KAY 26 de diciembre killapi 2004 watapi Simeulue churupi sinchʼi jallpʼa ikhakuy karqa. Qocha kantupi kajkunaqa yaku mama qochaman ujllata kutiykapushasqanta reparaspa, qhaparispa orqosman ayqerqanku. Niraj khuskan horapi yaku sinchʼita oqharikorqa casi tukuy wasista, ranchosta ima thuñerarqa.

Simeulue churuqa kashan Sumatra llajta chaynejpi Indonesia suyupi. Kay 2004 watapi Simeulue churutaraj waj churusmanta nisqaqa yaku pʼampaykorqa. Chay lugarpeqa 78.000 runas tiyakorqanku, jinapis qanchislla wañorqanku. ¿Imaraykú? * Chay lugarpi tiyakojkunaqa niyta yachanku: “Jallpʼa kharkatejtin, mama qochataj kutiykapushajtin, orqoman ayqekuy, imajtinchus yaku usqhayllata wasarimonqa”, nispa. Chayrayku chaypi tiyakojkunaqa chayta rikuspa yacharqankuña mama qochamanta yaku wasaykamunanta. Ajinamanta ashkhas mana wañorqankuchu.

Bibliaqa jatun ñakʼariy pʼunchay kananmanta ajinata nin: “Manchay ñakʼariy kanqa; kay pacha qallarikusqanmantapacha manaraj chay jina karqachu, nitaj jaykʼajpis kanqachu” (Mateo 24:21). Chayta nispaqa mana Jallpʼa chinkachisqa kananmantachu parlashan runas chʼichichashasqankurayku, nitaj jallpʼa ikhakuykuna kasqanraykuchu. Imajtinchus Diosqa munan Jallpʼa wiñaypaj kananta (Eclesiastés 1:4). Diosqa chay jatun ñakʼariypi ‘kay pachata phirejkunata tukuchenqa’. Sajra imas chinkanqa, nitaj ñakʼariy kanqañachu (Apocalipsis 11:18; Proverbios 2:22). ¡Chayqa may sumajpuni!

Kunanqa mama qochapi yaku oqharikojtin, jallpʼa ikhakojtin, chayri waj ñakʼariy kajtin tukuy wañunku, jinapis jatun ñakʼariy kajtenqa mana tukuychu wañonqanku. Bibliaqa nin “Diosqa munakuymin” kasqanta, nillantaj “cheqan runasqa kay pachata herenciankupaj japʼenqanku, chaypitaj wiñaypaj kawsanqanku” (1 Juan 4:8; Salmo 37:29). Chay jatun ñakʼariy tiempo chayamojtin mana wañunaykipaj, Diospa bendicionnintataj japʼinaykipaj, ¿imatá ruwawaj? Imatachus willawasqanchejta kasukuna.

Mana yachanchejchu ima pʼunchaychus sajra kausay, ñakʼariy ima chinkananta. Imajtinchus Jesús nerqa: “Maykʼajchus, ima pʼunchaychus, ima horachus chay imas kananta mana pipis yachanchu; ni janaj pachapi angelespis, nitaj Churipis yachanchu. Tatallay chaytaqa yachan”, nispa (Mateo 24:36; 25:13). ¿Imapajtaj wakichisqa kana? Bibliaqa nin imaynachus kausay kananta niraj kay sajra pachata Dios chinkachishajtin. Simeulue churupi mama qocha kutiykusqanqa runasta reparacherqa ujllata yaku wasaykamunanta, ajinallatataj Jallpʼapi tukuy ima sajrayashasqanqa rikuchin ñakʼariy  tiempo qayllapiña kasqanta. Recuadropi rikuchin Biblia nisqanman jina imaschus kananta.

Wakin imasqa karqaña, jinapis mana ujllapichu tukuynin, nitaj tukuynejpichu, recuadropitaj chayta rikuchishan. Chaywanpis Jesús nerqa “kay tukuy imasta rikuspa” sajra pachaj tukukuynin qayllapiña kasqanta yachananchejta (Mateo 24:33). Jesús nisqanman jina, ni jaykʼaj rikorqanchejchu, 1) Jallpʼantinpi chay imas kasqanta, 2) uj tiempollapi kasqanta, 3) astawan sajrayasqantataj. Kay tiempopi chaykunata rikushanchej.

Estados Unidosmanta uj presidente nerqa: “Ñaupajmantaña imachus kananta willakojtenqa ni pi wañunchu”, nispa. Kay 2004 watapi sinchʼi ñakʼariy kasqanmanta, manaña chay chhika runas wañunankupaj wakichisqaña kasharqanku. Diospis ajinallatataj runasman willachin niraj ñakʼariy tiempo chayamushajtin. Biblia nin: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachamá tukukoyqa jamonqa”, nispa (Mateo 24:14).

Jehovaj testigosnenqa qayna wata casi 2.000 millones horasta Diosmanta willarqanku, 240 suyuspi, llajtaspitaj, 700 kuraj parlaykunapitaj. Chaytaj sutʼita rikuchin ñakʼariy tiempo qayllapiña kasqanta. Chantapis runa masinkuta munakusqankurayku mayta kallpachakunku juicio pʼunchay qayllapiña kasqanta willanankupaj (Mateo 22:39). Jehová Dios chayta willasusqanqa munakususqanta rikuchin. Payqa mana “munanchu pipis juchanrayku chinkayman rinanta. Astawanqa pay munan tukuy runas Diosman kutirikunankuta”  (2 Pedro 3:9). Qanrí, ¿Dios nisusqanta kasukunkichu?

Simeulue churu qaylla llajtaspi tiyakojkunaqa ayqekorqanku orqo patasman mana wañunankupaj mama qocha kutiykushajtin. Chayta ruwarqanku salvakuyta munaspa. Noqanchejpis salvakunapajqa ayqekunallanchejtaj tiyan. Profeta Isaías Dios yuyaychasqanman jina qhelqasqanqa, kay “qhepa pʼunchaykunapi” yanapawasunman. Pay nerqa: “Jakuchej, Tata Diospa orqonman wicharinachej, Jacobpa Diosnimpa wasinman; payqa ñankunanmanta yachachiwasunchej, chaki ñankunampi purinanchejpaj”, nispa (Isaías 2:2, 3).

Orqo patamantaqa tukuynejta rikusunman nitaj imata manchachikusunmanchu. Ajinallatataj, Biblianejta Diospa ñankunasninta rejseyqa, Jallpʼantinpi ashkha runasta yanapashan (2 Timoteo 3:16, 17). Chayrayku Diospa “ñankunampi” puriyta, allinpaj qhawasqa, jarkʼasqataj kayta atinku.

Kay sajra tiempopi imatachus Dios willachisqanta kasukuna, jarkʼayta munawasqanchejqa allinninchejpaj. Kay yachaqanaj recuadronta leeriy, mayqenpichus Biblia nisqanman jina ‘sajra pʼunchaykunapi’ kausashasqanchejta rikuchin (2 Timoteo 3:1). Jehovaj testigosnin Bibliaj nisqanta entiendenaykipaj, chayman jinataj kausakunaykipaj tukuy sonqo yanapasonqanku. Bibliaqa ashkha tapuykunaman kutichin, chaytataj tarinki Internetpi jw.org nisqapi. Maskʼawaj ENSEÑANZAS BÍBLICAS > PREGUNTAS SOBRE LA BIBLIA, nisqapi. Kayqa castellanollapi.