DIDIMU dia nkɛtɛ diaki la wolo wa magnitude 9,1 diakasalema la Simeulue, disɛnga dia lo nɔrdɛ owɛstɛ ka Sumatra, lo wodja wa Indonésie lo Ngɔndɔ ka dikumi l’ahende 26, 2004. Anto tshɛ wakendaka otsha lo ndjale kakɔ. Asuku wa wolo wakatatɛ salema ko mbala kakɔ ɔtɔi anto tshɛ wakatatɛ ndawɔ otsha l’akona, watade ekoko wata ɔnɛ: “Smong! Smong!” tshɛkɛta yalembetshiya mpɛpɛ ya wolo. Lo minitɛ 30, asuku wa wolo efula wakalanya mvudu ndo tongelongelo efula.

Disɛnga dia Simeulue mbaki dihole dia ntondo diakalanyema la mpɛpɛ ya wolo. Koko l’atei w’anto 78 000 wakadjasɛka l’ɛtshi ka nkɛtɛ kɛsɔ, paka anto 7 ato mbakavu. Lande na kakavu anto yema tshitshɛ ngasɔ? * Anto amɔtshi wodjashi lo disɛnga sɔ mbutaka ɔnɛ: ‘Naka didimu dia wolo diambosalema ndo ndjale kambomɔ oma lo dihole diatɔ, kete lawɔ otsha l’akona nɛ dia hatonga edja ashi wayokoma l’okongo.’ Lo menda akambo wakaakomɛ, anto wa lo disɛnga dia Simeulue wakashihodiaka tolembetelo takɛnyaka dia mpɛpɛ ya wolo yaya suke la nsala etshikitanu lo ndjale. Diakɔ diele, woho wakawakitanyiyaka ɔhɛmwɛlɔ akashimbɛ nsɛnɔ yawɔ.

Bible tɛkɛtaka dia mpokoso kɛmɔtshi kaya kemembe, ɔnɛ: “Mfɔnu ka woke kayoyala woho wahatayalaka oma ko etatelo k’andja polo ndo kakianɛ ndo woho wahayalaki nto pondjo.” (Mateo 24:21) Ɔsɔ keema ekomelo k’okama wa nkɛtɛ oma le ana w’anto kana elanyelo k’oma lo diangɔ diakatongama nɛ dia sangwelo diaki Nzambi ele dia nkɛtɛ tshikalaka pondjo pondjo. (Undaki 1:4) Diakɔ diele, mfɔnu kayaye ekɔ djembetelo yɛnya dia Nzambi ‘ayanga ndanya wanɛ walanya nkɛtɛ.’ Ɔsɔ ayonga ekomelo k’awui tshɛ wa kɔlɔ ndo k’asui. (Ɛnyɛlɔ 11:18; Tukedi 2:22) Ande ɔlɔ wayonga lee!

Laadiko dia laasɔ, otshikitanyi la mpɛpɛ ya wolo, adidimu wa nkɛtɛ kana akona watondja dja, elanyelo kayaye kɛsɔ hatodiaka anto wele bu l’onongo. Bible mbutaka ɔnɛ: “Nzambi ekɔ ngandji.” Ndo lokombo la Nzambi kakɔ ele Jehowa, nde ndakaka ɔnɛ: ‘Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo.’ (1 Joani 4:8; Osambu 37:29) Ko, ngande wakokayɛ shimbamɛ lo mfɔnu ka woke kɛsɔ ndo ndjɔngɛnangɛna l’ɛtshɔkɔ wakalakema? Kɛnɛ kahombayɛ nsala ele: Nkitanyiya ɔhɛmwɛlɔ

Sho hatokoke nshikikɛ datɛ shikaa diayoyala ekomelo k’awui tshɛ wa kɔlɔ ndo k’asui, nɛ dia Yeso akate ɔnɛ: “Lo kɛnɛ kendana la lushi kana la wonya akɔ, ndooko onto leya, kaanga andjelo wa l’olongo, kaanga Ɔna, paka Papa ndamɛ.” Diakɔ diakatokeketsha Yeso dia sho ‘sungukalaka.’ (Mateo 24:36; 25:13) Lande na? Bible tolembetshiyaka woho wayonga akambo l’andja ɔnɛ la ntondo ka Nzambi mbela ekomelo. Oko wele elola kakaye la shashimoya kakewola anto wodjashi lo disɛnga dia Simeulue ɔnɛ lɔpɛpɛ la wolo laya suke, mbele  ndo akambo wasalema l’andja ɔnɛ mɛnyaka ɔnɛ ekomelo kaya k’emembe. Kiombo yele lo sawo nɛ mɛnyaka etshikitanu ɛmɔtshi wa diambo watɛkɛta Bible dikambo diawɔ.

Kɛnɛ kele mɛtɛ ele, akambo amɔtshi wa lo kiombo nyɛ wambosalemaka lo nshi yakete lo yɛdikɔ mɔtshi. Koko Yeso akate ate lam’ayonyɛna “akambo asɔ tshɛ” kanyeye nyate ekomelo kaya k’emembe. (Mateo 24:33) Yambola wate: ‘Etena kakɔna ka l’ɔkɔndɔ w’ana w’anto kakatatɛ akambo asɔ salema 1) l’andja w’otondo, 2) l’etena kakɔ kaamɛ ndo 3) katawatetemala ntshɔ otsha lo kɔlɔ kamboleka?’ Mbokɛmaka hwe dia tekɔ lo nsɛna l’etena kakɔ.

Prezida k’edjedja ka l’Amɛrikɛ akate ate: “Ɛhɛmwɛlɔ washama la ntondo . . . kokɛka nsɛnɔ.” L’ɔkɔngɔ wa lɔpɛpɛ la wolo lakasalema l’ɔnɔnyi wa 2004, wakakitsha diangɔ diada ombeka dia pɛmɔlaka anto wakadjasɛka l’ɛtshi ka nkɛtɛ di’aha anto nyomovɔ nto lo nshi yayaye ngasɔ. Woho akɔ waamɛ mbele, Nzambi akɔshi yɛdikɔ dia ɔhɛmwɛlɔ wa ngasɔ mbishama la ntondo k’ekomelo ndja. Bible akate ɔnɛ: ‘Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.’​—Mateo 24:14.

L’ɔnɔnyi w’etshi oto, Ɛmɛnyi wa Jehowa waketsha wenya ndekana 1,9 miliyara lo esambishelo ka lokumu l’ɔlɔlɔ lo wedja 240 ndo l’ɛtɛkɛta ndekana 700. Akambo wasalema lo nshi yaso nyɛ wamboleka mɛnya di’ekomelo kaya kemembe. Oma lo ngandji kokawɔ asekawɔ anto, Ɛmɛnyi wa Jehowa hawodje tsho welo dia mpɛmɔla anto akina dia lushi la kilombo laki Nzambi laya suke, koko vɔ mbatɛka nto ɔnɛ lɔ laya k’emembe. (Mateo 22:39) Wahɔ wakokayɛ nkondja oma lo losango lɔsɔ mɛnyaka ngandji kakoka Jehowa. Eya dia ‘Nzambi halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.’ (2 Petero 3:9) Onde wɛ nangaka  mɛnya lowando layɛ lo ngandji ka Nzambi ndo mbidja yimba l’ɛhɛmwɛlɔ washama?

Teye di’anto wadjasɛ lo disɛnga dia Simeulue kana lo tongelongelo tele suke la diɔ wakalawɔka l’akona w’etale efula dia ndjakokɛ etena kakawɛnyi asuku wa wolo wosalema lo ndjale, vɔ kokongɛka ɔnɛ asuku watokɔlala. Yɛdikɔ yawɔ yakakimanyiya dia vɔ nkokɛ nsɛnɔ yawɔ. Dia shimbamɛ lo mfɔnu kayaye, tekɔ l’ohomba wa sho ndawɔ otsha l’akona w’etale efula wa didjidji la ntondo ka ndjohɔ okanga a kɔngɔlɔ wanyu amboshila. Lo ngande? Omvutshi Isaya akafunde lo wolo wa nyuma k’ekila dikambo dia leeta l’ohomba efula lashama lo ‘etena k’ekomelo ka nshi,’ mbuta ate etena kasɛnaso kɛnɛ. Bible mbutaka ɔnɛ: ‘Nyoye tode otsha lo dikona dia Jehowa. Nde ayotetshaka mboka yande, ndo sho tayɔkɛndakɛndaka lo ɛsɛsɛ ande.’​—Isaya 2:2, 3.

Ndawɔ otsha lo shɔdi ya dikona kokimanyiyaka dia wɛ mɛna etale ndo dia kokamɛ. Woho akɔ wamɛ mbele, mbeya mboka yaki Nzambi l’ekimanyielo ka Bible, kimanyiyaka miliyɔ y’anto wa l’andja w’otondo ɛlɔ kɛnɛ dia vɔ nsala etshikitanu wahombama lo nsɛnɔ yawɔ. (2 Timɔte 3:16, 17) Lo nsala ngasɔ, vɔ tatɛka ‘nkɛndakɛnda lo mboka yaki Nzambi’ ndo ngɛnangɛnaka lo ngandji ndo lo ekokelo kande.

Onde wɛ ayetawɔ leeta lɔsɔ ndo ayokondja wahɔ oma lo yɛdikɔ yoludi la ngandji yambɔsa Nzambi dia nkokɛ anto lo tena dia wolo nɛ? Sho kokeketshaka dia wɛ nsɛdingola la yambalo tshɛ tolembetelo t’oma l’Afundelo tɛnya dia tekɔ lo nsɛna lo “nshi y’ekomelo,” tolembetelo tele lo kiombo ya sawo nɛ. Ɛmɛnyi wa Jehowa wa l’ɛtshi kanyu ka nkɛtɛ wayɔngɛnangɛna efula dia nkosha ekimanyielo tshɛ keyɛ l’ohomba dia nshihodia dimɛna avɛsa woshami ndo woho wakokayɛ nkamba la wɔ. Wɛ koka ntana ekadimwelo lo ambola ayɛ lo mbɔtɔ lo sitɛ kaso k’Ɛtɛrnɛtɛ ka www.pr418.com. Ɔtɔ lam’ofundjiwɔ WETSHELO WA LO BIBLE > EKADIMWELO LO AMBOLA W’OMA LO BIBLE.