LONG December 26, 2004, wanfala earthquake wea strong bilong hem 9.1 sekem Simeulue, wanfala island klosap long Sumatra, long Indonesia. Evriwan wea standap long saedsea luk go long sea and olketa lukim sea hem start for go bak. Stretawe nomoa, olketa shout “Smong! Smong!” wea hem languis word bilong olketa for tsunami, and evriwan ranawe go long olketa hill. Bihaen 30 minute, tsunami hem distroem staka haos and olketa vilij long datfala area.

Datfala tsunami wea happen long 2004 hem spoelem staka ples. Simeulue Island nao hem first ples wea datfala tsunami kasem. Datfala island garem 78,000 pipol, bat 7-fala nomoa dae. Why nao no staka pipol dae? * Pipol long datfala island garem wanfala toktok wea sei: ‘Sapos hem wanfala big earthquake and sea hem go bak, ran go long olketa hill, bikos bae kwiktaem nomoa sea kam bak moa.’ Pipol long Simeulue savve sapos sea hem go bak, datwan minim tsunami bae kam. From olketa followim warning, olketa sevem laef bilong olketa.

Bible storyim wanfala disaster wea bae kasem full earth. Hem sei: “Bae bigfala trabol kamap wea hem winim eni trabol wea happen start kam long taem world hem start, kam kasem distaem, and no eni trabol wea kam bihaen bae nogud olsem.” (Matthew 24:21) Bat datwan no minim olketa man or eni nara samting bae distroem disfala earth. Hem plan bilong God for earth stap for olowe. (Ecclesiastes 1:4) Datfala big trabol hem samting wea God bae duim for “finisim olketa wea spoelem earth.” Hem taem wea God bae finisim nogud pipol and wei for safa. (Revelation 11:18; Proverbs 2:22) Datwan bae hem barava gudfala samting!

Datfala big trabol bae no olsem olketa tsunami, earthquake, or volkeno, bikos gudfala pipol bae no dae. Bible sei “God hem love,” and God, wea nem bilong hem Jehovah, sei “olketa wea raeteous bae stap long earth, and olketa bae stap for olowe.” (1 John 4:8; Psalm 37:29) Wanem nao iu savve duim mekem iu stap laef long datfala taem, and kasem olketa gud samting wea bae kamap? Iu mas followim warning wea kam from God!

Iumi no savve long barava taem wea datfala big trabol bae kam, bikos Jesus sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” Nomata olsem, Jesus sei “gohed for lukaot.” (Matthew 24:36; 25:13) Wanem nao iumi mas lukaot for hem? Bible storyim olketa samting wea bae happen long world bifor end hem kam. Taem pipol long Simeulue lukim sea hem go bak, olketa savve tsunami bae kam. Iumi tu, taem iumi lukim olketa nogud  samting wea happen long world, iumi luksavve end hem klosap. Box long antap hem storyim samfala samting wea Bible sei bae happen bifor end hem kam.

Samfala samting wea box hia story abaotem hem happen bifor tu. Bat Jesus sei taem iumi lukim “evri samting hia,” iumi bae savve end hem barava klosap. (Matthew 24:33) Ting raonem disfala kwestin, ‘Waswe, enitaem long history evri samting hia (1) happen evriwea long world, (2) happen long semtaem, and (3) gohed for kamap worse?’ Evri samting hia happen long taem bilong iumi.

Wanfala president long America sei “wei for warnim pipol . . . savve sevem laef bilong olketa.” Bihaen long tsunami long 2004, olketa start for iusim olketa siren for givimaot warning long pipol sapos eni tsunami bae kam. Long sem wei tu, God warnim iumi firstaem bifor end hem kam. Bible sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matthew 24:14.

Last year, Olketa Jehovah’s Witness iusim winim 1.9 billion hour for preachim gud nius long 240 kantri and long winim 700 languis. Datfala preaching waka wea gohed long taem bilong iumi showimaot end hem barava klosap. Olketa Jehovah’s Witness lovem pipol, so olketa waka hard for warnim pipol abaotem day bilong God for judgem pipol wea klosap for kam. (Matthew 22:39) Jehovah talem datfala warning bikos hem lovem iu. Bible sei: “[God] no laekem eniwan for dae bat hem laekem evriwan for garem chance for repent.” (2 Peter 3:9) Waswe, bae iu followim datfala warning?

Taem pipol long Simeulue lukim sea hem go bak, olketa no weit gogo sea kam bak, bat olketa stretawe ran go long olketa hill for stap sef. From olketa duim olsem, olketa sevem laef bilong olketa. Sapos iumi laek for stap laef taem bigfala trabol hem kam, iumi mas duim samting distaem mekem iumi no dae long datfala taem. Wanem nao iumi mas duim? Profet Isaiah storyim samting wea iumi evriwan shud duim long “olketa last day,” wea iumi stap long hem distaem. Hem sei: “Kam, iumi go ap long maunten bilong Jehovah . . . Hem bae teachim iumi long olketa wei bilong hem and iumi bae wakabaot long road bilong hem.”—Isaiah 2:2, 3.

Sapos iu go ap long wanfala maunten taem tsunami kam, iu bae sef. Plande million pipol distaem lane abaotem God long Bible, and datwan helpem olketa for changem wei bilong olketa and for kasem gud samting long laef. (2 Timothy 3:16, 17) Olketa duim wanem God laekem, and from datwan, God hapi long olketa and lukaftarem olketa.

Waswe, bae iu “go ap long maunten bilong Jehovah” and kasem protection bilong God distaem? Mifala encouragem iu for ting raonem olketa scripture wea stap long box long disfala article, wea pruvim iumi stap long “olketa last day” distaem. Olketa Jehovah’s Witness wea stap long ples bilong iu bae hapi for helpem iu for minim olketa scripture hia and olketa savve helpem iu for duim wanem God laekem. Or iu savve kasem ansa for olketa kwestin bilong iu long website bilong mifala, www.pr418.com. Go long English website BIBLE TEACHINGS > BIBLE QUESTIONS ANSWERED.