IA Tesemo 26, 2004, ne tō e mafuike ne 9.1 e malolō ki Simeulue, ko e aelani ne tū he faahi tokelau ki lalo he kautahi ha Sumatra, i Indonesia. Ko lautolu ne tutū he mataafaga hane onoono atu oti ki tahi. Ko e puke tahi ne mamiti lahi ki moana ko e mena nakai fa mahani ki ai. Mogoia ni, ne tafepoi e tau tagata oti ke he tau mouga mo e tauhea fakalalahi, “Smong! Smong!” ko e kupu he motu ma e tsunami. Kavi ke he 30 e minuti, o hake mai e tau peau malolō mo e papihi ke he kautahi, ti moumou e laulahi he tau kaina mo e tau maaga.

Ko e aelani ko Simeulue ne lauia mua he tsunami matematekelea lahi ia. Ka e, he 78,000 tagata ne nonofo he aelani nei, toko 7 ni ne mamate. Ko e ha ne tokofiha ai? * Pehē e talahauaga he tau tagata he motu: ‘Ka malulululu malolō e kelekele mo e mamiti e tahi, tafepoi ke he tau mouga, ha ko e mena to liu mai mafiti e tahi ke he mataafaga.’ Mai he tau tsunami fakamua, kua iloa he tau tagata Simeulue, ko e tsunami hane hau ka hiki e tahi. Ati hao a lautolu he omaoma ke he tau hatakiaga ne fakailoa tuai.

Kua talahau he Tohi Tapu hagaao ke he matematekelea lahi hane hau, ko e “vaha ia ke lahi ai e matematekelea, nakai pihia taha mena tali mai he kamataaga he lalolagi, kua hoko ni ke he vaha nai; ti nakai tuai pihia foki.” (Mataio 24:21) Ka e ai ko e fakaotiaga anei he Lalolagi palaneta ha ko e tau gahua matahavala he tagata po ke tau matematekelea pauaki​—ko e finagalo he Atua ke tumau tukulagi e lalolagi. (Fakamatalaaga 1:4) Ka ko e matematekelea lahi hane hau, ko e puhala he Atua ke “moumou ai foki a lautolu kua moumou e lalolagi.” To fakaotioti ai e tau mahani kelea oti kana mo e matematekelea. (Fakakiteaga 11:18; Tau Fakatai 2:22) Ko e monuina mooli a ia!

He nakai tuga e tau tsunami, tau mafuike, po ke tau mouga ne pāpā, ko e moumouaga hane hau, to nakai mamate a lautolu ne mahani mitaki. “Ko e Atua ko e fakaalofa a ia,” he talahau he Tohi Tapu, ti ko e Atua ne higoa ko Iehova, ne mavehe mai to “eke ni e motu ma e tau tagata tututonu, to nonofo muatua ai a lautolu.” (1 Ioane 4:8; Salamo 37:29) Ka e maeke fēfē ia koe ke hao mai he matematekelea lahi mo e moua e tau monuina ne mavehe mai? Ko e kei: Omaoma ke he tau hatakiaga!

Nakai maeke ia tautolu ke iloa e aho pauaki ka fakaoti e tau mahani kelea oti kana mo e matematekelea, ha kua pehē a Iesu: “Ka ko e aho ia mo e magaaho ia nakai iloa he taha tagata, nakai iloa foki he tau agelu he lagi, ka ko e haku a Matua hokoia ni.” Pete ia, kua fakamafana e Iesu a tautolu, “kia mataala.” (Mataio 24:36; 25:13) Mataala ke he heigoa? Fakamaama mai he Tohi Tapu e tau tuaga he lalolagi ka tutupu ato tamai he Atua e fakaotiaga. Tuga he kitia he tau tagata Simeulue e tahi ne hiki, ti iloa ko e tsumani hane hau, to pihia foki e hikiaga  he tau tuaga he lalolagi ka fakakite kua tata mai e fakaotiaga. Kikite e puha ke he falu hikiaga ofoofogia ne talahau he Tohi Tapu.

Ka onoono takitaha, ko e falu he tau mena ia ne tutupu po ke tau tuaga ne fakakite mai i loto he puha, kua fitā he tutupu he vahā fakamua. Ka e pehē a Iesu ka kitia e “tau mena oti ia,” to iloa e tautolu kua tata mai e fakaotiaga. (Mataio 24:33) Hūhū hifo ki a koe ni, ‘Tali mai he vahā fakamua, ko e magaaho fe ne kitia e tau mena oti nei ne fakamaama mai (1) kua lauia ai e lalolagi katoa, (2) tutupu he taha e magaaho, mo e (3) holo ke he kelea muitui?’ Maaliali ai, kua nonofo a tautolu he magahala pihia.

“Ko e tau fakatokaaga ke fakailoa tuai e tau hatakiaga . . . kua fakahao e tau momoui,” he talahau he taha pelesiteni fakamua atu ha Amerika. He mole e tsunami he 2004, ne fakatū e fakatokaaga ke hataki e tau matakavi ne lauia ai, ke ua tokologa e tau tagata ka mamate ka liu ke fai mena pihia ka tupu. Pihia foki, kua fitā e Atua he fakatoka e hatakiaga ke fakailoa ato hoko mai e fakaotiaga. Talahau tuai he Tohi Tapu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.

He tau kua mole ni, ne fakaaoga he Tau Fakamoli a Iehova molea e 1.9 e piliona tulā he fakamatala e tala mitaki he 240 e motu mo e ke he molea e 700 vagahau. Ko e mena ia ne tupu he magahala nei kua kitia e fakamooliaga lahi kua tata mai e fakaotiaga. Ha kua omoomoi he fakaalofa ke he tau katofia ha lautolu, ne fakamakamaka e Tau Fakamoli a Iehova ke hataki e tau tagata hagaao ke he aho he fakafiliaga he Atua hane mafiti he hau. (Mataio 22:39) He iloa, to aoga e vala tala nei ki a koe, ko e fakakiteaga kua fakaalofa e Atua ki a koe. Manatu, “nakai finagalo a ia [Atua] ke malaia taha, ka kia hohoko oti kana ke he tokihala.” (2 Peteru 3:9) To talia  nakai e koe e fakaalofa he Atua mo e omaoma ke he hatakiaga?

Manatu e tau tagata ne nonofo he tau maaga he kautahi ha Simeulue, ne fehola a lautolu ke he tau mena tokoluga ke hao he magaaho ne kitia e lautolu e tahi ne mamiti; ai fakatali a lautolu ke liu hake mai e tahi. Ko e ha lautolu a fifiliaga mauokafua ati momoui a lautolu. Ke hao he matematekelea lahi hane hoko mai, kua lata foki a tautolu ke fehola ke he tau mena tokoluga, neke to mui lahi. Fehola fēfē? Ne omoomoi he agaaga e perofeta ko Isaia ke tohi e uiina fakalagalaga ne hoko mai foki ke he vahā he “tau aho a mui,” ko e magahala nei kua nonofo ai a tautolu. Pehē mai: “O mai a, kia o hake a tautolu ke he mouga a Iehova . . . To fakaako mai foki e ia a tautolu ke he hana tau puhala, ti o ai a tautolu ke he hana tau puhala.”​—Isaia 2:2, 3.

Ka hake ke he tapunu he mouga to kitia mitaki e koe mai he mena tokoluga mo e to haohao mitaki ai. Pihia foki, he iloa e tau puhala he Atua mai he Tohi Tapu, kua lagomatai e tau miliona tagata he lalolagi mogonei ke taute e tau hikiaga aoga he tau momoui ha lautolu. (2 Timoteo 3:16, 17) He taute pihia, kua kamata a lautolu ke “o ai . . . ke he hana [Atua] tau puhala” ti moua e taliaaga mo e puipuiaga haana.

To talia nakai e koe e uiina ia mo e fakaatā a koe ke moua e puipuiaga fakaalofa he Atua he tau aho uka nei? Fakamafana e mautolu a koe ke kumikumi fakamitaki e tau fakamooliaga he Tohi Tapu ke he “tau aho fakamui” ne fakakite mai he puha he vala tala nei. Fiafia e Tau Fakamoli a Iehova he matakavi haau ke lagomatai a koe ke maama mitaki e tau kupu Tohi Tapu ne fakakite mai mo e puhala ke fakagahua ai. Po ke moua e koe e tau tali ke he tau hūhū haau he fakakia ha mautolu a faahi kupega hila, www.pr418.com. Moua ke he vagahau Peritania. Onoono ki lalo he BIBLE TEACHINGS > BIBLE QUESTIONS ANSWERED.