INDONESIAPA Simeulue islanchömi 26 de diciembri 2004 wata alläpa fuertipa patsa kuyïkurqan. Tsëchö täraqkunaqa rikäyarqan lamar yaku ruriman kutikïkushqa kanqantam. Tsë höram llapan tsëchö täraqkuna jirkakunapa ëwakuyarqan kënö qayararnin: “¡Smong! ¡Smong!”, y tsëqa ¡“lamar yaku yarqamun”! ninanmi. Manaraqpis media höra pasaptinmi alläpa jatun lamar yaku yarqakaramur tsë islachö këkaq wayikunata y ichikllan markakunata paqwë ushakätsirqan.

Lamar yaku yarqamurmi kë Simeulue islata puntata ushakäratsirqan. Peru 78 mil täraqkunapitaqa qanchisllam wanuyarqan. ¿Imanirtaq qanchisllaqa? * Tsëchö täraqkunam imëpis niyan: “Patsa alläpa kuyuptin lamar yaku kutikïkoqta rikarqa, jirkakunata ras ëwakï, porqui yarqamoq yakuqa mantsakëpaqmi kanqa”. Simeulue islachö täraqkunaqa, awilunkunapitam yachakuyashqa lamar yakuchö señalta rikarqa, qeshpir ëwakuyänampaq. Tsëmi salvakuyarqan.

Bibliaqa juk jatun desgracia entëru Patsachö pasanampaq kaqtam kënö nin: ‘Allapa jipaquimi canqa. Tseno jipaqueqa manam imepis cashqaraqtsu que patsa camacashqanpita; y manam yape canqatsu’ (Mateu 24:21). Patsaqa manam nuna mana alli gobernanqanrëkur o desgraciakuna pasakunqanrëkurtsu ushakanqa, porqui Diosnintsikqa munan kë Patsa imëyaqpis kanantam (Eclesiastes 1:4). Kë jatun sufrimientuwanmi Diosqa “cay munduta mana allita rurarnin ushacätsigcunata” ushakätsinqa. Imëka mana allikunapa y sufrimientukunapa ushakëninmi kanqa (Apocalipsis 11:18, NTCN; Proverbius 2:22). ¡Tsëqa alläpa kushikïpaqmi!

Jatun sufrimientuchöqa manam culpannaq nunakunaqa wanuyanqatsu. Porqui Bibliam nin: ‘Dios allapa cuyacoq’ kanqanta y pëqa änikun, “Patsachöqa alli nunakunallam täräyanqa, y tsëchömi imëkamayaqpis kawayanqa” nirmi (1 Juan 4:8; Salmu 37:29). ¿Imataraq rurankiman jatun sufrimientuta kawëkar pasanëkipaq y Dios änikunqankunata chaskinëkipaq? Pasakunqan señalkunapita cuentata qokï y cäsukï.

Mana alli cösaskuna y sufrimientukuna imë ushakänampaq kaqtaqa manam musyantsiktsu, porqui Jesusmi nirqan: ‘Que nishqäcuna ime öra o ime junaq cumplicänanpaq caqtaqa manam pipis musyantsu, ni sielucho anjelcuna, ni noqapis, sinoqa quiquin Diosllam’. Peru Jesusqa nimarquntsik mäkoq mäkoqlla kanapaqmi (Mateu 24:36; 25:13). ¿Imapitaraq? Bibliaqa nin manaraq ushakë chämuptin imakuna pasanampaq kaqtam. Imanömi Simeulue islachö täraqkuna lamar  yarqamunampaq kaqta cuentata qokuriyarqan, tsënöllam kë Patsachö señalkunata rikanqantsikpis musyaratsimäshun ushakë këllachöna kanqanta. ¿Ima señalkunataq? (Rikäri recuadruta).

Tsë recuadruchö këkaqkunaqa, unëkunapis pasakurqanmi, peru manam kanannöqa. Jesusmi nirqan këkuna “susedicoqta ricar” ushakë këllachöna kanqanta musyanapaq kaqta (Mateu 24:33). Tsëmi kënö tapukï: 1) ¿Entëru patsachöku pasakushqa? 2) ¿Llapampis tsë tiempullachöku? 3) ¿Y mana allipita mas mana allimanku tikrashqa? Rasumpëpaqa tsë pasakunqan tiempuchömi kawëkantsik.

Puntallapitana alarmakuna waqamunqanqa salvamashwanmi. Tsëmi, 2004 watachö lamar yarqaramuptin, alarmakunata churayarqan mëtsikaq nunakuna yapë mana wanuyänampaq. Tsënöllam Diospis manaraq ushakë junaq chämuptin, alarma cuentata patsätsishqa, Bibliaqa kënömi nin: “Tsemi llapan nunacunata alli willaquinïta willayänequi presisan; [...] y jinantin nasioncunacho tse alli willaquita musyariyaptinnam, que patsapa ushenin chäramonqa” (Mateu 24:14, noqakunam yanayätsiyarqö).

Pasaq wataqa 1.900 millon hörakunapitapis masmi Jehoväpa testïgunkunaqa Diospa Gobiernumpita yachatsikuyashqa, 700 idiömakunapitapis maschö y 240 nacionkunachö. Këmi rikätsikun ushakë junaq këllachöna kanqanta. Nuna mayinkunata kuyarmi Testïgukunaqa kallpachakuyan ushakë junaq këllachöna kanqanta willakuyänampaq (Mateu 22:39). Kë revista qanman chämunqanmi Jehovä kuyashunqëkita rikätsikun.  Yarpë, Diosqa “manam munantsu pipis condenacunanta; antis shuyarëcan nunacuna jutsancunata jaqiriyänantam” (2 Pëdru 3:9). ¿Dios kënö kuyëpa willashunqëkita cäsukunkitsuraq?

Yarpë, Simeulue islachö täraqkunaqa, lamar yaku kutikïkoqta rikarmi salvakuyänanrëkur jirkakunapa ëwakuyarqan, y manam shuyaräyarqantsu lamar yarqamunantaraqqa. Tsëmi salvakuyarqan. Tsënöllam, manaraq ushakë junaq chämuptin, salvakunëkipaqqa imëka jirkaman qeshpeq cuenta ëwakunëki. Tsëchi profëta Isaïasqa, “Ushanan junaqkunapaq” parlar, juk precisaq invitacionchö kënö nirqan: “Witsäshun Jehoväpa jirkanman, [...] pëmi näninkunata reqitsimäshun y rasumpëpam imëpis nänimpa purishun” (Isaïas 2:2, 3).

Jirkaman witsëqa yanapakun karuyaq rikänapaq y següru kanapaqmi. Tsënöllam Bibliachö Diospa consëjunkunapita yachakuyanqanqa entëru Patsachö nunakunata yanapëkan kawëninkunata altsayänampaq (2 Timoteu 3:16, 17). Tsënöpam Diospa näninchö puriyan, yanapakïninta y tsapäkïninta chaskiyan.

Kë mana alli tiempukunachöqa tsapäkïnintam Diosqa änishunki, ¿chaskikunkitsuraq? Kë yachatsikïchö ‘ushanan junaqkunachö’ kawëkanqantsikta rikätsikoq recuadruta rikäri. Täranqëkichö Jehoväpa testïgunkunaqa kushishqam yanapayäshunki Biblia yachatsikunqanta entiendinëkipaq y yachakunqëkimannö kawanëkipaq. Tapukïnikikunata Biblia imanö contestanqanta musyëta munarqa, jw.org ENSEÑANZAS BÍBLICAS > PREGUNTAS SOBRE LA BIBLIA nishqanman yëkuri.