EKAKAMO lyevi enene lyondjundo 9.1, olya li lya dhenge muSimeulue mo 26 Desemba 2004, okantuntu ke li kooha dhefuta lyaSumatra, moIndonesia. Aantu ayehe mboka ya li komunkulo gwefuta ndyoka oya li ye li tala. Efuta olya li tali shuna neendelelo shi vulithe shito. Nziyanziya, kehe gumwe okwa tameke okutondoka u uka koondundu, ti igidha melaka lyawo ta ti: “Smong! Smong!” shoka tashi ti oshikungulu oshinene shomefuta shoka hashi etithwa kekakamo lyevi. Konima ashike yominute 30, okwa zi ekuthikuthi li na oonkondo oonene nolyi idhenge kooha dhefuta, nokuhanagula po omagumbo ogendji nosho wo omikunda.

Okantuntu kaSimeulue oko kotango ka li ka dhengwa koshikungulu shekuthikuthi shoka oshinyanyalithi. Mokantuntu hoka omwa li aantu 78 000, ihe yaheyali owala ya si. Omolwashike mwa si owala aantu aashona? * Aantu mokantuntu hono ohaya popi taya ti: ‘Ngele ekakamo enene lyevi lya ningwa, efuta e tali shuna, matukila koondundu, molwaashoka efuta otali ke etelela ekuthikuthi li na oonkondo ndyoka tali ya li idhenge kooha dhefuta mbalambala.’ Iiningwanima yomonakuziwa, oya kwathele aantu yomokantuntu kaSimeulue yi ilonge okutala ngele otaku zi oshikungulu shomakuthikuthi mokukala haya tala keinyengo lyefuta. Okuvulika komalondodho okwe ya kwathele ya hupe.

Ombiimbeli otayi popi kombinga yoshiponga oshinene shi li pokuya, ano “uudhigu uunene inaau kala ko nale okuza ketameko lyuuyuni sigo ongashingeyi, nongaashi [itawu] ya we.” (Mateus 24:21) Uudhigu mbuka kawu shi ehulilo lyuuyuni tali etithwa kaantu mboka haya yono evi, wo kawu shi oshiponga shopaunshitwe. Omolwashike tatu tile ngawo? Elalakano lyaKalunga, evi li kale sigo aluhe. (Omuuvithi 1:4) Pehala lyaashono, uudhigu uunene mboka tawu ya owo onkatu ndjoka Kalunga ta ka katuka ‘a hanagule po mboka taa yonagula po evi!’ Otashi ka kala ethimbo lyokuhulitha po uukolokoshi nosho wo okumona iihuna. (Ehololo 11:18; Omayeletumbulo 2:22) Shika kashi shi tuu elaleko nuuyamba lya dhenga mbanda!

Shimwe ishewe, ngaashi iikungulu yomakuthikuthi, omandwafuko gomulilo moondundu, nenge epilili lyokohi yevi, mbyoka hayi dhipaga aantu yaana ondjo, uudhigu uunene mboka tawu ya itawu ka hanagula po aantu yaana ondjo. Ombiimbeli otayi ti kutya, “Kalunga oye ohole,” naKalunga ngoka edhina lye Jehova, oku uvaneka kutya “aayuuki otaa ka thigulula evi e taa kala mo sigo aluhe.” (1 Johannes 4:8; Episalomi 37:29) Ongiini mbela ngoye to ka vula oku ka hupa puudhigu uunene nankene to ka nyanyukilwa uuwanawa mboka tu uvanekelwa? Oshinima sha simana: Okupulakena komalondodho manga taku tiwa onena!

Itatu vulu okutya uunake kondandalunde esiku lyehulilo lyuukolokoshi awuhe nosho wo lyemono lyiihuna tali ya, molwaashoka Jesus okwe tu lombwela ta ti: “Esiku notundi ndjoka kaku na ngoka e yi shi, nando aayengeli yomegulu nenge Omwana, Tate oye awike.” Nonando esiku ndyoka katu li shi, Jesus okwe tu ladhipike a ti kutya natu ‘kale twa tonata.’ (Mateus 24:36; 25:13) Omolwashike mbela? Ombiimbeli oye tu  lombwela oonkalo dhuuyuni nkene tadhi ka kala manga Kalunga inaa eta ehulilo. Ngaashi owala elunduluko lyombaadhilila lyefuta lya li lya londodha aakalimo yomokantuntu kaSimeulue kutya opu na oshikungulu tashi zi mefuta, omalunduluko giiningwanima yomuuyuni otayi tu ulukile kutya otu li popepi nehulilo lyuuyuni. Oshimpungu shoka shi li moshitopolwa shika osha popya kombinga yomalunduluko gamwe omanene ngoka ga popiwa mOmbiimbeli.

Iiningwanima yimwe nenge oonkalo dhimwe ndhoka dha tumbulwa moshimpungu, odha ningwa monakuziwa. Jesus okwa ti kutya ngele tatu “mono ayihe mbika,” natu kale tu shi shi kutya ehulilo olya hedha popepi. (Mateus 24:33) Ipula to ti: ‘Uunake iinima mbika ayihe ya ningwa mondjokonona (1) muuyuni awuhe, (2) ya ningwa pethimbo limwe (3) noye ende tayi nayipala noonkondo?’ Osha yela kutya otu li pethimbo ndyoka ngashingeyi.

Omupresitende gumwe omukulu gwaAmerika okwa ti: “Omalondodho gopetameko . . . ohaga hupitha oomwenyo.” Konima yoshikungulu shomefuta shomo 2004, moshitopolwa shoka omwa li mwa tulwa eshina lyokulondodha aantu pehala mpoka pwa li pwa dhengwa unene koshikungulu, opo kaaya ka kanithe oomwenyo dhawo monakuyiwa. Sha faathana, Kalunga naye okwe tu pa omalondodho kuyele manga ehulilo inaali thika. Ombiimbeli otayi tu lombwele tayi ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”—Mateus 24:14.

Omumvo gwa zi ko, Oonzapo dhaJehova odha longa oowili obiliyona 1.9 miilonga yokuuvitha elaka etoye miilongo yi li 240 nomomalaka ge vulithe po 700. Ehumokomeho ndika lyokunena otali gandja uumbangi wa kola kutya ehulilo oli li popepi. Molwaashoka Oonzapo dhaJehova ohadhi inyengithwa kohole yokuhola aantu ooyakwawo, ohadhi ningi oonkambadhala dha mana mo, opo dhi londodhe yalwe kombinga yesiku lyepangulo lyaKalunga kutya oli li popepyeelela. (Mateus 22:39) Uushili mboka kutya nangoye oto vulu okumona uuwanawa melondodho ndika, owu li euliko lyohole  yaJehova kutya oku ku hole. Koneka kutya, “[Kalunga] ina hala, ku kale nando ogumwe ta geelwa, ihe okwa hala, aantu ayehe ye ethe uulunde wawo.” (2 Petrus 3:9) Mbela oto ka pulakena ngaa komalondodho gaKalunga gopahole?

Dhimbulukwa kutya, aantu oyendji yomomukunda gwaSimeulue ngoka gu li kooha dhefuta oya matuka yu uka koondundu ya ka konge egameno sho ya mono efuta lya shuna; inaya tegelele li galuke, opo andola ya vule okuya ontuku. Okuya ontuku okwe ya hupitha. Opo wu ka hupe puudhigu uunene mboka tawu ya, nangoye wo owa pumbwa okumatuka wu uka koondundu manga kuyele, ano oku shi popya pathaneko. Ngiini mbela? Omuhunganeki Jesaja okwa nwethwa mo a nyole kombinga yehiyo tali gumu omitima ndyoka tali ka kala tali ningwa ‘omasiku gahugunina.’ (OB-1954) Ngashingeyi otu li pethimbo ndyoka. Ehiyo ota li ti: “Natu londeni kondundu yOmuwa, . . . Ote ke tu nongeka shoka a hala tu longe; otatu ke enda momapola e ga hogolola.”—Jesaja 2:2, 3.

Ngele owa londo kondungu yondundu oto vulu okumona shoka tashi ningwa noto kala wu li megameno. Momukalo gwa faathana, okutseya oondjila dhaKalunga mOmbiimbeli, otaku kwathele aantu omamiliyona muuyuni awuhe ya ninge omalundulo moonkalamwenyo dhawo ngoka ge na oshilonga. (2 Timoteus 3:16, 17) Mokuninga ngaaka, ohaya tameke ‘okweenda mondjila yu uka [yaKalunga],’ nohaya kala ya hokiwa kuye nohe ya gamene.

Mbela oto ka taamba ko ngaa ehiyo ndyoka nokwiigandja megameno lyohole yaKalunga momasiku ngaka omawinayi tu li mugo? Otatu ku ladhipike wu konakone Omanyolo nuukeka ngoka ge na uuyelele, ge li moshimpungu shoka shi li moshitopolwa shika kombinga ‘yomasiku gahugunina.’ (OB-1954) Oonzapo dhaJehova dhomoshitopolwa sheni otadhi ka kala dha nyanyukwa oku ku kwathela wu mone euvoko lya yela nawa lyomanyolo nosho wo nkene to vulu oku ga tula miilonga. Oto vulu wu mone omayamukulo komapulo goye kepandja lyetu lyokointaneta, www.pr418.com. Tala mpoka pwa nyolwa BIBLE TEACHINGS > BIBLE QUESTIONS ANSWERED.