KINA KIA 26 kia Desemba, 2004, nzakama yangolo ya ntoto yavangama kuna sanga kia Simeulue, kuna Indonésia. Wantu awonso basia sungididi kuna kalunga ekolo maza makulukanga mu nzaki zawonso. Vana vau, wantu bayantika manta kuna miongo yo kaza muna ndinga au vo “Smong! Smong!,” disongele vo mavuku mampwena ma kalunga. Muna kolo kia miniti 30, mavuku ma maza mafwasa nzo zayingi ye mavata.

E sanga kia Simeulue i zunga kiantete kiafwasuka muna mavuku mampwena. Muna 78.000 ma wantu bazingilanga mu zunga kiaki, wantu 7 kaka bafwa. Ekuma wantu ayingi bavukila? * Esi sanga kiaki betanga kingana vo: ‘Avo ntoto unikukini o maza makulukidi, tinina kuna mongo kadi ke kolo ko maza mevutuka.’ Mana mateka vangama mesadisanga nkangu a sanga kiaki mu zaya vo mavuku mampwena ma kalunga malueke. O lemvokela lulukisu diavuluza e mioyo miau.

Nkand’a Nzambi uvovelanga vonza kifinamanga, e vonza kiaki i “mpasi zayingi zina ke zateka kala ko tuka kuna semo dia nza yamu wau, ke zikala diaka ko.” (Matai 24:21) E vonza kiaki ke lufwasu lwa ntoto ko, kadi Nzambi ozolele vo o ntoto wazinga yakwele mvu. (Kimpovi 1:4) Kansi, Nzambi otwasa e vonza kiaki muna “fwasa awana befwasanga e nza.” Ediadi difukisa e mvimba yimpumbulu yawonso yo fokola e mpasi. (Lusengomono 11:18; Ngana 2:22) Ekwe ntangw’a kiese ikala!

Nswaswani ye mavuku mampwena ma kalunga, nzakama za ntoto ye tiya tubukanga mu nsi a ntoto tuvondanga wantu ambi ye ambote, o lufwasu ketwasa Nzambi wantu ambi kaka luvonda. Yave wa Nzambi a zola osianga nsilu vo: “Asongi bevwa nza, besikila vo yakwele mvu.” (1 Yoane 4:8; Nkunga 37:29) Aweyi olenda vulukila muna vonza kiaki yo vua nsambu za Nzambi? E nsabi i zazi, lemvokela lulukisu.

Katuzeye ko e lumbu kina Nzambi kasikidisa muna fwasa yimpumbulu yawonso yo fokola e mpasi, kadi Yesu wavova vo: “Mu kuma kia lumbu kiakina ye ola, ke vena muntu ko ozeye kio, kana nkutu mbasi za zulu yovo Mwana, kansi Se kaka.” Muna kuma kiaki Yesu watukasakesa vo: “Nuyingila.” (Matai 24:36; 25:13) Yingila muna nki? Nkand’a Nzambi uvovelanga mambu mevangama vitila o Nzambi katwasa e mbaninu. Nze una esi Simeulue balukisilwa mu kuma kia mavuku mampwena mafinamanga, mambu mevangamanga mu nza yawonso mekutulukisanga vo e mbaninu ifinamene. E babu kina muna longi  diadi kisonganga e nsobani zasakulwa mu Nkand’a Nzambi.

Dialudi vo maka muna mambu mayikilu muna babu kiaki mavangama kala mu fulu yakaka kuna nz’ankulu. Kansi, Yesu wavova vo avo numwene “mambu mama mawonso” nuzaya wo vo e mbaninu ifinamene. (Matai 24:33) Owau ukiyuvula: ‘Nkia ntangwa mavangama mambu mama mawonso mu nza mvimba? Nkia ntangwa mavangama mambu mama mawonso mu ntangwa imosi? Nkia ntangwa mavangu mambi mawokela mu nza?’ Kieleka, mawonso mama mu tandu kieto mevangamenanga.

Nyadi mosi wa América wavova vo: “O lukisa wantu vitila sumbula kiabwa . . . disadisanga mu vuluza mioyo.” Vava mavuku mampwena mavioka, ayadi a nsi yayina bavanga mpungi a lulukisu kimana nkangu walukiswa mu konso vonza kiadi bwa. Diau adimosi mpe, tulukiswanga mpe vo e mbaninu ifinamene. Nkand’a Nzambi wasakula vo: “E nsangu zazi zambote za Kintinu zisamunwa mu nza yawonso muna umbangi kwa zula yawonso, i bosi ikwiza e mbaninu.”—Matai 24:14.

O mvu waviokele, Mbangi za Yave vioka ola 1.900.000.000 basala muna samuna e nsangu zambote mu nsi 240, mu vioka 700 za ndinga. O wokela kwa salu kiaki i ziku kiampwena kisonganga vo e mbaninu ifinamene. Mu kuma kia zola kwau muna wantu, Mbangi za Yave besianga ngolo za lukisa akaka mu kuma kia lumbu kia lufundisu kia Nzambi kikwizanga mu nzaki. (Matai 22:39) Yave osonganga o zola kwandi muna ngeye muna kuvana e lau dia wá lulukisu lwalu. Zaya wo vo “[Nzambi] kazolele ko vo muntu kafwa, kansi, awonso  baluaka muna luviluku lua ntima.” (2 Petelo 3:9) Nga olemvokela lulukisu kekuvananga o Nzambi?

Sungamena vo nkangu a sanga kia Simeulue batinina kuna miongo vava bamona maza makulukanga, ke bavingila ko vo maza mavutuka. Ediadi diabasadisa mu vuluka. Muna vuluka muna lufwasu lukwizanga, ngeye mpe ofwete tinina kuna mongo vitila sumbula kiabwa. Aweyi olenda wo vangila? Nzambi wasadila Yesaya wa ngunza muna sakula e mboka ivewanga mu “lumbu yambaninu” eyi tuzingilanga. Nkand’a Nzambi uvovanga vo: “Nwiza twatomboka kuna mongo a Yave, . . . katulonga nzila zandi, twakangala muna mayendelo mandi.”—Yesaya 2:2, 3.

O tinina kuna mongo dilenda kusadisa mu vuluza moyo aku. Diau dimosi mpe, o zaya e nzila za Nzambi muna longokanga e Diambu diandi, disadisanga mafunda ye mafunda ma wantu mu nza yawonso mu soba mpila zingu kiau. (2 Timoteo 3:16, 17) Ediadi dikubafilanga mu kangalela mu “nzila za [Nzambi]” yo vua e dienga yo lutaninu lwandi.

Nga otambulwila e mbok’a Nzambi yo vua lutaninu lwandi mu lumbu yayi yampasi? Tukasakese wafimpa e sono ina muna babu eyi isonganga mambu mawonso mevangamanga mu “lumbu yayi yambaninu.” Mbangi za Yave mu zunga kiaku, bekala ye kiese kia kusadisa mu bakula Nkand’a Nzambi ye mpila olenda wo sadila muna zingu kiaku. Olenda mpe solola mvutu za yuvu yaku muna sadila nzil’eto muna internete, www.pr418.com. Tala vana vasonama ENSINOS BÍBLICOS > PERGUNTAS BÍBLICAS RESPONDIDAS.