ILO Tijem̦ba 26, 2004 eo, ear wal̦o̦k juon m̦akũtkũt lal̦ el̦ap ilo juon ãne etan Simeulue. Ãne in epãd tuiõñin juon jikin etan Sumatra ilo Indonesia. Ke ear wal̦o̦k m̦akũtkũt lal̦ eo ilo Simeulue, aolep rar reimetol̦o̦k im loe an kajju pããt, juon men ekkã an jab wal̦o̦k. Ilo m̦õkaj, aolep rar jino ettõr ñan tol̦ ko im rar lam̦õj im ba, “Smong! Smong!” Ilo kajin eo aer, naan in ej jitõñl̦o̦k ñan n̦o ko rel̦l̦ap. Enañin 30 minit tokãlik, ear uwe n̦o ko rel̦l̦ap ñan ioon ãne im ko̦kkure enañin aolep m̦õko m̦õn armej ro im bukwõn ko.

Ãne in etan Simeulue, kar jikin eo jinointata me ear jorrããn kõn n̦o ko rel̦l̦ap me ear wal̦o̦k ilo 2004 eo. Ewõr 78,000 armej rej jokwe ilo ãne in, bõtab 7 wõt armej rar mej. Etke jejjo wõt armej rar mej? * (Lale kõmel̦el̦e eo itulal̦.) Ewõr juon jabõn kõnnaan an armej in jikin in me ej ba: ‘Ñe ewal̦o̦k juon m̦akũtkũt lal̦ el̦ap im kwõj lo an kajju pããt, ko l̦o̦k ñan tol̦ ko, kõnke enaaj m̦õkaj an uwe n̦o ioon ãne.’ Ewõr iien ko m̦oktal̦o̦k ear uwe n̦o ko rel̦l̦ap ilo jikin in. Kõn men in, ro ilo Simeulue rejel̦ã ñe enaaj wal̦o̦k n̦o ko rel̦l̦ap ñe rej lo an kajju m̦õkaj an pããt. Kõn aer kar loe kakõl̦l̦e ko im m̦õkaj im ko, rar maroñ mour wõt.

Baibõl̦ ej kwal̦o̦k kõn juon iien jorrããn me enaaj wal̦o̦k. Iien in ej ‘iien eo enaaj l̦ap eñtaan, eo ejjañin ãinwõt jãn jinoin lal̦ ñan iien in, aet, ejãmin ãinwõt tokãlik.’ (Matu 24:21) Mel̦el̦ein ke bwe enaaj jako lal̦ in ilo iien in? Jaab. Lal̦ in eban jako itok wõt jãn men ko armej rej kõm̦m̦ani me rej ko̦kkure lal̦ in ak kõn jorrããn ko rel̦l̦ap rej wal̦o̦k. Etke? Kõnke ej ankilaan Anij bwe lal̦ in en pãd ñan indeeo. (Ekklisiastis 1:4) Kõn men in, ilo iien eñtaan eo el̦ap me enaaj wal̦o̦k, Anij enaaj “ko̦kkure ro rej ko̦kkure lal̦.” Mel̦el̦ein bwe enaaj jako aolep men ko renana kab men ko jej eñtaan kaki. (Revelesõn 11:18; Jabõn Kõnnaan 2:22) Men in enaaj juon jeraam̦m̦an el̦ap!

Bareinwõt, iien eñtaan eo el̦ap enaaj oktak jãn jorrããn ko rel̦l̦ap ãinwõt n̦o ko rel̦l̦ap, m̦akũtkũt lal̦, ak an wal̦o̦k lõñtak kijeek jãn tol̦ ko. Etke? Kõnke ilo iien eñtaan eo el̦ap eban jako armej ro rem̦m̦an. Baibõl̦ ej ba bwe Anij ej juon ‘Anij in yokwe.’ Ej bar ba bwe Anij, eo me etan ej Jeova, ej kallim̦ur bwe “ro rejim̦we renaaj jokwe ilo lal̦, im ro reweeppãn renaaj pãdwõt ie.” (1 Jon 4:8; Jabõn Kõnnaan 2:21) Bõtab, ewi wãween bwe kwõn maroñ el̦l̦ã im mour jãn eñtaan eo el̦ap im lo jeraam̦m̦an ko Anij ear kallim̦ur kaki? Eñin men eo kwõj aikuj in kõm̦m̦ane: M̦õkaj im pokake naanin kakkõl ko!

Jejjab maroñ jel̦ã raan eo im awa eo enaaj jem̦l̦o̦k aolep men ko renana kab men ko jej eñtaan kaki kõnke Jijej ear ba: “A raan eo im awa eo ejjel̦o̦k juon ejel̦ã kake, im jab enjel̦ ro ilañ, jab Nejin, a Jema wõt.” Meñe jejjab jel̦ã, ak Jijej ear rõjañ kõj bwe jen wõnm̦aanl̦o̦k im “ekkõl” wõt. (Matu 24:36; 25:13) Ta eo jej aikuj ekkõl im lale? Baibõl̦ ej kwal̦o̦k kõn men ko renaaj wal̦o̦k ilo lal̦ in m̦okta wõt jãn an Anij jol̦o̦k aolep  men ko renana. Ilo kar ãne eo etan Simeulue, ke armej ro rar lo an kajju m̦õkaj an pããt, men in ear juon menin kakkõl ñan er bwe m̦õttan jidik enaaj wal̦o̦k n̦o ko rel̦l̦ap. Ãindeinl̦o̦k wõt, ñe jej lo an wal̦o̦k oktak ko ipel̦aakin lal̦ in ilo juon wõt iien, men in ej ãinwõt juon menin kakkõl ñan kõj bwe epaak jem̦l̦o̦kin. Bo̦o̦k eo ilo katak in enaaj kwal̦o̦k kõn jet iaan oktak kein Baibõl̦ ej kwal̦o̦k kaki.

Em̦ool bwe ñe jej etale kajjojo iaan men ko rej wal̦o̦k ilo lal̦ in me em̦õj kõllaajraki ilo bo̦o̦k eo, jenaaj lo bwe jet iaaer rar bar wal̦o̦k ilo iien ko etto. Bõtab, Jijej ear ba bwe ñe jej lo an “men kein otemjej” wal̦o̦k, men in ej kaalikkar bwe epaak jem̦l̦o̦kin. (Matu 24:33) Kajjitõk ippam̦ make, ‘Aolep men ko Baibõl̦ ear kwal̦o̦k kaki, ñããt rar wal̦o̦k (1) ipel̦aakin lal̦ in, (2) ilo juon wõt iien, im (3) ñããt ear l̦apl̦o̦k aer nana?’ Elukkuun alikkar bwe men kein rej wal̦o̦k ilo iien kein ad.

Juon kar bũrejtõn an Amedka ear ba: “Kein kakkõl ko . . . rej kõjparok mour ko an armej.” Ãlikin an kar wal̦o̦k n̦o ko rel̦l̦ap ilo 2004 eo, rar illik kein kakkõl ko ilo jikin ko rar jorrããn ñan kakkõl armej ro m̦okta jãn an wal̦o̦k juon jorrããn. Kar kõm̦m̦ane men in bwe en jab bar lõñ armej rej mej ñe ebar wal̦o̦k jorrããn ko rel̦l̦ap ilju im jekl̦aj. Ãindeinl̦o̦k wõt, Anij ear kõm̦m̦ane juon karõk ñan kakkõl aolep m̦okta jãn an jol̦o̦k aolep men ko renana. Juon kanaan ilo Baibõl̦ ej ba: “Naaj kwal̦o̦k gospel in an aelõñin lañ iaolepen lal̦ kõn menin kõnnaan ñan aelõñ otemjel̦o̦k, ilo iien eo enaaj itok jem̦l̦o̦kin.”​—Matu 24:14.

Ilo iiõ eo l̦o̦k, Ri Kõnnaan ro an Jeova rar jol̦o̦k elõñl̦o̦k jãn 1.9 bilien awa ko ñan kwal̦o̦k kõn ennaan eo em̦m̦an ilo 240 aelõñ ko im ilo elõñl̦o̦k jãn 700 kajin ko. Jerbal in rej kõm̦m̦ane ilo raan kein ej lukkuun kaalikkar bwe epaak jem̦l̦o̦kin. Kõnke Ri Kõnnaan ro an Jeova rej yokwe aolep armej, rej kate er joñan wõt aer maroñ ñan kakkõl ro jet bwe m̦õttan wõt jidik enaaj itok raanin ekajet eo an Anij. (Matu 22:39) Ilo m̦ool, kõnke kwõj maroñ bõk tokjãn jãn am̦ riiti mel̦el̦e ko ilo katak in, men in ej kaalikkar bwe Jeova ej yokwe eok. Keememej bwe “[Anij] ejjab kõn̦aan bwe  jabdewõt en jako,” ak ekõn̦aan bwe aolep ren ukel̦o̦k. (2 Piter 3:9) Kwõnaaj ke kortokjãn yokwe in an Anij ñan eok ilo am̦ pokake naanin kakkõl ko an?

Armej ro ilo Simeulue me rar jokwe ilo bukwõn ko repaake lo̦jet, rar ko ñan jikin ko reutiej ñan kõjparok mour ko aer im rar ko ilo iien eo wõt rar lo an kar kajju m̦õkaj an pããt. Rar jab kõttar ak aepedped m̦ae iien eo ewal̦o̦k n̦o ko rel̦l̦ap. Kõn aer kar m̦õkaj im ko, men in ear kõjparok mour ko aer. Ãindeinl̦o̦k wõt, bwe kwõn maroñ el̦l̦ã im mour jãn eñtaan eo el̦ap, kwe bareinwõt kwõj aikuj m̦õkaj im ko ñan jikin ko reutiej ilo kõkkar m̦okta jãn an ejjel̦o̦k iien. Ewi wãween? Rũkanaan Aiseia ear je im kwal̦o̦k kõn juon naanin kũr me ej ñan aolep ro ilo “raan ko ãliktata,” ak raan kein jej mour ie. Naanin kũr in ilo bokin Aiseia ej ba: “Kom̦win itok, im jen wanlõñl̦o̦k ñan tol̦ an Jeova . . . Enaaj katakin kõj kõn ial̦ ko An, im jenaaj etetal ilo ial̦ ko An.”​—Aiseia 2:2, 3.

Ñe kwõj etal ñan ioon juon tol̦, em̦m̦an am̦ reilal̦l̦o̦k im loe aolep men im kwõj pãd ilo juon jikin kwõban jorrããn. Ilo ejja wãween in wõt, elõñ milien armej ro ipel̦aakin lal̦ ilo raan kein rej katak Baibõl̦ im jel̦ã kõn l̦õmn̦ak ko an Anij, im men in ej jipañ er ñan kõm̦m̦an oktak ko ilo mour ko aer. (2 Timote 3:16, 17) Ke rar kõm̦m̦ani oktak kein ilo mour ko aer, rar jino “etetal ilo ial̦ ko An [Anij].” Kõn men in, Anij ej buñbũruon kake er im rej pãd ium̦win kõjparok eo an.

Kwõnaaj ke m̦õn̦õn̦õ in l̦oor naanin kũr in im kortokjãn wãween eo Anij ej kõjparok kõj ilo raan kein me el̦ap nana ie? Kõmij rõjañ eok bwe kwõn lukkuun etale eoon ko ilo bo̦o̦k eo ilo katak in me ej kwal̦o̦k kõn aolep men ko me rej kaalikkar bwe jej mour ilo “raan ko ãliktata.” (2 Timote 3:1) Ri Kõnnaan ro an Jeova ilo bukwõn eo am̦ renaaj m̦õn̦õn̦õ in jipañ eok bwe en maroñ alikkarl̦o̦k am̦ mel̦el̦e kõn eoon kein im wãween aer jejjet kũtieer ilo raan kein. Kwõmaroñ bar loe uwaakin kajjitõk ko am̦ ilo am̦ etal ñan weep jait eo am etan www.pr418.com/mh.