MU DIA 26/12/2004, tshikumina kampanda tshiakenzeka kuditutatshi mu Simeulue, tshiidila tshia ku Nord Est kua Sumatra, mu Indonésie. Mêsu a bantu bonso avua matangile pa mbuu. Mbuu uvua upueka mutubi kabiyi bianji kuenzeka. Diakamue bantu bonso bakatuadija kubanda ku mikuna benda bela mbila, “Smong! Smong!” muaku udi umvuija dipasalala dia mâyi. Mu minite 30, mavuala makole akadituta ku nseke, kupula nzubu ne misoko ya bantu.

Mu tshidiila tshia Simeulue ke muaba wa kumpala uvua mu lutatu lukole pavua dipasalala dia mâyi a Mbuu mualabale dienzeke. Kadi, mu bantu 78 000, anu bantu 7 ke bavua bafue. Bua tshinyi anu bantu bakese nunku? * Bena mu tshidiila etshi batu ne lusumuinu lua ne: ‘Tshipepele tshikole tshiotshi tshituta ne mbuu ukepela bikole, mbimpe kunyemena ku mikuna, bualu mâyi neapasalale mu bantu mu tshitupa tshîpi.’ Bua malu akavua mabafikile, bantu ba mu tshidiila tshia Simeulue bakavua balonge bamanye ne: padi luendu lua Mbuu lushintuluka, dipasalala dia mâyi dikadi pa kuenzeka. Kuteleja didimuija kumpala kua dîba kudi kusungila mioyo.

Bible udi wakula bua tshikumina tshikadi pa kulua, ke “dikenga dinene ditu kadiyi dianji kuenzeka katshia bafuka buloba too ne mpindieu, ne kadiakuenzeka kabidi to.” (Matayi 24:21) Kadi ki ndibutuka dia buloba dikebesha kudi malu adi bantu benza peshi dikebesha kudi bintu bidi Nzambi mufuke to, bualu Nzambi mmulongolole bua buloba bushale kashidi ne tshiendelele. (Muambi 1:4) Tshikumina tshidi tshienzeka ndikenga didi Nzambi mulongolole bua “kubutula bantu badi babutula buloba.” Nebikale ndekelu wa malu mabi ne makenga. (Buakabuluibua 11:18; Nsumuinu 2:22) Nebikale masanka a katshia!

Bualu bukuabu, bishilangane ne dipasalala dia mâyi, dizakala dia buloba, peshi dipatuka dia bitotshi bia kapia mu mikuna, dibutuka didi dilua kadiakushipa bantu badi kabayi ne bualu to. Bible udi wamba ne: “Nzambi udi dinanga,” ne Nzambi udi ne dîna dia Yehowa, mmulaye ne: ‘Bantu bakane nebapiane buloba, nebashikamemu tshiendelele.’ (1 Yone 4:8; Musambu 37:29) Kadi ntshinyi tshiudi ne bua kuenza bua kupanduka ku dikenga dinene ne kupeta masanka adi Nzambi mulaye? Tshia mushinga nkuteleja didimuija kumpala kua dîba.

Katuena mua kumanya dituku dia nshikidilu wa malu mabi ne makenga to, bualu Yezu wakamba ne: “Bua dituku adi ne dîba adi, kakuena muntu udi mumanye, nansha banjelu ba mu diulu, nansha Muana; kadi anu Tatu nkayende ke udi mumanye.” Nansha nanku, Yezu udi utukankamija bua ‘kushala batabale.’ (Matayi 24:36; 25:13) Bua tshinyi? Bible udi utuleja malu ikala ne bua kuenzeka kumpala kua Nzambi kutualaye nshidikilu. Anu bu muvua dipueka dia mâyi didimuije bena mu tshidiila tshia Simeulue ne: dipasalala dikadi pabuipi, dishintuluka dia amue  malu didi ne bua kuikala tshimanyinu kutudi tshia ne: nshikidilu ukadi pabuipi. Kazubu kadi mu tshiena bualu etshi kadi kaleja amue malu adi mashintuluke adi Bible uleja.

Bushuwa, amue a ku malu adibu baleje mu kazubu akavua menzeke ku kale mu mushindu kampanda anyi kansanga. Kadi Yezu wakamba ne: tuetu bamone “malu aa onso,” tumanye ne: nshikidlu ukadi pabuipi. (Matayi 24:33) Diebeja ne: ‘Ndîba kayi mu miyuki ya bantu malu onso adibu bambe 1) menzeke pa buloba bujima, 2) menzeke dîba dimue, ne 3) manyanguke bikole menemene?’ Mbimueneke patoke ne: tukadi tshikondo atshi.

Mfumu kampanda wa mu Amerique wakamba ne: “kudimuija bantu kumpala kua dîba nkunsungila mioyo yabu.” Panyima pa dipasalala dia mâyi dia mu 2004, bakenza bintu bivuabu bateke bua kudimuija bantu ba mu tshitupa atshi anu bua ne: bantu kabalu kufua kabidi bu musangu mushale to. Bia muomumue, Nzambi mulongolole bua kudimuija bantu kumpala kua nshikidilu kuluaye. Bible ukavua mudianjile kuamba ne: “Nebayishe lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso, pashishe, nshikidilu nealue.”​—Matayi 24:14.

Tshidimu tshishale etshi nkayatshi, Bantemu ba Yehowa mbapitshishe mêba 1 945 487 604 bua kuyisha lumu luimpe mu matunga 240 ne mu miakulu mipite pa 700. Dilubuluka dia malu mu matuku etu aa didi difila tshijadiki tshinene tshia ne: nshikidilu ukadi pabuipi. Bu mudi Bantemu ba Yehowa ne dinanga bua bena mutumba nabu, badi badifila ne muabu muonso bua kumanyisha bantu bakuabu ne: dituku dia Nzambi dia dilumbuluisha dikadi pabuipi. (Matayi 22:39) Malu audi upeta aa ntshijadiki tshia ne: Yehowa mmukunange. Vuluka ne: “[Nzambi] ki mmusue bua muntu nansha umue abutudibue,  mmusue bua bonso bafike ku dikudimuna mutshima.” (2 Petelo 3:9) Newandamune ku diananga dia Nzambi ne neuteleje didimuija kumpala kua dîba anyi?

Vuluka ne: bena mu musoko wa Simeulue bakanyemena ku mikuna mile bua kudisungila anu tshikondo tshivuabu bamone bimanyinu; kabavua bindile too ne pavuabi bipita to. Mapangadika abu akabapetesha muoyo. Bua kusungidibua ku dikenga dinene didi dilua, wewe pebe udi ne bua kunyema ku mikuna mile, kuenza nunku, kumpala kua dîba. Mmushindu kayi? Muprofete Yeshaya uvua muenzejibue kudi nyuma muimpe bua kufunda dibikila dimpe divua ne bua kumuangalaka ku “matuku a ku nshikidilu,” matuku atukadi mene aa. Wakamba ne: ‘Luayi bienu, tubande ku mukuna wa Yehowa, bua yeye atuyishe bienzedi biende, ne bua tuetu tuende mu njila yende’​—Yeshaya 2:2, 3.

Kubanda ku mukuna wa Yehowa kudi kukubandisha kuulu kule muaba uudi mua kupetela lupandu. Bia muomumue, kupeta dimanya dia Nzambi kudiambuluisha dia Bible nkuambuluishe bantu miliyo mivule ba pa buloba lelu eu bua kushintulula nsombelu wabu. (2 Timote 3:16, 17) Padibu benze nanku, mbatuadije ‘kuendela mu njila wa Nzambi’ ne kupeta bulenga bua Nzambi ne bukubi buende.

Newandamunaku ku dibikila edi ne kupeta muaba wa bukubi udi Nzambi wa dinanga mulongolole mu matuku aa mabi anyi? Tudi tukulomba bua kukonkonona ne ntema yonso bijadiki bia “matuku a ku nshikidilu” bidi Bible ufila bidi mu kazubu kadi mu tshiena bualu etshi. Bantemu ba Yehowa ba muaba uudi nebikale ne disanka bua kukuambuluisha bua umvue bimpe Bible ne mushindu uudi mua kumutumikila. Anyi udi mua kupeta mandamuna a nkonko iudi udiela wewe mubuele mu site wetu wa www.pr418.com. Tangila muinshi mua LA BIBLE ET VOUS > QUESTIONS BIBLIQUES.