa 700. Ũndũ ũsu wĩtũĩkĩĩthya vyũ kana mũminũkĩlyo wĩ vakuvĩ. Nũndũ nĩmendete andũ mũno, Ngũsĩ sya Yeova nĩmatũmĩaa vinya woo mwingĩ maikany’a andũ ĩũlũ wa mũthenya wa Yeova wa ũsilĩlo ũla wĩ vakuvĩ vyũ. (Mathayo 22:39) Ũtethyo ũla ũtonya  kũkwata kumana na ũvoo ũũ ũtavanaw’a nĩ wonany’o wa kana Yeova nũkwendete. Lilikana, ‘[Ngai] ndendaa mũndũ o na wĩva ae, ĩndĩ endaa onthe mavikĩe ũalyũlo wa ngoo.’ (2 Vetelo 3:9) We nũkũatĩĩa ũkany’o ũla Ngai ũkũnengete ũkwonany’a kana nũkwendete?

Lilikana kana ekali ma Simeulue nĩmasembie iĩmanĩ na mĩtũkĩ ĩla moonie kĩw’ũ kyaoleka ũkanganĩ, ĩndĩ mayaaeteela kĩsyoke nĩ kana masembe. Ĩtambya ya mĩtũkĩ yĩla moosie nĩyatangĩĩie mathayũ moo. Nĩ kana twĩtangĩĩwa ũla thĩnanĩ mũnene wũkĩte, no nginya twose ĩtambya na mĩtũkĩ ĩvinda yĩtanathi mũno. Tũtonya kwĩka ũu ata? Mwathani Isaia nĩwaveveeiwe aandĩka ĩũlũ wa ũndũ Ngai ũtũthoketye ‘mĩthenyanĩ ya mũminũkĩlyo,’ nayo nĩ ĩvindanĩ yĩĩ tũilyĩ. Aisye atĩĩ: “Ũkai inyw’ĩ, twambate kĩĩmanĩ kya Yeova, . . . nake akatũmanyĩasya nzĩa syake, na tũkaendaa nzĩanĩ syake.”—Isaia 2:2, 3.

Ĩla mũndũ walĩsa kĩĩmanĩ ethĩawa atonya kwona kĩla kĩendeee na ayĩthĩwa e ũsũvĩonĩ. O ta ũu, andũ milioni mbingĩ ĩũlũ wa nthĩ nĩmekĩte moalyũku thayũnĩ woo nũndũ wa kũmũmanya Ngai ĩtina wa kwĩmanyĩsya Mbivilia. (2 Timotheo 3:16, 17) Meeka ũu, methĩawa mambĩĩa ‘kũendaa nzĩanĩ’ sya Ngai, nake nũmasũvĩaa na mayĩthĩwa na ngwatanĩo nzeo nake.

We nũkwĩtĩkĩla kũthokw’a na ũitetheka nĩ ũndũ Ngai ũtũsũvĩaa kwa nzĩa ya wendo ĩvindanĩ yĩĩ ya mũisyo? Twĩũkũlya ũsisye maũndũ ala mawetetwe Maandĩkonĩ ala me ĩsandũkũnĩ yĩu yĩ vau ĩũlũ mekũĩkĩĩthya kana yu twĩ “mĩthenyanĩ ya mũminũkĩlyo.” Ngũsĩ sya Yeova kĩsionĩ kyenyu ikaũtetheesya ũelewe nesa nĩ Maandĩko ala monanĩtw’e vau na ũndũ ũtonya kũmatũmĩa. O na no ũkwate mosũngĩo ma makũlyo maku Kĩsesenĩ kya www.pr418.com/kam. Sisya ungu wa MOMANYĨSYO MA MBIVILIA > MOSŨNGĨO MA MAKŨLYO MA MBIVILIA.