ITECH tonal 26 metsti diciembre xiuit 2004, tel chikauak talolinik ompa Simeulue tein moajsi tatajko ueyiat itech ueyi altepet Sumatra (Indonesia). Akin moajsiaj ueyiatenoj kiitakej keniuj ueyiat tel kaxania. Niman, nochin motalojkej itech tepemej uan chikauak tsajtsitiayaj: “Smong! Smong!”, tein itech inintajtol kijtosneki “tsunami”. Ayamo panouaya tajko hora keman ueyiat tel uejkapan moajkotamotak uan kinuikak tel miak kalmej uan xolalmej.

Ompa Simeulue yejua kampa yekinika taijtakoj nejon ueyi tetsauit. Akin ompa nemij ajsiaj 78,000 uan sayoj momikilijkej chikome. ¿Keyej amo miakej momikilijkej? * Se tajtol tein ompa moixmati kijtoua: “Komo talolini uan tikita ke ueyiat mouejkatilia, ximotalo kampa tepemej, porin niman chikauak mokepa”. Akin nemij Simeulue kikakkej tein kinnejmachtijkaj ininuejkaujtatuan, yejua ika keman kiitakej ke ueyiat taman moitaya kimatiaj ke moajkotamotaskia. Kemej kikakkej tanejmachtilis, kinpaleuij maj momakixtikan.

Biblia tanejmachtia tein panos amo uejkaua itech semanauak taltikpak, kijtoua: “Onkas kachi ueyi tajyouilis ten amo keman nankitakke desde kuak tsinpeuak in taltikpak. Uan amo keman onkas ok satepan okse tajyouilis keme nijin” (Mateo 24:21). Nejin amo kijtosneki ke taltikpak ixpoliuis porin taltikpaktekiuajyomej amo kuali taixyekanaj oso ika se tetsauit; Dios kineki maj taltikpak moajsi nochipaya (Eclesiastés 1:4). Dios kinixpolos “nekes ten taijtakojtinenke nikan taltikpak”. Nochi tein amo kuali uan tajyouilis tamis (Apocalipsis [Revelación] 11:18; Proverbios 2:22). ¡Se ueyi tatiochiualis!

Sayoj ke ijkuak, amo momikiliskej akin yolkualmej kemej panoua keman ueyiat moajkotamota, talolini oso toponi se tepet. Biblia kijtoua ke “Dios Yejuatsin tetasojtatinemi”, uan motenkaua ke “akin yolmelaujkej ininaxkatis taltikpak, uan ompa nemiskej nochipaya” (1 Juan 4:8; Salmo 37:29). ¿Toni uelis tikonchiuas tein mitsonpaleuis xionmomakixti itech okachi ueyi tajyouilis uan xikonseli tein kuali tein Jiova motenkaua kiualkuis? Xikonkaki tein tanejmachtia.

Amo uelis tikijtoskej kemanian tamis tein amo kuali uan tajyouilis, porin Jesús kijtoj: “Ne tonal de noualalis amo aken kimatis. Hasta itakeualuan de Dios in ángeles ten yetokke ne tech eluiyak amo no kimatij de ne tonal kuak Nejuatsin nimoualuikas. Ta, sayo kimatos Toueyitajtsin Dios”. Maski ijkon, Jesús techyoleuak maj titachixtokan (Mateo 24:36; 25:13). ¿Keyej moneki titachixtoskej? Biblia kijtoua toni taman mochiuaskia achto ke Dios kiixpolos tein amo kuali. Ijkon kemej akin nemiaj ompa Simeulue kiitakej ke ueyiat taman moitaya kimatkej ke yaya moajkotamotati, no ijkon niman mopatas tein mochiua semanauak taltikpak tein technejmachtis  ke ixpoliuilis amo uejka yetok. Itech recuadro tein moajsi itech nejin página uelis tikonitas seki taman tein Biblia kijtoua ke mochiuaskia.

Melauak ke seki nejon tachiualismej panouanijya ne uejkauj, maski amo noyampa. Sayoj ke, Jesús kijtoj ke keman tikitaskej ke mochiua “nochi nijin neskayome” tikmatiskiaj ke ixpoliuilis amo uejka yetok (Mateo 24:33). Xionmotajtani kemanian tein Jesús kijtoj 1) mochiuani semanauak taltikpak, 2) mochiuani itech sayoj seki xiujmej uan 3) okachi momiakiliani. Uelis tikijtoskej ke tinemij itech nejon tonalmej.

Se takat akin tekiuajtik itech ueyi altepet Estados Unidos kijtoj: “Komo niman motanejmachtia [...] uelis momakixtiskej miakej”. Satepan keman ueyiat moajkotamotak itech xiuit 2004, itech nochi altepet motalij se taman tein tanejmachtiskia ke panoti se tetsauit uan ijkon amo miakej momikiliskiajok. No ijkon, Dios kiixtaliani se taman tein tanauatis ke ixpoliuilis amo uejka yetok. Biblia kijtoua: “Uan nejin kuali tanauatilmej ika tekiuajyot motetapouis semanauak taltikpak kampa nemij uan ijkon nochin kimatiskej; uan ompa ejkos tamilis” (Mateo 24:14, TNM).

Xiuit tein tiualpanokej, itaixpantijkauan Jiova panoua 1,900 millones horas kiteixmatiltijkej kuali tanauatilmej itech 240 altepemej uan xolalmej itech panoua 700 tataman tajtolmej. Nejin tekit tein kichiuaj kinextia ke ixpoliuilis amo uejka yetok. Kemej kintasojtaj oksekin, itaixpantijkauan Jiova senkis mochikauaj kinnejmachtiskej ke iueyi tonal Dios amo uejka yetok (Mateo 22:39). Tikonixtajtoltis nejin tamachtilis kinextia ke Jiova mitsontasojta. Xikonelnamiki ke Dios “amo kineki ma senme ixpoliuikan. Ta, Yejuatsin kimonekiltia ke tinochin ma timoyolnemilikan de totajtakoluan para tikpiaske ne  nemakixtilis” (2 Pedro 3:9). Uan tejuatsin, ¿tikonkakis tein Dios ika miak netasojtalis tanejmachtia?

Xikonelnamiki ke akin nemiaj ueyiatenoj ompa Simeulue motalojkej itech tepemej keman kiitakej ke ueyiat kaxania uan ijkon ueliskiaj momakixtiskej; amo kichiakej maj mokepani. Tein niman kichiujkej kinmakixtij. Tejuatsin no moneki kemej yeskia niman tionmotalos kampa “okachi uejkapan” uan ijkon uelis tionmomakixtis. Dios kiluij tanauatijkej Isaías maj kijkuilo se tayoleualis tein hasta axkan “itech itamian tonalmej” kisentoka moajsi. Tayoleualis yejua nejin: “Xiualakan, uan maj titejkokan itech tepet tein iaxka Jiova, [...] yejuatsin techmachtis ika iojuan, uan yekmelauj tinentinemiskej itech iojuan” (Isaías 2:2, 3).

Se moajsis ikuapan se tepet tapaleuia maj se uejkatachia uan maj se momakixti. No ijkon, se kiixmatis iojuan Dios tein moajsij itech Biblia, kinpaleuiani millones akin nemij semanauak taltikpak maj kipiakan se kuali nemilis (2 Timoteo 3:16, 17). Nejon kinpaleuia maj moajsikan “itech iojuan” Dios, maj kiyolpaktikan uan maj yejuatsin kinyekpia.

¿Tikonselis itayoleualis uan inepaleuil Dios tein kitemaka itech nejin tonalmej tein semi ouijkej? Uelis tikonitas recuadro tein kipia nejin tamachtilis kampa kinextia tein Biblia kijtoua ke mochiuaskia itech itamian tonalmej (2 Timoteo 3:1). Itaixpantijkauan Jiova akin kiteixmatiltiaj iTajtol Dios kampa tejuatsin tionnemi, ika miak pakilis mitsonpaleuiskej xikonajsikamati uan xikonchiua tein Biblia tamachtia. Xa tikonuelitaskia tikonmatis keniuj Biblia kinankilia netajtanilmej tein tikonpia keman tikonitas kampa timoteixmatiltiaj itech Internet www.pr418.com/ncj. Xikontemo TIAKONIMEJ > NETAJTANILMEJ TEIN MOCHIUAJ.