IĀ Tesema 26, 2004, na lūlū ai se mafuiʻe e 9.1 lona malosi i Simeulue, o se motu i mātū i sisifo i le talafatai o Sumatra, i Initonesia. Ua tau fai vāai uma atu tagata i le sami. Ua maui atu i tai le suāsami. Ua vave ona taufetuli tagata uma i mea maualuluga ma feʻei, “Smong! Smong!” o le upu a le atunuu mo le galulolo. Pe tusa o le ʻafa itula, ae vaaia loa ni galu mataʻutia ua fafati mai, ma na faaleagaina ai le tele o fale ma nuu.

O le motu o Simeulue o le vaega muamua lea na taia i lenā galulolo. E 78,000 tagata o lenei motu, ae e na o le toʻa fitu na feoti. Aiseā ua toʻaitiiti ai? * E iai se faaupuga i le motu e faapea: ʻA lūlū se mafuiʻe ma ua maui i tai le sami, ia tamoʻe i se nofoaga maualuga, auā ua toeitiiti sau le galu telē.’ Na aʻoaʻoina e tagata Simeulue mai i mea na tutupu muamua, e iloa ua latalata mai se galulolo i suiga i le sami. O le utagia o lenā lapataʻiga na faasaoina ai o latou ola.

Ua taʻua i le Tusi Paia se mala o loo faaloloʻi mai, o se “puapuaga tele, e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea.” (Mataio 24:21) Peitaʻi, e lē o faasino atu i le iʻuga o le Lalolagi paneta ona o ni mea faalenatura mataʻutia e tutupu, po o gaoioiga lē alofa a tagata faatalalē, auā o le finagalo o le Atua ia tumau e faavavau le lalolagi. (Failauga 1:4) Nai lo o lea, o le puapuaga tele ua lata mai, o se gaoioiga a le Atua ina ia “faafanoina ai i latou o loo faaleagaina le laueleele.” O le a faaiʻuina ai foʻi mea leaga uma ma mafatiaga. (Faaaliga 11:18; Faataoto 2:22) Maʻeu se faamanuiaga o le a iai!

E lē gata i lea, e ese mai i galulolo, mafuiʻe, ma mauga mū, o le faaumatiaga o loo faaloloʻi mai o le a lē faaumatia ai tagata lē sala. Ua taʻua i le Tusi Paia, “o le Atua, o le alofa lava ia,” ma ua folafola mai e le Atua, o Ieova o lona suafa lea, “e fai lava le nuu mo tagata amiotonu, e nonofo ai pea i latou.” (1 Ioane 4:8; Salamo 37:29) Ae e mafai faapefea ona faasaoina oe mai i le puapuaga tele, ma tofo i faamanuiaga ua folafola mai? O le auala autū, o le utagia lea o lapataʻiga!

E tatou te lē iloa le aso tonu e faaiʻuina ai mea leaga uma ma mafatiaga, auā na fetalai Iesu: “A o lea aso ma lea itula e lē iloa e se tasi, e oo lava i agelu i le lagi po o le Atalii, ua na o le Tamā lava.” O le pogai lea na faalaeiau ai e Iesu i tatou ia ʻfaaauau ona mataala.’ (Mataio 24:36; 25:13) Mataala i le ā? Ua faamatala mai i le Tusi Paia tulaga e tutupu i le lalolagi a o leʻi aumaia e le Atua le iʻuga. E pei lava ona nofouta tagata Simeulue i suiga faafuaseʻi i le tai e iloa ai ua lata mai se galulolo, e faapena foʻi suiga faafuaseʻi i mea e tutupu i le  lalolagi, o le faailoga lenā e tatou te iloa ai ua lata mai le iʻuga. O loo faamatilatila mai i le pusa i le itulau e 12-13 nisi o suiga tetele o loo taʻua i le Tusi Paia.

E moni o nisi o tulaga loo taʻua i le pusa e eseese taimi na tutupu ai i taimi ua mavae. Peitaʻi na fetalai Iesu pe a vaaia “nei mea uma,” ona tatou iloa ai lea ua latalata mai le iʻuga. (Mataio 24:33) Ia fesili ifo iā te oe lava, ʻPe a fua i mea uma na faamatalaina, o anafea o le talafaasolopito na (1) tutupu ai i le lalolagi aoao, (2) tutupu faatasi ai i le taimi e tasi, ma (3) faateteleina ai le leaga?’ E manino mai ua tatou ola i na taimi.

Na faapea mai se tasi na avea ma peresitene o Amerika: “O faailoilo lapataʻi . . . e faasaoina ai ola.” Ina ua mavae le galulolo i le 2004, sa faia ni faailoilo lapataʻi i vaipanoa na aafia, o se taumafaiga ina ia ʻalofia ai le toe maliliu o tagata i se isi mala faapea i le lumanaʻi. I se tulaga talitutusa, ua faia e le Atua se sauniuniga e fai ma lapataʻiga a o leʻi oo mai le iʻuga. Na valoia i le Mataio 24:14: “O le a talaʻiina atu lenei tala lelei o le malo i le lalolagi atoa e fai ma molimau i atunuu uma; ona oo mai ai lea o le iʻuga.”

I le tausaga ua mavae, na faaalu ai e Molimau a Ieova le silia i le 1.9 piliona itula, i le talaʻia o le tala lelei i atunuu e 240 ma gagana e silia i le 700. O lenei faatelega i aso nei o le faamaoniga malosi lea o le latalata mai o le iʻuga. O le alolofa o Molimau a Ieova i o latou tuaoi, ua uunaʻia ai i latou e fai taumafaiga uma ina ia lapataʻia isi, e faatatau i le aso faamasino a le Atua lea ua lata tele mai. (Mataio 22:39) O le mea moni e mafai ona e maua aogā mai i lenei galuega, ma o le faamaoniga lenā o le alofa o Ieova iā te oe. Ia manatua, ʻe lē finagalo le Atua e faaumatia se tasi, ae e finagalo ia oo uma  lava i le salamō. (2 Peteru 3:9) Po o le a e tali atu i le alofa o le Atua ma utagia le lapataʻiga?

Ia manatua, o le taimi lava na vaaia ai e tagata Simeulue sa nonofo latalata i le sami ni suiga i le tai, sa latou sosola loa i nofoaga maualuluga ina ia faasaoina ai. E leʻi faatali seʻi toe foʻi mai le sami. Sa tāua lenā gaoioiga vave mo le faasaoina o o latou ola. Ina ia faasaoina i le puapuaga tele o loo faaloloʻi mai, i se uiga faafaatusa, e manaʻomia foʻi ona e sola i se mea maualuga a o leʻi tuai tele. E faapefea? Na faagaeeina le perofeta o Isaia e tusi e faatatau i se valaaulia faagaeeloto lea ua faia a o faagasolo “aso e gata ai,” po o taimi ia ua tatou ola ai. Ua taʻua i lea valaaulia: “Ō mai ia, tatou ō aʻe i le mauga o Ieova, . . . e na te aʻoaʻoina ai i tatou i ona ala, ma tatou savavali ai i ona ala.”—Isaia 2:2, 3.

O le alu i le tumutumu o se mauga, ua e iai i se nofoaga saogalemu ma manino mai ai lau vaai. I se tulaga talitutusa, o le iloaina o ala o le Atua e ala mai i le Tusi Paia, ua fesoasoani i le faitau miliona i le lalolagi aoao i aso nei, ina ia faia ni suiga tāua i o latou olaga. (2 Timoteo 3:16, 17) O le faia faapea, ua latou ʻsavavali ai i ala o le Atua,’ ma maua lona finagalo malie ma lana puipuiga.

Po o le a e tali atu i lenā valaaulia ma maua le puipuiga alofa a le Atua i nei aso faigatā? E matou te faalaeiau oe ia iloilo totoʻa faamaoniga mai i le Tusi Paia o “aso e gata ai,” ia o loo faamatalaina mai i le pusa. E fiafia Molimau a Ieova i lou vaipanoa e fesoasoani atu i so o se itu o loo e manaʻomia, ina ia maua le malamalamaga saʻo i mau o loo taʻua ma le auala e faatatauina ai. E mafai foʻi ona e maua tali o au fesili pe a tagaʻi i la matou upega tafaʻilagi, o le www.pr418.com. O loo maua i le faa-Peretania: Tagaʻi i le BIBLE TEACHINGS > BIBLE QUESTIONS ANSWERED.