MU NJIKU 26 ya Mbuji, 2004 mudhuma ngo pasi wo mutengo wo kukura kunoita 9.1 wakazungunyisa cirundu cinozwi Simeulue ciri ku pharamande ra njikazi ko Sumatra, Indonezia ngo mumbhiripiri mo jombe. Vandhu vese vaenga munogumira kumwa yo mu jombe vakasota mu jombe. Kumwa yo mu jombe yaenga yashefukira kupindirija moyaigumira. Cipondho-pondho, umwe na umwe wakatanga kugogoma acienda ku matundhu, acimima kuti: “Smong! Smong!” gama ro kondhoyo rinonanga tsunami. Mukati mo 30 o museswa, mavimbi ana simba akafukija cirundu ciya, ophwanya-phwanya nyumba zinji no ndharaundha zinji.

Cirundu co Simeulue caenga ndau yo kutanga kuparajwa ngo tsunami mu Oseyano Indiko mu 2004. Ko vagari vanoita 78.000, vakafa ndi vanomwe basi. Ngenyi vakafa vashoma basi? * Mumwe musumuri wo pa mutundhuwo wakati: ‘Kudari kukaitika mudhuma ngo pasi zve jombe rofunduruka, gogomanyi mucienda ku matundhu ngokuti jombe roda kuphamura mumbhiripiri munogumira kumwa yo mu jombe.’ Kubvira ko zvakaitika kare, vandhu vo Simeulue vakajija kuziva kuti tsunami iri kuda kuitika ngo kucinja ko mugariro wo jombe. Kupurukira ngwajo nguva iciripo kwakaponesa upenyu hwavo.

Bhaibheri rinonanga ngo kukhwedera ko ngozi yo ‘dambujiko guru, ricito rakambowanika kubvira pakutanga ko nyika, aricazowanikibze.’ (Mateu 24:21) Haiwa, asipi kupera ko Nyika ngo zviito zvo vandhu vacikaitaji ushoni kana ngo zviitiko zvimweni zvo cibarihwe​—ngokuti i cidisiso ca Mwari kuti nyika irambe iripo mbhera narini. (Mucumaeri 1:4) Mukusiana, dambujiko riri kuviyari i ciito ca Mwari kuti ‘apeje vaya vanophwanya nyika yo pasi.’ Uku kucazova kupera ko ushati hwese no matambujiko. (Apokalipsi 11:18; Mazwi Akangwara 2:22) Acazova makomborero akanaka zvakadini!

Kunja kwa izvi, mukusiana no tsunami, mudhuma ngo pasi kana kuputika ko matundhu, kuparajwa kuri kuviyari akuzourai vandhu vacina ndava. Bhaibheri rinoti: “Mwari, rudo,” zve Mwari wodhowo ana zina rokuti Jehovha, ari kupikira kuti “varurami vanozoita veno vo nyika, vanozogaremo mbhera narini.” (1 Johani 4:8; Nduyo 37:29) Waro, mungapokonyokesa kudini pa dambujiko guru no kubusa makomborero akagondeswa? Khiya nga ii: Kuzwa ngwajo nguva iciripo!

Itusu atiizivi kamare njiku inozopera kushata kwese no matambujiko, ngokuti Jesu wakati: “Njiku no nguva apana anobziziva, nokuti ngirozi jo mugore. Anobziziva ndi Baba.” Asi, Jesu wakativangisa kuti tirambe ‘takarinda.’ (Mateu 24:36; 25:13) Kuitirenyi? Bhaibheri rinotibvunja zviitiko zvo mugariro wo nyika zvaizovepo Mwari acito waviisa mugumo. Enga ngo  mangwajiro ovakaiitwa vagari vo Simeulue ngo kucinja ko ciriporipoco ko mugariro wo jombe ngo kukhwedera ko tsunami, kucinja ko zviitiko zvo jombe ro nyika, icitatijo co kuti mugumo waaphedo. Ngojapi cinjo jimweni jinonangwa ngo Bhaibheri?​—Vonanyi bhokiso.

Ngozvokadi kuti zviitiko izvo kana mugariro​—umwe nga umwe​—wakaitika kare mbhera pa mupimo jimweni. Asi Jesu wakananga kuti tikavona “bzese ibzi,” tinodikana kuziva kuti mugumo waaphedo kamare. (Mateu 24:33) Zvibvunjisenyi kuti: ‘Kudari mu zviitiko mukaitika zviro zvese zvakanangwaya (1) zvikaitika pasi pese, (2) zveciitika pa mukuvo wondhowo zve (3) zviciengejereka padoko ngo padoko kubva mu kushata kuenda mu kunyanya?’ Zvakajeka kamare kuti, tiri kuraramadi pa mukuvo wondhowo.

Umwe prezidenti wokare wo ku Estadhos Unidhos wakati: “Mugariro wo ngwajo yo nguva iciripo . . . unoponesa vandhu”. Pa tsunami inozoitikazve mu Oseyano Indiko, mugariro wo ngwajo unonga wapera kunasirihwa mu ndharaundha yo yakaitikiraya kuitira kuphiningijira kufa ko vandhu pakazoitikazve tsunami kumbejiyo. Mukuezana, Mwari wakaita nasiriro kuti kupekejwe ngwajo mugumo ucito waviya. Bhaibheri rakananga kuti: “Vangeri iri ro Umambo rinozotokoteswa pasi pese, kuita ufakazi ku vandhu vese. Pondhopo kunozovia kupejwa ko bzese.”​—Mateu 24:14.

Gore raperari basi, Zvapupu zva Jehovha zvakapeja nguva jinodarika 1.9 o mabhiriyau zvicicumaira masoko akanaka mu nyika jinokwana kuita 239 zve mu ndumi jinodarika 700. Kuenderera mberi ko njiku jino kangaije kunopa citatijo cakavanga cokuti mugumo waaphedo. Zvicindundihwa ngo rudo ku vocigarisano, Zvapupu zva Jehovha azvithuruji simba razvo pozvinongwaja vamweni ngo njiku yo kutonga ka Mwari yokuti iri kukhwedera ngo kukasika. (Mateu 22:39) Zvokadi, mungabesereka ngo masoko aya ari citatijo co rudo hwa Jehovha komuri. Rangariranyi kuti, “[Mwari] aadi kuti mundhu afe, anoda kuti vese  vaphinduke mwoyo.” (2 Pedru 3:9) Munodavira rudo hwa Mwari no kupurukira ngwajo inopuwa nguva iciripo here?

Kurangarira kuti vagari vo mundharaundha yo mumbhiripiri mo jombe yo ku Simeulue vakatizira ku matundhu kuitira kujiviririka pa mukuvo wovakavona kumwa yo mu jombe icishefukira; avazivi kuivetera mbhera ihwirire. Kutiza kwavo ngo kukasika kwakaita kuti vapokonyoke. Kuti mupokonyoke pa dambujiko riri kuviyari, munodikanavo kuti mutizire ku matundhu, amudikani kunonoka kamare. Ngenyi? Muporofita Isaia wakafemehwa kuti atare ngo pamusoro po mukoka unodakajisa uri kuitwari “mu njiku jokupejisira,” mu mukuvo wotiri kuraramari wari. Mukokewo uri kuti: “Ngatende, tokhwira dunthu ra [Jehovha] . . . kuti atijijise makwanja ake, ngokudaro tinozofamba mu njira jake.”​—Isaia 2:2, 3.

Kukhwira nyezuru ko dundhu kunomupa mavonero akakhwirira no ndau yo kungwaririka. Mu njira yakafanana, kuguma pa kuziva makwanja a Mwari ngo kuverenga Bhaibheri kuri kubesa zviuru no zviuru zvo vandhu pasi pese nyamasi uno kuti vaite cinjo jinovabesera mu upenyu hwavo. (2 Timoti 3:16, 17) Ngo kuita kudaro, vanotanga ‘kufamba mu njira ja [Mwari]’ zve vanobusa unyasha hwake no kukorondhwa ndiena.

Munozodavira mukoka uwo zve mowina kujivirihwa ko rudo ka Mwari mu njiku jino jo kunesa here? Tiri kumuvangisa kuti mupopore no ubhasopa hwese zvitatijo zviri pa bhokiso riri pa musoro uno rinobhuya ngo pamusoro po zviro zvese zvinokhombija nguva yedu ino, inga “njiku jokupejisira.” Zvapupu zva Jehovha zvo mundharaundha menyu zvinozodakara ngo kumupa besero ririrese romungada kuti muve no kuzwisisa kwakajeka ko matahwa ari mu musoro uu no mashandisihwe ao nyamasi uno. Kana mungawana mupinguro jo mubvunjo jenyu ngo kunghwina mu website yedu, www.pr418.com. Vonanyi panoti ZVINODZIDZISWA NEBHAIBHERI > MINBVUNZO YEBHAIBHERI INOPINDURWA, mu ciShona.