PA 26 December, 2004, kitentanshi kikatampe kyapichile pa jikuji ja Simeulue jaikela ku buyeke muzhika wa kitulu kya Sumatra mu kyalo kya Indonesia. Bantu bonse batajilenga byamwekelenga pa kalunga ka mema. Mema akepelenga kukila byo ekala kimye kyonse. Ponkapotu bantu bonse batatwile kunyemena ku mitumba saka babijika’mba “Smong! Smong!” kyambo kilumbulula’mba kinkunkwila kya mema. Byo papichiletu maminiti 30, manyaki akatampe aimene ne kupuma ku kitulu, kabiji aonawine mazubo ne mizhi yavula bingi.

Jikuji ja Simeulue jo jajinga jitanshi pafikijile kino kinkunkwila kyafumine mu kalunga ka mema. Pa bantu 78,000 bajinga pa jino jikuji, pafwiletu bantu 7 Mambo ka o pafwijiletu bantu bacheche? * Bantu bekala pa makuji baji na ñambilo ya kuba’mba ‘inge kwaikala kitentanshi kicheche kabiji mema a mu kalunga ke akepe, nyemenai ku mitumba mambo kibena kumwesha kuba’mba katatakatu kinkunkwila kiye kukitulu.’ Bantu ba pa jikuji ja Simeulue bayuka inge kinkunkwila ke kiye kupichila mu kumona bibena kwenda mema pa kalunga. Kumvwina lujimuno ko kwibalengejile kupuluka.

Baibolo waamba pa malwa abena kwiya, “malwa akatampe, akyangye kumwekapo kala kufumatu ku ntendekelo ya pano pa ntanda kufika ne buji lelo, kabiji kechi akamwekapo jibiji ne.” (Mateo 24:21) Kino kechi kibena kulumbulula’mba ntanda bakeyonauna ku bantu nangwa ku bya malwa biyako bine ne, mambo kyaswa muchima wa Lesa ke kya kuba’mba ntanda ikekale myaka ne myaka. (Musapwishi 1:4) Lesa ye ukaleta ano malwa kuba’mba ‘onaune boba babena konauna ntanda.’ Ano malwa akafumyapo bubi bonse ne buyanji. (Lumwekesho 11:18; Byambo bya Maana 2:22) Ano malwa akaleta bintu byawama bingi.

Kupusanako na binkunkwila, bitentanshi, nangwa kutubika kwa mushiji, malwa abena kwiya kechi akepaya bantu babula mambo ne. Baibolo waamba’mba “Lesa butemwe,” ne kuba’mba Lesa wa jizhina ja Yehoba, walaya’mba “baoloka bakaswana ntanda, kabiji bakekalangamo myaka ne myaka.” (1 Yoano 4:8; Salamo 37:29) Pano mwakonsha kupuluka byepi malwa akatampe ne kwiyowa mapesho etulaya Lesa? Kikatampe kyakonsha kwimukwasha ke kumvwina lujimuno.

Kechi twayuka juba jikeshilamo mpelo ya bubi ne buyanji ne, mambo Yesu waambile’mba: “Pa mambo a joja juba ne kimye kafwako wayuka ne, nangwatu bamalaika ba mwiulu, nangwatu Mwana, kana bene Batata.” Nangwa byonkabyo, Yesu witutundaika’mba “labainga ne kukenkenta.” (Mateo 24:36; 25:13) Kulaba ne kukenkenta ku ñanyi bintu? Baibolo witulumbulwila bintu byafwainwa kumweka Lesa saka akyangye kuleta mpelo. Byonkatu mwekelo ya mema pa kalunga ka mema byo yakwashishe bangikazhi ba pa jikuji ja Simeulue kuyuka’mba  kinkunkwila kibena kwiya, ne bintu bibena kumweka mu ntanda bitubuula kuba’mba mpelo ijitu pepi. Kitenguluzha kiji peulu kyaamba pa bintu bimo bibena kumweka byaambapo Baibolo.

Bintu bimo biji mu kitenguluzha byaambapo Baibolo byamweka kala. Pano bino, Yesu waambile’mba inge twamona “bino bintu byonse,” twafwainwa kuyuka’mba mpelo ijitu pepi. (Mateo 24:33) Ishikishai anweba bene amba, ‘Mwapita bwikalo bwa bantu, ñanyi kimye bino bintu byatongolwa (1) po byaubiwe kuzhokoloka ntanda yonse, (2) po byamwekele pa kimye kimo, ne (3) kukizhamo kutama? Kwambatu kine, bino bintu bibena kumweka mu kimye kyo tujimo.

Wajinga kala ndamakyalo wa U.S. waambile’mba: “Kujimuna bantu saka kuji kimye . . . kulengela bantu kupuluka.” Na mambo a kinkunkwila kyaubiwe pa kalunga ka mema mu 2004, banengezhezhe bintu bya kujimunako bantu pa mpunzha papichila kinkunkwila pa kuba’mba bantu bakabule kufwa kulutwe na lwendo. Lesa naye wabikako lunengezho lwa kujimuna bantu mpelo saka ikyangye kufika. Baibolo waambijile jimo amba: “Ano mambo awama a Bufumu bakeasapwila pano pa ntanda ponse kwikala bukamonyi ku bisaka byonse bya bantu, apa bino mpelo ikafike.”—Mateo 24:14.

Mwaka wapwa, Bakamonyi ba kwa Yehoba baingijile maola kukila pa 1.9 bilyonyi mu mwingilo wa kusapwila mambo awama mu byalo 240 mu milaka kukila pa 700. Kino kibena kumweshatu patoka kuba’mba mpelo ijitu pepi. Na mambo a kutemwa bakwabo, Bakamonyi ba kwa Yehoba bengila na ngovu kujimunako bakwabo pa mambo a juba ja Lesa ja kije jibena kwiya. (Mateo 22:39) Na mambo a kuba’mba mwakonsha kumwenamo mu bino byambo, ke kishiino kimwesha’mba Yehoba wimutemwa bingi. Vulukainga kuba’mba “[Lesa] kechi usaka muntu nangwa umo amba akafwe ne, bino ukeba’mba  bonse balapile.” (2 Petelo 3:9) Nanchi mukomvwina lujimuno ne kumwenamo mu butemwe bwa Lesa nyi?

Vulukai kuba’mba bangikazhi ba pa jikuji ja Simeulue banyemene byo bamwene mema na kukepa mu kalunga ka mema; kechi bapembejile mema abwela ne. Kuba bino kwibalengejile kupuluka. Pa kuba’mba mukapuluke malwa abena kwiya, ne anweba mwafwainwa kubapo bimo mema saka akiji mu kapokoso. Mu ñanyi jishinda? Ngauzhi Isaya watangijilwe na mupashi wazhila kunemba pa byambo bya lujimuno bibena kushimunwa mu ano “moba a ku mpelo.” Byaamba’mba: “Twayai ku mutumba wa Yehoba . . . Aye uketufunjisha mashinda anji, kabiji tukendanga mu mashinda anji.”—Isaya 2:2, 3.

Kukanjila peulu ya mutumba kwimulengela kumona bulongo bintu bibena kumweka, kabiji yo mpunzha ya luzhikijilo. Ne kuyuka mashinda a Lesa kupichila mu kufunda Baibolo kwakwasha bantu bavula bingi mwaya ntanda yonse lelo jino kupimpula byubilo byabo. (2 Timoti 3:16, 17) Na mambo a kuba bino, batendeka ‘kwenda mu mashinda a Lesa’ ne kwiyowa mapesho anji ne luzhikijilo.

Nanchi mukomvwina bino byambo ne kunyemena ku mpunzha ya luzhikijilo lwa Lesa mu ano moba akatazha nyi? Twimutundaika kulangulukapo bulongo pa bishiino bya mu Binembelo bimwesha’mba tubena kwikala mu “moba a kupelako” biji mu kakitenguluzha kaji mu kino kibaba. Bakamonyi ba kwa Yehoba baji ku mpunzha ko mwikala bakatemwa bingi kwimukwasha kumvwisha binembelo ne bya kwibingijisha. Nangwa mwakonsha kutaana mikumbu ya mepuzho enu inge mwaya pa keyala wetu wa pa intaneti wa www.pr418.com/kqn. Chintai panembwa’mba BIFUNJISHA BAIBOLO > MEPUZHO A MU BAIBOLO AKUMBULWA.