OMU Kwaikumi-n’abari 26, 2004, omutsitsa gw’amaani munonga gukatengyetsa ensi aha kirwa Simeulue, ekiri aha kizinga kya Sumatra, omuri Indonesia. Abantu boona bakareeba ekyabaire kiriyo nikibaho. Ebingonzi bikaba biri eby’amaani kukira aha bya butoosha. Ahonaaho, abantu bakatandika kwiruka barikuza aha nshozi, barikugira ngu, “Smong! Smong!” ekigambo eki abantu b’aha kizinga ekyo barikukoresa kumanyisa tsunami. Omu dakiika 30, ebingonzi by’amaani bikatandika kuteera ekizinga, byashiisha amaju maingi aha kizinga ekyo.

Ekirwa Simeulue nikyo kyabandize kuteerwa eihunga ry’amaani eririkwetwa tsunami. Kwonka, aha bantu 78,000 abaabaire nibatuura aha kirwa ekyo, 7 bonka nibo baafiire. Ahabw’enki abaafiire batari baingi? * Abantu abarikutuura aha kirwa ekyo baine enfumu egi: ‘Haabaho omutsitsa gw’amaani kwonka enyanja ekagaruka omu buteeka, yiruka oze aha rushozi ahakuba bwanyima y’obwire bukye neeba neeza kushuka amaizi aha nkungu.’ Kuruga aha kyabaire kyabaireho enyima, abantu b’aha kirwa Simeulue bakeega kumanya ngu nihaza kubaho tsunami barikureeba empindahinduka aha nyanja. Okworobera okurabura kikakiza amagara gaabo.

Baibuli neegamba aha kabi akari haihi kubaho, “okubonabona kwingi okutakabahoga okwiha aha kuhangwa kw’ensi okuhitsya hati, kandi tikuribaho.” (Matayo 24:21) Kwonka tikugira ngu emirimo y’abantu nari ekihikirizi nibiza kucwekyereza ensi erikutuurwaho abantu reero ehweho, ahakuba Ruhanga naayenda ngu ensi egumeho ebiro byona. (Omubuurizi 1:4) Kureka, Ruhanga niwe araikirize okubonabona oku kubaho, kugira ngu ‘acwekyereze abarikucwekyereza ensi.’ Neija kuba eri emperu y’obubi bwona n’okubonabona. (Okushuuruurwa 11:18; Enfumu 2:22) Ogwo ka nigwija kuba guri omugisha gw’amaani!

Kandi, okutashushana na tsunami, emitsitsa, nari okubaruka kw’enshozi, okucwekyerera okurikuza kubaho tikurikwija kwita abantu abataine rubanja. ‘Ruhanga ni rukundo,’ Baibuli nikwo erikugira, kandi Ruhanga ou eiziina rye riri Yehova naaraganisa ngu ‘abahikiriire nibaija kuhungura ensi, bagituuremu ebiro byona.’ (1 Yohaana 4:8; Zaaburi 37:29) Mbwenu shi noobaasa kuhonokaho ota aha kubonabona kwingi, kandi okatunga emigisha erikuraganisibwa? Ekikuru n’okworobera okurabura okurikutuheebwa kare!

Titurikubaasa kumanya ebiro byenyini obu haraabeho emperu y’obubi n’okubonabona, ahakuba Yesu akagira ati: “Eby’ekyo kiro n’obwo bunaku tihaine orikubimanya, n’obu baakuba baamaraika b’omu iguru, n’obu yaakuba Omwana, kureka Isheboona wenka.” Kwonka, Yesu akatuhiga ati: “mugume nimureeba.” (Matayo 24:36; 25:13) Ahabw’enki? Baibuli neeetushoboororera oku embeera omu nsi ziraabe ziri Ruhanga atakareetsire emperu. Nk’oku okubaho kw’ebingonzi kwarabwire  abantu abarikutuura ahari Simeulue ngu hariyo nihaza kubaho tsunami, empindahinduka eziriyo nizibaho omu nsi zishemereire kuturabura ngu emperu eri haihi. Ebiri omu kabokisi nibyoreka zimwe aha mpindahinduka ezi Baibuli erikugambaho.

Zimwe aha mpinduka eziri omu kabokisi zikaba zaabaireho ira. Kwonka Yesu akagira ngu ku turireeba “ebyo byona,” tumanye ngu emperu eri haihi munonga. (Matayo 24:33) Yebuuze oti, ‘Ni ryari omu byafaayo obu ebintu byona ebyagambwaho (1) biraabaireho omu nsi yoona, (2) biraabaireho omu bwire bumwe, kandi (3) obu byagumire nibyeyongyera kuba bibi?’ Buzima, turi omu bwire nk’obwo.

Owaabaireho omwebembezi wa U.S. akagira ati: “Okutaho ebyoma ebirikurabura kare . . . nikukiza amagara.” Bwanyima y’okubaho tsunami omu 2004, bakataho ekyoma omu mwanya ogwo kurabura abantu bataija kufeerwa amagara gaabo omu biro by’omumaisho. Nikyo kimwe, Ruhanga ataireho entebeekanisa y’okurabura abantu bukiri kare emperu etakaizire. Baibuli neegira eti: “Engiri egi ey’Obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”​—Matayo 24:14.

Omwaka oguhweire gwonka, Abajurizi ba Yehova bakamara eshaaha ezirikurenga akahumbi kamwe n’emitwaro rwenda barikubuurira amakuru marungi omu mahanga 240, omu ndimi ezirikurenga 700. Omurimo ogu ogurikukorwa obunaku obu, niguhamya ngu emperu eri haihi. Abajurizi ba Yehova ahabw’okukunda bataahi baabo, tibarikweziringa kurabura abandi aha bikwatiraine n’ekiro kya Ruhanga eky’okucweraho orubanja ekiri haihi kuhika. (Matayo 22:39) Ahabw’okugira ngu amakuru marungi aga gakuhikireho kandi noobaasa kugagasirwamu, n’obuhame ngu Yehova naakukunda. Ijuka ngu Ruhanga ‘tarikwenda muntu weena kuhwerekyerera, kureka naayenda ngu boona  bahikye aha kweteisa.’ (2 Petero 3:9) Mbwenu shi noija kusiima rukundo ya Ruhanga oyorobere okurabura oku arikukuha kare?

Ijuka ngu abatuuzi b’ebyaro bya Simeulue bakahungira aha nshozi kubaasa kutunga oburinzi ku baareebire ebingonzi byahongoza. Tibarategyereize ngu bibanze byagaruka. Okurahuka kucwamu kwabo kukabahwera kuhonokaho. Kubaasa kuhonokaho aha kubonabona kwingi okuri haihi kubaho, oine kugira eki waakora, obwire butakahweireyo. Mu muringo ki? Ruhanga akahwera nabi Isaaya kuhandiika aha bikwatiraine n’okwetwa okuriyo nikugyenda omumaisho “omu biro bya bwanyima,” obwire obu turimu hati. Okwetwa okwo nikugira kuti: “Mwije twinamukye aha rushozi rwa Mukama . . . Atwegyese emitwarize ye, naitwe tubone kugigyenderamu.”​—Isaaya 2:2, 3.

Okuza aha mutwe gw’orushozi nikikubaasisa kuranzya gye n’okutunga obuhungiro. Omu muringo nigwo gumwe, okumanya emihanda ya Ruhanga kurabira omu Baibuli, hati nikihwera obukaikuru bw’abantu omu nsi yoona kukora empindahinduka ezirikubagasira. (2 Timoseo 3:16, 17) Omu kukora ekyo, nibatandika ‘kugyendera omu mihanda ya Ruhanga,’ basiimwa, kandi batunga n’oburinzi.

Noija kwikiriza okwetwa okwo kandi oze ahansi y’oburinzi bwa Ruhanga omu biro ebi eby’akabi kaingi? Nitukuhiga kushwijuma gye obuhame bw’Ebyahandiikirwe oburi omu kabokisi k’ekicweka eki, oburikworeka ngu turi omu biro by’emperu. Abajurizi ba Yehova omu kicweka kyanyu, nibaija kushemererwa kukuhwera waaba nooyenda kwetegyereza gye ebyahandiikirwe ebiri omu kabokisi ako n’oku orikubaasa kubigyenderaho. Nari noobaasa kutunga eby’okugarukamu by’ebibuuzo byawe orikuza aha mukura gwaitu, www.pr418.com. Za aha BIBLE TEACHINGS > BIBLE QUESTIONS ANSWERED.