MONTHIKI 26 ya Kayovo yo 2004, mo Simeulue okalongo kekahi pokati komaande kokulio kwo Sumatra ko Indonésia, paendele otyinimawe tyimwe otyinene. Ovanthu aveho avakala nowoma notyinimawe otyo. Omaande elunga aalingi omatengeiva ine omanyonda monkhalelo imwe ovanthu vehenemone. Liwa-liwa ovanthu avahimbika okuenda nkholo okuhatekela konomphunda, otyo veliyavela okuti “Otyinimawe! Otyinimawe!” melaka liavo. Etyi palamba ono minutu 30, omaande aeya, kumwe nepuku-puku enene aahanye-po onondyuo ononyingi.

Mokalongo ko Simeulue, omo muatetekela okueenda otyinimawe. Po vanthu vena 78.000 vakala pokalongo oko, pankhile vala ovanthu 7. Pankhile ovanthu vehevehi mokonda yatyi? * Ovanthu vo poulongo oo, vehole okupopia okuti: ‘Inkha weiva ohi yaluluma unene iya omaande elunga akondoka unene konyima, hatekela konomphunda, mokonda kamapakala ehimbwe, elunga malitutana.’ Mokonda yovinimawe viaendele-ko, pahe ovanthu vo ko Simeulue, vetyivila okuimbuka enyingilikilo lilekesa okuti makueende otyinimawe, okutalela komapiluluko omaande elunga. Mokonda yokutavela elondolo avahupu.

Ombimbiliya ipopia okuti, kukahi nokuya otyiponga, “ononkhumbi mbumwe ononene, mbeheneende-ko tunde konthyimbi youye alo pahe. Tupu, kamambukaenda-ko vali.” (Mateus 24:21) Mahi, otyo katyilekesa okuti Ohi maihanyua-ko novipuka vikahi nokulingwa novanthu, ine o notyiponga otyikuavo, mokonda Huku uhanda ohi ikale-ko apeho. (Eclesiastes 1:4) Ononkhumbi ononene mambuya, o Huku membueta, opo “ahanyeko vana vekahi nokuhanyauna ohi.” Oyo, onthyulilo yovivi aviho nononkhumbi. (Revelação [Apocalipse] 11:18; Provérbios 2:22) Okuti otyo hatyipuka otyiwa?

Otyo tyelikalela novinimawe, mokonda ehanyauno olio maliya, kamaliipaa vala kese munthu. Ombimbiliya yati: “Huku oluembia.” Iya aiyawisa-ko okuti, Huku utiwa o Jeova, walaa okuti: “Ovaviuki mavakapiñgana ohi, avakakala-ko apeho.” (1 João 4:8; Salmo 37:29) Ngotyo, oñgeni ove upondola okuhupa kononkhumbi ononene, opo ukatambule oviwa Huku alaa? Otyipuka tyakolela una okulinga, otyetyi: Okutavela omalondolo!

Onthue katwii onthiki ine hamwe oola onthyulilo yononkhumbi ambuho maiya, mahi Jesus wati: “Konthele yonthiki oyo, noola yatyo nawike utyii, tyilinge onoandyu keulu, tyilinge Omona, o Tate vala utyii.” Otyo Jesus etupopilila okuti: “Tualeiko tyalunguka.” (Mateus 24:36; 25:13) Omokonda yatyi? Omokonda Ombimbiliya itupopila ovipuka vimwe mavimoneka mouye, tyina Huku eheneete onthyulilo. Ngetyi ovanthu vo ko Simeulue vatalele komaande omelunga apiluluka avetyimono okuti kukahi nokuya otyinimawe, tupu ovipuka vikahi nokumoneka mouye, vilekesa okuti onthyulilo ikahi popepi. Okakasa keli monthele ei kapopia omapiluluko omanene Ombimbiliya ipopia.

Kuhole okumoneka omapiluluko ekahi mokakasa ehole tunde kohale. Mahi Jesus wati: Tyina muamamono “ovipuka evi aviho,” noñgonokei okuti onthyulilo ikahi popepi. (Mateus 24:33) Lilinga omapulo aa: (1) Onalupi ovipuka ovio viapopiwa ‘mavimoneka mouye auho? (2) Okuti mavimoneka momuvo wike vala? (3) Okuti ovipuka ovio mavitualako okuvilapo?’ Tyotyili, onthue tukahi momuvo watyo oo.

Omutimini umwe wo ko Amelika wati: “Omalondolo . . . ayovolele omienyo viovanthu.” Konyima yotyinimawe tyaedeleko mo 2004, ovatumini avapake onomakina mbokulondola ovanthu ponomphangu vamona okuti mapaende otyinimawe, opo mbulondole ovanthu tyina tyamehiki-po. Tyelifwa notyo, Huku una etyi ekahi nokulinga opo etulondole konthele yovipuka mavimoneka tyina onthyulilo yeheneye. Ombimbiliya yapopia okuti: “Onondaka ombu onongwa Mbouhamba wa Huku, mambukaiviswa kombanda yohi aiho, pala oumbangi movilongo aviho, iya konyima onthyulilo aiya.”—Mateus 24:14.

Menima liokualamba, Onombangi mba Jeova vaundapa onoola mbulamba po 1,9 mbiliau movilinga viokuivisa onondaka onongwa, movilongo 240, momalaka alamba po 700. Ovilinga ovio vikahi nokulingwa, vilekesa okuti onthyulilo ikahi popepi. Mokonda Onombangi mba Jeova vehole ovanthu, valinga atyiho vevila opo valondole ovanthu konthele yonthiki ya Huku ikahi unene popepi. (Mateus 22:39) Moluotyo, upondola okupola ouwa kuetyi valongesa, mokonda otyo tyilekesa okuti Jeova ukuhole. Hinangela okuti, “[Huku] kahande nawike ahanyueko, mahi uhanda ovanthu aveho velivele.” (2 Pedro 3:9) Okuti motavela oluembia lwa Huku iya oendela momalondolo ae?

Hinangela okuti, etyi ovanthu vo po Simeulue vamona enyingilikilo liotyinimawe, vakahatekelele ko nomphunda opo vahupe. Kavakevelele alo omaande akondoka iya aevevasi. Moluotyo avahupu. Opo ove uhupe kononkhumbi ononene, wesukisa okuhatekela pomphangu yapama, putyina lihenetake unene. Oñgeni motyilingi? Omuuli Isaia watuminwe na Huku okuhoneka konthele yovilinga viokukonga ovanthu, vikahi nokuyandyaneswa mokueenda “kuononthiki mbahulilila,” momuvo tukahi hono. Isaia wati: “Endyuei, tulonde komphunda ya Jeova . . . Oe meketulongesa onondyila mbae, iya onthue atuendela monondyila mbae.”—Isaías 2:2, 3.

Okuenda konthongo-tongo yomphunda tyikupa omphitilo yokutala kokule, nokukala pomphangu yapama. Tupu, okunoñgonoka onondyila mba Huku mokulilongesa Ombimbiliya, tyikahi nokukuatesako ovanthu mouye auho hono okulinga omapiluluko. (2 Timóteo 3:16, 17) Mokulinga ngotyo, vahimbika “okuendela monondyila mba [Huku]” iya avapandwa nokuyakulilwa nae.

Okuti motavela ku Huku ukahi nokukukonga, opo moluembia lwae ekuyakulile mononthiki mbuno mbepuiya? Tukuavela ondundo, opo ulilongese nawa Ovihonekwa vikahi pokakasa keli monthele ei vilekesa okuti tuli “mononthiki mbonthyulilo.” Onombangi mba Jeova potyilongo tyenyi mavakala nehambu liokukukuatesako okunoñgonoka vali nawa onotestu ombo, no ñgeni upondola okuendela-mo. Tupu, upondola okuvasa omakumbululo omapulo ove mo site, www.pr418.com/nyk Tala pana pati: OMALONGESO OMBIMBILIYA > OMAPULO OMBIMBILIYA AKUMBULULWA.