LAMAR qucham 2004 watapi lluqsiramurqa hinaspam Indonesia nacionpi kaq Simeulue sutiyuq llaqtata puntata aparurqa. Chay llaqtapiqa 26 diciembre punchawpim manchakuypaqta allpa katkatatarqa. Chay llaqtapi kaqkunam musyarurqaku lamar qucha patanmanta llumpayta karunchakusqanta. Chaymi llapallanku urqukunaman kallparqaku “¡lamar quchapi yakum hamukuchkan!” nispanku. Manapas media horallamantam lamar quchamanta yaku urqu hina huqarikuruspan lluqsiramurqa hinaspam llapa wasikunata tuñirachispan llaqtatapas aparurqa.

Ichaqa 7 runakunallam Simeulue llaqtapiqa 78.000 runakunamanta wañurqaku. ¿Imanasqa? * Willakuykunata kasukuspa ayqikusqankuraykum. Chay llaqtayuqkunapa rimakuyninmi nin: “Kay pacha katkatataptin lamar quchata patanmanta karunchakuqta qawaspaqa urqukunamanmi ayqikuna, manachayqa yakum kutiramuspa aparusunkiman”, nispa. Chay llaqtayuqkunaqa ñawpa abuelonkumantam yacharurqaku lamar qucha karunchakuqta qawaspaqa desgracia pasananta yachaspa ayqikuyta.

Bibliam nin huk hatun sasachakuy chayamunanmanta, ninmi: ‘Llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qipa punchawkunapipas’, nispa (Mateo 24:21). Kaypiqa manam kay pacha imawanpas chinkananmantachu rimachkan, Diosqa kay pachatam unancharqa wiñaypaq kananpaq (Eclesiastes 1:4). Chaymi Diosqa llumpa-llumpay ñakariy punchawkunapi ‘kay pacha’ yanqachaqkunata chinkachinqa. Manañam kanqachu mana allin ruwaqkunaqa nitaq ñakariypas (Apocalipsis 11:18; Proverbios 2:22). ¡Mayna allinmi chayqa!

Hatun sasachakuykunapiqa allin hinaspa mana allin runakunam wañunku, Diospa apamusqan ñakariy punchawpiqa manam chaynachu kanqa, chaypiqa mana allin runakunallam wañunqaku. Bibliam nin: “Diosqariki kuyakuqllañam”, nispa. Nintaqmi: ‘Allin ruwaq runakunam allpataqa dueñoyanqaku. Paykunaqa chaypimiki wiñaypaqraq kawsakunqaku’, nispa (1 Juan 4:8; Salmo 37:29). ¿Imatam ruwanayki llumpa-llumpay ñakariy punchawpi mana wañunaykipaq hinaspa Diospa yanapakuyninta chaskinaykipaq? Bibliapi willakuykunatam kasukunayki.

Manam yachanchikchu mana allinkuna haykapi tukunantaqa, chaymi Jesuspas nirqa: ‘Manam pipas yachanchu, hanaq pachapi angelkunapas manam yachankuchu, nitaqmi runapa churinpas yachanchu, aswanqa taytallaymi’, nispa.  Chaymi Jesusqa niwarqanchik mana allinkunata Diospa chinkachisqan punchawta qawan-qawanlla suyananchikpaq (Mateo 24:36; 25:13, CQ12). Bibliapim willawanchik mana allinkunata Dios manaraq chinkachichkaptin imakuna kananmanta. Simeulue llaqtayuqkunam lamar qucha patanmanta qunqayllata karunchakuqta qawaspanku yacharurqaku yaku kutirimunanta, chaynam ñuqanchikpas tukuy imakuna mana chaynalla kasqanta qawaspaqa yachasunña Diospa piñakuynin punchaw hichpallapiña kasqanta (kay yachachikuypi dibujoyuq willakuyta qaway).

Chay willakuypi nisqankunaqa ñawpaqpipas karqañam ichaqa manam chay tiempollapichu nitaq tukuy hinastinpichu, Jesusmi ichaqa nirqa chaykuna chay tiempollapi kananta, hinaspa chaykunata qawaspa Diospa piñakuynin punchaw hichpallapiña kasqanta yachananchikmanta (Mateo 24:33). Manamá Jesuspa nisqankunaqa haykapipas kunan hinaqa tukuy hinastinpi hinaspa chay tiempollapiqa karqachu nitaqmi mana allinkunapas kunan hinaqa aswanyarqachu.

Estados Unidospi riqsisqa runam nirqa: “Imapas kananmanta willakuykunaqa runakuna mana wañunanpaqmi yanapan”, nispa. 2004 watapi lamar qucha lluqsiramusqan qipatam autoridadkunaqa desgracia hamusqanmanta willakunankupaq yanapakuykunata churarurqaku chaynapi achka runakuna mana wañunankupaq, Diospas piñakuynin punchawpi mana wañunapaqmi willakuykunawan yanapawanchik. Bibliapim nin: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mateo 24:14).

Qayna watam Jehova Diospa testigonkunaqa 1.900 millon horakunata 240 nacionkunapi hinaspa 700 masnin rimaykunapi Diosmanta willakurqaku.  Chayna willakusqankuwanmi yachanchik Diospa piñakuyninqa kayllapiña kasqanta. Runamasinkunata kuyasqankuraykum testigokunaqa kallpanchakunku runakunaman willanankupaq chaynapi Diospa piñakuynin punchawpi mana wañunankupaq (Mateo 22:39). Kay qillqawan willasuspaykim Diosqa kuyasusqaykita qawachisunki. Amayá qunqaychu ‘payqa munachkan huchamanta wanakuspayki payman’ kutirikunaykitam (2 Pedro 3:9). Chaynaqa, ¿kasukunkichu Diospa willasusqaykita?

Simeulue llaqtayuqkunaqa lamar qucha patanmanta karunchakusqanta qawaspankum urqukunaman chaylla ayqikurqaku, chaymi mana wañurqakuchu. Qampas Diospa piñakuynin punchawpi mana wañunaykipaqqa alto urquman ayqikuchkaq hinam Diosman asuykunayki. Diosmanta willakuq Isaiasmi tukupay punchawkunamanta rimaspan nirqa: ‘Hakuchikyá risunchik tayta Diospa urqunman [...]. Paymi yachachiwasun paypaq hina kawsanapaq. Yachachiwasunchikmi paypa munasqanman hina kawsanapaq’, nispa (Isaias 2:2, 3).

Pipas urquman qispispanqa muyuriqninpi kaqtam qawan hinaspapas segurom tarikun. Chaynam wara-waranqantin runakunapas Diosmanta yachaspanku allinña kawsakuchkanku (2 Timoteo 3:16, 17). Diosmanta yachasqankuraykum Diospa munasqanman hina kawsakuchkanku, chaymi Diosqa paykunata yanapaspan imamantapas harkaykun.

Kasukuyá Diosman asuykunapaq nisusqaykita. ‘Tukupay tiempokunapi’ yachanaykipaq, qawaykuy dibujoyuq willakuypi bibliapa nisqanmanta (2 Timoteo 3:1). Jehova Diospa testigonkunam bibliamanta kusikuywan yachachisuspayki kasukunaykipaq yanapasunki. Bibliamanta astawan yachayta munaspaykiqa yaykuwaqmi internetpi jw.org nisqanmanpas. Yaykuy ENSEÑANZAS BÍBLICAS > PREGUNTAS SOBRE LA BIBLIA.