MOMAZUVA 26 Sindimba 2004 ekankamo lyenene lyevhu kwa horokere moSimeulue sirudi somoIndonesia. Vantu va kere konontere defuta kwa tere eyi yina kuhoroka mefuta. Enkupi kwa tengwire mefuta nononkondo. Makura vantu tava tameke kudukira kononondundu oku tava zigire. Konyima zonominute 30 enkupi kwa ka tengwire nononkondo nokuyazonagura mambo gawo.

Sirudi saSimeulue yiso sokuhova kuzonauka kenkupi lyenene eli lya tundire mefuta lyaIndia. Vatungi mo wokusika po-78 000, ntambali tupu va fire. Morwasinke va fililire wovasesu? * Vantu woposirudi kwa kara nosisewe esi asi: ‘Nsene evhu tali kankama makura o mone enkupi kuna kutengura mefuta nononkondo, dukira konondundu morwa enkupi olyo nali ka tengura.’ Kweyi ya horoka, vantu womoSimeulue va lironga kudimburura marunduruko gemefuta. Kutambura marondoro kwa va parwire.

Bibeli kuuyunga asi kuna wiza “udigu wounene, ou wa dilire kukara po kutunda ketameko lyouzuni dogoro nokwanaina, wangoso hena kapi ngau kara po rumwe.” (Mateusa 24:21) Nye evhu kapi ngava li zonagura po vantu ndi yimpagwa, morwa sitambo saKarunga asi evhu ngali karerera ngorooro. (Muudisi 1:4) Nye udigu owo wounene kuna kara apa Karunga nga ya ‘zonagura ava wokuzonagura evhu!’ Udinikarunga noruhepo ngayi ya haga po. (Ehororo 11:18; Yisewe 2:22) Oso ngasi kara siruwo sosiwa!

Poudigu owo, vantu va hana nzo kapi ngava va zonagura po, kapisi ngwendi moomu ayi horoka pekankamo lyevhu ndi pomankupi gomanene ndi apa ndundu azi rusa mundiro. Bibeli kutanta asi Karunga gedina Jehova “yige eharo,” ntani ga tumbwidira asi “muhungami nga gusa sirongo nga tunge mo narunye-narunye.” (1 Johanesa 4:8; Episarome 37:29) Yisinke no vhura kurugana o ka paruke udigu wounene nokukahafera matungiko? Tambura marondoro.

Kapi tatu diva ezuva eli ngau haga po udinikarunga noruhepo, morwa Jesus kwa tente asi: “Nagumwe si ga diva asi ezuva nosiruwo apa ngasi sika mo, novaengeli si vemeguru noMuna si, ntudi Guhya ntani.” Nye Jesus kuna kutukorangeda tu ‘rungarare.’ (Marukusa 13:32; Mateusa 25:13) Kosinke? Bibeli kwa tumbura yihorokwa eyi ngayi horoka mouzuni komeho Karunga a rete uhura. Ngwendi moomu enkupi eli lya tengwire nononkondo mefuta lya rondwere vantu woposirudi saSimeulue, marunduruko koyihorokwa yomouzuni kutupa sidiviso asi uhura pepi una kara. Kakende ka didilika marunduruko gamwe aga za tumbura Bibeli.

 Yihorokwa yimwe yina kara mokakende nare ngayi horauka pamwe-pamwe. Nye Jesus kwa uyungire asi apa ngomu mona ‘yininke eyi nayinye,’ kuna kuhoroka, diveni asi uhura pepi. (Mateusa 24:33) Lipura asi: ‘Siruwoke yininke eyi (1) ya horoka mouzuni mudima, (2) posiruwo simwe ntani (3) kwa donapa unene?’ Yosili, ose kuna kuparuka posiruwo oso souhura.

Peresidente gwanare gwaAmerika kwa tente asi: “Marondoro kuparura vantu.” Konyima zenkupi eli lya horokere mo-2004, kwa tulisire po yininke yokugava erondoro komavango aga lya kundamene enkupi mokuvapopera nsene ngali horoka hena komeho. Mokulifana Karunga ga tura po mawapaiko mokurondora vantu komeho uhura u wize. Bibeli kwa tanta asi: ‘Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.’—Mateusa 24:14.

Mvhura za ka pita, Nombangi daJehova kwa zuvhisire novili dokupitakana ebiliyona 1,9 moyirongo yokusika po-240 ntani momaraka gokupitakana 700. Ezuvhiso eli kuna kugava umbangi wounene asi uhura pepi. Morwa eharo lyokuhara vantu, Nombangi daJehova kulitura mo kurondora vantu kuhamena ezuva lyaKarunga lyompanguro eli lina kara pepi. (Mateusa 22:39) Mokumona asi ove kuna kugwanena mo uwa mombudi ezi kulikida asi Karunga kwa ku hara. Diworoka asi Karunga “kapi ga hara asi ngapa zonauke nampili gumwe, age kwa hara asi navenye ngava litezurure.” (2 Peturusa 3:9) Tambura eharo lyaKarunga pokutambura marondoro gendi.

Vatungi womoSimeulue kwa dukilire konondundu apa va mwene enkupi kuna kutengura mefuta nononkondo, awo kapi va ndindilire li ka tengure. Eyi va rugene ya va parwire. Mokukaparuka udigu wounene nose twa hepa kurugana ko yuma komeho uhura u wize. Yisinke natu rugana? Muporofete Jesaya kwa tjenge kuhamena ezigido ‘lyomomazuva aga’ tuna kuparuka. Age kwa tente asi: “Tu rondeni kondundu zaHOMPA . . . nga tu ronge eyi ana hara tu yi rugane, ose ngatu gende mononzira edi ga horowora.”—Jesaya 2:2, 3.

Kuronda kondundu tayi ku vatere o mone eyi yina kuhoroka ntani to paruka. Mokulifana, kudiva Karunga kupitira moBibeli kuna kuvatera vantu wovanzi mouzuni mudima mokutura po marunduruko gomawa meparu lyawo. (2 Timoteusa 3:16, 17) Pokuyirugana awo ‘kugenda monzira’ zaKarunga ntani nokuhafera eharo nepopero lyendi.

Ngo tambura ezigido lyaKarunga lyeharo nepopero lyendi momazuva aga goudigu ndi? Tatu ku korangeda o konakone Matjangwa gana kulikida asi ose kuna kuparuka “pomazuva gopouhura” aga gana kara mokakende. Nombangi daJehova momukunda gweni ngadi hafera kukuvatera yipo o kwate egano matjangwa ogo nomu no ga tura pasirugana. Ndi kuvhura o gwane malimbururo komapuro pokutara koIntaneta www.pr418.com/kwn. Tara koruha KUTUHAMENA > MAPURO.